Marcos 6 - Biblia Tetun Dili

Ema Nazaré sira la simu Nai Jesus

¹ Hotu tiha, Jesus ho Nia eskolanti sira hotu fila fali ba iha Nia aldeia Nazaré.

² Too ona loron Sabadu, ema Judeu sira nia loron hodi harohan. I Jesus tama ba iha uma kreda laran hodi hanorin. Iha loron nee, ema barak mak baa harohan. Bainhira sira rona Jesus nia hanorin, sira hotu admira loos, i dehan, “Ema nee matenek duni. Nia mos iha kbiit! Nusaa mak Nia bele hanesan nee?

³ Afinal Nia badaen ai ida. Ita hotu konhese Nia inan Maria ho Nia alin sira: Tiago, José, Judas ho Simão. Ita konhese mos Nia alin feto sira. Ita hotu hela iha aldeia ida nee.” Tanba nunee, sira laran moras, i lakohi rona tan Nia.

⁴ Rona nunee, Jesus hatete, “Loos duni! Ema respeita liu Maromak nia ibun ho nanaal iha fatin seluk. Maibee iha nia aldeia rasik, sira la respeita nia.”

^5-6a Afinal ema sira nee fuan toos, too lakohi fiar Jesus. Tanba nee, Jesus hakfodak, i doko ulun. I Nia la uza Nia kbiit iha aldeia nee. Nia so kura ema ituan deit.

Nai Jesus haruka Nia eskolanti nain sanulu resin rua

^6b Liu tiha nee, Jesus lao tama-sai ba aldeia-aldeia nebee besik, hodi hanorin kona ba Nai Maromak nia hakarak.

⁷ Nia bolu Nia eskolanti nain sanulu resin rua nee, i haruka sira lao nain ru-rua baa foo sai Nai Maromak nia Novidade Diak ba ema. Nia mos foo kbiit ba sira para duni sai espiritu aat.

^8-9 Nia haruka sira dehan, “Imi lalika lori buat bar-barak iha dalan, tanba Maromak sei prepara buat hotu. Lalika lori bukae, osan, i pasta. Tau deit xinelus iha ain, ho hena iha isin. I kaer deit ai tonka ida.

¹⁰ Se iha ema ruma simu imi iha sira nia uma, imi tenki hela nafatin iha uma nee, too imi sai fali ba fatin seluk.

¹¹ Maibee se imi too iha fatin ida, ema lakohi simu imi, i lakohi rona imi, imi tenki sai kedas hosi fatin nee. I baku rai rahun hosi imi nia ain. Ida nee sinal katak, ‘Imi lakohi rona ami, imi rasik mak lori todan nee!’ ”

¹² Depois sira lao baa hatoo Nai Maromak nia Novidade Diak, i hanorin ema dehan, “Imi hotu tenki husik ona imi nia sala, i fila fali tuir nafatin Nai Maromak nia hakarak.”

¹³ I sira duni sai espiritu aat hosi ema. Sira mos tau mina i halo orasaun ba ema moras sira, i sira diak kedas.

Ema tesi tiha João Sarani Nain nia kakorok

¹⁴ Iha tempu nee, ema iha fatin-fatin hatene ona kona ba Jesus. I liurai Erodes mos rona kona ba Jesus nia kbiit. Iha ema balu dehan, “Jesus nee João Sarani Nain. Nia moris fali iha Jesus nia Aan. Tanba nee mak Nia bele halo milagre barak.”

¹⁵ Iha ema balu hatete, “Laos! Jesus nee, Nai Maromak nia ibun ho nanaal Elias mak moris fali ona.” Iha ema balu tan dehan, “Jesus nee, Maromak nia ibun ho nanaal ida, hanesan Maromak nia ibun ho nanaal sira uluk.”

¹⁶ Bainhira liurai Erodes rona sira koalia hanesan nee, nia dehan, “Tuir hau, Jesus nee, João Sarani Nain. Tempu nebaa, hau haruka tesi tiha João nia kakorok. Agora nia moris fali ona!”

