Mateus 18 - Biblia Tetun Dili

Ema nebee boot liu iha Maromak nia reinu

¹ Iha tempu nebaa, Jesus nia eskolanti sira mai husu ba Nia, “See mak boot liu iha Maromak nia reinu?”

² Entaun Jesus bolu labarik ida mai hamriik iha sira nia klaran,

³ i Nia dehan ba sira, “Hau hatete loloos ba imi, see mak atu sai Maromak nia reinu, nia tenki husik nia sala hodi sai hanesan labarik kiik ida nee.

⁴ Nunee see mak haraik aan hanesan labarik nee, nia mak boot liu iha Maromak nia reinu.

⁵ See mak simu labarik ida nebee fiar mai Hau, hanesan mos nia simu Hau.

Nai Jesus foo hanoin ba ema nebee halo ema seluk monu ba sala

⁶ Maibee see mak halo labarik kiik ida monu ba sala too nia la fiar mai Hau, nia sei simu kastigu todan. Diak liu ema kesi fatuk boot ida iha nia kakorok hodi lori ba soe tama ba tasi laran.

⁷ Mundu nee susar barak tanba iha buat barak mak halo ema monu ba sala. Loos duni, buat aat sira nee sempre iha. Maibee see mak halo ema seluk monu ba sala, nia sei simu terus.

⁸ Se o nia liman ka o nia ain halo o monu ba sala, tesi i soe tiha. Diak liu o tama ba iha lalehan ho liman ka ain sorin deit duke o tama ba iha infernu ho liman-ain kompletu.

⁹ Se o nia matan halo o monu ba sala, sukit sai tiha o nia matan nee i soe tiha. Diak liu o tama ba iha lalehan ho matan sorin deit duke o tama ba iha infernu ho matan kompletu.”

Komparasaun kona ba bibi malae nebee lakon

¹⁰ “Jesus koalia tan dehan, keta hanoin dehan ema kiik sira nee la iha folin. Hau hatete ba imi, anju sira nebee hamriik iha Hau nia Aman Maromak nia oin, iha lalehan, sempre tau matan ba sira.

¹¹ [Tanba Hau, Ema Oan, mai hodi salva ema nebee lakon hela.]

¹² Imi hanoin oinsaa? Se ema ida iha bibi malae atus ida, depois bibi malae ida lakon, bibi nain sei halo saida? Nia sei husik hela bibi sia-nulu resin sia iha foho, i baa buka tuir bibi ida nebee lakon nee.

¹³ Hau hatete loloos ba imi, bainhira nia hetan ona bibi nebee lakon nee, nia kontenti liu fali ho bibi ida nee duke ho bibi sia-nulu resin sia nebee la lakon.

¹⁴ Nunee mos imi nia Aman iha lalehan lakohi atu labarik kiik sira ida lakon.”

Oinsaa ita diak malu fali ho ema nebee halo sala hasoru ita

¹⁵ Jesus koalia tan dehan, “Se o nia maun-alin ida halo sala hasoru o, baa koalia rasik ho nia, maibee imi nain rua mesak. Se nia simu o nia liafuan, entaun o diak malu fali ho nia.

¹⁶ Maibee se nia lakohi rona o nia liafuan, entaun lori ema ida ka rua baa koalia tan ho nia, atu sira sai sasin ba buat nebee imi koalia. Tanba iha Livru Sagradu hakerek dehan, ‘Bainhira tesi lia ruma, tenki iha sasin nain rua ka tolu nebee koalia hanesan mak foin bele rona sira nia koalia nee.’

¹⁷ Se nia lakohi rona imi, baa foo hatene Maromak nia povu. Se Maromak nia povu mos nia lakohi rona, husik tiha deit ba, konsidera nia hanesan kobrador impostu ida ka ema ida nebee mak la konhese Maromak.

¹⁸ Hau hatete loloos ba imi, saida mak imi bandu iha mundu nee, iha lalehan mos bandu. I saida mak imi foo lisensa atu halo iha mundu nee, iha lalehan mos foo lisensa.

¹⁹ Iha tan buat ida mak Hau hakarak hatete: Hosi imi sira nee, se iha ema nain rua mak lian ida hakarak ida iha mundu nee husu buat ruma ba Hau nia Aman iha lalehan, Nia sei foo ba imi.

²⁰ Tanba se iha ema nain rua ka tolu halibur hamutuk hodi Hau nia naran, Hau mos iha sira nia klaran.”

Komparasaun kona ba ema nebee lakohi foo perdaun ba nia maluk

²¹ Depois Pedro mai husu ba Jesus, “Nai, se hau nia maluk ida halo sala hasoru hau, hau tenki perdua nia dala hira? Too dala hitu ka?”

²² Jesus hataan, “Lae, laos dala hitu deit! Maibee o tenki perdua nia too hitu-nulu dala hitu.

²³ Tanba reinu lalehan nian kompara hanesan nee: Iha loron ida, liurai ida hakarak sura nia osan nebee mak nia ema sira deve.

²⁴ Bainhira nia hahuu sura, iha ema balu lori nia ema ida mai. Ema nee deve osan mean rihun sanulu.

²⁵ Maibee ema nee la iha kbiit atu selu. Entaun liurai foo orden ba nia soldadu sira atu baa faan tiha ema nee, nia feen ho oan sira ho mos nia rikusoin hotu.

²⁶ Rona nunee, ema nee hakneak hakruuk too rai iha liurai nia ain hodi husu dehan, ‘Tulun hau lai, foo tempu mai hau! Hau sei selu hotu hau nia tusan nee.’

²⁷ Liurai hanoin loos nia, i hamoos tiha nia tusan hotu hodi husik nia baa ho livre.

²⁸ Bainhira ema nee sai mai, nia hetan nia kolega atan ida nebee uluk deve nia osan mutin atus ida. Nia baa kaer ema nee i buti nia kakorok hodi sisi dehan, ‘O tenki selu hotu o nia tusan nee!’

²⁹ Rona nunee, nia kolega atan nee hakneak hakruuk too rai hodi husu dehan, ‘Tulun hau lai, foo tempu mai hau! Hau sei selu hotu hau nia tusan nee.’

³⁰ Maibee ema nee la simu, nia sulan nia kolega nee ba iha komarka too selu hotu nia tusan.

³¹ Bainhira liurai nia funsionariu sira seluk haree, sira nia laran susar teb-tebes i sira baa kesar iha liurai.

³² Depois liurai bolu ema nee hodi dehan, ‘O ema laran aat! O nia tusan sira hotu hau hamoos hotu tiha ona tanba o hakneak hodi husu mai hau.

³³ Hau hatudu tiha ona laran luak ba o. Tuir loloos o mos tenki hatudu laran luak ba o nia kolega nee!’

³⁴ Liurai nee hirus teb-tebes too haruka ema baa lori ema aat nee ba kastigu iha komarka laran too selu hotu nia tusan.”

³⁵ Jesus taka Nia komparasaun dehan, “Hau nia Aman iha lalehan mos sei halo nunee ba imi ida-idak, se imi la foo perdaun ba imi nia maluk ho fuan-laran tomak.”