Mateus 26 - Biblia Tetun Dili

Ema Judeu nia lider sira buka dalan atu oho Nai Jesus

¹ Bainhira Jesus hanorin tiha hotu buat sira nee, Nia hatete ba Nia eskolanti sira dehan,

² “Imi hatene katak, hela tan loron rua atu festa Paskua. Iha loron nee, ema sei entrega Hau, Ema Oan atu prega mate iha krus.”

³ Iha tempu nebaa nai lulik nia xefi sira ho katuas lia nain Judeu nian halibur hamutuk iha nai lulik boot Kaifás nia uma.

⁴ Sira kombina malu atu kaer Jesus nonook deit hodi oho nia.

⁵ Maibee sira hatete, “La bele kaer Nia iha loron festa nee, se lae povu bele protesta no hirus.”

Feto ida fui mina morin ba Nai Jesus nia ulun

⁶ Bainhira Jesus iha aldeia Betánia iha Simão nia uma, ida nebee uluk moras lepra.

⁷ Bainhira Jesus haan hela, feto ida mai lori botir ida nebee halo hosi fatuk murak. Iha botir nee nia laran iha mina morin karun teb-tebes. Nia baa besik Jesus hodi fui mina morin nee ba iha Jesus nia ulun.

⁸ Bainhira Jesus nia eskolanti sira haree, sira hirus hodi dehan ba malu, “Nusaa mak nia fakar estraga deit mina morin nebee folin karun nee?

⁹ Se karik mina morin nee faan, bele hetan osan barak hodi ajuda ema kiak sira.”

¹⁰ Maibee Jesus hatene hela sira nia hanoin, i Nia dehan, “Imi keta hirus feto nee, tanba nia halo ona buat diak mai Hau.

¹¹ Tanba ema kiak sira sempre iha imi nia leet, maibee Hau sei la hela nafatin ho imi.

¹² Nia fui mina morin nee mai Hau hodi prepara hakoi Hau nia mate isin.

¹³ Hau hatete loloos ba imi, iha fatin nebee deit ema foo sai Novidade Diak iha mundu tomak, sira mos sei konta kona ba buat nebee feto nee halo mai Hau, para ema hanoin nafatin nia.”

Judas kombina ho Ulun relijiaun Judeu nian hodi entrega Jesus ba sira

¹⁴ Depois Judas Iscariotes, eskolanti ida hosi sanulu resin rua nee, baa hasoru nai lulik nia xefi sira.

¹⁵ Too iha nebaa nia husu, “Se hau entrega Nia ba imi nia liman, imi sei foo saida mai hau?” Entaun sira selu osan mutin tolu-nulu ba nia.

¹⁶ I Judas sai kedas hodi buka dalan atu entrega Jesus ba sira.

Nai Jesus haan hamutuk ho Nia eskolanti sira iha loron Paskua

¹⁷ Tempu too ona atu ema Judeu selebra Festa Paun la Tau Fermentu. Iha loron primeiru Jesus nia eskolanti sira baa husu Nia dehan, “Ita Boot hakarak ami baa prepara hahaan festa Paskua nian iha nebee?”

¹⁸ Jesus hataan, “Baa iha sidade laran, imi sei hasoru ema ida iha nebaa. Hatete ba nia nunee: ‘Mestri hameno katak, Nia loron nebee Maromak desidi nee besik ona, i Nia hakarak selebra festa Paskua hamutuk ho Nia eskolanti sira iha ita nia uma.’ ”

¹⁹ Depois Nia eskolanti sira halo tuir buat nebee mak Jesus haruka. Sira halo preparasaun ba festa Paskua iha nebaa.

²⁰ Bainhira kalan ona Jesus tuur hamutuk ho Nia eskolanti nain sanulu resin rua iha meza hodi haan.

²¹ Sira haan dadaun, Nia dehan, “Hau hatete loloos ba imi, hosi imi sira nee, ida sei entrega Hau ba Hau nia inimigu sira.”

²² Rona nunee, Nia eskolanti sira tristi teb-tebes. I sira ida-idak komesa husu ba Nia dehan, “Nai, laos hau too?”

²³ Jesus hataan, “Ida nebee agora hatama nia liman iha manko hamutuk ho Hau, nia mak sei faan Hau.

²⁴ Hau, Ema Oan tenki mate duni tuir buat nebee hakerek tiha ona iha Livru Sagradu. Maibee ema nebee faan Hau nee, sei terus teb-tebes. Diak liu ema ida nee lalika moris.”

²⁵ Depois Judas, ida nebee atu faan Jesus nee husu, “Mestri, laos hau too?” Jesus hataan, “O duni.”

Santa Seia

²⁶ Bainhira sira haan hela, Jesus foti paun hodi foo agradese ba Maromak. Nia silu paun nee hodi fahe ba Nia eskolanti sira dehan, “Simu hodi haan baa. Nee Hau nia isin.”

²⁷ Depois Nia foti tua kalis ida. Nia foo agradese ba Maromak, i foo ba Nia eskolanti sira dehan, “Simu hodi hemu baa.

