Mateus 12 - Biblia Tetun Dili

Nai Jesus mak loron Sabadu nia Nain

¹ Iha loron Sabadu ida, Jesus ho Nia eskolanti sira lao liu hosi ema nia toos. Nia eskolanti sira hamlaha, entaun sira komesa korut trigu musan ba haan.

² Iha ema hosi grupu relijiaun Farizeu haree, i sira hasee Jesus dehan, “Haree took. Ita Boot nia eskolanti sira serbisu fali iha loron Sabadu. Ida nee kontra ita nia lei!”

³ Jesus hataan, “Imi lee tiha ona saida mak liurai David halo. Iha loron ida David ho nia ema sira hamlaha loos.

⁴ Nia tama ba Maromak nia uma. Iha nebaa iha paun nebee nai-lulik sira oferese ona ba Maromak. Tuir loloos, so nai-lulik sira deit mak bele haan paun nee, liurai David ho nia ema sira nee la bele. Maibee David foti tiha paun nee, i nia ho nia ema sira haan.

⁵ Imi la lee Moisés nia lei ka? Iha loron Sabadu-sabadu nai lulik sira kontra lei Sabadu nian iha Maromak nia uma. Maski nunee, Maromak la foo sala ba sira.

⁶ Hau dehan ba imi, agora iha imi nia leet iha Ema ida boot liu uma kreda.

⁷ Iha Livru Sagradu hakerek dehan, ‘Hau hakarak atu imi hatudu laran diak ba malu. Se lae imi lori sakrifisiu foo mai Hau mos la iha folin.’ Se imi komprende didiak Maromak nia Liafuan nee, klaru imi la foo sala ba Hau nia eskolante sira.

⁸ Tanba Hau, Ema Oan, mak Nain ba loron Sabadu.”

Nai Jesus kura ema iha loron Sabadu

⁹ Depois Jesus lao hosi toos nee, baa tama iha sira nia uma kreda.

¹⁰ Iha nebaa, iha mane ida nia liman sorin mate. Ema Farizeu sira buka dalan atu foo sala ba Jesus. Entaun sira husu ba Jesus dehan, “Tuir lei Moisés nian, bele kura ema moras iha loron Sabadu ka lae?”

¹¹ Jesus hataan, “Se karik iha loron Sabadu ida mak imi nia bibi ida monu tama ba rai kuak laran, laos imi sei baa hasai?

¹² Entaun halo buat diak iha loron Sabadu mos la kontra lei. Tanba ema folin boot liu se kompara ho bibi.”

¹³ Depois Nia dehan ba ema liman sorin mate nee, “Lolo o nia liman nee mai!” Ema nee lolo baa, i nia liman diak kedas hanesan fali nia liman sorin.

¹⁴ Entaun ema Farizeu sira sai tiha ba liur hodi kombina malu para oho Jesus.

^15a Maibee Jesus hatene hela ema Farizeu sira nia planu, nunee Nia husik tiha fatin nee.

Nai Maromak hili nanis Jesus atu serbii Nia

^15b Ema barak tuir Jesus, i Nia kura sira nia moras hotu.

¹⁶ Maibee Jesus bandu sira para la bele hatete sai kona ba Nia.

¹⁷ Nunee Nia halo tuir buat nebee mak Maromak foo sai tiha ona liu hosi profeta Isaias. Maromak dehan,

¹⁸ “Haree baa! Nee Hau nia Atan nebee Hau hili. Hau hadomi Nia, i Hau nia laran haksolok nafatin ba Nia. Hau sei tau Hau nia Espiritu iha Nia, i Nia sei foo sai lia loos ba ema hosi nasaun hotu-hotu.

¹⁹ Nia la diskuti malu i la hakilar ema. Nia la koalia ho lian makaas tutuir dalan.

²⁰ Onu nebee besik atu tohar, Nia la silu tohar. Ahi oan nebee besik atu mate, Nia la huu mate. Nia sei hatudu Nia laran luak bebeik too lia loos mak manaan.

²¹ Ema hosi nasaun hotu-hotu sei laran metin ba Nia.”

Nai Jesus nunka uza Satanás nia kbiit

²² Depois ema balu lori mane ida ba Jesus. Ema nee matan delek i monok tanba espiritu aat domina nia. Jesus kura nia, nunee nia bele koalia no haree.

²³ Ema hotu admira hodi dehan, “Karik Ema nee mak David nia Jerasaun nebee Maromak promete atu haruka mai.”

²⁴ Maibee bainhira ema hosi grupu relijiaun Farizeu rona nunee, sira dehan, “Ema nee bele duni sai espiritu aat tanba Nia simu kbiit hosi Belzebu, espiritu aat sira nia xefi.”

²⁵ Maibee Jesus hatene sira hotu nia hanoin. Nunee Nia hatete ba sira, “Se iha nasaun ida, nia povu haan malu hela deit, nasaun nee sei rahun. Se iha sidade ida ka uma kain ida, nia ema sira istori malu hela deit, sira sei rahun.

²⁶ Nunee mos, se diabu duni sai diabu, sira sei fahe malu i kontra nia aan rasik. Entaun nia reinu sei la dura.

²⁷ Imi duun Hau dehan, hodi Belzebu nia kbiit mak Hau duni sai espiritu aat. Entaun bainhira imi nia eskolanti sira duni sai espiritu aat, sira mos uza Belzebu nia kbiit ka? Lae! Imi nia eskolanti sira rasik mak sei hatete sai katak, buat nebee imi duun Hau nee, la loos.

