Mateus 25 - Biblia Tetun Dili

Komparasaun kona ba feto raan matenek ho feto raan beik

¹ Jesus koalia tan kona ba Maromak nia Ukun nudar Liurai, dehan, “Imi tenki prepara aan hodi simu Hau bainhira Hau fila fali mai. Nee hanesan komparasaun ida nee: Iha kalan ida, iha feto raan nain sanulu atu baa simu noivu, ida-idak lori nia ahi-oan.

² Feto raan nain lima matenek i nain lima seluk beik.

³ Nain lima beik nee lori deit ahi-oan, la lori mina rezerva.

⁴ Maibee nain lima matenek nee lori mina rezerva iha botir.

⁵ Tanba noivu nee kleur too mai, nunee sira matan dukur toba tiha.

⁶ Iha kalan boot ema ida hakilar dehan, ‘Noivu mai ona! Mai hasoru ona nia!’

⁷ Rona nunee, feto raan nain sanulu nee hadeer hodi prepara sira nia ahi-oan.

⁸ Nain lima beik nee hatete ba nain lima matenek dehan, ‘Foo imi nia mina ituan mai, tanba ami nia ahi besik atu mate.’

⁹ Maibee feto raan nain lima matenek nee hataan, ‘Ami la foo. Se ami foo, ami nia ahi mos bele mate. Diak liu imi baa sosa iha ema sira nebee faan mina.’

¹⁰ Bainhira sira baa sosa mina, noivu mos too mai. I feto raan nain lima nebee prontu hela atu simu noivu nee, tama hamutuk ho noivu ba iha festa kazamentu laran. Depois ema taka tiha odamatan.

¹¹ Iha ikus feto raan nain lima beik nee mos too mai iha odamatan oin hodi bolu, ‘Senhor! Senhor! Favor loke odamatan mai ami.’

¹² Maibee noivu hataan, ‘Hau dehan loloos ba imi, hau la konhese imi.’ ”

¹³ Konta hotu tiha, Jesus hatete, “Tanba nee, matan moris neon nain nafatin baa. Tanba imi la hatene loron ho oras nebee mak Hau atu fila fali mai.”

Komparasaun kona ba atan nebee kaer patraun nia osan

¹⁴ Jesus foo tan komparasaun ida dehan, “Iha Reinu lalehan hanesan ema ida atu baa iha rai liur. Molok atu baa, nia bolu nia atan sira hodi foo fiar ba sira kaer nia rikusoin too nia fila.

¹⁵ Nia foo ba atan sira nee tuir ida-idak nia kapasidadi. Atan ida, nia entrega osan mean atus lima. Ida seluk nia entrega osan mean atus rua. Ida seluk tan nia entrega osan mean atus ida. Depois nia sai tiha ba rai liur.

¹⁶ Atan ida nebee simu osan mean atus lima nee, sai baa fila liman kedas, i nia manaan tan osan mean atus lima.

¹⁷ Nunee mos atan ida nebee simu osan mean atus rua. Nia mos sai kedas baa fila liman i manaan tan osan mean atus rua.

¹⁸ Maibee atan ida nebee simu osan mean atus ida, nia baa kee rai hodi hakoi subar tiha nia patraun nia osan.

¹⁹ Liu tiha tempu kleur mak sira nia patraun fila. Too iha uma, patraun bolu sira hodi husu tuir, sira ida-idak manaan fali osan hira.

²⁰ Atan ida nebee simu osan mean atus lima nee mai uluk. Nia lori osan funan atus lima tan hodi dehan, ‘Patraun, uluk patraun entrega osan mean atus lima mai hau. Agora haree ba, hau manaan tan osan mean atus lima.’

²¹ Nia patraun hatete ba nia, ‘Diak teb-tebes! O nee atan diak, no foo laran duni. O halo buat kiik-oan nee ho loloos, nunee hau sei foo tan buat boot atu o tau matan. Mai haksolok hamutuk ho hau.’

²² Nunee mos atan nebee simu osan mean atus rua. Nia mai dehan, ‘Patraun, uluk patraun entrega osan mean atus rua mai hau. Haree ba, hau manaan tan osan mean atus rua.’

²³ Nia patraun hataan, ‘Diak loos! O nee atan diak, no foo laran duni. O halo buat kiik-oan nee ho loloos, nunee hau sei foo tan buat boot atu o tau matan. Mai haksolok hamutuk ho hau.’

²⁴ Depois atan nebee simu osan mean atus ida nee mai dehan, ‘Patraun, hau hatene ita boot siak-teen. Ita boot gosta kuu buat nebee laos ita boot mak kuda, i simu buat nebee laos ita boot nia kosar been.

²⁵ Nee mak hau tauk, i hau baa hakoi subar tiha patraun nia osan. Haree ba, ita boot nia osan mak nee.’

