Mateus 10 - Biblia Tetun Dili

Nai Jesus hili Nia apostolu sanulu resin rua

¹ Iha loron ida Jesus bolu Nia eskolanti nain sanulu resin rua, i foo kbiit ba sira hodi duni sai espiritu aat hosi ema i kura moras oi-oin.

² Sira nain sanulu resin rua nia naran mak hanesan tuir mai nee: Primeiru, Simão, ema mos bolu nia Pedro, ho nia alin André, Tiago ho nia alin João, sira nain rua Zebedeu nia oan,

³ Filipe ho Bartolomeu, Tomé ho Mateus, Mateus nee kobrador impostu, Tiago, Alfeu nia oan ho Tadeu,

⁴ Simão, ida nebee tuir partidu Patriota, ho Judas Iscariotes, nebee ikus mai nia mak faan Jesus.

Nai Jesus haruka Nia apostolu sira

^5-6 Liu tiha nee, Jesus haruka Nia apostolu nain sanulu resin rua, no Nia foo orden dehan: “La bele baa tama iha ema nebee laos ema Judeu sira nia leet. Ema Samaria nia aldeia mos la bele tama. Maibee imi tenki baa iha ema Israel sira deit, tanba sira hanesan bibi malae nebee lao sala dalan ona.

⁷ Baa foo hatene ema Israel sira dehan, ‘Tempu besik ona atu Maromak ukun imi.’

⁸ Baa kura ema moras, halo moris fali ema mate, halo ema moras lepra isin moos fali, i duni sai espiritu aat hosi ema nia laran. Imi simu kbiit nee ho gratis, nunee mos imi tenki foo ho gratis.

⁹ La bele lori osan mean ka osan mutin, ka doit riti ida mos la bele.

¹⁰ Lalika lori bukae, lalika lori hena tahan rua ka sandalias, i lalika lori ai tonka. Tanba ema nebee serbisu, nia iha direitu atu ema foo buat nebee mak nia presiza.

¹¹ Bainhira imi tama iha sidade ida ka aldeia ida, buka ema nebee laran diak, i hela iha nia uma too imi sai hosi fatin nee.

¹² Bainhira imi tama iha ema nia uma, imi dehan: "Shalom, Maromak foo bensaun ba imi".

¹³ Se uma nain simu imi nia liafuan nee ho diak, sira sei hetan bensaun. Se lae, Maromak dada fila fali bensaun nee hosi sira.

¹⁴ Se imi baa iha uma ida ka aldeia ida i ema la simu imi ka lakohi rona imi nia liafuan, husik tiha fatin nee, i baku rai rahun hosi imi nia ain okos nudar sinal katak sira rasik mak sei lori todan.

¹⁵ Hau hatete loloos ba imi, iha loron ikus bainhira Maromak tesi ema hotu-hotu nia lia, ema iha aldeia nee sei simu kastigu todan liu fali ema aat sira nebee uluk hela iha rai Sodoma no Gomora.”

Nai Jesus nia eskolanti sira sei simu terus no susar

¹⁶ “Rona didiak, Hau haruka imi baa hanesan bibi malae baa tama iha asu fuik nia leet. Imi tenki matenek hanesan samea. I imi nia laran tenki moos hanesan manu pombu.

¹⁷ Maibee kuidadu, tanba ema sei mai kaer imi hodi lori imi ba iha tribunal relijiaun nian. Sira sei baku imi ho sikoti iha sira nia uma kreda laran.

¹⁸ Sira mos sei foo sala ba imi iha liurai ho nai ulun sira nia oin. Buat sira nee hotu sai nunee tanba imi tuir Hau. Nee oportunidade ba imi atu foo sai Novidade Diak ba sira ho mos ba ema nebee mak laos Judeu.

¹⁹ Bainhira ema lori imi baa hataan iha tribunal, lalika preokupa atu koalia saida ka atu hataan oinsaa. Tanba iha momentu nee Maromak sei foo hatene ba imi liafuan nebee mak imi atu koalia.

²⁰ Iha tempu nee, laos imi mak koalia, maibee imi nia Aman nia Espiritu mak koalia liu hosi imi.

²¹ Iha uma laran ida, se iha ema ida mak fiar mai Hau, nia maun-alin rasik mak sei entrega nia ba nai ulun sira para oho nia. Se oan ida fiar mai Hau, nia aman rasik mak entrega nia ba ema seluk para oho nia. I se inan-aman mak fiar, sira nia oan rasik mak hamriik hasoru sira hodi foo ba ema oho sira.