²⁸ Maibee se Hau duni sai espiritu aat hodi Maromak nia Espiritu, nee hatudu katak Maromak nia reinu mai ona iha imi.

²⁹ Hau foo ezemplu tan. Se ema ida hakarak tama ba hadau sasaan hosi ema forti ida nia uma, nia tenki futu tiha ema nee uluk mak foin bele naok sasaan hosi uma nee.

³⁰ Ema nebee la hamutuk ho Hau, nia kontra Hau. I ema nebee la halibur hamutuk ho Hau, nia hafahe.

³¹ Nee duni Hau hatete ba imi, ema nebee halo sala, too hatete aat Maromak, Maromak sei foo perdaun. Maibee see mak hatete aat Espiritu Santu, Maromak sei la foo perdaun ba nia.

³² Nunee mos ema nebee mak koalia kontra Hau, Ema Oan, nia sei hetan perdaun. Maibee see mak koalia kontra Espiritu Santu, Maromak la foo perdaun ba nia too tinan ba tinan.”

Ai huun ho nia fuan

³³ Jesus koalia nafatin ba ema Farizeu sira dehan, “Se imi dehan ai huun nebee diak maka sei foo fuan diak. Maibee se imi dehan ai huun nebee la diak maka sei foo fuan la diak. Tanba hosi ai nee nia fuan mak hatudu katak ai huun nee diak ka la diak.

³⁴ Imi nee hanesan samea nebee fila lia tuun-sae! Imi ema laran aat bele koalia buat diak? Lae! Tanba buat nebee mak iha ema nia laran, ida nee mak sei sai hosi nia ibun.

³⁵ Ema nebee diak koalia liafuan diak, tanba nia laran nakonu ho buat diak. I ema nebee aat koalia buat aat, tanba nia laran nakonu ho buat aat.

³⁶ Hanoin didiak! Iha loron ikus bainhira Maromak tesi ema hotu-hotu nia lia, Nia sei tetu ema nia liafuan ida-idak. Imi nia liafuan nebee mak imi koalia arbiru, imi tenki responsabiliza iha Maromak nia oin.

³⁷ Tanba tuir o nia liafuan, o sei sai ema nebee loos i tuir o nia liafuan mos o sei hetan kastigu.”

Ema eziji Nai Jesus atu hatudu sinal

³⁸ Depois ema Farizeu ho mestri relijiaun balu husu ba Jesus, “Mestri, ami hakarak haree sinal ruma hosi Ita Boot.”

³⁹ Jesus hataan, “Imi ema agora nee mesak aat deit i la foo laran ba Maromak! Imi eziji Hau hatudu sinal ida. Maibee Hau sei la hatudu. Hau so hatudu deit sinal nebee uluk halo liu hosi profeta Jonas.

⁴⁰ Jonas hela iha ikan boot nia kabun laran loron tolu kalan tolu. Nunee mos Hau, Ema Oan, sei hela iha rai okos loron tolu kalan tolu.

⁴¹ Iha loron ikus bainhira Maromak tesi ema hotu-hotu nia lia, ema sira hosi sidade Ninive sei hamriik hamutuk ho ema sira agora nee, hodi foo kastigu ba imi. Tanba uluk, bainhira Jonas baa foo sai Maromak nia Liafuan ba sira, sira husik kedas sira nia sala. Agora Ida iha imi nia leet nee boot liu fali Jonas.

⁴² I liurai feto hosi rai Seba, mos sei moris fali, i hamriik hodi foo kastigu ba imi nebee moris agora, tanba uluk nia mai hosi rai dook atu rona rasik liafuan matenek nian hosi liurai Salomão. Afinal agora iha imi nia leet iha Ida ke boot liu fali liurai Salomão.”

Espiritu aat fila fali ba nia hela fatin

⁴³ “Bainhira espiritu aat sai hosi ema ida, espiritu aat nee baa lao lemo-lemo iha rai fuik maran hodi buka fatin atu hela, maibee nia la hetan.

⁴⁴ Entaun nia dehan, ‘Diak liu hau fila fali ba hau nia hela fatin uluk.’ Bainhira nia fila, nia haree fatin nee mamuk, moos tiha ona i buat hotu-hotu tau tuir nia fatin.

⁴⁵ Depois espiritu aat nee baa bolu tan espiritu aat hitu nebee aat liu fali nia, i sira hotu baa hela iha ema nee. I ema nee nia kondisaun aat liu fali uluk. Nunee mos sei akontese ho ema aat sira nebee moris agora nee.”

Nai Jesus nia familia loloos

⁴⁶ Bainhira Jesus koalia hela ho ema lubun boot nee, Nia inan ho Nia alin sira mai hamriik iha liur i hakarak tebes atu hasoru Nia.

⁴⁷ Entaun ema ida foo hatene ba Jesus dehan, “Ita Boot nia inan ho alin sira hamriik iha liur. Sira hakarak tebes hasoru Ita Boot.”

⁴⁸ Maibee Jesus hataan ba ema nee dehan, “Hau nia inan mak see? I Hau nia alin sira mak see?

⁴⁹ Depois Nia hatudu ba Nia eskolanti sira hodi dehan, “Nee mak Hau nia inan ho Hau nia alin sira.

⁵⁰ Tanba see deit mak halo tuir Hau nia Aman iha lalehan nia hakarak, nia mak Hau nia alin mane, nia mak Hau nia alin feto i nia mak Hau nia inan.”