Marcos 10 - Biblia Tetun Dili

Farizeu sira buka dalan hodi koko Nai Jesus kona ba feen ho laen fahe malu

¹ Liu tiha, Jesus baa iha provinsia Judeia, ho fatin-fatin iha mota Jordaun nia sorin balu baa. Ema barak mai hosi fatin-fatin haleu Nia, i Jesus hanorin sira hanesan baibain.

² Iha mos ema Farizeu balu mai ho hanoin atu hamonu Nia. Sira husu nunee, “Tuir ita nia relijiaun nia hanorin, se mane ida kaben tiha ona, nia bele fahe malu ho nia kaben, ka lae?”

³ Jesus hataan, “Hanoin lai! Lei kona ba feto ho mane, nebee Moisés foo ba ita, dehan saida?”

⁴ Sira hataan, “Lei Moisés nian dehan, ‘Ema bele fahe malu, naran katak foo uluk surat soe malu nian ba nia kaben.’ ”

⁵ Jesus hataan fila fali, “Rona mai! Tanba imi nia ulun toos, mak Moisés hakerek hanesan nee.

⁶ Imi keta haluha istoria uluk liu kona ba Nai Maromak halo lalehan ho rai. Istoria nee hatete katak, ‘Nai Maromak halo ema, mane ho feto.

⁷ Nee duni, mane sei husik hela nia inan-aman, i baa moris neon ida laran ida ho nia kaben,

⁸ i sira nain rua, hamutuk sai ema ida deit.’

⁹ Tanba Nai Maromak hatete ona dehan, sira nain rua hamutuk ida deit, nee duni, ema la bele fahe sira.”

¹⁰ Liu tiha nee, Jesus ho Nia eskolanti sira mesak tama ba iha uma ida. Iha nee, sira husu ba Jesus kona ba nia liafuan ohin nee.

¹¹ Jesus hataan, “Se mane ida soe nia kaben, i kaben fali ho feto seluk, ema nee halo sala kontra ukun fuan hitu kona ba feen-lain.

¹² I feto mos hanesan. Se nia soe tiha nia kaben, i kaben fali ho mane seluk, nia mos halo sala kontra ukun fuan hitu kona ba feen-lain.”

Nai Jesus foo bensaun ba labarik oan sira

¹³ Iha loron ida, ema lori sira nia oan ba Jesus, i sira husu ba Nia atu tau liman hodi foo bensaun ba sira. Maibee Jesus nia eskolanti sira bandu netik.

¹⁴ Jesus haree nunee, Nia hirus Nia eskolanti sira hodi dehan, “Husik labarik sira mai Hau. Keta bandu! Tanba ema hanesan sira nee, mak Nai Maromak nia ema.

¹⁵ Imi hanoin didiak! See mak atu sai Nai Maromak nia ema, nia tenki hanoin Nai Maromak hanesan labarik sira hanoin sira nia inan-aman . Se lae, sira la serve atu sai Nai Maromak nia ema.”

¹⁶ Nunee Jesus hakuak labarik oan sira nee, i tau liman ba ida-idak nia ulun, hodi foo bensaun ba sira.

Ema riku ida buka dalan hodi moris hamutuk ho Nai Maromak

¹⁷ Bainhira Jesus atu sai ona, ema riku ida halai mai hasoru Jesus. Nia hakneak iha Jesus nia oin, hodi husu, “Mestri mak hau respeita, Ita Boot mak diak. Hau atu husu buat ida nunee: Hau tenki halo saida, para hau bele hatene loloos katak hau bele tama lalehan i moris hamutuk ho Nai Maromak?”

¹⁸ Jesus hataan, “Tanba saa mak o dehan, Hau ema diak? La iha ema ida mak diak, so Nai Maromak deit.