²² Ema iha nebee-nebee deit sei odi imi tanba imi tuir Hau. Maibee ema nebee mak aguenta nafatin too rohan, Maromak sei salva sira.

²³ Bainhira ema halo terus imi iha sidade ida tanba imi fiar mai Hau, halai ba sidade seluk. Hau hatete loloos ba imi, imi seidauk haleu sidade hotu iha Israel laran, Hau Ema Oan fila fali mai ona.

²⁴ Estudante ida la bele boot liu nia mestri, i atan ida la bele boot liu nia patraun.

²⁵ Se estudante ida sai hanesan nia mestri, nee too ona. I atan ida sai hanesan nia patraun, nee mos too ona. Se xefi familia rasik ema bolu dehan, diabu Belzebu, saa tan membru familia sira iha uma laran nee.”

La bele tauk ba ema, tauk deit ba Maromak

²⁶ “Nunee lalika tauk ema sira nee. Tanba buat hotu-hotu nebee agora taka hela, loron ida sei nakloke. I buat hotu-hotu nebee agora subar hela, aban-bainrua ema sei hatene.

²⁷ Buat nebee mak Hau foo hatene ba imi iha kotu-kotuk, imi tenki hatete sai. I saida mak Hau hanorin bis-bisu deit ba imi, imi tenki foo sai ho lian makaas iha ema barak nia oin.

²⁸ La bele tauk ema nebee mak hakarak oho imi, tanba sira so bele oho deit imi nia isin lolon, imi nia klamar sira la bele oho. Diak liu imi tauk ba Maromak, tanba Nia mak iha kbiit hodi oho imi nia isin lolon i soe imi nia klamar ba infernu.

²⁹ Hanoin took manu liin. Manu liin rua, ema faan sentavus ida deit. Maski baratu liu, maibee la iha ida mak monu ba rai, se imi nia Aman iha lalehan la foo lisensa.

³⁰ Laos nee deit, maibee Maromak mos hatene loloos imi nia fuuk lahan hira mak iha imi nia ulun.

³¹ Nee duni, lalika tauk, tanba imi folin boot liu manu liin barak.”

Keta moe foo sai katak ita tuir Nai Jesus

³² “See mak foo sai iha ema nia oin katak nia fiar mai Hau, aban-bainrua Hau mos sei foo sai iha Hau nia Aman iha lalehan nia oin katak, nia Hau nia ema.

³³ Maibee see mak nega Hau iha ema nia oin, aban-bainrua Hau mos sei nega nia iha Hau nia Aman iha lalehan nia oin.”

Nai Jesus mai, halo ema fahe malu

³⁴ “Keta hanoin dehan Hau mai iha mundu nee lori dame. Hau mai laos lori dame, maibee Hau mai halo ema kontra malu.

³⁵ Hau mai para halo ‘oan mane kontra nia aman, oan feto kontra nia inan, feto foun kontra nia banin feto.

³⁶ I sira nia inimigu mai hosi nia uma laran rasik.’

³⁷ See mak hadomi liu nia inan-aman duke nia hadomi Hau, nia la serve atu sai Hau nia ema. Nunee mos see mak hadomi nia oan mane ka oan feto liu fali Hau, nia la serve sai Hau nia ema.

³⁸ See mak hakarak sai Hau nia ema, nia tenki lori nia krus hodi tuir Hau, i tenki prontu atu simu terus too mate. Se lae, nia la serve sai Hau nia ema.

³⁹ Ema nebee hanoin liu nia moris iha mundu nee, nia sei lakon nia moris. Maibee see mak lakon nia moris iha mundu nee tanba nia tuir Hau, nia sei hetan moris rohan-laek.”

Nai Maromak sei selu buat nebee mak ita halo

⁴⁰ “See mak simu imi, nia simu Hau. See mak simu Hau, nia simu Ida nebee haruka Hau mai.

⁴¹ See mak simu profeta ida tanba profeta nee foo sai Maromak nia Liafuan, bainhira Maromak selu profeta sira nia kolen, ema nee mos sei simu hanesan profeta sira simu. I see mak simu ema ida nebee moris loos tanba nia moris nee loos, bainhira Maromak selu ema moris loos sira nia kolen, ema nee mos sei simu hanesan.

⁴² Hau dehan loloos ba imi, see mak foo bee kopu ida deit ba ema kiik ida tanba ema nee tuir Hau, Maromak la haluha nia kolen.”