Lucas 23 - Biblia Tetun Dili

Nai Jesus iha governador Pilatus nia oin

¹ Hotu tiha, ema Judeu nia ulun boot sira hotu hamriik hodi lori Jesus ba governador Pilatus.

² Too iha governador nia oin, sira komesa foo sala ba Jesus dehan, “Ami kaer toman Ema nee tau lia ba povu para kontra estadu. Nia haruka povu la bele selu impostu ba liurai boot César. Nia mos deklara katak, Nia mak Kristu, ema Judeu sira nia liurai.”

³ Entaun Pilatus husu ba Jesus, “O mak ema Judeu sira nia liurai duni ka?” Jesus hataan, “Ita dehan nee loos.”

⁴ Depois Pilatus foo sai nia desizaun ba nai lulik nia xefi sira ho ema lubuk boot nee, dehan, “Hau la hetan Ema nee nia sala ida atu bele kastigu Nia.”

⁵ Maibee sira ulun toos nafatin hodi protesta dehan, “Lae, Nia tau lia ba povu no hanorin iha nebee ba nebee para povu halo rungu-ranga, komesa hosi provinsia Galileia, too iha rai Judeia tomak, mai too iha nee.”

Nai Jesus iha liurai Erodes nia oin

⁶ Rona nunee, governador Pilatus husu ba sira, “Se hanesan nee, Nia ema Galileia ka?”

⁷ Sira hataan dehan, loos. Nunee governador haruka Jesus baa iha liurai Erodes, tanba nia mak ukun iha provinsia Galileia, i tempu nebaa nia iha hela sidade Jerusalém.

⁸ Bainhira Erodes haree Jesus, nia kontenti teb-tebes, tanba kleur ona nia hakarak atu hasoru Nia. Erodes rona ona buat barak kona ba Jesus, i hakarak atu haree Nia halo milagre ruma.

⁹ Entaun Erodes husu pergunta oi-oin ba Jesus, maibee Nia la hataan liafuan ida.

¹⁰ Nai lulik nia xefi sira ho mestri relijiaun sira mos hamriik besik hodi duun nafatin dehan, Nia halo ona sala oi-oin.

¹¹ Depois liurai Erodes ho nia soldadu sira komesa hamoe Jesus i goza Nia. Sira foo hatais Nia ho ropa nabilan ida nebee baibain liurai sira mak hatais, depois haruka Nia fila ba governador Pilatus.

¹² Uluk Erodes ho Pilatus inimigu malu, maibee iha loron nee sira nain rua diak malu fali.

Governador Pilatus foo kastigu mate ba Nai Jesus

¹³ Depois, governador Pilatus halibur nai lulik nia xefi sira, ukun nain sira ho tan povu.

¹⁴ I nia foo sai nia desizaun dehan, “Imi lori Ema nee mai hau hodi foo sala ba Nia dehan, Nia sempre tau lia ba povu para kontra estadu. Maibee hau investiga tiha ona Nia iha imi nia oin, i hau la hetan Nia sala ida atu bele kastigu Nia.

¹⁵ Liurai Erodes mos la hetan Nia sala ida. Tanba nee mak liurai haruka Nia fila fali mai ita. Imi haree ona, ema nee la halo sala ida atu hau bele foo kastigu mate ba Nia.

¹⁶ Nunee, hau sei haruka baku Nia ho sikoti, depois husik fali Nia.”

¹⁷ [Iha tempu nebaa, bainhira ema Judeu sira halo festa Paskua, governador sempre hasai ema dadur ida tuir sira nia hakarak.]

¹⁸ Entaun sira hotu hakilar rame-rame dehan, “Oho tiha Nia! Hasai mak Barabás!”

¹⁹ (Barabás nee tama kadeia tanba nia kontra estadu Roma, i nia mos oho ema.)

²⁰ Dala ida tan, Pilatus koalia ho lian makaas ba sira, tanba nia hakarak husik Jesus.

²¹ Maibee sira hotu hakilar dehan, “Prega tiha Nia ba krus! Prega tiha Nia ba krus!”

²² Pilatus koalia ba sira ba dala tolu, dehan, “Nia halo krimi saida? Hau la hetan razaun ida para hau bele kastigu mate Nia. Nee mak hau haruka ema baku deit Nia ho sikoti, depois husik fila fali.”

²³ Maibee ema barak nee hakilar bebeik ho lian makaas hodi obriga para prega mate Jesus iha krus. Ikus mai, sira mak manaan.

²⁴ Entaun Pilatus desidi tuir sira nia hakarak.

²⁵ Nia hasai ema nebee mak sira husu, ida nebee dadur hela tanba kontra estadu i oho ema. I nia entrega Jesus ba sira nia liman hodi halo tuir sira nia hakarak.

Ema prega Nai Jesus iha krus

²⁶ Depois soldadu sira lori Jesus sai hosi governador Pilatus nia uma. Iha dalan klaran sira hasoru ema ida naran Simão hosi Sirene, nia foin mai hosi foho atu tama ba sidade. Sira obriga Simão lori Jesus nia krus hodi lao tuir Nia.

²⁷ Ema barak lao tuir Jesus, i senhora balu tanis halerik ba Nia.

²⁸ Jesus fila oin ba sira hodi dehan, “Senhora Jerusalém oan sira, lalika tanis mai Hau. Diak liu tanis halerik ba imi nia aan rasik, i tanis ba imi nia oan sira.