¹⁹ O hatene ona Nai Maromak nia ukun fuan nebee dehan: ‘La bele oho ema. La bele halo relasaun seksual ho ema nebee laos o nia laen ka o nia feen. La bele naok. La bele foo sasin falsu hasoru ema seluk. La bele haan-matak ema nia sasaan. I respeita o nia inan-aman.’ ”

²⁰ Ema nee hataan, “Loos, mestri! Dezde hau sei kiik, ukun fuan sira nee, hau tuir hotu ona.”

²¹ Jesus hadomi ema nee, i dehan, “Nee loos! Maibee sei falta buat ida tan. Agora o fila ona, i baa faan tiha o nia riku soin hotu. Nia osan nee, o fahe ba ema kiak ho ema mukit sira. Foin o mai tuir Hau. Depois Nai Maromak sei foo fali ba o, riku seluk iha lalehan.”

²² Ema nee rona Jesus dehan nunee, nia laran susar teb-tebes. Nia fila ho laran tristi atu mate, tanba nia ema riku boot.

²³ Entaun Jesus haree baa-mai, i hatete ba Nia eskolanti sira dehan, “Rona mai! Ema riku, susar teb-tebes atu tama ba lalehan.”

²⁴ Rona nunee, Nia eskolanti sira mos hakfodak. Maibee Jesus hatete tan, “Rona didiak! Atu sai Nai Maromak nia ema, susar teb-tebes. Keta hanoin dehan ‘fasil’.

²⁵ Kuda kamelu tama ba nia luhan liu hosi daun kuak, susar liu! Maibee susar liu tan, ema riku atu sai Nai Maromak nia ema, i tama ba lalehan.”

²⁶ Jesus dehan nunee, halo sira bilaan liu tan. Depois sira husu ba malu, “Se nunee tebes, see mak bele hetan salvasaun?”

²⁷ Jesus haree ba sira ida-idak, hodi dehan, “Ba ema, la bele duni. Maibee, ba Nai Maromak, buat hotu-hotu bele!”

²⁸ Depois Pedro hatete ba Jesus, “Nai, ami husik tiha ona buat hotu-hotu, hodi tuir Ita Boot. Maibee ami simu saida?”

^29-30 Jesus hataan, “Hau hatete ba imi nunee: See mak tuir Hau, i husik hela nia inan-aman, nia maun-alin, nia oan sira, nia toos, nia serbisu, i nia uma laran tomak, hodi foo sai Nai Maromak nia Novidade Diak, Nai Maromak sei foo fali dala atus ida. Buat hotu-hotu nebee nia husik nee, nia sei simu fali barak liu tan. Nia mos sei hetan terus, tanba nia tuir Hau. Maibee bainhira mundu nee remata, nia sei moris hamutuk ho Nai Maromak tinan ba tinan. Ida nee mak nia simu.

³¹ Hanoin didiak! See mak halo nia aan hanesan ema boot, tuir Nai Maromak nia haree, nia ema kiik liu. Maibee see mak halo nia aan hanesan ema kiik, tuir Nai Maromak nia haree, nia ema boot. “

Nai Jesus foo sai dala tolu ona kona ba Nia mate

³² Iha tempu nee, Jesus ho Nia eskolanti sira lao dadauk ba iha Jerusalém. Jesus lao iha oin. I Nia eskolanti sanulu resin rua ho ema seluk tuir Nia. Sira hanoin buat nebee Nia koalia tiha ona uluk, kona ba ema atu oho Nia iha Jerusalém. Tanba nee, sira laran rurua i tauk. Rona nunee Jesus bolu deit Nia eskolanti sira mesak, hodi foo hatene tan ba sira saida mak ema atu halo ba Nia iha Jerusalém.

³³ Nia hatete, “Imi rona didiak! Ita agora atu baa Jerusalém. Hau nee Ema Oan, iha nebaa, ema sei faan Hau, foo ba mestri relijiaun ho nai-lulik nia ulun sira. Depois sira sei tesi lia no dehan, Hau tenki mate. Tuir mai, sira entrega Hau ba ema sira nebee la konhese Nai Maromak.

