Marcos 7 - Biblia Tetun Dili

Ema nia regra la bele troka fali Nai Maromak nia lei

¹ Iha ema hosi grupu relijiaun Farizeu, ho mestri relijiaun balu mai hosi Jerusalem atu hasoru Jesus.

^2-5 Ema Farizeu sira kaer metin lisan Judeu nian. Ezemplu ida mak nee: kuandu atu haan, tenki fasi liman uluk tuir regra lisan nian. Nunee mos, bainhira fila hosi merkadu, tenki hariis lai. I kuandu atu uza sasaan dapur nian, tenki fasi uluk tuir regra lisan nian. Hanesan bikan, kopu, buli, ka sanan. Nee hotu tenki halo tuir regra lisan nian, foin bele uza hodi haan. Se iha ema Judeu ruma mak la halo tuir regra sira nee, ema Farizeu sira hirus. Tanba nee, sira hirus bainhira sira haree Jesus nia eskolanti sira haan la fasi liman tuir regra lisan nian. Nee duni, sira mai i foo sala ba Jesus dehan, “Nusaa mak O nia eskolanti sira haan la fasi liman? Imi kontra ona ita nia regra lisan nian hosi bei-ala sira!”

^6-7 Maibee Jesus hataan, “Imi koalia oin ida, halo oin seluk! Hori uluk Nai Maromak nia ibun ho nanaal Isaias hakerek ona Maromak nia lian menon dehan, ‘Ema sira nee adora Hau ho ibun deit, maibee la ho laran. Sira adora hanesan nee, la iha folin. Sira foo valoor deit ba ema nia regra, hanesan ke sira simu regra nee hosi Hau. Afinal laos Hau mak foo regra nee.’ Imi mos hanesan sira.

^8-9 Imi husik tiha ona Nai Maromak nia lei, i imi tuir deit ema nia regra. Atu halo tuir ema nia regra deit, imi matenek la halimar!

¹⁰ Hori uluk kedas, Moisés foo sai Nai Maromak nia lei dehan, ‘Respeita imi nia inan-aman.’ I Moisés hatete tan, ‘See mak tolok nia inan-aman, ema nee tenki simu kastigu mate.’

^11-12 Nai Maromak hanorin nunee, maibee imi hanorin oin seluk fali. Imi dehan, ‘Se ema promete atu foo nia sasaan ida ba Nai Maromak, maski nia inan-aman terus atu mate, maibee imi dehan la bele foo nia sasaan nee ba sira, tanba nia promete tiha ona atu foo ba Nai Maromak.’

¹³ Tanba nee mak ohin Hau hatete ona, imi husik tiha ona Nai Maromak nia lei, i troka fali ho imi nia regra foun. Iha lei barak mak imi troka tiha ona hanesan nee.”

Hahalok aat sai hosi ema nia laran

¹⁴ Liu tiha nee, Jesus bolu tan ema barak iha fatin nee hodi hatete, “Rona didiak mai, para imi bele komprende.

¹⁵ Saida deit mak tama ba ema nia kabun la halo foer nia. Maibee saida deit mak sai hosi ema nia laran, nee mak halo foer nia.

¹⁶ [See mak rona, hanoin didiak baa!]”

¹⁷ Depois Jesus ho Nia eskolanti sira husik hela ema barak nee, i sira baa tama iha uma ida. I Nia eskolanti sira husu ba Nia, “Komparasaun ohin nee signifika saida?”

^18-19 Jesus hataan, “Imi mos la komprende, ka? Komparasaun nee nia signifikadu nunee: saida deit mak ema haan, nee diak. Maibee saida deit mak sai hosi ema nia laran, nee mak la diak. Tanba saida deit mak ema haan, tama ba kabun, depois sai fila fali. (Nunee Nai Jesus hatete dehan, ema bele haan hahaan saida deit. La bandu.)

²⁰ Maibee saida deit mak sai hosi ema nia laran, nee mak halo foer ema, too Nai Maromak mos hakribit i lakohi hamutuk ho nia.