²⁹ Tanba aban-bainrua susar boot sei kona imi too ema dehan, ‘Feto nebee sorti mak sira nebee la iha oan, sira nebee nunka tuur ahi i nunka foo susu bebee.’

³⁰ Bainhira susar nee mai, ema sei halerik ba foho dehan, ‘Monu hanehan ona ami baa!’ Sira sei dehan ba foho kiik sira, ‘Hakoi tiha ami baa!’

³¹ Se ai nebee matak mos ahi haan, saa tan ai nebee maran tiha ona. Ema foo terus mai Hau, maski Hau la sala. Saa tan ba imi sala nain sira.”

³² Bainhira soldadu sira lori Jesus, sira lori mos ema aat nain rua para kastigu mate hamutuk ho Nia.

³³ Too iha fatin ida naran Ulun Ruin, sira prega Jesus ba iha krus. Sira prega mos ema aat nain rua nee, ida iha Jesus nia sorin loos, ida iha Nia sorin karuk.

³⁴ [Jesus halo orasaun dehan, “Hau nia Aman, foo perdaun ba ema sira nee nia sala, tanba sira la hatene saida mak sira halo.”] Depois soldadu sira dada rifa hodi fahe Jesus nia hena ba malu.

³⁵ Ema barak hamriik hela hodi haree. I ema Judeu nia boot sira tarata Jesus dehan, “Nia salva ona ema seluk. Se Nia mak Kristu duni, Ida nebee Nai Maromak hili, entaun tuir loloos agora Nia salva Nia Aan rasik.”

³⁶ Soldadu sira mos besik Jesus hodi goza Nia. Sira lolo tua siin ba Nia

³⁷ hodi dehan, “Se O mak ema Judeu sira nia liurai, salva O nia Aan baa!”

³⁸ Sira prega ai kabelak ida ba krus iha Jesus nia ulun leten. Iha ai kabelak nee hakerek dehan, “Ema nee ema Judeu sira nia liurai.”

³⁹ Ema aat ida nebee prega hela iha Jesus nia sorin mos hatete aat Jesus dehan, “O mak Kristu ka? Entaun, salva O nia Aan no salva mos ami!”

⁴⁰ Maibee ema aat ida seluk siak nia dehan, “O la tauk Nai Maromak ka? O simu kastigu mate hanesan mos Nia.

⁴¹ Ita nain rua merese duni simu kastigu nee, tanba ita nia hahalok aat. Maibee Ema nee la halo sala buat ida.”

⁴² Depois nia dehan, “Jesus, bainhira Ita Boot kaer ona ukun nudar Liurai, hanoin hau baa.”

⁴³ Jesus hataan ba nia, “Hau promete ba o, loron ohin kedas o sei hamutuk ho Hau iha lalehan.”

Nai Jesus mate

⁴⁴ Komesa meudia, nakukun taka metin tiha rejiaun nee tomak too tuku tolu lokraik,

⁴⁵ tanba loro matan la foo naroman tiha. Iha Uma Kreda Boot iha kortina boot ida hodi haketak fatin nebee lulik liu. Derepenti deit, kortina nee naklees fahe ba rua.

⁴⁶ Jesus bolu ho lian makaas dehan, “Hau nia Aman, Hau entrega Hau nia klamar ba Ita Boot nia liman.” Koalia tiha nunee, Nia iis mos kotu.

⁴⁷ Komandante Roma haree buat nebee mak akontese, i nia hahii Nai Maromak dehan, “Tebes duni! Ema nee Ema ida ke moris loos.”

⁴⁸ Ema hotu nebee ohin mai asisti nee, sira haree saida mak akontese, i sira fila ba uma ho laran tristi teb-tebes.

⁴⁹ Maibee senhora sira nebee uluk tuir Jesus hosi Galileia too iha Jerusalém, sira sei hamriik hela hosi dook hodi haree. Nunee mos ema sira nebee konhese besik liu Nia.

José hakoi Nai Jesus nia mate isin

^50-51 Iha ema ida naran José, hosi sidade Arimateia iha provinsia Judeia, buka dalan atu hakoi Jesus nia mate isin. Nia ema ida ke diak no moris loos, i nia hein hela Nai Maromak hatudu Nia ukun nudar Liurai. José mos membru tribunal relijiaun Judeu nian, maibee nia la konkorda ho nia kolega sira nia desizaun hodi kastigu mate Jesus.

⁵² Entaun nia baa hasoru governador Pilatus hodi husu lisensa atu hakoi Jesus nia mate isin.

⁵³ Hetan tiha lisensa, José baa hatuun Jesus nia mate isin hosi krus. Depois nia falun ho hena mutin diak nian i nia lori baa tau iha rate. Fatin nee, fatuk lolon nebee ema bahat tiha ona sai rate, maibee seidauk iha ema ida hatama iha laran.

⁵⁴ Tempu nee, loron Sesta iha lokraik ona, besik atu tama ona ba loron Sabadu, ema Judeu nia loron deskansa.

⁵⁵ Senhora sira nebee akompanha Jesus hosi Galileia, sira lao tuir José too iha rate. Sira haree rate nee i haree José latan Jesus nia mate isin baa.

⁵⁶ Hotu tiha, sira fila ba uma hodi prepara ai been morin ho mina morin oi-oin. Too iha loron Sabadu, sira deskansa tuir sira nia lei.