Marcos 8 - Biblia Tetun Dili

Nai Jesus foo hahaan ba ema rihun haat

^1-3 Iha loron ida, ema barak mai hamutuk hodi rona Jesus nia koalia. Ema sira nee tuir Nia loron tolu kalan tolu ona, too sira nia bukae hotu ona. Tuir mai, Jesus bolu Nia eskolanti sira dehan, “Hau nia fuan lakon i hadomi teb-tebes ema sira nee. Sira balu mai hosi rai dook, i sira iha nee loron tolu kalan tolu ona, too sira nia bukae hotu ona. Keta husik sira fila ho kabun mamuk. Keta halo be, sira oin nakukun iha dalan.”

⁴ Jesus nia eskolanti sira hataan, “Mestri, fatin nee dook hosi aldeia. Oinsaa mak ita bele foo hahaan ba ema barak ida nee?!”

⁵ Maibee Jesus husu ba sira, “Imi iha paun fuan hira?” Sira hataan, “Ami iha paun fuan hitu deit.”

⁶ Depois Jesus haruka ema barak nee tuur tiha iha rai. Tuir mai Nia foti paun fuan hitu nee, agradese ba Nai Maromak. Nia silu fahe paun nee, i Nia foo ba Nia eskolanti sira hodi baa fahe ba ema barak nee.

⁷ Sira mos iha ikan ituan. Jesus foo agradese tan ba Nai Maromak ba ikan nee, depois Nia haruka Nia eskolanti sira fahe tan ikan ba ema barak nee.

^8-9 Ema sira nee mais-ou-menus rihun haat. Sira hotu haan too bosu. Haan tiha hotu, Nia eskolanti sira baa aruma paun restu nee iha bote boot hitu. Hotu tiha, Jesus haruka sira fila ona.

¹⁰ Bainhira sira fila ona, Jesus ho Nia eskolanti sira, baa sae bero, liu hosi tasi ba iha rai ida naran Dalmanuta.

Ema Farizeu sira hakarak hamonu Nai Jesus

¹¹ Jesus foin too iha Dalmanuta, iha ema balu hosi grupu Farizeu mai hasoru Nia. Sira mai atu koko hodi hamonu Nia. Sira husu ba Nia nunee, “Mestri, halo milagre ruma para hatudu katak Ita Boot simu kbiit hosi Nai Maromak.”

¹² Jesus dada iis tiha dehan, “Tanba saa mak imi husu milagre ba Hau?! Milagre iha duni, maibee Hau la halo ba imi.”

¹³ Hotu tiha, Jesus husik hela sira. Nia ho Nia eskolanti sira sae fali bero, hodi baa iha tasi sorin baa.

Nai Jesus dehan, “Kuidadu ho ema Farizeu sira”

¹⁴ Bainhira Jesus ho Nia eskolanti sira too tiha ona iha tasi klaran, foin Nia eskolanti sira hanoin katak sira haluha tiha lori bukae. Sira lori paun fuan ida deit.

¹⁵ Rona sira koalia kona ba paun, Jesus dehan, “Imi tenki kuidadu ho liurai Erodes no ema Farizeu sira. Sira nia hanorin hanesan fermentu nebee tau ba trigu hodi halo trigu sae.”

¹⁶ Rona Nia koalia nunee, Nia eskolanti sira mos laran ru-rua. Sira dehan ba malu, “Mestri dehan saida mak nee? Karik Nia koalia nunee, tanba ita la lori paun, ka?”

¹⁷ Maibee Jesus hatene saida mak sira hanoin. Nia dehan, “Nusaa mak imi koalia deit kona ba paun?! Imi seidauk komprende, ka? Imi nia kakutak la lao duni.

¹⁸ Imi haree ona ho imi nia matan rasik, maibee imi la hatene, hanesan imi matan delek. Imi rona ho imi nia tilun rasik, maibee imi la komprende, hanesan imi tilun diuk. Imi haluha ona

¹⁹ paun fuan lima nebee Hau silu fahe hodi foo haan ema rihun lima nee, ka? Iha loron nebaa, imi aruma paun restu bote hira?” Sira hataan, “Resin bote sanulu resin rua.”

²⁰ Jesus husu tan, “Imi haluha ona katak iha tempu nebaa Hau silu fahe paun hodi foo haan ema rihun haat, ka? Imi aruma paun restu bote hira?” Sira hataan, “Resin bote hitu.”

²¹ Jesus dehan, “Nee loos duni! Imi haree ona ho matan rasik, maibee nusaa mak imi seidauk komprende Hau nia kbiit nee mai hosi nebee?”

