Marcos 9 - Biblia Tetun Dili

¹ Imi keta haluha Hau nia liafuan nee: hosi imi nee hotu, imi balu seidauk mate, maibee sei haree Nai Maromak tuur i kaer ukun ho forsa boot.”

Iha foho leten Nai Jesus fila aan tiha i Nia hena mos nabilan

² Liu tiha loron neen, Jesus lori Pedro, Tiago, ho João, sae ba iha foho aas ida. Iha nebaa la iha ema. Bainhira sira too iha foho leten, sira hakfodak, tanba sira haree Jesus fila aan tiha.

³ Nia hena mos mutin nabilan tiha. Iha mundu nee, la iha buat ida mak mutin nabilan liu Nia hena nee.

⁴ Derepenti deit sira haree Jesus koalia hela ho Elias no Moisés.

^5-6 Sira nain tolu tauk atu mate, too Pedro koalia arbiru deit nunee, “Mestri, sorti ami iha nee. Diak liu ami halo uma oan tolu. Ida foo ba Ita Boot, ida ba Moisés, ho ida tan foo ba Elias.”

⁷ Depois kalohan tuun mai falun tiha sira. I sira rona lian ida sai hosi kalohan nee dehan, “Rona mai! Jesus nee Hau nia Oan doben. Imi tenki rona didiak ba Nia!”

⁸ Bainhira Pedro sira rona liafuan nee, sira haree baa-mai, maibee la haree ema ida. Sira haree mak Jesus mesak deit.

⁹ Nee liu tiha, Jesus ho Nia eskolanti sira tuun fila fali hosi foho nee mai. Jesus bandu sira i hatete, “Buat nebee ohin imi haree nee, imi la bele konta sai ba ema. Hau Ema Oan. Hau tenki mate. Bainhira Hau moris fali ona, foin imi bele foo hatene ba ema.”

¹⁰ Sira kaer metin liafuan nebee Jesus hatete nee. Sira la konta ba ema. Maibee sira nain tolu husu ba malu dehan, “Nia dehan Nia sei mate i moris fali. Oinsaa mak nee?”

¹¹ Nunee sira husu ba Jesus, “Tuir mestri relijiaun sira dehan, ‘Elias tenki mai uluk, foin Kristu mai.’ Maibee tuir Ita Boot nia hanoin, oinsaa?”

¹² Jesus hataan, “Loos duni. Elias tenki mai uluk hodi loke dalan ba Kristu. Kristu mak Nai Maromak hili hori uluk kedas. Maibee oinsaa? Nai Maromak nia Liafuan hakerek ona kona ba Ema Oan, dehan nunee: Bainhira Nia mai, ema sei halo terus i oho Nia. Nusaa mak imi seidauk komprende?

¹³ Imi tenki rona didiak! Elias mai tiha ona. Maibee ema halo susar nia, tuir sira nia hakarak. Buat sira nee hotu hodi kumpri saida mak Nai Maromak nia profeta sira hakerek tiha ona hori uluk.”

Nai Jesus duni sai espiritu aat hosi labarik monok ida

¹⁴ Bainhira Jesus ho Nia eskolanti nain tolu nee, hasoru malu fali ho Nia eskolanti sira seluk, sira haree ema barak mak halibur malu hela. I Jesus nia eskolanti balu diskuti hela ho mestri relijiaun sira.

¹⁵ Bainhira ema barak nee haree Jesus, sira hakfodak, tanba sira hanoin Nia sei iha hela foho leten. Nunee sira halai baa hasoru Nia.

¹⁶ Depois Jesus husu ba sira, “Imi haksesuk saida nee?”

¹⁷ Maibee iha ema ida dehan, “Senhor, ajuda lai. Hau lori hau nia oan mane atu Ita Boot kura. Nia monok, tanba espiritu aat tama iha nia.

¹⁸ Bainhira espiritu aat nee ataka ona, nia riba labarik nee ba rai. Nia kabeen mutin sai, i halo nia ruun nehan. Depois nia isin toos tiha, hanesan ai. Hau husu ona ba Ita Boot nia eskolanti sira, para duni sai tiha espiritu aat nee. Maibee sira la bele halo buat ida.”

¹⁹ Rona nunee, Jesus koalia makaas ba Nia eskolanti sira, “Imi nee demais ona! Hau hanorin bebeik ba imi, maibee imi la komprende nafatin deit. Imi seidauk fiar deit Hau. Hau tenki pasiensia ba imi too bainhira?! Lori labarik nee mai iha nee!”

²⁰ Nunee sira lori labarik nee ba Jesus. Maibee espiritu aat nee foin haree Jesus, nia riba kedas labarik nee ba rai, too nia duir baa-mai, i kabeen mutin mos sai hosi ibun.

²¹ Haree nunee, Jesus husu ba labarik nia aman, “O nia oan nia moras nee kleur ona ka?” Nia aman hataan, “Komesa nia sei kiik.

²² Kleur ona espiritu aat nee atu oho labarik nee. Nia soe hau nia oan bebeik ba ahi ho ba bee laran. Nee duni Senhor, ajuda lai. Se bele, Ita Boot hadomi ami lai, kura labarik nee.”

²³ Jesus hataan, “Nusaa mak o dehan ‘se bele’? Hau bele halo buat hotu-hotu, naran katak ema fiar.”

²⁴ Nee hotu tiha, labarik nee nia aman hataan ho laran susar, “Senhor, hau fiar ona. Maibee tulun hau para hau nia fiar nee bele makaas liu tan.”

²⁵ Bainhira Jesus haree ema barak halai mai hamutuk iha fatin nee, Nia hatete ba espiritu aat nee, “Espiritu aat nebee halo labarik nee diuk no monok, sai ona hosi nia! I la bele tama tan ba nia ona.”

