Mateus 27 - Biblia Tetun Dili

Ema lori Nai Jesus ba iha governador Pilatus

¹ Iha dadeer-saan, xefi relijiaun Judeu sira ho katuas lia nain sira halibur hodi foti desizaun para kastigu mate Jesus.

² Depois sira futu Nia, i lori Nia ba entrega iha governador Pilatus.

Judas tara aan

³ Bainhira Judas, eskolanti nebee faan Jesus nee, hatene katak sira atu kastigu mate Jesus, nia mos arepende. Depois nia lori fali osan mutin tolu-nulu nee hodi baa entrega iha nai lulik Judeu nia xefi sira ho katuas lia nain sira.

⁴ Nia hatete, “Hau halo sala ona! Hau faan Ema ida nebee la iha sala ba ema oho.” Maibee sira hataan, “Ami la interese. Nee o nia problema.”

⁵ Entaun Judas soe osan mutin sira nee ba iha uma kreda laran. Depois nia sai baa tara aan mate tiha.

⁶ Xefi relijiaun Judeu sira hili tiha osan sira nebee Judas soe nee hodi dehan, “Osan nee la bele hatama fali ba hamutuk ho osan oferta Uma Kreda nian. Tanba Osan nee folin hosi ema nia raan.”

⁷ Nunee sira desidi uza osan nee hodi sosa rai pedasuk nebee ema temi "Rai badaen sanan rai". I sira foo rai nee para sai fatin hodi hakoi ema estranjeiru.

⁸ Tanba nee, rai nee too agora ema bolu ‘Rai Raan nian’.

⁹ Nunee sira halo tuir liafuan nebee profeta Jeremias hakerek hori uluk dehan, “Sira uza osan mutin tolu nulu nee hodi sosa rai. Tanba osan nee folin hodi sosa ema, tuir saida mak ema Israel sira desidi ona.

¹⁰ Rai nee sosa hosi badaen halo sanan rai, tuir Nai Maromak nia orden nebee foo mai hau.”

Nai Jesus iha governador Pilatus nia oin

¹¹ Bainhira Jesus hamriik iha governador Pilatus nia oin, governador husu ba Nia, “O mak ema Judeu sira nia Liurai ka?” Jesus hataan, “Ita rasik mak dehan nunee.”

¹² Maibee bainhira nai-lulik nia xefi sira ho katuas lia nain sira duun Jesus iha Pilatus nia oin, Jesus la hataan buat ida.

¹³ Entaun Pilatus hatete ba Jesus dehan, “O la rona ka? Ema sira nee foo sasin oi-oin kontra O!”

¹⁴ Maibee Nia la hataan liafuan ida. Nunee halo governador Pilatus admira loos.

Governador Pilatus hamonu kastigu mate ba Nai Jesus

¹⁵ Tin-tinan, bainhira ema Judeu halo festa Paskua, governador sempre hasai ema dadur ida tuir povu nia hakarak.

¹⁶ Iha tempu nebaa, iha ema dadur ida naran Barabás, ema hotu konhese nia nudar kriminozu boot ida.

¹⁷ Bainhira ema barak halibur hamutuk ona, Pilatus husu ba sira dehan, “See mak imi hakarak hau husik? Barabás ka Jesus nebee ema bolu Kristu?”

¹⁸ Pilatus koalia nunee tanba nia hatene katak sira entrega Jesus ba nia tanba sira laran moras.

¹⁹ Bainhira Pilatus tuur iha kadeira juiz nian atu tesi Jesus nia lia, nia feen haruka lia menon dehan, “La bele envolve iha Ema nee nia problema, tanba Ema nee la sala ida. Horikalan hau mehi kona ba Nia nebee halo hau terus loos.”

²⁰ Maibee nai-lulik nia xefi sira ho katuas lia nain sira obriga ema barak nee husu ba Pilatus atu husik Barabás, i oho Jesus.

²¹ Depois governador Pilatus husu fali dehan, “Hosi ema nain rua nee, imi hakarak hau husik ida nebee?” Sira hataan, “Barabás!”

²² Rona nunee Pilatus husu ba sira, “Se nunee, imi hakarak halo saida ba Jesus nebee ema bolu Kristu nee?” Sira hotu hataan hakilar, “Prega tiha Nia ba krus!”