^17-18 Liurai Erodes hatete nunee, tanba uluk iha problema boot ho João. Nia istoria hanesan nee: liurai Erodes kaben fali ho nia alin Filipe nia kaben, naran Erodias, maski Filipe ho Erodias seidauk soe malu. Tan nee, João kritika bebeik liurai Erodes dehan, “Liurai, tuir loos ita boot la bele kaben fali ho ita nia alin nia feen. Nee kontra ita ema Judeu nia lei!” Maski nunee, liurai Erodes kaben nafatin ho feto nee. Depois nia haruka ema baa kaer João hatama iha kadeia.

¹⁹ Tanba João kritika bebeik hanesan nee, feto nee odi João, i buka dalan atu oho nia. Maibee seidauk bele, tanba liurai Erodes hatama hela João iha kadeia laran.

²⁰ I nia haruka soldadu sira hein João didiak. Liurai Erodes tauk no respeita hela ba João. Tanba nia hatene João nee, Nai Maromak mak haruka mai, i nia mos laran diak. Erodes gosta rona João nia koalia. Maibee dalaruma, kuandu nia rona João nia koalia, nia laran la hakmatek.

²¹ Too iha loron ida, feto Erodias hetan tempu diak hodi selu nia laran moras nee. Iha loron nee, ema halo liurai Erodes nia tinan. Sira konvida ema bo-boot mai iha festa. Konvidadu sira nee, balu hosi estadu nian, balu komandante tropas sira, ho mos nai ulun Judeu sira hosi rai Galileia.

²² Iha festa klaran, senhora Erodias nia oan feto tama baa dansa. I nia dansa kapaas teb-tebes, halo Erodes ho konvidadu sira laran haksolok. Depois liurai bolu menina nee, hodi promete ba nia, “O hakarak husu saida ba hau, husu deit! Hau sei foo duni.

²³ Maski o husu hau nia reinu sorin balu mos, hau foo. Hau jura hodi Nai Maromak nia naran!”

²⁴ Depois labarik feto nee baa husu ba nia inan, “Amaa! Amaa hakarak hau husu saida mak diak liu hosi liurai?” Nia inan hataan, “O baa husu deit João nia ulun fatuk.”

²⁵ I labarik feto nee baa lalais iha liurai hodi husu, “Apaa, hau husu deit João nia ulun, tau iha bandeja ida ba hau. Agora kedas!”

²⁶ Rona nunee, liurai Erodes fuan lakon kedas. Maibee nia la bele dada fali nia liafuan, tanba nia jura tiha ona, i ema hotu iha fatin nee mos rona ona.

²⁷ Depois nia foo orden ba komandanti ida baa tesi João nia kakorok iha kadeia lori mai.

²⁸ Entaun sira tesi tiha João nia kakorok, i tau nia ulun iha bandeja ida, hodi mai foo ba labarik feto nee. Nia simu tiha bandeja nee, nia lori hodi baa foo nia inan.

²⁹ Kuandu João nia eskolanti sira rona dehan ema tesi tiha João nia kakorok ona, sira mos baa foti tiha João nia mate isin hodi baa hakoi. João nia mate hanesan nee.

Nai Jesus foo hahaan ba ema rihun lima resin

³⁰ Iha loron ida, Jesus nia eskolanti sira nebee Nia haruka baa nee, sira fila fali mai hamutuk ho Nia. I sira konta ba Jesus buat hotu-hotu nebee mak sira halo ona, ho mos buat nebee mak sira hanorin ona ba ema.

³¹ Maibee momentu nee, ema barak teb-tebes baa-mai buka Jesus, too Nia ho Nia eskolanti sira la iha tempu ba haan. I Jesus hatete ba Nia eskolanti sira, “Mai ita baa buka fatin hakmatek ida, para ita bele deskansa ituan.”

³² Depois sira hotu sae bero hodi baa buka fatin hakmatek nebee dook hosi aldeia.

³³ Maibee ema barak haree sira nia bero liu hosi tasi ibun. Entaun ema hosi aldeia-aldeia halai liu hosi rai maran, i sira too uluk Jesus sira.