²⁸ Tua nee Hau nia raan. Raan aliansa nebee fakar hodi hamoos ema barak nia sala. Liu hosi Hau nia raan nee mak Maromak kumpri Nia promesa.

²⁹ Hau hatete ba imi, Hau sei la hemu tan tua nee. Bainhira Hau nia Aman iha lalehan ukun Nia povu hotu mak foin Hau hemu fali tua foun hamutuk ho imi.”

³⁰ Hotu tiha Jesus ho Nia eskolanti sira kanta hamutuk hodi hahii Maromak. Depois sira sai hodi baa iha foho Oliveira.

Nai Jesus hatete Pedro sei nega Nia

³¹ Bainhira sira lao dadaun Jesus hatete ba Nia eskolanti sira dehan, “Iha kalan nee kedas, imi hotu nia fiar sei nakdoko i sei halai husik hela Hau. Tanba iha Livru Sagradu hakerek tiha ona dehan, ‘Hau sei oho tiha bibi atan, i bibi sira sei halai namkari hotu.’

³² Hau sei mate duni. Maibee bainhira Hau moris fila fali, Hau sei baa uluk imi iha provinsia Galileia.”

³³ Pedro hataan, “Maski sira hotu fiar nakdoko i halai namkari tanba sira haree saida mak akontese ba Ita Boot, hau sei la halai duni.”

³⁴ Jesus dehan ba nia, “Hau hatete loloos ba o, iha kalan nee duni, molok manu kokoreek, o sei nega Hau dala tolu.”

³⁵ Pedro hataan fali, “Maski hau tenki mate hamutuk ho Ita Boot, hau sei la nega Ita Boot.” Eskolante sira seluk mos hatete nunee.

Nai Jesus harohan iha toos Getsemani

³⁶ Depois Jesus lao hamutuk ho Nia eskolanti sira baa iha fatin ida naran Getsemani. Too iha nebaa, Nia hatete ba sira, “Imi tuur iha nee, Hau sei baa halo orasaun iha nebaa.”

³⁷ Nia lao tan ituan, i Nia lori Pedro ho Zebedeu nia oan nain rua, Tiago ho João. Iha tempu nee Jesus nia laran tristi teb-tebes i la hakmatek.

³⁸ Jesus hatete ba sira, “Hau nia laran tristi teb-tebes, senti hanesan atu mate deit ona. Imi hein Hau iha nee i matan moris neon nain nafatin.”

³⁹ Jesus lao tan ba oin ituan, depois Nia hakneak i taka oin ba rai hodi halo orasaun dehan, “Hau nia Aman, se bele karik hasai tiha terus ida nee hosi Hau. Maibee la bele tuir Hau nia hakarak, tuir deit Ita Boot nia hakarak.”

⁴⁰ Depois Nia fila fali ba nia eskolanti nain tolu nee, Nia haree sira hotu toba dukur hela. Nia hatete ba Pedro, “Imi la bele hadeer oras ida deit hamutuk ho Hau ka?

⁴¹ Hakaas aan i halo orasaun para imi la bele monu ba tentasaun. Imi nia laran prontu atu halo buat diak, maibee imi nia aan fraku.”

⁴² Depois Jesus baa halo orasaun ba dala rua dehan, “Hau nia Aman! Se Hau tenki simu terus nee, entaun halo tuir Ita Boot nia hakarak baa.”

⁴³ Bainhira Nia fila fali ba sira nain tolu, Nia haree sira toba hela, tanba sira nia matan dukur teb-tebes.

⁴⁴ Entaun Nia husik hela sira i Nia fila fali hodi halo orasaun ba dala tolu. Nia halo orasaun hanesan ohin nee.

⁴⁵ Hotu tiha Nia fila fali ba Nia eskolanti sira hodi dehan, “Imi sei toba ka? Hadeer ona! Agora tempu too ona para ema entrega Hau, Ema Oan ba ema sala nain sira.

⁴⁶ Hadeer! Mai ita baa ona. Ema nebee entrega Hau nee besik mai ona.”

Ema kaer Nai Jesus

⁴⁷ Jesus sei koalia hela, Judas, eskolanti ida hosi sira nain sanulu resin rua nee, too mai. Ema barak teb-tebes mai hamutuk ho nia, lori surik ho ai dona. Ema sira nee, nai lulik nia xefi sira ho katuas lia nain sira mak haruka.

⁴⁸ Molok too iha nebaa, Judas foo tiha ona sinal ba sira dehan, “Ema nebee hau rei, Nia mak nee, imi kaer Nia.”

⁴⁹ Entaun Judas baa kedas Jesus dehan, “Shalom, Mestri.” I nia rei Jesus.

⁵⁰ Jesus hatete ba nia, “Kolega, ita mai ho objetivu ida nee ka?” I ema sira nee mai kaer Jesus.

⁵¹ Molok hakfodak Jesus nia eskolanti ida losu nia surik hodi tesi kotu tiha ema ida nia tilun. Ema nee nai lulik boot nia atan.

