Mateus 16 - Biblia Tetun Dili

Ema Farizeu ho Saduseu husu Nai Jesus atu hatudu sinal

¹ Iha loron ida ema balu hosi grupu relijiaun Farizeu ho Saduseu mai koko Jesus. Sira husu para Nia hatudu tan sinal ida ba sira hodi hatudu katak Nia kbiit nee mai duni hosi Maromak.

² Maibee Jesus hataan, “Bainhira loromatan atu besik monu, imi haree kalohan sai mean, imi dehan, aban la udan.

³ Iha dadeer-saan, bainhira imi haree loromatan leno kalohan nakukun, imi dehan, orsida udan. Imi hatene sinal nebee mosu iha kalohan. Maibee sinal nebee akontese iha tempu nee, imi la hatene.

⁴ Imi agora nee mesak aat deit i la foo laran ba Maromak! Imi husu Hau hatudu sinal atu imi bele fiar. Maibee Hau sei la hatudu. Milagre nebee uluk Maromak halo liu hosi profeta Jonas too ona.” Koalia tiha hotu, Jesus lao husik tiha sira.

Kuidadu ho ema Farizeu ho Saduseu sira nia hanorin

⁵ Jesus ho Nia eskolanti sira baa iha tasi sorin. Too iha nebaa Nia eskolanti sira foin hanoin katak sira haluha lori paun.

⁶ Depois Jesus hatete ba sira, “Matan moris neon nain! Hadook aan hosi ema Farizeu ho Saduseu sira nia fermentu.”

⁷ Nunee Nia eskolanti sira komesa hatete ba malu dehan, “Nia koalia hanesan nee tanba ita la lori paun.”

⁸ Jesus hatene hela saida mak sira koalia. Entaun Nia hatete, “Imi nia fiar fraku! Nusaa mak imi diskuti malu fali kona ba la iha paun?

⁹ Imi seidauk komprende ka? Imi haluha ona paun fuan lima nebee Hau fahe ba ema rihun lima? Iha tempu nebaa imi tau hamutuk hahaan nebee resin too bote hira?

¹⁰ Depois oinsaa ho paun fuan hitu nebee Hau fahe ba ema rihun haat? Imi tau hamutuk hahaan nebee resin too bote hira?

¹¹ Nusaa mak imi la komprende katak Hau laos koalia kona ba paun. Maibee Hau foo hanoin ba imi atu kuidadu ho ema Farizeu ho Saduseu sira nia fermentu.”

¹² Nee mak foin Nia eskolanti sira komprende katak, Nia laos koalia kona ba fermentu nebee mak halo trigu sae. Maibee Nia koalia kona ba ema Farizeu ho Saduseu sira nia hanorin nebee mak lori ema lao sala dalan.

Pedro rekonhese Nai Jesus mak Kristu

¹³ Depois Jesus too iha rejiaun Sezareia Filipi. Iha nebaa Nia husu ba Nia eskolanti sira dehan, “Tuir ema konta, Hau, Ema Oan nee see?”

¹⁴ Sira hataan, “Iha balu dehan, Ita Boot João Sarani Nain. Balu tan dehan, profeta Elias. Seluk tan dehan, Jeremias ka profeta ida seluk.”

¹⁵ Jesus husu tan, “Maibee, tuir imi rasik, Hau nee see?”

¹⁶ Simão Pedro hataan, “Ita Boot nee Kristu, Ida nebee Maromak promete ona hori uluk atu haruka mai. Ita Boot mak Maromak nebee Moris nia Oan.”

¹⁷ Jesus dehan, “Simão, Jonas nia oan, o hetan bensaun, tanba laos ema mak foo hatene ba o kona ba buat nee. Maibee Hau nia Aman iha lalehan mak foo hatene ba o.

¹⁸ Hau hatete ba o, Hau bolu o Pedro, nee dehan katak fatuk isin. Hau sei harii Hau nia igreja iha fatuk nee nia leten, i infernu mos la bele domina no manaan sira.

¹⁹ Hau sei foo xavi reinu lalehan nian ba o. Saida mak o bandu iha mundu nee, iha lalehan mos bandu. I saida mak o foo lisensa atu halo iha mundu nee, iha lalehan mos foo lisensa.”

²⁰ Depois Jesus bandu Nia eskolanti sira para la bele hatete sai ba see-see deit katak Nia mak Kristu.

Nai Jesus foo sai katak Nia sei mate i moris fali

²¹ Komesa hosi loron nee, Jesus hatete sai ba Nia eskolanti sira katak, Nia tenki baa iha Jerusalém i tenki simu terus oi-oin. Nai ulun Judeu sira, nai-lulik nia ulun sira ho mestri relijiaun sira sei halo terus Nia. Ema sei oho tiha Nia, maibee iha loron tolu, Nia sei moris fila fali.

²² Rona nunee, Pedro dada tiha Jesus ba sorin hodi siak Nia dehan, “Nai! Husu boot Maromak sei la foo lisensa atu buat nee akontese.”

²³ Maibee Jesus fila ba Pedro hodi siak fali nia dehan, “Satanás, sai tiha hosi nee! O atu taka dalan fali mai Hau! O nia hanoin nee laos mai hosi Maromak, maibee mai hosi ema nia hanoin.”

²⁴ Depois Jesus dehan ba Nia eskolanti sira, “See mak hakarak tuir Hau, nia tenki nega nia aan, lori nia krus i tuir Hau. Nee hanesan husik tiha nia hakarak rasik, tenki prontu simu terus, hanesan ema nebee loro-loron lori nia krus too mate. I nia tenki tuir Hau nafatin.

²⁵ Tanba see mak hakarak salva nia aan, nia sei lakon nia moris. I see mak lakon nia moris tanba tuir Hau, nia sei hetan moris rohan-laek.

²⁶ Folin saida se ema ida nian tiha mundu tomak maibee nia klamar lakon? La iha buat ida mak nia bele foo hodi troka nia klamar.

²⁷ Tanba aban-bainrua Hau, Ema Oan sei fila fali mai hosi lalehan ho Hau nia Aman nia naroman nabilan, hamutuk ho Nia anju sira. Iha tempu nee mak Hau sei foo ba ema ida-idak tuir saida mak sira halo.

²⁸ Hau hatete loloos ba imi, hosi imi sira nee, balu sei moris too haree Hau, Ema Oan mai ukun nudar Liurai, mak foin sira mate.”