³⁴ Jesus foin too ho bero, Nia haree ema barak hein hela ona Nia. Haree nunee halo Nia fuan lakon i hadomi sira teb-tebes, tanba sira la hatene atu halo saida, hanesan bibi malae nebee la iha atan. I Jesus hanorin Nai Maromak nia hakarak ba sira,

^35-36 komesa meu-dia too lokraik. Depois Nia eskolanti sira hatete ba Nia, “Mestri, diak liu Ita Boot haruka ema sira nee, baa sosa hahaan iha aldeia nebee bes-besik iha nee. Tanba lokraik ona, i la iha hahaan iha nee.”

³⁷ Maibee Jesus hataan, “Lalika! Imi deit mak foo hahaan ba sira.” Maibee sira hataan fali, “Se ita foo hahaan ba ema barak hanesan nee, ita tenki hasai osan barak teb-tebes, hanesan ema badaen simu osan iha tinan ida nia laran. Halo nusaa ita bele hetan osan barak ida nee?!”

³⁸ Maibee Jesus hataan, “Imi baa husu took, see mak lori bukae iha nee.” Entaun sira baa buka hatene, depois sira mai dehan fali, “Iha paun fuan lima ho ikan rua deit.”

³⁹ Depois Jesus haruka ema sira tuur tuir grupu-grupu iha duut matak leten.

⁴⁰ I sira tuur tiha hotu tuir grupu-grupu. Grupu balu iha ema nain atus ida, i balu iha nain lima-nulu.

⁴¹ Tuir mai, Jesus foti paun fuan lima ho ikan rua nee. I Nia hateke ba loro leten hodi agradese ba Nai Maromak. Depois Nia silu fahe paun sira nee, halo rohan-rohan. I Nia foo ba Nia eskolanti sira, hodi fahe ba ema barak nee hotu. Sira lori mos ikan rua nee baa fahe.

⁴² I sira hotu haan too bosu.

⁴³ Sira haan hotu tiha, Nia eskolanti sira baa aruma paun restu nee, tau iha bote, too bote sanulu resin rua nakonu.

⁴⁴ Ema sira nee mais-ou-menus rihun lima. Nee mane deit. Feto ho labarik seidauk sura.

Nai Jesus lao iha bee leten

⁴⁵ Nee liu tiha, Jesus haruka Nia eskolanti sira baa sae bero hodi baa uluk iha aldeia Betsaida, iha tasi sorin baa. Maibee Nia sei hela iha fatin nee, hodi haruka ema barak nee fila ba uma.

⁴⁶ Ema sira fila hotu ona, Jesus sae ba foho ida hodi halo orasaun ba Nai Maromak.

^47-50 Rai kalan ona, Jesus tuun fali hosi foho mai. Nia haree nia eskolanti sira ho bero too ona iha tasi klaran. Sira hean makaas tanba hasoru anin boot. Dadeer saan nakukun, Jesus tuir sira baa, Nia lao deit iha bee leten. Nia foin lao liu bero nee, sira haree Nia. Sira hakfodak ho tauk atu mate. Sira hanoin Nia nee klamar, i sira hakilar makaas. Maibee Jesus bolu ba sira, “Keta tauk! Hau nee Jesus!”

⁵¹ Jesus foin sae ba bero laran, anin boot mos para kedas. Nia eskolanti sira admira teb-tebes.

⁵² Sira foin haree Jesus uza Nia podeer hodi foo hahaan ba ema rihun lima resin. Maibee sira seidauk komprende didiak Nia kbiit, tanba sira nia fuan toos.

Jesus kura ema moras sira iha Genesare

⁵³ Sira too iha tasi sorin baa, sira para iha bee ibun iha sidade ida naran Genesare.

⁵⁴ Sira foin tuun hosi bero, ema barak haree sira. I ema hotu nee haklalak, “Jesus mai ona!”

^55-56 Sira baa foo hatene ba ema hotu. I ema lori ema moras sira ba Jesus. Jesus lao hosi fatin ba fatin. Bainhira ema rona katak Jesus iha fatin ida, sira rame-rame hulan ema moras hodi baa hatoba iha rai mamuk ida besik merkadu. Tanba sira hanoin, “Naran katak ema moras nee kona kois Jesus nia hena, sira bele diak.” Nee loos duni. See mak kona deit Nia hena, diak kedas.