Nai Jesus kura mane matan delek ida iha Betsaida

²² Tuir mai, Jesus ho Nia eskolanti sira too iha aldeia Betsaida. Iha fatin nee ema lori ema matan delek ida baa Jesus. Sira husu ba Jesus para bele kura nia matan.

²³ Entaun Jesus kaer ema nee nia liman i lori sai hosi aldeia nee. Nia tafui kabeen ba ema nee nia matan, i kose ho Nia liman. Nia husu, “Oinsaa? O bele haree ona buat ruma, ka?”

²⁴ Ema nee foti oin hodi haree ba baa-mai, i nia hataan, “Hau haree ema lao. Maibee hanesan ai huun mak lao.”

²⁵ Depois Jesus tau tan nia liman ba ema nee nia matan. I ema nee koko haree fali tan, derepenti deit nia matan diak i bele haree buat hotu-hotu ho moos.

²⁶ Hotu tiha, Jesus haruka ema nee fila ba nia uma, i foo hanoin dehan, “O fila ona, maibee liu hosi dalan seluk. La bele baa fali Betsaida.”

Pedro foo sai dehan Jesus nee mak Kristu, nebee Nai Maromak hatudu hori uluk kedas

²⁷ Tuir mai, Jesus ho Nia eskolanti sira baa iha aldeia-aldeia iha Sezareia Filipi. Iha dalan klaran, Nia husu ba sira, “Tuir ema konta, Hau nee see?”

²⁸ Sira hataan, “Ema balu dehan, ‘João Sarani Nain’. Balu tan dehan, ‘Maromak nia ibun ho nanaal Elias’. I seluk tan dehan, ‘Nia nee, Nai Maromak nia ibun ho nanaal ida seluk iha tempu uluk.’ ”

²⁹ Depois Jesus husu tan ba sira, “Maibee tuir imi nia hanoin, see mak Hau?” Pedro hataan, “Ita Boot nee Kristu, nebee Nai Maromak hatudu hori uluk kedas.”

³⁰ Maibee Jesus bandu sira, “Imi la bele konta ba ema seluk!”

Nai Jesus foo hatene kona ba Nia terus no Nia mate

³¹ Liu tiha nee, Jesus komesa foo hatene ba Nia eskolanti sira dehan, “Hau, Ema Loos Duni. La kleur tan, Hau sei hetan terus oi-oin, hosi nai ulun Judeu sira, nai-lulik Judeu nia ulun sira, ho mestri relijiaun sira. Sira hotu sei la simu Hau. Sira sei oho mate Hau, maibee iha loron tolu, Hau moris fali.”

³² Jesus hatete mo-moos deit, depois Pedro dada Jesus ba sorin i siak dehan, “Mestri keta koalia nunee! Hau la husik ema foti liman hasoru Ita Boot.”

³³ Maibee Pedro nia koalia nee, la tuir Nai Maromak nia hakarak. Entaun Jesus fila oin ba Nia eskolanti sira i siak makaas Pedro dehan, “Nee, diabu mak koalia. Sai hosi nee! O hanoin tuir deit ema nia hakarak, laos Nai Maromak nia hakarak.”

³⁴ Depois Jesus bolu tan ema seluk mai hamutuk ho nia eskolanti sira. Nia hanorin sira dehan, “See mak hakarak tuir Hau, nia tenki aguenta tuir nafatin Hau. Nia tenki husik tiha nia hakarak rasik, hodi tuir deit Nai Maromak nia hakarak. Maski ema atu oho nia, nia tenki tuir nafatin, hanesan ema nebee lori nia krus baa too nia fatin mate.

³⁵ Ema nebee moris deit ba nia aan, nia sei lakon buat hotu. Maibee ema nebee prontu mate tanba tuir Hau, no foo sai Nai Maromak nia Novidade Diak, nia sei moris hamutuk nafatin ho Maromak.

³⁶ Rona didiak! Se o hetan buat hotu iha mundu nee, maibee Nai Maromak la simu i soe o, o manaan saida?

³⁷ Maski o iha buat hotu-hotu iha mundu nee, o la bele uza buat sira nee hodi troka o nia klamar.

³⁸ Hanoin didiak! Iha mundu agora nee, ema halo buat aat oi-oin. Sira la interese tuir Nai Maromak. Nunee, see mak moe tuir Hau, no moe kaer metin Hau nia hanorin, Hau mos sei moe foo sai nia iha Nai Maromak nia oin. Tanba Hau nee, Ema Loos Duni, sei mai fali ho Nai Maromak nia anju sira hosi lalehan. Ami sei tuun mai ho Aman Maromak nia forsa nabilan. Foin ema hatene see mak Hau nee, see.