²³ Depois Pilatus husu, “Nia halo krimi saida?” Maibee sira hakilar makaas liu tan, “Prega tiha Nia ba krus!”

²⁴ Pilatus haree katak ema barak nee atu halo rungu-ranga, i nia la bele halo buat ida. Entaun nia foti bee hodi fasi nia liman iha ema barak nee nia oin dehan, “Hau la sala kontra Ema nee. Ida nee imi mak lori todan rasik.”

²⁵ Sira hotu hataan, “Husik Ema nee nia raan, ami ho ami nia oan no beoan sira mak lori.”

²⁶ Nunee Pilatus hasai Barabás hosi kadeia. I nia haruka ema baku Jesus ho sikoti, depois entrega Nia ba soldadu sira hodi prega iha krus.

Soldadu sira hamoe Nai Jesus

²⁷ Hotu tiha governador nia soldadu sira lori Jesus ba iha forsa sira nia kuartel. Iha nebaa, sira bolu sira nia kolega soldadu sira hotu mai haleu Nia.

²⁸ Sira kolu tiha Jesus nia hena i foo hatais fali batina kor mean ida.

²⁹ Sira mos dulas ai tarak halo kabuar hanesan koroa nebee tau iha liurai sira nia ulun, hodi tau iha Nia ulun. Sira tau ai sanak lotuk ida iha Nia liman loos hanesan ai tonka. Sira hakneak iha Nia oin hodi hamoe Nia dehan, “Viva, ema Judeu sira nia Liurai!”

³⁰ Sira mos tafui kabeen ba Nia i foti fali ai sanak nee hodi baku Nia ulun fila-fila.

³¹ Sira hamoe Nia nunee, depois kolu tiha batina mean hodi foo hatais fali Nia hena rasik. Hotu tiha sira lori Nia sai hodi baa prega iha krus.

Ema prega Nai Jesus iha krus

³² Bainhira sira lori Jesus sai, iha dalan klaran, soldadu sira nebee lori Jesus nee hetan ema ida hosi Sirene, naran Simão. Sira obriga nia lori Jesus nia krus.

³³ Sira too iha fatin ida naran Golgota, nee dehan katak “Fatin Ulun Ruin”.

³⁴ Iha nebaa sira kahur tua ho buat moruk ida hodi foo ba Jesus hemu. Nia koko tiha maibee lakohi hemu.

³⁵ Tuir mai sira prega Jesus iha krus. I soldadu sira dada rifa atu hatene see mak bele hetan Jesus nia hena.

³⁶ Hotu tiha sira tuur hodi hein Nia.

³⁷ Sira mos iha ai kabelak ida nebee hakerek nunee: “Ema nee Jesus, ema Judeu sira nia Liurai.” Nee hodi foo razaun tanba saa mak Jesus simu kastigu mate. I sira prega ai kabelak nee iha Nia ulun leten.

³⁸ Sira prega tan ema naok-teen boot nain rua iha krus, ida iha Jesus nia sorin kuana, ida iha sorin karuk.

³⁹ Ema sira nebee liu hosi fatin nee, sira doko ulun hodi hatete aat Jesus.

⁴⁰ Sira hatete, “Uluk O dehan atu halo rahun uma kreda boot, depois harii fali iha loron tolu nia laran. Se O Maromak nia Oan duni, entaun salva took O nia Aan hodi tuun hosi krus nee.”

⁴¹ Nai lulik nia xefi sira, mestri relijiaun sira ho katuas lia nain sira mos hatete aat Jesus dehan,

⁴² “Ema seluk Nia bele salva, maibee Nia rasik Nia la bele salva. Nia dehan, Nia mak ema Israel nia Liurai, entaun diak liu agora Nia tuun hosi krus atu ita fiar.

⁴³ Nia laran metin ba Maromak. Se Maromak gosta Nia, entaun ita haree took Maromak mai salva Nia ka lae. Tanba Nia rasik hatete katak Nia Maromak nia Oan.”

⁴⁴ Naok-teen nain rua nebee iha Jesus nia sor-sorin mos tarata aat Jesus nunee.

