Marcos 2 - Biblia Tetun Dili

Nai Jesus kura ema ain aat ida nebee lao la diak

¹ Liu tiha loron hira nunee, Jesus fila fali ba Kafarnaum. Ema nebee haree Nia baa foo hatene iha sidade laran katak Jesus iha ona uma.

² Nunee ema mai hosi fatin-fatin. Sira nadodon mai hamutuk, too sena malu metin iha uma laran; iha odamatan oin mos ema nakonu. Depois Jesus hatoo ba sira Maromak nia Novidade Diak.

³ Nia sei koalia hela, ema nain haat hulan ema ain aat ida, nebee lao la diak, ba Jesus.

⁴ Maibee, tanba ema barak liu, sira la konsege lori ema nee tama ba Jesus. Nunee sira sae ba uma leten, i sira sobu uma kakuluk iha loos Jesus nia ulun leten. Depois sira hatuun ema nee ho biti natoon loos iha Jesus nia oin.

⁵ Bainhira Jesus haree sira, Nia hatene katak sira fiar tebes ba Nia. I Nia hatete ba ema ain aat nee, “Oan, o nia sala sira hotu Hau perdua tiha ona.”

⁶ Maibee iha fatin nee, iha mos mestri relijiaun Judeu balu tuur hela. Bainhira sira rona Jesus koalia nunee, sira senti la diak iha sira nia laran,

⁷ tanba sira hanoin nunee, “Nusaa mak ema nee brani koalia fali nunee? Nai Maromak mesak deit mak bele perdua ema nia sala. Maibee ema nee halo nia aan hanesan fali Nai Maromak. Nia hatete aat ona Nai Maromak!”

⁸ Maibee Jesus hatene tiha ona sira nia laran. I Nia dehan, “Imi keta hanoin hanesan nee!

^9-10 Ida nebee mak fasil liu? Se Hau hatete ba ema ain aat nee dehan, ‘O nia sala hamoos tiha ona,’ imi la hatene se sai nunee ka lae. Maibee, se Hau hatete dehan, ‘Hamriik ona! Foti o nia biti, i fila ona.’ Se nia hamriik duni, imi foin hatene katak Hau Ema Oan. I Hau mos iha direitu para bele foo perdua ba ema nia sala.” Depois Jesus hatete ba ema ain aat nee dehan,

¹¹ “Rona mai! Agora o diak ona. Hamriik, foti o nia biti, i fila ona.”

¹² Rona nunee, nia hamriik kedas, foti nia biti, i sai ba liur. Ema hotu-hotu iha fatin nee, haree rasik ho matan. Sira hotu admira, i dehan, “Ita nunka haree buat hanesan nee. Nai Maromak nee boot teb-tebes!”

Nai Jesus bolu Levi hodi tuir Nia

¹³ Nee hotu tiha, Jesus fila ba iha tasi Galileia. Ema barak mai hasoru Nia, i Nia hanorin sira Nai Maromak nia hakarak.

¹⁴ Iha fatin nee, iha ema ida, naran Levi, Alfeu nia oan. Nia serbisu mak kobra impostu ba estadu Roma. Natoon Jesus liu hosi nebaa, Nia hetan Levi tuur hela, i Nia dehan, “Mai tuir Hau!” Nia rona nunee, nia hamriik kedas, i tuir Jesus.

¹⁵ Depois Jesus ho nia eskolante sira baa haan iha Levi nia uma. Iha mos Levi nia kolega kobrador impostu sira no ema seluk tan nebee ema Judeu sira dehan sira ema aat. Sira hotu haan hamutuk ho Jesus tanba ema barak tuir Nia.

¹⁶ Iha tempu nee, iha mestri relijiaun balu hosi grupu Farizeu, haree Jesus tuur haan hamutuk hela ho ema kobrador impostu sira, no ema aat sira. Depois sira husu ba Jesus nia eskolanti sira dehan, “Tanba saa mak imi nia Mestri tuur haan hamutuk ho ema kobrador impostu no ema aat sira?”

¹⁷ Bainhira Jesus rona sira husu hanesan nee, Nia hataan kedas, dehan, “Rona mai! Ema moras mak presiza doutor, maibee ema nebee la moras la presiza. Hau mai atu halibur ema sala nain sira para tuir Hau. Laos ema nebee foti aan dehan sira mak loos liu.”

Nai Jesus koalia kona ba jejun ho hanorin foun

¹⁸ Iha loron ida, ema hosi grupu Farizeu sira halo jejun. João Sarani Nain nia eskolanti sira mos jejun. Maibee ema haree Jesus nia eskolanti sira la jejun. I sira mai husu ba Jesus, “Senhor, ema hosi grupu Farizeu sira halo jejun. João nia eskolanti sira mos jejun. Nusaa mak Ita Boot nia eskolanti sira la jejun?”

¹⁹ Depois Jesus hataan, “Imi hatene ona, bainhira iha festa kazamentu ida, ema la jejun, maibee ema haan too bosu. Bainhira noivu sei iha, sira hotu-hotu haan rame-rame.

²⁰ Maibee too iha loron ida, se ema seluk mai lori lakon tiha noivu nee, foin nia kolega sira senti laran susar tebes. Nunee sira foin jejun.”

²¹ Jesus foo tan komparasaun ida dehan, “Bainhira ropa kuak, ita la taka ho hena foun. Tanba bainhira fasi, hena foun nee sei dada ropa bosan nee, halo naklees liu tan.

²² Nunee mos ema la uza au lahuk hodi tau tua uvas foun. Tanba au nee bele nakfera. Nunee tua uvas nee bele fakar sai hotu. Se tua foun, ita tenki uza au foun, para bele rai kleur.”

Nai Jesus nia eskolanti sira korut trigu iha loron Sabadu

²³ Iha loron Sabadu, ema Judeu sira nia loron hodi harohan, i sira la bele serbisu. Iha loron nee, Jesus ho Nia eskolanti sira lao liu hosi toos rohan. Nia eskolanti sira korut dadauk trigu ba haan.

²⁴ Depois ema hosi grupu Farizeu nian haree, i sira kesar ba Jesus, dehan, “Nusaa mak O nia eskolanti sira kontra ita nia lei relijiaun?! Sira korut fali trigu iha loron nebee la bele serbisu. Imi la bele halo nunee!”

^25-26 Jesus hataan, “Imi la hanoin kona ba avoo David nia istoria, ka? Tempu nebaa, nai lulik Abiatar mak ulun boot relijiaun Judeu sira nian. Avoo David ho nia ema sira hamlaha atu mate. Depois sira tama ba iha Nai Maromak nia Tenda Harohan Nian, i sira baa foti paun ida nebee ulun-relijiaun sira foo tiha ona ba Nai Maromak, i sira haan tiha. Tuir loloos, ulun-relijiaun sira mak bele haan; ema seluk la bele. Maibee avoo David sira haan tiha, i la iha ema ida foo sala ba sira.”

²⁷ I Jesus dehan tan nunee, “Imi la bele haluha katak Nai Maromak halo loron Sabadu para sai bensaun, hodi tulun ita ema. Maibee Nia la halo ita ema hodi tuir deit loron Sabadu nia lei.

²⁸ Hau nee, Ema Oan. Hau mak Nai ba loron Sabadu. Hau mak iha direitu hatete ba ema bele halo ka la bele halo saida deit iha loron Sabadu.”