Marcos 16 - Biblia Tetun Dili

Nai Jesus moris fali

¹ Aban fali, loron Sabadu, ema Judeu sira nia loron hodi harohan. Bainhira loro matan monu ona, Maria hosi rai Madala, ho Maria ida tan (Tiago nia inan), ho Salome, sira baa hola mina morin. Tanba iha aban fali, sira atu baa tau mina morin ba Jesus nia mate isin iha rate, tuir Judeu sira nia kostumi.

² Iha loron Domingu, dadeer-saan nakukun, sira nain tolu baa iha rate.

^3-4 Iha dalan klaran, sira hatete ba malu, “Orsida see mak atu duir fatuk hosi rate ibun ba ita? Ita nain tolu la iha forsa atu dudu fatuk nee, tanba todan teb-tebes.” Maibee bainhira sira too iha fatin nee, sira haree fatuk boot nee muda tiha ona.

⁵ Depois sira tama ba Jesus nia rate laran. I sira hakfodak teb-tebes, tanba sira haree mane klosan ida tuur hela iha sira nia liman kuana. Nia hena, mutin loos.

⁶ I mane nee hatete ba sira nunee, “Imi keta tauk. Hau hatene imi mai buka Jesus hosi Nazaré, ida nebee ema oho iha krus. Nia la iha nee tan ona. Tanba Nia moris fali ona. Mai imi haree rasik fatin nebee sira latan Nia mate isin, mamuk tiha ona.

⁷ Agora imi fila lalais ona! Imi baa foo hatene ba Pedro sira katak, Jesus moris fali ona. Nia baa uluk sira iha Galileia, i sira sei hasoru Nia iha nebaa. Tuir buat nebee uluk Nia promete ona ba sira. Agora, imi fila ona.”

⁸ Bainhira feto sira nee baa haree fatin nee mamuk duni, sira hakfodak! Sira halai sai kedas, i fila lalais. Iha dalan, sira la foo hatene ba ema ida, tanba sira tauk atu mate.

Nai Jesus hasoru Maria hosi Madala

⁹ Iha loron Domingu dadeer-saan, Jesus hatudu aan ba Maria hosi Madala. Feto nee, uluk Jesus hasai espiritu aat hitu hosi nia laran.

¹⁰ Nia haree tiha Jesus, nia baa foo hatene kedas ba ema sira uluk tuir Jesus nee. Ema sira nee sei tristi ho tanis hela, hanoin Jesus nia mate.

¹¹ I Maria foo sai ba sira dehan, “Tanba saa mak imi sei laran tristi? Lalika tristi tan, tanba Jesus moris fali ona! Hau foin hasoru malu ho Nia!” Maibee sira hataan, “O bosok!”

Nai Jesus hatudu aan ba Nia eskolanti nain rua tan

¹² Liu tiha nee, Jesus nia eskolanti nain rua lao ba iha aldeia ida. Iha dalan klaran, Jesus hatudu aan ba sira. Maibee Jesus oin seluk tiha ona. Maski nunee, la kleur tan sira konhese Nia.

¹³ Depois sira nain rua fila fali hodi foo hatene ba sira nia kolega sira, “Imi rona lai. Foin dadauk nee, ami hasoru Jesus iha dalan.” Maibee sira nia kolega hataan, “Bosok! Ami la fiar!”

Nai Jesus hatudu aan ba Nia eskolanti sira

¹⁴ Nee liu tiha, Jesus hasoru malu ho Nia eskolanti nain sanulu resin ida, bainhira sira haan hela. Nia hasee sira, dehan, “Imi nee ulun fatuk toos duni! Ema hatete ona ba imi katak, sira haree Hau ho sira nia matan rasik, maibee imi la fiar! Imi dehan, sira bosok. Agora, Hau rasik mak mai nee. Hau mate tiha ona, maibee Hau moris fali ona. Imi haree rasik baa.

¹⁵ Nee duni, imi tenki baa iha mundu tomak, i foo sai Hau nia Novidade Diak nee ba ema hotu-hotu.

¹⁶ See mak fiar Hau, i sarani, Nai Maromak sei salva nia, i nia sei moris hamutuk ho Nai Maromak iha lalehan. Maibee see mak la fiar, Nai Maromak sei kastigu nia, i sei la simu nia iha lalehan.

¹⁷ I ema sira nebee fiar Hau, sira sei halo milagre oi-oin, too ema hotu hatene katak, sira nia kbiit nee mai hosi Nai Maromak. I sira sei duni sai espiritu aat, hodi Hau nia naran. I Nai Maromak sei halo sira koalia liafuan foun, nebee sira seidauk hatene.

¹⁸ I se sira kaer samea nebee iha veneno, ou sira hemu sala veneno, sira la hetan susar. I bainhira sira tau liman ba ema moras, ema moras nee sei sai diak.”

Nai Jesus sae ba lalehan

¹⁹ Jesus koalia tiha hotu, Nai Maromak hasae Nia ba lalehan. Nia tuur iha Nai Maromak nia liman kuana para Sira nain rua ukun hamutuk.

²⁰ Nee liu tiha, Nia eskolanti sira halo tuir Nia orden. Sira baa iha mundu tomak, hodi foo hatene kona ba Jesus nia Novidade Diak. I Nai Maromak foo kbiit ba sira, para sira bele halo milagre, tuir Jesus hatete ona. Nunee ema barak fiar ba Jesus, tanba sira hatene katak Novidade Diak nee, loos duni.