Mateus 19 - Biblia Tetun Dili

Kona ba feen-laen fahe malu

¹ Jesus hanorin hotu tiha, Nia lao sai hosi Galileia hodi baa iha provinsia Judeia iha mota Jordaun nia sorin baa.

² Ema barak nadodon tuir Nia, i Nia kura sira nia moras.

³ Depois ema balu hosi grupu relijiaun Farizeu mai koko atu hamonu Nia. Sira husu dehan, “Tuir Moisés nia lei, laen bele soe nia feen ho razaun saida deit ka?”

⁴ Jesus hataan, “Imi la lee iha Livru Sagradu kona ba Maromak halo ema ka? Iha nebaa hakerek dehan, ‘Nia halo sira mane ho feto.’

⁵ I hakerek tan dehan, ‘Tanba nee, mane sei husik nia inan-aman hodi baa moris hamutuk neon ida laran ida ho nia feen, i sira nain rua sai isin ida deit.’

⁶ Nunee sira laos ona ema nain rua, maibee sai ona ida. Tanba nee saida mak Maromak halo hamutuk ona, la iha ema bele fahe.”

⁷ Depois ema Farizeu sira nee husu fali ba Jesus, “Se nunee, nusaa mak Moisés dehan, laen bele soe nia feen, naran katak nia foo surat deklarasaun fahe malu nian?”

⁸ Jesus hataan, “Moisés nia lei foo lisensa atu imi soe imi nia feen tanba imi susar atu foo perdaun. Maibee fofoun Maromak halo lalehan ho rai laos hanesan nee.

⁹ Hau hatete ba imi, mane ida bele soe nia feen bainhira nia feen halo ona relasaun seksual ho ema seluk. Se nia feen la halo sala nee, maibee mane nee soe nia hodi hola fali feto seluk, mane nee mak halo sala adulteriu.”

¹⁰ Rona nunee, Jesus nia eskolanti sira dehan, “Se hanesan nee, diak liu lalika kaben.”

¹¹ Jesus hataan, “Laos ema hotu-hotu mak bele komprende liafuan nee. So ema nebee Maromak foo kbiit ba sira mak bele komprende.

¹² Iha ema balu la kaben tanba sira moris mai nunee duni. Iha ema balu la kaben tanba ema seluk mak halo sira nunee. Iha mos ema balu la kaben tanba sira hakarak foo aan tomak atu serbii Maromak nudar Liurai. See mak bele komprende liafuan nee, komprende baa.”

Nai Jesus foo bensaun ba labarik

¹³ Depois ema balu lori labarik sira ba Jesus atu Nia tau liman hodi foo bensaun i halo orasaun ba sira. Maibee Jesus nia eskolanti sira hirus.

¹⁴ Entaun Jesus dehan, “Husik labarik sira nee mai Hau, la bele bandu. Tanba ema hanesan sira nee mak sai Maromak nia reinu.”

¹⁵ Depois Nia tau liman ba labarik sira i Nia sai hosi nebaa.

Joven riku nebee hakarak tama ba lalehan

¹⁶ Iha loron ida, iha mane joven ida mai iha Jesus i husu, “Mestri, hau tenki halo buat diak saida para hau bele hetan moris rohan-laek?”

¹⁷ Jesus hataan, “Nusaa mak ita husu mai Hau kona ba buat saida mak diak? So Maromak deit mak diak. Se ita hakarak hetan moris rohan-laek, halo tuir Nia ukun fuan hotu.”

¹⁸ Joven nee husu fali, “Ukun fuan ida nebee?” Jesus hataan, “La bele oho ema, la bele halo relasaun seksual ho ema nebee laos o nia kaben, la bele naok, la bele foo sasin falsu,

¹⁹ respeita o nia inan-aman, i hadomi ema seluk hanesan o hadomi o nia aan rasik.”

²⁰ Joven nee hataan, “Ukun fuan sira nee hau halo tuir hotu ona. Saida mak sei falta?”

²¹ Jesus hataan, “Se o hakarak moris halo tuir Maromak nia hakarak hotu, entaun baa faan tiha o nia rikusoin hotu, i osan nee fahe ba ema kiak sira. Nunee mak o sei hetan fali rikusoin iha lalehan. Depois, mai tuir Hau.”

²² Bainhira joven nee rona nunee, nia fila ho laran susar tanba nia riku teb-tebes.

²³ Depois Jesus dehan ba Nia eskolanti sira, “Hau hatete loloos ba imi, susar teb-tebes ema riku ida atu tama ba Reinu Lalehan.

²⁴ Dala ida tan Hau dehan ba imi, fasil liu kuda kamelu tama liu hosi daun kuak ida duke ema riku ida atu tama ba iha Maromak nia Reinu.”

²⁵ Bainhira Jesus nia eskolanti sira rona nunee, sira admira teb-tebes no husu, “Se nunee, see loos mak sei hetan salvasaun?”

²⁶ Jesus hateke ba sira hodi dehan, “Ba ema, la bele duni. Maibee ba Maromak, buat hotu-hotu bele.”

²⁷ Depois Pedro dehan, “Ami husik tiha ona buat hotu-hotu hodi tuir Ita Boot. Nunee ami sei hetan saida?”

²⁸ Jesus hatete ba sira, “Hau dehan loloos ba imi, bainhira Maromak halo buat hotu sai foun, Hau, Ema Oan sei tuur iha kadeira ukun, i naroman lalehan nian haleu hela Hau. Imi sira nebee agora tuir Hau mos sei tuur iha kadeira ukun sanulu resin rua hodi tesi Israel nia suku sanulu resin rua nia lia.

²⁹ See mak husik ona nia uma, nia maun-alin, feton ho naan, nia inan-aman, nia oan sira ka nia rai tanba nia tuir Hau, ema nee sei simu fali dala atus ida no mos sei hetan moris rohan-laek.

³⁰ Maibee ema barak nebee uluk, sei sai fali ikus. I ema barak nebee ikus, sei sai fali uluk.”