Marcos 4 - Biblia Tetun Dili

Nai Jesus halo komparasaun kona ba fini iha rai oi-oin

¹ Iha loron ida, Jesus baa fali tan iha tasi Galileia. Ema barak mai hobur Nia. Iha fatin nee, bero ida para hela iha bee laran. Depois Jesus sae tiha ba bero leten, i Nia tuur, hodi komesa hanorin. Ema iha bee ibun nee, rona hotu Nia koalia.

² Jesus hanorin sira buat barak liu hosi komparasaun, dehan,

³ “Rona didiak! Iha ema ida baa kari fini iha nia toos.

⁴ Momentu nia kari fini nee, iha fini balu monu iha dalan klaran. I manu fuik mai hili tiha hotu.

^5-6 Iha fini balu tan, monu iha rai fatuk. Fini nee tubun lalais. Maibee, tanba rai ituan deit, abut la tama too laran. Bainhira loron matan sae ona, tubun nebee foin moris nee, namlaik too maran tiha hotu.

⁷ Iha fini balu tan, monu iha duut tarak laran. Fini nee moris duni. Maibee duut tarak habit hela deit, too nia la foo isin.

⁸ Maibee iha fini balu tan, monu iha rai bokur. Fini nee moris diak, buras, too foo isin barak. Iha fini balu, bote ida bele foo fali too bote tolu-nulu, i balu foo too bote neen-nulu, i balu tan foo too bote atus ida.

⁹ See mak iha tilun, rona didiak baa.”

Tanba saa mak Nai Jesus hanorin uza komparasaun?

¹⁰ Bainhira Jesus mesak hela, Nia eskolanti nain sanulu resin rua, ho ema balu nebee rona ona Jesus nia hanorin nee, sira mai husu kona komparasaun nee dehan saida.

¹¹ Jesus hataan, “Tanba imi buka atu hatene duni Nai Maromak nia hakarak, Hau sei foo sai ba imi. Maibee, ba ema seluk, Hau hanorin deit ho komparasaun.

¹² Nai Maromak nia profeta ida hakerek ona hori uluk, kona ba ema hanesan sira nee, dehan, ‘Sira haree ona, maibee lakohi komprende. Sira rona ona, maibee lakohi hatene. Se sira lakohi nunee, diak liu sira lalika fiar Nai Maromak! Para Nai Maromak lalika perdua sira nia sala.’ ”

Nai Jesus foo hatene komparasaun nee nia signifikadu

¹³ Depois Jesus dehan, “Se imi la komprende komparasaun ida nee, halo nusaa mak imi bele komprende komparasaun sira seluk?

¹⁴ Komparasaun nee nunee: Ema ida nebee kari fini nee, hanesan ema nebee mak foo sai Nai Maromak nia Liafuan.

¹⁵ I fini nebee monu iha dalan klaran, too manu fuik mai hili tiha hotu, hanesan ema nebee rona Nai Maromak nia Liafuan. Maibee diabu mai hadau tiha Liafuan nee hosi ema nia laran.

¹⁶ I fini nebee monu iha rai fatuk, hanesan ema nebee rona ona Nai Maromak nia Liafuan, i simu Liafuan nee ho laran haksolok.

¹⁷ Maibee Liafuan nee la iha abut. Tanba nee mak la hela metin iha nia laran. Bainhira ema seluk ameasa nia, nia husik tiha kedas Liafuan nee.

¹⁸ I fini nebee monu iha duut tarak laran, hanesan mos ema nebee rona ona Nai Maromak nia Liafuan.

¹⁹ Maibee nia fadigadu demais ho nia serbisu oi-oin, hanesan nia buka riku, nia buka sai ema boot, ho nia goza tuun-sae. Too nia la interese Nai Maromak. Nunee nia husik tiha Nai Maromak nia Liafuan.

²⁰ Maibee fini nebee monu iha rai bokur, hanesan ema nebee rona ona Nai Maromak nia Liafuan, i halo tuir Nai Maromak nia hakarak. Tanba nee, nia sempre halo buat diak deit, hanesan fini nebee foo isin barak. Iha balu foo isin dala tolu-nulu, balu foo dala neen-nulu, too balu tan foo dala atus ida.”