⁵² Haree nunee, Jesus hatete, “Hatama tiha o nia surik nee ba iha nia knuuk. Tanba see mak hodi surik hasoru ema, nia sei mate mos ho surik.

⁵³ O la hatene ka? Se karik Hau husu tulun ba Hau nia Aman iha lalehan maka Nia sei haruka kedas anju barak liu batalhaun sanulu resin rua para mai ajuda Hau.

⁵⁴ Se Hau husu nunee, saida mak hakerek iha Livru Sagradu kona ba Hau nee la kumpri ona.”

⁵⁵ Depois Jesus hatete ba ema barak nee dehan, “Nusaa mak imi mai lori surik ho ai dona atu kaer Hau? Imi hanoin Hau ema aat ka? Afinal loro-loron Hau hanorin hela iha uma kreda laran, i imi la kaer Hau.

⁵⁶ Maibee buat sira nee hotu akontese hodi kumpri saida mak profeta sira hakerek tiha ona iha Livru Sagradu.” Depois Jesus nia eskolanti sira husik tiha Nia i sira halai namkari hotu.

Nai Jesus iha tribunal relijiaun Judeu nian

⁵⁷ Sira kaer tiha Jesus hotu, sira lori Nia ba iha nai lulik boot Kaifás nia uma. Iha nebaa mestri relijiaun sira ho katuas lia nain sira halibur hamutuk tiha ona.

⁵⁸ Pedro lao tutuir Jesus hosi dook deit, too tama ba iha nai lulik boot nia kintal laran. Nia tuur hamutuk ho nai lulik boot nia soldadu sira, atu hatene tuir saida mak sei akontese ba Jesus.

⁵⁹ Nai lulik nia xefi sira ho tesi lian nain relijiaun Judeu sira seluk buka hela ema atu foo sasin falsu para bele kastigu mate Jesus.

⁶⁰ Maski ema barak mai hodi duun Nia, maibee tesi lian nain sira la hetan sala ida hodi bele kastigu Nia. Too ikus ema nain rua tan baa

⁶¹ hodi foo sasin dehan, “Ema nee hatete hanesan nee: ‘Hau bele harahun Maromak nia Uma Kreda Boot nee, i iha loron tolu nia laran Hau sei harii fila fali.’ ”

⁶² Depois nai lulik boot hamriik hodi dehan ba Jesus, “O rona ona ema sira nee duun ona O. Nusaa mak O la hataan ba sira?”

⁶³ Maibee Jesus nonook deit. I nai lulik boot dehan, “Hodi Maromak nebee Moris nia naran, hau husu para O hataan ho loloos. O mak Kristu, Nai Maromak nia Oan nebee Nia promete ona hori uluk atu haruka mai nee ka?”

⁶⁴ Jesus hataan, “Loos duni, hanesan ita dehan nee. Maibee Hau hatete ba imi, aban-bainrua imi sei haree Hau, Ema Oan tuur iha Maromak Forsa Teb-tebes nia sorin loos. I imi sei haree Hau tuun mai hosi lalehan iha kalohan laran.”

⁶⁵ Rona nunee, nai lulik boot nee hirus teb-tebes too lees tiha nia ropa hodi dehan ba ema barak nee, “Imi rona deit baa. Nia hatete aat Nai Maromak! Ita hein tan sasin seluk hodi halo saida?

⁶⁶ Agora imi hanoin oinsaa?” Sira hataan, “Nia merese simu kastigu mate.”

⁶⁷ Depois sira tafui kabeen ba Jesus nia oin i baku Nia. I ema balu tan basa Nia

⁶⁸ hodi husu, “He, Kristu, hatete took mai, see mak baku O nee?”

Pedro nega Nai Jesus

⁶⁹ Pedro sei tuur hela iha kintal laran, iha atan ida mai besik nia dehan, “O mos sempre hamutuk ho Jesus, Ema Galileia nee.”

⁷⁰ Maibee Pedro nega iha ema hotu nia oin dehan, “Hau la hatene saida mak o koalia nee.”

⁷¹ Depois Pedro sai ba iha portaun, atan ida tan haree nia i hatete ba ema sira iha nebaa, “Ema ida nee ohin hamutuk ho Jesus, Ema Nazaré nee.”

⁷² I Pedro nega dala ida tan hodi dehan, “Hau jura, hau la konhese Ema nee.”

⁷³ La kleur, ema sira iha nebaa mai besik Pedro hodi dehan, “O nee Nia ema duni. Tanba o koalia hanesan ema Galileia.”

⁷⁴ Maibee Pedro jura no foo malisan ba nia aan dehan, “Hau la konhese Ema nee.” Iha momentu nee kedas, manu kokoreek.

⁷⁵ Rona nunee, Pedro hanoin fila fali liafuan nebee uluk Jesus dehan ba nia, “Molok manu kokoreek, o sei nega Hau dala tolu.” Tuir mai, Pedro sai hosi nebaa i tanis ho laran tristi.