Mateus 21 - Biblia Tetun Dili

Nai Jesus tama iha Jerusalém nudar liurai

¹ Bainhira Jesus ho Nia eskolanti sira besik ona sidade Jerusalém, sira too iha aldeia Betfagé, besik foho Oliveira. I Jesus haruka eskolanti nain rua baa uluk.

² Nia dehan ba sira, “Imi baa iha aldeia nebaa. Bainhira imi tama, imi hetan kedas kuda buru inan ida kesi hela, nia oan iha hela nia sorin. Imi kore tiha i dada kuda buru inan ho oan nee mai Hau.

³ Se iha ema ruma husu ba imi, 'tanba saa mak imi kore kuda buru nee?'. Foo hatene dehan, ‘Nai mak presiza, depois Nia sei haruka fila fali mai.’ I ema nee sei haruka imi dada kedas kuda buru nee."

⁴ Nee tuir saida mak Maromak koalia liu hosi nia profeta hori uluk kedas dehan,

⁵ “Hatete ba Jerusalém oan sira nunee: ‘Haree baa, imi nia Liurai mai iha imi. Nia mai ho haraik Aan, sae deit kuda buru salak.’ ”

⁶ Depois eskolanti nain rua nee baa halo tuir saida mak Jesus haruka.

⁷ Sira dada kuda buru inan nee ho nia oan lori ba Jesus. Too iha nebaa sira hasai sira nia hena tau ba iha kuda nia kotuk, para Jesus sae.

⁸ Ema barak hasai sira nia hena hodi nahe tutuir dalan. Iha mos ema balu taa ramus hodi latan tuir dalan.

⁹ Ema balu lao uluk iha Jesus nia oin, balu lao hosi kotuk. Sira hotu haklalak hahii Maromak dehan, “Hosana, liurai David nia Jerasaun! Maromak foo bensaun ba Ida nebee mai lori Nai Maromak nia naran. Hosana, hahii Nia iha fatin aas liu!”

¹⁰ Bainhira Jesus tama iha Jerusalém, ema hotu iha sidade nee hakfodak hodi husu {ba malu} dehan, “Ema nee see?”

¹¹ Ema barak nebee mak lao hamutuk ho Jesus nee hataan dehan, “Nia nee Jesus, Maromak nia profeta hosi Nazaré iha provinsia Galileia.”

Nai Jesus duni sai kontratu nain sira hosi uma kreda boot nia area

¹² Depois Jesus tama iha area uma kreda boot nian, Nia duni sai ema sira nebee halo kontratu iha fatin nee. Nia dudu baku fila tiha meza nebee ema uza hodi troka osan, i banku nebee ema tuur hodi faan manu pombu mos Nia dudu baku fila hotu.

¹³ Nia siak sira dehan, “Iha Maromak nia Liafuan hakerek tiha ona dehan, ‘Hau nia uma nee fatin para halo orasaun.’ Maibee imi halo fali hanesan ema naok-teen sira nia subar fatin.”

¹⁴ Hotu tiha, ema matan delek ho ema ain kudeik sira mai hasoru Jesus iha area uma kreda boot nee, i Nia kura sira hotu.

¹⁵ Bainhira nai lulik nia ulun sira ho mestri relijiaun sira haree milagre nebee Jesus halo, sira hirus. Sira mos hirus liu tan tanba labarik sira haklalak dehan, “Hosana, liurai David nia Jerasaun!”

¹⁶ Nunee sira hasee Jesus dehan, “O la rona ka? Labarik sira haklalak saida ba O nee?! ” Jesus hataan, “Hau rona. Maibee iha Livru Sagradu dehan, ‘Maromak hanorin labarik sira ho kiik-oan sira nebee sei susu hela atu hahii Ita Boot.’ Liafuan nee imi la lee ka?”

¹⁷ Depois Jesus husik tiha sira hodi baa fali iha aldeia Betánia, i Nia hela iha nebaa kalan ida.

Nai Jesus foo malisan ba ai figeira nebee la foo fuan

¹⁸ Iha dadeer-saan tuir mai, Jesus fila fali ba sidade Jerusalém. Iha dalan, Nia senti hamlaha.

¹⁹ Nia haree ai figeira huun ida iha dalan ninin, i Nia baa besik ai huun nee hodi buka nia fuan. Maibee la iha, tahan deit mak iha. Haree nunee, Jesus hatete ba ai huun nee dehan, “O sei la foo fuan tan ona!” Derepenti ai nee namlaik tiha.

²⁰ Bainhira Jesus nia eskolanti sira haree, sira admira hodi husu, “Nusaa mak ai huun nee namlaik tiha derepenti hanesan nee?”

²¹ Jesus hataan, “Hau hatete loloos ba imi, se imi fiar i fiar nee la nakdoko, imi mos bele halo saida mak Hau halo ona ba ai figeira huun nee. Laos ida nee deit, maibee imi mos bele haruka foho nee muda ba iha tasi laran, i sei muda duni.

²² Saida deit mak imi husu liu hosi orasaun ho fuan-laran tomak, imi sei simu.”

Nai ulun Judeu husu kona ba Jesus nia kbiit

²³ Depois Jesus tama iha area uma kreda boot hodi hanorin iha nebaa. Nia sei hanorin hela, nai lulik nia ulun sira ho lider katuas judeu sira mai husu ba Jesus, “O iha kbiit saida para halo buat sira nee? See mak foo kbiit nee ba O?”