La bele doku ahi-oan ho bote

²¹ Jesus koalia nafatin iha bero leten. Nia foo tan komparasaun ida, nunee, “Oinsaa? Imi haree ema sunu ahi-oan, sira doku tiha ho bote ka? Sira tau iha kama okos ka? Lae! Se tau iha fatin hanesan nee, ahi-oan nee la foo tan naroman. Ema tenki tau ahi-oan nee iha fatin nebee aas, atu bele foo naroman ba hotu-hotu.

²² Nunee, buat nebee mak agora subar hela, aban-bainrua sei bele haree. Buat nebee mak agora ita la hatene, aban-bainrua sei bele hatene.

²³ See mak iha tilun, rona didiak baa.

²⁴ Hanoin didiak! Se imi sukat ema seluk nia hahalok, ema seluk moos sei sukat fali imi nunee. I Nai Maromak moos sei sukat fali imi hanesan nee. Maibee Nia sukat todan liu tan.

²⁵ Ema nebee buka teb-tebes Nai Maromak nia hakarak, nia sei matenek liu tan. Maibee ema nebee la interese Nai Maromak nia hakarak, nia sei beik liu tan.”

Komparasaun kona ba fini nebee mesak moris

²⁶ Depois Jesus koalia tan nunee, “Nai Maromak nia reinu aumenta boot ba bebeik, hanesan mos fini nebee ema kari iha nia toos.

²⁷ Bele ema nee fila tiha ba uma, halo fali buat selu-seluk, i la hanoin tan nia toos. Maibee fini nee buras i boot ba bebeik.

²⁸ Fini nee moris mesak. Depois komesa iha sanak, funan, too nia iha fuan.

²⁹ Bainhira hare tasak ona, toos nain hatene mai koa deit. Nai Maromak nia reinu mos nunee. Buat sira nee hotu, Maromak nia serbisu.”

Komparasaun kona ba ai musan nebee kiik-oan liu

³⁰ Liu tiha nee, Jesus dehan tan, “Hau foo sai tan komparasaun ida nunee: Imi bele hanoin Nai Maromak nia reinu sira hanesan nee: Sira komesa hosi ituan liu, maibee kleur-kleur, sira aumenta ba bebeik too barak teb-tebes.

³¹ Nee hanesan ai musan ida kiik-oan liu.

³² Bainhira ai musan nee ita kuda ona, nia moris sai ai huun boot la halimar. Too manu fuik sira mos mai hamahon, i halo knuuk iha ai leten nee.”

³³ Jesus nia hanorin hanesan nee, tuir buat nebee sira bele komprende.

³⁴ Nia baibain hanorin ema barak ho komparasaun. Maibee ba Nia eskolanti sira, Nia foo hatene komparasaun sira nee nia signifikadu, para sira bele komprende didiak.

Nai Jesus halo hakmatek anin boot

³⁵ Too loro matan tuun ona, Jesus sei iha bero leten nafatin, hodi hanorin ema sira nee. Depois Nia hatete ba Nia eskolanti sira dehan, “Mai ita baa tasi nia sorin baa.”

³⁶ Entaun sira sae tan baa hamutuk ho Jesus. I sira husik hela ema barak iha tasi ninin nee. Maibee iha ema balu sae bero seluk hodi tuir Jesus.

^37-38 Tempu nebaa, Jesus luni iha sumasu, i Nia toba dukur loos iha bero laran. La kleur, anin boot mosu. Laloran baku bero baa-mai, i bee tama bero laran nebee Jesus sae nee, too bee besik nakonu. Nunee Jesus nia eskolanti sira tauk atu mate. Depois sira mai fanu Nia, hodi dehan, “Mestri, hadeer lai! Ita atu mate ona! Maibee Mestri la interese.”

³⁹ Rona nunee, Jesus mos hadeer, hodi hatete ba anin nunee, “Para ona!” Depois Nia foo orden ba tasi dehan: “Hakmatek ona” anin para no tasi hakmatek kedas.

⁴⁰ Depois Jesus hatete makaas ba Nia eskolanti sira, “Nusaa mak imi tauk demais hanesan nee? Imi la fiar Hau ka?”

⁴¹ Sira hotu tauk ho admira. Depois sira koalia ba malu, dehan, “Ema nee see loos? Nia koalia deit mos anin ho laloran rona ona!”