²⁶ Maibee nia patraun hataan, ‘Hei! Atan aat i baruk-teen! O hatene katak hau gosta kuu buat nebee laos hau mak kuda, i simu buat nebee laos hau nia kosar been.

²⁷ Tanba nee, tuir loloos o rai hau nia osan iha banku para hau fila mai bele simu fali osan nee ho nia funan.’

²⁸ Depois patraun hatete ba nia atan ida seluk, ‘Foti tiha osan nee hosi nia i foo ba atan ida nebee iha ona osan mean atus sanulu nee.

²⁹ Tanba ema nebee iha ona, sei simu tan too nakonu resin. Maibee ema nebee la iha, ituan nebee nia iha mos, sei hasai tiha hosi nia.

³⁰ Agora kaer tiha atan nebee la iha folin nee, soe sai nia ba iha fatin nebee nakukun liu. Iha nebaa nia sei tanis hakilar i ruun nehan.’ ”

Nai Jesus sei tesi ema hotu-hotu nia lia

³¹ Jesus hatutan tan dehan, “Hau, Ema Oan sei fila fali mai hosi lalehan ho naroman nabilan, i anju sira hotu mai hamutuk ho Hau. Hau sei tuur iha kadeira naroman nabilan hodi ukun nudar Liurai.

³² Depois ema hosi nasaun hotu-hotu sei mai halibur iha Hau nia oin, i Hau sei haketak ema sira nee ba grupu rua, hanesan bibi atan haketak bibi malae ho bibi.

³³ Ema nebee moris tuir Maromak nia hakarak, Hau tau iha Hau nia sorin loos, sira seluk Hau tau iha Hau nia sorin karuk.

³⁴ Nudar Liurai, Hau sei hatete ba ema sira nebee iha Hau nia sorin loos nee dehan, ‘Imi sira nebee mak Hau nia Aman foo bensaun, mai tama ona ba imi nia fatin iha reinu lalehan. Fatin nee prepara nanis tiha ona ba imi bainhira Maromak halo mundu nee.

³⁵ Tanba bainhira Hau hamlaha, imi foo hahaan mai Hau. Bainhira Hau hamrook, imi foo bee mai Hau. Bainhira Hau hanesan ema lao rai iha imi nia rain, imi simu Hau iha imi nia uma.

³⁶ Bainhira Hau la iha ropa, imi foo ropa mai Hau. Bainhira Hau moras, imi vizita Hau. Bainhira Hau dadur iha komarka, imi baa vizita Hau.’

³⁷ Depois ema nebee moris loos nee husu, ‘Nai, hori bainhira mak ami haree Ita Boot hamlaha, ami foo hahaan ba Ita Boot, ka Ita hamrook ami foo bee ba Ita Boot?

³⁸ Hori bainhira mak Ita Boot hanesan ema lao rai, ami simu Ita iha uma? Hori bainhira mak Ita Boot la iha ropa, ami foo ropa ba Ita Boot?

³⁹ Hori bainhira mak ami haree Ita Boot moras ka dadur iha komarka, ami baa vizita Ita Boot?’

⁴⁰ Hau sei hataan, ‘Hau hatete loloos ba imi! Bainhira imi halo saida deit ba Hau nia maluk ida, maski ba ema kiik ida mos, nee hanesan imi halo ona mai Hau.’

⁴¹ Depois Hau hatete ba ema sira nebee iha Hau nia sorin karuk dehan, ‘Sai tiha hosi nee, imi sira nee hetan ona malisan. Baa tama iha ahi laran nebee mak nunka mate. Ahi nee prepara tiha ona ba diabu ho nia anju sira.

⁴² Tanba bainhira Hau hamlaha, imi la foo hahaan mai Hau. Bainhira Hau hamrook, imi la foo bee mai Hau.

⁴³ Bainhira Hau hanesan ema lao rai iha imi nia rain, imi la simu Hau iha imi nia uma. Bainhira Hau la iha ropa, imi la foo ropa mai Hau. Bainhira Hau moras ka iha komarka, imi la baa vizita Hau.’

⁴⁴ Sira mos husu, ‘Nai, hori bainhira mak ami haree Ita Boot hamlaha ka hamrook, ka hanesan ema lao rai, ka la iha ropa, ka moras ka iha komarka i ami la tau matan?’

⁴⁵ Hau sei hataan, ‘Hau hatete loloos ba imi! Bainhira imi la halo buat sira nee ba Hau nia maluk ida, maski la halo ba ema kiik ida mos, nee hanesan imi la halo mai Hau.’

⁴⁶ I ema sira nee sei tama ba iha fatin terus rohan laek. Maibee ema nebee moris loos sei hetan moris rohan-laek.”