Mateus 1 - Biblia Tetun Dili

Nai Jesus nia bei-ala sira

¹ Livru nee koalia kona ba Jesus Kristu. Jesus mai hosi liurai David nia jerasaun, i David nee mai hosi Abraão nia jerasaun.

² Jesus nia bei-ala sira nia naran komesa hosi Abraão too liurai David hanesan tuir mai nee: Abraão nia oan mak Isac. Isac nia oan mak Jacó. Jacó nia oan mak Judá ho ninia maun-alin sira.

³ Judá nia oan mak Perez ho Zerá, sira nia inan naran Tamar. Perez nia oan mak Hesron. Hesron nia oan mak Ram.

⁴ Ram nia oan mak Aminadab. Aminadab nia oan mak Nahason. Nahason nia oan mak Salmon.

⁵ Salmon nia oan mak Boaz, nia inan naran Rahab. Boaz nia oan mak Obed, nia inan naran Rute. Obed nia oan mak Jessé.

⁶ Jessé nia oan mak liurai David. David nia oan mak Salomão, nia inan nee uluk Urias nia feen.

⁷ Salomão nia oan mak Roboão. Roboão nia oan mak Abias. Abias nia oan mak Aza.

⁸ Aza nia oan mak Josafat. Josafat nia oan mak Jorão. Jorão nia oan mak Uzias.

⁹ Uzias nia oan mak Jotam. Jotam nia oan mak Ahaz. Ahaz nia oan mak Ezequias.

¹⁰ Ezequias nia oan mak Manassés. Manassés nia oan mak Amon. Amon nia oan mak Jozias.

¹¹ Jozias nia oan mak Jekonias ho nia alin sira. Iha sira nia tempu mak militar lori povu Israel baa destera iha Babilónia.

¹² Tempu destera iha Babilónia hotu ona: Jekonias nia oan mak Salatiel. Salatiel nia oan mak Zorobabel.

¹³ Zorobabel nia oan mak Abiud. Abiud nia oan mak Eliakim. Eliakim nia oan mak Azur.

¹⁴ Azur nia oan mak Zadok. Zadok nia oan mak Jakim. Jakim nia oan mak Eliud.

¹⁵ Eliud nia oan mak Eleazar. Eleazar nia oan mak Matan. Matan nia oan mak Jacó.

¹⁶ Jacó nia oan mak José. José kaben ho Maria, i Maria nee mak tuur ahi oan mane ida, nia naran Jesus, nebee ema mos bolu Kristu.

¹⁷ Nunee, komesa hosi Abraão too David hamutuk jerasaun 14. Hosi David too militar lori povu Israel baa destera iha Babilónia mos jerasaun 14. I hosi jerasaun nebee destera iha Babilónia too Jesus Kristu hamutuk jerasaun 14 tan.

Nai Jesus Kristu moris

¹⁸ Istoria kona ba Jesus Kristu nia moris hanesan nee: Nia inan Maria troka prenda ona ho José. Maibee bainhira sira nain rua seidauk moris hamutuk nudar feen ho laen, Maria isin rua ona liu hosi Espiritu Santu.

¹⁹ Tanba José, nia laen, ema nebee laran moos, nia lakohi hamoe nia feen iha ema barak nia oin. Entaun nia desidi atu husik Maria nonook deit.

²⁰ Maibee bainhira José hanoin hela planu nee, Nai Maromak nia anju ida mai hatudu aan ba nia liu hosi mehi hodi dehan, "José, liurai David nia jerasaun, la bele tauk atu kaben ho Maria, tanba labarik nebee mak iha Maria nia kabun-laran nee mai hosi Espiritu Santu.

²¹ Maria sei tuur ahi oan mane ida. O tenki foo naran Jesus, tanba Nia mak sei salva Nia povu hosi sira nia sala."

²² Buat hirak nee hotu sai nunee tuir saida mak Nai Maromak nia profeta hori uluk kedas hakerek ona dehan,

²³ "Iha feto raan ida sei isin rua i tuur ahi oan mane ida. Labarik nee nia naran Emanuel." Nee dehan katak "Maromak hamutuk ho ita.”

²⁴ Bainhira José hadeer, nia halo tuir saida mak anju nee hatete ba nia. Nia kaben ho Maria.

²⁵ Maibee nia la halo relasaun seksual ho Maria too Maria tuur ahi. I José foo naran ba labarik nee, Jesus.