²¹ Tanba buat aat barak mak sai hosi ema nia laran. Hanesan: hanoin aat; hanoin no halo sala seksual arbiru; naok; oho ema;

²² kaan-teen; halo sala seksual ho ema nebee laos o nia kaben; halo buat aat; han-matak ema; tuir deit nia kaan; laran moras; hatete aat ema; foti aan; ukun la iha, i lakohi rona ema seluk.

²³ Buat aat sira nee hotu sai hosi ema nia laran. Nee mak halo foer ema. I Nai Maromak mos hakribit.”

Jesus ajuda feto ida, maski nia laos ema Judeu

²⁴ Liu tiha nee, Jesus sira husik hela fatin nee, hodi baa iha sidade ida, naran Tiru. Too iha nebaa, Nia tama liu ba iha uma ida, tanba Jesus lakohi atu ema hatene katak Nia iha fatin nee. Maibee Nia subar aan la diak.

^25-26 Iha fatin nee, iha feto ida, maibee nia laos ema Judeu. Nia moris iha rai Fenísia iha provinsia Síria. Bainhira nia rona dehan Jesus mai, nia baa hasoru kedas, i nia husu ba Jesus atu duni sai espiritu aat hosi nia oan feto.

²⁷ Maibee Jesus soe lia deit hodi dehan, “Oan sira tenki haan uluk, foin nia restu foo ba asu.” [Nee katak, Jesus tenki ajuda uluk Nia ema Judeu sira, mak foin bele ajuda ema seluk.]

²⁸ Maibee feto nee hataan fali dehan, “Nee loos, Senhor! Maibee asu nee iha hela meza okos. Nia mos haan hahaan nebee monu hosi oan nia bikan.” [Nee katak, bainhira oan sira haan, asu mos bele haan. Jesus bele ajuda Nia ema, maibee Nia mos bele ajuda ema seluk.]

²⁹ Rona nunee, Jesus hataan ba feto nee dehan, “O koalia nee, loos duni! O bele fila ona, tanba espiritu aat nee sai tiha ona hosi o nia oan.”

³⁰ I feto nee fila ba nia uma. Too iha uma, nia haree nia oan toba dukur hela. I espiritu aat nee sai tiha ona.

Jesus kura ema ida nebee monok i tilun diuk

³¹ Liu tiha nee, Jesus sira husik tiha sidade Tiru, i baa fali iha sidade Sidon. Depois Nia lao too iha tasi Galileia. Tuir mai, Nia baa iha rai Dekapolis.

³² Iha fatin nee, iha ema ida monok i tilun diuk. Nia maluk sira lori nia ba Jesus. I sira husu ba Nia dehan, “Senhor, ajuda lai! Tau liman ba ema nee, hodi kura nia.”

³³ Jesus husik hela ema barak nee, i Nia sai ho ema monok nee mesak deit. Depois Jesus hatama nia liman fuan ba iha ema nee nia tilun rua. I Nia mos tau kabeen iha Nia liman, i tau ba ema nee nia nanaal.

³⁴ Depois Jesus hateke ba leten. Nia dada iis tiha, i hatete ho sira nia lian Aram dehan,“Efata!” (Nee katak, “Nakloke ona baa!”)

³⁵ Nia hatete nunee, ema nee nia tilun rona, i nia nanaal toos nee mos sai mamar. I nia koalia diak kedas.

³⁶ Nee liu tiha, sira nain rua fila fali ba ema barak ohin nee. Jesus bandu sira dehan, “Rona mai! Imi la bele konta ba ema dehan, Hau mak kura ema nee.” Maski Jesus bandu makaas, maibee sira baa konta iha fatin-fatin.

³⁷ I ema sira nebee rona notisia nee, sira admira teb-tebes no doko ulun. Sira foo hatene ba malu dehan, “Ema nee laos halimar! Nia bele halo buat hotu-hotu sai diak. Ema tilun diuk bele rona. Ema monok mos bele koalia.”