Mateus 22 - Biblia Tetun Dili

Komparasaun kona ba festa kazamentu

¹ Depois Jesus koalia tan ho sira uza komparasaun dehan,

² “Maromak nudar Liurai nia ukun hanesan istoria ida tuir mai nee: Iha liurai ida prepara festa kazamentu ba nia oan mane.

³ Bainhira buat hotu besik prontu ona, liurai haruka nia atan sira baa bolu ema nebee nia konvida tiha ona nee para sira mai ona iha festa nee. Maibee konvidadu sira hotu lakohi baa festa nee.

⁴ Depois liurai haruka nia atan sira seluk baa foo hatene dala ida tan ba konvidadu sira. Nia hameno dehan, ‘Hahaan prepara tiha ona. Hau oho tiha ona karau aman sira ho karau oan sira. Buat hotu-hotu prontu ona. Mai ona baa!’

⁵ Maibee konvidadu sira nee la interese nafatin. Sira balu baa sira nia toos, balu baa iha sira nia serbisu fatin i balu tan ba halo sira nia kontratu.

⁶ I konvidadu sira seluk kaer tiha atan sira nee hodi halo terus sira i oho tiha sira.

⁷ Rona nunee, liurai hirus teb-tebes i haruka nia soldadu sira baa oho tiha ema oho door sira nee i sunu motuk tiha sira nia sidade.

⁸ Depois liurai hatete ba nia atan sira, ‘Festa kazamentu prontu ona, maibee ema nebee hau konvida sira la serve atu tuir festa nee.

⁹ Tanba nee, agora imi baa iha dalan-dalan nebee ema rame iha sidade laran. See-see deit mak imi hetan iha nebaa, bolu sira mai deit iha festa kazamentu nee.’

¹⁰ Nunee atan sira baa iha dalan-dalan nebee ema rame, i see-see deit mak sira hetan, atu ema diak ka ema aat, sira halibur hotu, too halo nakonu fatin kazamentu nee.

¹¹ Depois liurai tama iha fatin kazamentu atu hasoru bainaka sira. Iha nebaa nia haree ema ida la hatais hena festa nian.

¹² Entaun nia husu, ‘Hai kolega, halo nusaa mak o tama mai iha festa nee se o la hatais hena festa nian?’ Maibee ema nee nonook deit

¹³ Nunee liurai hatete ba nia atan sira, ‘Futu tiha ema nee nia liman-ain i soe sai ba iha fatin nakukun. Iha nebaa ema nee sei tanis hakilar i ruun nehan.’ ”

¹⁴ Jesus taka komparasaun nee dehan, “Nunee mos Maromak bolu ema barak, maibee Nia hili ituan deit mak tama iha Nia reinu.”

Pergunta kona ba selu impostu

¹⁵ Depois ema Farizeu sira sai hosi nebaa hodi kombina malu atu hamonu Jesus liu hosi pergunta oi-oin.

¹⁶ Nunee sira haruka ema balu baa atu koko Jesus. Ema sira nee mak Farizeu nia eskolanti sira ho ema hosi partidu Erodes nian. Sira finji husu ba Jesus dehan, “Mestri, ami hatene katak Ita Boot ema nebee onestu i sempre hanorin Maromak nia dalan ho loloos. Ita Boot la hola ba lia ho ema seluk nia hanoin, i Ita Boot la fihir ema.

¹⁷ Ita Boot nia hanoin oinsaa? Tuir ita nia lei relijiaun, ita selu impostu ba estadu Roma nia liurai boot César nee, loos ka lae?”

¹⁸ Maibee Jesus hatene sira nia hanoin aat, i Nia dehan ba sira, “Imi nee laran makerek! Nusaa mak imi hakarak hamonu Hau?

¹⁹ Hatudu took mai Hau osan nebee mak uza hodi selu impostu.” Depois sira lori osan mutin ida foo ba Nia.

²⁰ Jesus husu ba sira, “See nia oin mak iha osan nee? I see nia naran?”

²¹ Sira hataan, “Liurai boot César nian.” Jesus hatete ba sira, “Se nunee, foo ba estadu buat nebee estadu nian, i foo ba Maromak buat nebee Maromak nian.”