³⁴ I ema sira nee trata Hau, tafui kabeen ba Hau, baku Hau nia isin ho sikoti too kanek naklees. Nee hotu tiha, sira oho Hau. Hau mate duni. Maibee iha loron tolu, Hau sei moris fila fali.”

Tiago ho João husu atu sai ema boot

³⁵ Iha tempu nee, Zebedeu nia oan, Tiago ho João, baa iha Jesus. Sira husu, “Mestri, ami presiza Ita Boot.”

³⁶ Jesus husu, “Imi presiza saida?”

³⁷ Sira hataan, “Nai, aban-bainrua, bainhira Ita Boot tuur kaer ona ukun, ami husu atu Nai foo fatin ba ami: ida tuur iha Ita Boot nia sorin loos, ida iha sorin karuk. Para ami mos bele kaer ukun.”

³⁸ Jesus hataan ba sira, “Imi nain rua nee la komprende saida mak imi husu. La kleur tan, Hau hetan terus teb-tebes. Nunee oinsaa? Imi hanoin katak imi bele terus hamutuk ho Hau too mate ka?”

³⁹ Sira hataan, “Ami bele, Mestri!” Jesus hatete tan ba sira, “Loos duni. La kleur tan, imi mos hetan terus hanesan Hau.

⁴⁰ Maibee kona ba tuur iha Hau nia sorin loos ka sorin karuk, nee laos Hau nia direitu. Nee Nai Maromak nia direitu. Nia desidi tiha ona, see mak bele tuur iha fatin nee.”

⁴¹ Bainhira Jesus nia eskolanti sira seluk rona dehan Tiago ho João husu nunee, sira hirus.

⁴² Depois Jesus bolu sira hotu, hodi dehan, “Ema boot sira iha mundu nee, ukun nunee: Sira sempre hanehan sira nia reinu, too reinu sira book aan la diak. Ulun sira hosi nasaun nebee la konhese Nai Maromak, sira mos foo orden todan liu, too sira nia reinu la bele halo buat ida.

⁴³ Maibee imi la bele halo nunee! See mak atu sai boot, nia tenki haraik aan, i serbii ema seluk.

⁴⁴ I see mak atu sai nai ulun, nia tenki haraik aan, i sai atan ba ema hotu.

⁴⁵ Tanba Hau Ema Oan. Hau mai iha mundu laos para ema serbii Hau; maibee Hau mai hodi serbii ema barak, i foo Hau nia aan hodi salva ema barak.”

Nai Jesus kura ema matan delek ida

⁴⁶ Depois Jesus ho Nia eskolanti sira too iha sidade Jerikó. Bainhira sira lao sai hosi sidade nee, ema barak mos tuir. Iha dalan ninin, ema matan delek ida tuur hela hodi husu ezmola. Nia naran Bartimeu, Timeu nia oan.

⁴⁷ Bainhira nia rona dehan ema ida liu nee Jesus, hosi Nazaré, nia bolu kedas, “Jesus, liurai David nia jerasaun! Hanoin hau lai!”

⁴⁸ Rona nia bolu nunee, ema hirus nia hodi bandu dehan, “He! Nonook!” Maibee nia bolu ho lian makaas liu tan, “Jesus, liurai David nia jerasaun! Hadomi hau lai!”

⁴⁹ Nunee Jesus mos para tiha, hodi dehan, “Imi bolu nia mai!” I sira dehan ba ema matan delek nee, “Mestri rona ona o, i Nia bolu o. Hamriik ona!”

⁵⁰ Rona nunee, Bartimeu soe tiha nia manta, hamriik kedas, i baa hasoru Jesus.

⁵¹ Jesus husu, “O hakarak saida?” Ema matan delek nee hataan, “Mestri, hau husu atu hau bele haree.”

⁵² Jesus hatete tan, “Tanba o fiar katak Hau bele kura o, agora o nia matan diak ona.” I nia matan mos diak kedas. Hotu tiha, nia tuir kedas Jesus.