Mateus 20 - Biblia Tetun Dili

Komparasaun kona ba ema nebee serbisu iha toos uvas

¹ “Reinu Lalehan bele kompara hanesan nee: Iha toos nain ida, dadeer-saan nakukun nia baa iha merkadu hodi buka ema atu serbisu iha nia toos uvas.

² Hetan tiha ema, sira konkorda malu atu selu loron ida osan mutin ida, i nia haruka sira baa serbisu kedas iha nia toos uvas.

³ Mais-ou-menus tuku sia dadeer, toos nain baa fali merkadu, nia haree tan ema balu nebee la halo buat ida.

⁴ Nia hatete ba sira, ‘Imi baa serbisu iha hau nia toos uvas, hau sei selu imi ho loloos.’ I sira mos baa.

⁵ Mais-ou-menus tuku sanulu resin rua, toos nain sai baa bolu tan ema seluk. Nunee mos tuku tolu lokraik.

⁶ Mais-ou-menus tuku lima lokraik, nia baa fali merkadu, hetan ema seluk tan nebee la halo buat ida. Nia husu ba sira, ‘Nusaa mak loron tomak imi iha nee deit, la halo buat ida?’

⁷ Sira hataan, ‘La iha ema ida mak foo serbisu mai ami.’ Toos nain dehan, ‘Se nunee, imi baa serbisu iha hau nia toos deit.’

⁸ Rai besik kalan ona, nia hatete ba mandor dehan, ‘Baa bolu ema sira nebee mak serbisu iha toos uvas hodi selu sira ida-idak. Maibee selu uluk ema sira nebee mak tama ikus. Sira nebee mak tama uluk, selu ikus.’

⁹ Nunee mandor bolu uluk ema nebee mak mai serbisu iha tuku lima lokraik, i sira ida-idak simu osan mutin ida.

¹⁰ Entaun ema sira nebee mak mai serbisu hosi dadeer-saan nakukun hanoin katak sira atu simu barak liu fali. Maibee sira mos simu osan mutin ida.

¹¹ Bainhira sira simu hotu sira nia osan, ema nebee mak tama serbisu hosi dadeer nee mai murmura ba toos nain

¹² dehan, ‘Sira nebee mai ikus serbisu oras ida deit. Nusaa mak sira simu osan hanesan fali ho ami? Ami nee serbisu mate aan hosi dadeer too lokraik, loron manas mos ami serbisu nafatin.’

¹³ Rona nunee, toos nain nee hataan ba ema ida hosi sira dehan, ‘Kolega, hau la halo buat ida ke la justu ba o. Ita konkorda malu ona katak o atu simu osan mutin ida iha loron ida, loos ka lae?

¹⁴ Foti o nia osan nee hodi fila ona. Hau hakarak atu ema nebee tama serbisu ikus mos simu osan hanesan ho imi.

¹⁵ Nee hau nia osan. Hau iha direitu atu uza tuir hau nia hakarak. Ka o laran moras ba hau tanba hau halo buat diak ba ema seluk?’ ”

¹⁶ Jesus taka Nia liafuan dehan, “Nunee mos ema nebee ikus, aban-bainrua sei sai fali uluk. I ema nebee uluk, sei sai fali ikus.”

Nai Jesus koalia ba dala tolu kona ba Nia mate

¹⁷ Bainhira Jesus lao dadaun ba sidade Jerusalém, Nia bolu Nia eskolanti nain sanulu resin rua hodi koalia ba sira deit dehan,

¹⁸ “Rona mai, agora ita baa Jerusalém. Too iha nebaa, ema sei entrega Hau, Ema Oan, ba iha nai lulik nia ulun sira ho mestri relijiaun sira. Ema sira nee sei tesi Hau nia lia katak Hau tenki hetan kastigu mate.

¹⁹ Sira sei entrega Hau ba iha ema nebee la konhese Maromak. I ema sira nee sei tarata Hau, baku Hau ho sikoti, i prega Hau iha krus. Maibee iha loron tolu Hau sei moris fali hosi mate.”

Tiago ho João nia inan husu atu nia oan sira sai ema boot

²⁰ Depois Zebedeu nia feen mai hamutuk ho nia oan Tiago ho João. Senhora nee mai hakneak iha Jesus nia oin hodi husu atu Jesus foo buat ruma ba nia.

²¹ Jesus husu, “Senhora hakarak saida?” Senhora nee hataan, “Hau husu atu aban-bainrua iha Ita Boot nia reinu, hau nia oan nain rua nee, ida tuur iha Ita Boot nia sorin loos, ida seluk tuur iha Ita Boot nia sorin karuk.”

²² Maibee Jesus hataan ba Tiago ho João dehan, “Imi la komprende saida mak imi husu. La kleur Hau sei hemu kalis ka simu terus todan. Imi mos prontu simu terus nee ka lae?” Sira hataan, “Ami prontu.”

²³ Jesus hatete ba sira, “Loos duni, Hau nia kalis imi sei hemu duni, imi sei simu duni terus hanesan Hau. Maibee Hau la iha direitu atu hili see mak atu tuur iha Hau nia sorin loos ho sorin karuk. Kona ba ida nee Hau nia Aman iha lalehan desidi tiha ona.”

²⁴ Bainhira eskolanti nain sanulu rona buat nebee mak Tiago ho João husu, sira hirus maun-alin nain rua nee.

²⁵ Entaun, Jesus bolu sira hamutuk hodi dehan, “Imi hatene katak, iha nasaun sira seluk, nai ulun sira ukun sira nia povu ho liman besi i ema boot sira hanehan sira nia povu.

²⁶ Maibee imi la bele halo hanesan nee. See mak hakarak sai boot, nia tenki haraik aan hodi serbii ema seluk.

²⁷ I see mak hakarak sai xefi, nia tenki serbii ema seluk hanesan atan.

²⁸ Hanesan Hau, Ema Oan. Hau mai iha mundu nee laos atu ema serbii Hau. Maibee Hau mai hodi serbii ema i foo Aan ba mate hodi selu kotu ema barak nia tusan.”

Nai Jesus kura ema matan delek nain rua

²⁹ Depois Jesus ho nia eskolanti sira sai hosi sidade Jerikó, i ema barak nadodon tuir Nia.

³⁰ Iha nebaa iha ema matan delek nain rua tuur hela iha dalan ninin. Bainhira sira rona katak Jesus lao liu, sira bolu ho lian makaas dehan, “Nai, liurai David nia Jerasaun, hadomi ami baa!”

³¹ Ema barak nee hirus sira nain rua i haruka sira nonook. Maibee sira nain rua bolu makaas liu tan dehan, “Nai, liurai David nia Jerasaun, hadomi ami baa!”

³² Rona nunee, Jesus para, i bolu sira mai hodi husu, “Imi hakarak Hau halo saida ba imi?”

³³ Sira hataan, “Nai, ami hakarak haree.”

³⁴ Rona nunee, Jesus hanoin sira nain rua ho fuan-laran tomak, i Nia tau liman ba sira nia matan, i sira haree kedas. Depois sira tuir Jesus.