Mateus 11 - Biblia Tetun Dili

João Sarani Nain haruka nia eskolanti ba Nai Jesus

¹ Bainhira Jesus hanorin tiha buat sira nee hotu ba Nia eskolanti nain sanulu resin rua, Nia husik tiha fatin nee. Depois Nia baa iha aldeia ba aldeia iha rejiaun nee hodi hanorin ema i foo sai Nai Maromak nia Novidade Diak.

² Iha tempu nebaa João Sarani Nain tama ona iha kadeia. Nia rona buat nebee Kristu halo. Nunee nia haruka nia eskolanti balu baa hasoru Jesus hodi husu,

³ “Ita Boot mak Ema ida nebee Maromak promete atu haruka mai ka, ami tenki hein ema seluk?”

⁴ Jesus hataan dehan, “Imi fila baa konta ba João kona ba buat hotu-hotu nebee imi ohin rona ho saida mak imi haree.

⁵ Ema matan delek bele haree. Ema lao la diak bele lao. Ema moras lepra, isin sai moos. Ema tilun diuk bele rona. Ema mate bele moris fali. Ema kiak rona Novidade Diak.

⁶ Ema nebee fiar nafatin mai Hau too rohan, nia hetan bensaun. ”

⁷ Bainhira João nia eskolanti sira fila ona, Jesus komesa koalia ba ema barak nee kona ba João. Nia husu, “Uluk imi baa iha rai fuik maran hodi haree see? Imi baa atu haree ema nebee hanesan onu nebee anin huu baa-mai ka? Lae!

⁸ Entaun imi baa atu haree see? Imi baa atu haree ema nebee hatais hena folin karun ka? Lae! Ema nebee hatais hena folin karun hela iha liurai nia uma.

⁹ Entaun imi baa atu haree see? Imi hanoin atu haree Maromak nia profeta ka? Loos duni! Maibee Hau hatete ba imi, João nee boot liu profeta.

¹⁰ Uluk kedas Livru Sagradu temi ona kona ba nia dehan, ‘Rona mai! Hau haruka Hau nia ema ida baa uluk O hodi prepara dalan ba O.’

¹¹ Hau hatete loloos ba imi, iha mundu nee la iha ema ida nebee moris hosi inan ida nebee boot liu João Sarani Nain. Maski nunee, ema nebee kiik liu iha Reinu lalehan nian nia sei boot liu João.

¹² Hosi tempu João Sarani Nain mai too agora, ema ataka Reinu lalehan nian hodi domina nia.

¹³ Molok João mai, profeta sira ho mos Moisés nia lei foo sai tiha ona kona ba saida mak akontese agora dadauk.

¹⁴ Se imi hakarak fiar ida nee ka lae, João nee mak profeta Elias nebee durante nee ema hein hela atu mai.

¹⁵ Imi nebee iha tilun, rona didiak baa!”

¹⁶ Jesus dehan tan, “Ema agora nee, Hau atu kompara ho saida? Sira hanesan labarik nebee tuur iha merkadu hodi hakilar ba sira nia kolega dehan,

¹⁷ ‘Ami toka muzika haksolok, maibee imi la dansa. Ami kanta muzika tristi, maibee imi la tanis lelir.’

¹⁸ Bainhira João mai, nia sempre jejun i la hemu tua, depois ema dehan, espiritu aat tama iha nia.

¹⁹ Maibee Hau, Ema Oan mai, Hau haan ho hemu hanesan ema baibain, i ema dehan, Hau kaan-teen ho lanu-teen, i halo belun ho kobrador impostu sira no ema sala nain. Maromak nia matenek hatudu liu hosi ema nia moris loos.”

Ema nebee lakohi husik sala sei terus

²⁰ Depois Jesus komesa kritika ema iha aldeia balu, tanba iha aldeia hirak nee mak Nia halo milagre barak liu, maibee ema sira nee lakohi husik sira nia sala.

²¹ Jesus dehan, “Imi ema Korazim sei terus. I imi ema Betsaida mos sei terus. Hau halo ona milagre bar-barak iha imi nia leet, maibee imi lakohi husik imi nia sala. Ema nebee hela iha sidade Tiru ho Sidon nunka haree milagre sira nee. Se sira haree karik, maka sira sei tuur iha ahu kdesan i hatais hena lutu hodi hatudu katak sira husik ona sira nia sala.

²² Maibee Hau hatete ba imi, iha loron ikus bainhira Maromak tesi ema hotu-hotu nia lia, imi sei simu kastigu todan liu fali ema Tiru ho ema Sidon.

²³ Nunee mos imi ema Kafarnaum sira, keta hanoin katak, Maromak sei foti sae imi ba lalehan. Lae! Nia sei soe imi ba infernu. Se karik uluk ema nebee laos judeu sira hela iha sidade Sodoma haree milagre nebee Hau halo iha imi nia rai nee, entaun sira husik sira nia sala, i Maromak la sunu motuk sidade nee.

²⁴ Hau dehan ba imi, iha loron ikus bainhira Maromak tesi ema nia lia, Maromak sei foo kastigu ba imi todan liu ema Sodoma sira nian.”

Nai Jesus foo konvite

²⁵ Iha tempu nee, Jesus agradese ba Maromak dehan, “Hau nia Aman, lalehan ho rai nia Nain, Hau agradese ba Ita Boot, tanba Ita Boot taka buat sira nee ba ema matenek ho ema eskola boot, maibee Ita Boot hatudu fali ba ema nebee kiik.

²⁶ Hau nia Aman, ida nee halo Ita Boot nia laran haksolok.”

²⁷ Hotu tiha, Jesus koalia ba ema iha nebaa nunee: “Hau nia Aman foo ona kbiit ho matenek hotu-hotu mai Hau. La iha ema ida konhese diak Hau, so Hau nia Aman deit. I la iha ema ida mak konhese diak Hau nia Aman, so Oan, Hau deit. I Hau mos hili ema seluk hodi hatudu Hau nia Aman ba sira, para sira mos bele konhese Nia.

²⁸ Mai iha Hau, imi nebee kole, imi nebee senti todan, i Hau sei foo kamaan ba imi.

²⁹ Mai aprende hosi Hau i moris tuir Hau nia hanorin, tanba Hau nee laran maus ho haraik Aan. Nunee imi nia fuan-laran bele hakmatek.

³⁰ Tanba buat nebee Hau hanorin la susar, i todan nebee Hau foo ba imi atu lori mos kamaan.”