²² Bainhira sira rona Jesus nia liafuan nee, sira hotu admira, i sira husik hela Jesus iha nebaa hodi baa fali fatin seluk.

Nai Jesus hanorin kona ba ema mate moris fila fali

²³ Iha loron nee ema hosi grupu relijiaun Saduseu mos mai iha Jesus. Ema Saduseu sira hanorin dehan, ema mate sei la moris fali. Entaun sira husu ba Jesus,

²⁴ “Mestri, Moisés dehan, se mane ida mate, maibee la iha oan, mane nia alin tenki kaben fali feto faluk nee para bele foo jerasaun ba nia maun.

²⁵ Entaun, hanesan nee: ami iha maun-alin nain hitu. Maun boot kaben, depois nia mate, la iha oan. Entaun alin ida tuir nia nee kaben fali ho feto faluk nee.

²⁶ Tuir mai nia mos mate, la iha oan. Nunee bebeik too alin ikun mos kaben ho feto faluk nee, depois mate, la iha oan.

²⁷ Too ikus feto faluk nee mos mate.

²⁸ Agora ami husu nunee: feto nee kaben ho mane nain hitu. Aban-bainrua bainhira Maromak halo moris fali ema mate, feto nee nia kaben mak ida nebee loos?”

²⁹ Jesus hataan, “Imi nia hanoin nee la loos tanba imi la hatene saida mak hakerek iha Livru Sagradu, i imi mos la komprende Maromak nia kbiit.

³⁰ Tanba bainhira ema mate moris fila fali, sira la kaben tan i la kaben malu tan ona. Maibee sira hanesan anju sira iha lalehan.

³¹ Kona ba ema mate moris fali, Maromak koalia ona ba imi iha Livru Sagradu. Imi lee tiha ona ka lae? Maromak dehan,

³² ‘Hau mak Abraão nia Maromak, Isac nia Maromak ho Jacó nia Maromak, sira hotu adora nafatin Hau too agora.’ Nee hatudu katak ema mate sei moris fali. Tanba so ema moris deit mak bele adora Maromak, ema mate lae.”

³³ Bainhira ema barak nebee rona Jesus nia hanorin nee, sira admira teb-tebes.

Ukun fuan nebee importante liu

³⁴ Bainhira ema Farizeu sira rona katak Jesus halo ema Saduseu sira la brani atu koalia tan. Nunee ema Farizeu sira halibur malu atu koko tan Jesus.

³⁵ Entaun mestri relijiaun ida hosi sira mai husu ba Jesus,

³⁶ “Mestri, ukun fuan ida nebee mak importante liu?”

³⁷ Jesus hataan, “O tenki hadomi Nai, o nia Maromak, ho o nia fuan-laran tomak, ho o nia aan tomak, no ho o nia hanoin tomak.’

³⁸ Ida nee mak ukun fuan nebee boot liu i importante liu.

³⁹ Iha tan ukun fuan segundu nebee besik hanesan: ‘O tenki hadomi ema seluk hanesan o hadomi o nia aan rasik.’

⁴⁰ Moisés nia lei tomak ho profeta sira nia hanorin hotu nia huun mak iha ukun fuan rua nee.”

See mak Kristu?

⁴¹ Bainhira ema Farizeu sira sei halibur hela iha nebaa, Jesus husu ba sira,

⁴² “Imi hanoin saida kona ba Kristu, Salvador nebee mak Maromak promete ona hori uluk atu haruka mai nee? Kristu nee see nia Jerasaun?” Sira hataan, “Nia nee liurai David nia Jerasaun.”

⁴³ Jesus husu tan dehan, “Se nunee, nusaa mak Maromak nia Espiritu foo hatene ba liurai David atu bolu Kristu nee ‘Nai’? David hakerek dehan,

⁴⁴ ‘Nai Maromak hatete ona ba hau nia Nai, dehan, “Mai tuur iha Hau nia sorin loos, too Hau hamonu O nia inimigu sira iha O nia ain okos.’ ”

⁴⁵ Iha nee, liurai David rasik bolu Kristu nia Nai. Entaun oinsaa mak Kristu bele sai fali David nia Jerasaun?”

⁴⁶ La iha ema ida mak bele hataan. Komesa iha loron nee ema ida mos la brani atu husu tan pergunta ba Nia.