²⁶ Rona Jesus koalia nunee, espiritu aat nee hakilar makaas. Nia halo labarik nee monu ba rai, i tebe liman tebe ain. Depois nia sai kedas hosi labarik nee. I labarik mos dezmaia, sai hanesan tiha ema mate ida. Too ema koalia ba malu dehan, “Nia mate tiha ona!”

²⁷ Maibee Jesus kaer labarik nee nia liman hodi foti nia. I nia hadeer kedas.

²⁸ Depois Jesus ho Nia eskolanti sira husik hela fatin nee, i baa tama iha uma ida. Bainhira sira mesak ona, sira husu ba Jesus, “Mestri, tanba saa mak ami la bele duni sai espiritu aat nee?”

²⁹ Jesus hataan, “Rona didiak. Espiritu aat sira, aat duni. Tanba nee, se imi la harohan husu ajuda ba Nai Maromak, imi la iha forsa hodi duni sai espiritu hanesan nee.”

Nai Jesus foo hatene tan kona ba Nia mate

³⁰ Hotu tiha nee, Jesus ho Nia eskolanti sira husik hela tiha uma nee, i sira baa iha provinsia Galileia. Jesus lakohi atu ema hatene katak Nia iha fatin nee,

³¹ tanba Nia atu hanorin deit Nia eskolanti sira. Nia hatete ba sira, “La kleur tan, ema sei faan Hau ba ema seluk. Depois sira sei oho Hau, Ema Oan nee. Hau mate duni. Maibee iha loron tolu, Hau moris fali.”

³² Jesus foo hatene nunee, maibee Nia eskolanti sira konfunzaun hela. Sira la brani husu tan Jesus kona ba Nia koalia nee.

Nai Jesus nia eskolanti sira haksesuk malu kona ba see mak boot liu

³³ Liu tiha nee, Jesus ho Nia eskolanti sira too iha sidade Kafarnaum. Sira tama iha uma laran, i Jesus husu ba Nia eskolanti sira, “Ohin imi haksesuk saida iha dalan?”

³⁴ Maibee la iha ema ida brani atu hataan. Sira moe, tanba iha dalan sira haksesuk malu kona ba see mak boot liu.

³⁵ Depois Jesus tuur tiha hodi hanorin sira nunee, “See mak atu sai boot, nia tenki sai ema kiik, i serbii ema hotu-hotu.”

³⁶ Depois Jesus baa kous tiha labarik oan ida, hodi baa iha sira nia klaran. I Nia hatete,

³⁷ “See mak tuir Hau, nia tenki serbii ema kiik, hanesan labarik oan nee. Bainhira halo hanesan nee, nia mos serbii Hau. I see mak serbii Hau, nia serbii mos Nai Maromak, ida nebee haruka Hau mai iha mundu nee.”

See mak bele sai ita nia ema?

³⁸ Depois Jesus nia eskolanti ida, naran João, hatete, “Mestri, iha loron ida, ami haree ema duni sai espiritu aat hodi Ita Boot nia naran. Maibee ami bandu ema nee, tanba nia laos ita nia ema nebee tuir Ita.”

³⁹ Maibee Jesus hataan, “Imi la bele bandu nia! Tanba see mak uza Hau nia naran hodi halo milagre, nia sei la hatete aat Hau nia naran.

⁴⁰ See mak la kontra ita, nia ita nia ema.

⁴¹ Nee duni, hanoin didiak. Se ema hatene katak imi tuir Kristu, mak nia ajuda imi, Nai Maromak mos la haluha ema nee nia kole. Maski nia foo deit bee kopu ida mos, Nai Maromak la haluha nia.”

Keta halimar ho sala

⁴² Depois Jesus hatete tan ba sira, “Se ema ruma halo labarik oan ida tuir dalan sala, too labarik nee la fiar tan Hau, kuidadu! Diak liu ba ema nee, foti fatuk boot ida kesi ba nia kakorok, hodi baa soe tiha ba tasi laran.

⁴³ Se o halo sala ho o nia liman, tesi soe tiha liman nee! Tanba diak liu o tama lalehan ho liman ida deit, dukee o iha liman rua, maibee o tama ba infernu.

⁴⁴ [Infernu nee fatin terus nian. Iha nebaa, ular oan sira nunka mate. I ahi mos nunka mate.]

⁴⁵ Se o halo sala ho o nia ain, tesi soe tiha ain nee! Tanba diak liu o tama lalehan ho ain ida deit, dukee o iha ain rua, maibee o tama ba infernu.

⁴⁶ [Infernu nee fatin terus nian. Iha nebaa, ular oan sira nunka mate. I ahi mos nunka mate.]

⁴⁷ Se o halo sala ho o nia matan, sukit soe tiha matan nee! Tanba diak liu o tama ba lalehan ho matan ida deit, dukee o iha matan rua, maibee o tama ba infernu.

⁴⁸ Infernu nee fatin terus nian. Iha nebaa, ular oan sira nunka mate. I ahi mos nunka mate.

⁴⁹ Hau nia hanorin nee todan tebes. Nee duni, see mak atu tuir Hau, nia tenki tuir nafatin. Hanesan ema tau masin ba naan, i tamun ba ahi, para naan nee bele rai kleur.

⁵⁰ Masin nee diak duni, tanba halo hahaan furak. Maibee se masin nee, nia meer la iha tan ona, nia la iha folin. Soe tiha deit! Imi mos tenki hanesan masin. Imi tenki moris paz ho ema hotu-hotu. Nee duni, para ona ho imi nia haksesuk kona ba see mak boot, see mak kiik.”