²⁴ Jesus hataan, “Hau mos atu husu pergunta ida. Se imi hataan ho loloos mak Hau foo hatene ba imi, ho kbiit nebee mak Hau halo buat sira nee.

²⁵ Hau nia pergunta mak nee: See mak foo kbiit ba João Sarani Nain hodi foo sarani ema? Maromak mak foo ka, ema mak foo?” Sira koalia ba malu dehan, “Ita susar ona. Se ita hataan, ‘Maromak mak foo kbiit ba nia’, Jesus sei husu fali ba ita, ‘Se nunee, nusaa mak imi la fiar ba nia?’

²⁶ Maibee se ita dehan, ‘Ema mak foo kbiit’, entaun ita tauk povu, tanba povu sira hanoin dehan, João nee Maromak nia profeta.”

²⁷ Entaun sira hataan dehan, “Ami la hatene.” Jesus dehan ba sira, “Se nunee, Hau mos la hatete ba imi, see mak foo kbiit mai Hau hodi halo buat sira nee.”

Komparasaun kona ba oan mane nain rua

²⁸ Depois Jesus hatete ba nai ulun Judeu sira, “Imi hanoin took komparasaun nebee Hau atu koalia nee. Iha senhor ida iha oan mane nain rua. Loron ida nia hatete ba nia oan mane boot dehan, ‘Oan, loron ida nee o baa serbisu iha toos uvas.’

²⁹ Nia oan hataan, ‘Hau lakohi baa.’ Maibee too ikus nia arepende i baa duni serbisu iha toos.

³⁰ Depois senhor nee haruka tan nia oan darua baa serbisu iha toos. Nia oan nee hataan, ‘Diak apaa, hau sei baa.’ Maibee too ikus nia la baa.”

³¹ Konta tiha hotu, Jesus husu ba sira, “Tuir imi nia hanoin, oan rua nee, ida nebee mak halo tuir nia aman nia hakarak?” Sira hataan, ‘Oan mane boot.’ Jesus dehan ba sira, “Hau hatete loloos ba imi, kobrador impostu ho feto luroon sira sei tama iha Maromak nia reinu uluk fali imi.

³² Tanba uluk João Sarani Nain mai hanorin dalan loos no lia loos ba imi, i imi lakohi fiar. Maibee kobrador impostu ho feto luroon sira rona, fiar no hodi halo tuir. Maski imi haree nunee, imi lakohi hakribit imi nia sala i la fiar nafatin ba João nia liafuan.”

Komparasaun kona ba ema nebee aluga toos uvas

³³ Jesus hatutan tan komparasaun ida, “Iha toos nain ida kuda uvas iha nia toos. Nia halo lutu haleu tiha toos nee, i halo tanki ida hodi sama uvas. Nia mos harii uma ain aas ida ba seguransa sira hodi hein toos nee. Hotu tiha, nia foo ba ema aluga, depois nia baa hela tiha iha rai liur.

³⁴ Bainhira tempu besik ku ona uvas, toos nain haruka nia atan balu baa simu rezultadu hosi toos uvas nebee ema aluga nee.

³⁵ Maibee ema nebee aluga toos nee kaer tiha atan sira nee. Sira baku tiha ida, sira tuda ida ho fatuk, i ida seluk sira oho tiha.

³⁶ Depois toos nain haruka nia atan barak liu tan ba. Maibee ema nebee aluga toos nee halo aat nafatin.

³⁷ Too ikus toos nain haruka nia oan rasik mak baa, tanba nia hanoin dehan, ‘Sira sei respeita hau nia oan.’

³⁸ Maibee bainhira ema nebee aluga toos nee haree toos nain nia oan, sira dehan ba malu, ‘Nia mak sei hetan nia aman nia rikusoin hotu. Diak liu ita oho tiha nia, atu toos nee sai fali ita nia rikusoin.’

³⁹ Nunee sira kaer nia, rasta nia sai hosi toos laran, i oho tiha nia.”

⁴⁰ Konta hotu tiha, Jesus husu ba nai ulun Judeu sira, “Tuir imi nia hanoin, bainhira toos nain nee fila fali mai, nia sei halo saida ba ema sira nebee aluga toos nee?”

⁴¹ Sira hataan, “Nia sei kastigu mate tiha ema aat sira nee. I nia sei foo fali toos nee ba ema seluk hodi aluga, atu nunee too tempu kuu uvas, nia sei simu rezultadu hosi ema nebee aluga toos uvas nee.”

⁴² Depois Jesus hatete ba sira, “ Imi nunka lee iha Livru Sagradu ka? Iha nebaa dehan, ‘Iha fatuk ida nebee badaen fatuk sira soe tiha ona, agora fatuk nee sai fali fatuk nebee importante liu sira seluk. Nai Maromak rasik mak hili fatuk nee, ita haree ba furak teb-tebes.’ ”

⁴³ “Nee duni Hau hatete ba imi, Maromak sei hasai Nia reinu hosi imi. Nia sei hili fali povu seluk nebee sei halo tuir Nia hakarak.

⁴⁴ Ema nebee monu kona Fatuk nee, nia sei tohar. I se Fatuk nee monu kona ema ruma, ema nee sei rahun uut.”

⁴⁵ Bainhira nai lulik nia ulun sira ho ema Farizeu sira rona komparasaun hirak nee, sira hatene katak Jesus koalia kona ba sira.

⁴⁶ Entaun sira buka dalan atu kaer Jesus, maibee sira tauk ema barak nee, tanba povu fiar katak Jesus nee profeta ida.