Mateus 28 - Biblia Tetun Dili

Nai Jesus moris fila fali

¹ Iha aban fali, loron primeiru iha loron Domingu, dadeer-saan nakukun, Maria Madalena ho Maria ida seluk baa vizita rate.

² Derepenti rai nakdoko makaas tanba Nai Maromak nia anju ida tuun mai hosi lalehan hodi duir tiha fatuk nebee taka rate nee. I nia tuur iha fatuk nee nia leten.

³ Anju nee nia oin nabilan hanesan rai lakan, i nia hena mutin loos.

⁴ Haree nunee, soldadu sira nebee hein rate nee tauk teb-tebes too sira nakdedar i monu ba rai hanesan ema mate.

⁵ Depois anju hatete ba senhora nain rua nee dehan, “La bele tauk. Hau hatene imi buka hela Jesus, Ida nebee ema prega tiha ona ba krus nee.

⁶ Nia la iha nee ona, tanba Nia moris fali ona, tuir buat nebee uluk Nia hatete tiha ona. Mai haree fatin nebee ema tau Nia mate isin nee.

⁷ Haree tiha, imi baa lalais foo hatene ba Nia eskolanti sira katak, Nia moris fali ona hosi mate. Nia sei baa uluk imi iha Galileia hodi hein imi, i imi sei haree Nia iha nebaa. Ida nee mak hau nia lia menon ba imi.”

⁸ Nunee senhora nain rua husik kedas rate nee. Sira tauk maibee sira mos haksolok teb-tebes. Sira halai lalais baa foo hatene ba Jesus nia eskolanti sira.

⁹ Iha dalan klaran, derepenti Jesus hasoru sira i kumprimenta sira dehan, "Shalom." Entaun sira baa besik Nia i hakruuk hakuak Nia ain hodi adora Nia.

¹⁰ I Jesus hatete ba sira, “La bele tauk. Baa foo hatene Hau nia maun-alin sira para sira baa iha Galileia. I iha nebaa sira sei haree Hau.”

Soldadu sira nebee hein iha rate hatoo lia falsu

¹¹ Bainhira senhora sira nee lao dadauk, soldadu balu baa iha sidade Jerusalém. Too iha nebaa, sira konta ba nai lulik nia xefi sira kona ba buat hotu-hotu nebee akontese iha rate.

¹² Entaun nai lulik nia xefi sira hasoru malu ho katuas lia nain sira hodi halo planu. Sira foti desizaun hodi foo osan barak ba soldadu sira nebee hein rate nee.

¹³ I sira hameno dehan, “Imi tenki foo sai dehan, ‘Iha kalan boot bainhira ami toba dukur tiha, Nia eskolanti sira mai naok tiha Nia mate isin.’

¹⁴ Se governador rona karik, ami mak baa koalia ho nia atu nunee imi la bele hetan kastigu.”

¹⁵ Entaun soldadu sira simu tiha osan nee i hatoo lia falsu nebee hameno tiha ona ba sira. I istoria bosok nee namkari iha ema Judeu sira too agora nee.

Nai Jesus foo orden para foo sai Novidade Diak

¹⁶ Depois Jesus nia eskolanti nain sanulu resin ida baa sae foho ida iha provinsia Galileia, tuir buat nebee Jesus hameno tiha ona ba sira.

¹⁷ Bainhira sira haree Jesus, sira adora Nia. Maibee sira balu sei duvida hela.

¹⁸ Entaun Jesus baa besik sira hodi dehan, “Maromak foo tiha ona kbiit tomak mai Hau hodi ukun buat hotu-hotu iha lalehan ho rai.

¹⁹ Tanba nee, baa hanorin ema iha nasaun hotu-hotu atu sira sai Hau nia eskolanti. Foo sarani sira hodi Aman, Oan no Espiritu Santu sira nia naran.

²⁰ I hanorin sira atu halo tuir buat hotu-hotu nebee mak Hau hatete ona ba imi. Keta haluha, Hau sempre hamutuk ho imi too mundu nee remata.”