Nai Jesus mate

⁴⁵ Komesa tuku sanulu resin rua, nakukun taka metin rejiaun nee tomak too tuku tolu lokraik.

⁴⁶ Iha tuku tolu lokraik, Jesus hakilar ho lian makaas dehan, “Eli, Eli, lama sabaktani?” Nee dehan katak, “Hau nia Maromak! Hau nia Maromak! Tansaa mak Ita Boot husik Hau mesak?”

⁴⁷ Rona nunee, ema balu nebee hamriik besik nebaa dehan, “Nia bolu profeta Elias.”

⁴⁸ Sira ida halai kedas baa foti esponza rohan ida habokon ho tua siin, tau ba ai naruk ida hodi lolo ba iha Jesus nia ibun para hemu.

⁴⁹ Maibee sira seluk dehan, “Keta foo lai! Ita haree took, Elias mai salva duni Nia ka lae.”

⁵⁰ Depois Jesus hakilar dala ida tan ho lian makaas, i Nia iis kotu.

⁵¹ Iha Uma Kreda Boot iha kortina boot ida hodi taka fatin santu. Kortina nee naklees hosi leten too kraik fahe tiha ba rua. Rai nakdoko makaas i fatuk boboot sira nakfera.

⁵² Rate sira mos nakloke. I Maromak nia ema balu nebee mate tiha ona, Nia halo moris fali.

⁵³ Bainhira Jesus moris fila fali, sira ida-idak sai hosi sira nia rate i ba tama iha sidade santu Jerusalém, i ema barak haree.

⁵⁴ Bainhira komandante Roma ho soldadu sira nebee hein Jesus nee haree rai nakdoko ho buat seluk nebee akontese, sira tauk teb-tebes hodi dehan, “Loos duni! Ema nee Maromak nia Oan.”

⁵⁵ Iha nebaa iha senhora barak haree hosi dook deit. Sira nee tuir Jesus hosi Galileia too iha Jerusalém hodi serbii Nia.

⁵⁶ Hosi sira nee mak Maria Madalena, Maria nebee Tiago ho José nia inan, i Zebedeu nia feen.

Ema hakoi Nai Jesus nia mate isin

⁵⁷ Loromatan atu monu ona, ema riku ida mai hosi sidade Arimateia, naran José. Nia mos tuir Jesus.

⁵⁸ Nia baa hasoru Pilatus hodi husu Jesus nia mate isin para hakoi. Entaun Pilatus haruka soldadu sira entrega Jesus nia mate isin ba José.

⁵⁹ Depois José simu Jesus nia mate isin, i falun ho hena mutin foun diak nian.

⁶⁰ Nia lori Jesus nia mate isin baa haloot iha rate nebee nia prepara tiha ona ba nia aan rasik. Fatin nee fatuk lolon nebee ema bahat tiha ona para sai rate. Depois nia duir fatuk boot ida hodi taka rate ibun nee. Hotu tiha nia fila.

⁶¹ Maibee Maria Madalena ho Maria ida seluk tuur hela iha rate nia oin hodi hateke ba rate nee.

Soldadu sira hein metin iha Nai Jesus nia rate

⁶² Iha aban fali, loron Sabadu, nai lulik nia xefi sira ho ema Farizeu sira baa hasoru Pilatus.

⁶³ Sira dehan, “Senhor, ami hanoin hela Ema bosok-teen nee nia liafuan. Uluk Nia sei moris, Nia dehan katak liu tiha loron tolu Nia sei moris fali.

⁶⁴ Tanba nee haruka ita boot nia soldadu sira baa hein iha rate too loron tolu. Keta halo be Nia eskolanti sira mai naok tiha Nia mate isin, depois sira dehan ba povu, 'Nia moris fali ona hosi mate'. Se ida nee mak akontese, entaun bosok-teen sira ikus nee aat liu fali sira nia Mestri.”

⁶⁵ Pilatus hataan ba sira, “Entaun lori soldadu balu ba iha rate hodi hein metin iha nebaa.”

⁶⁶ Nunee nai ulun Judeu sira hamutuk ho soldadu sira baa iha rate. Sira tau sinal ba rate nee nia odamatan atu ema keta tama. Depois soldadu sira hein metin nafatin iha nebaa para ema la bele mai foti mate isin.