Lucas 22 - Biblia Tetun Dili

Nai lulik Judeu nia xefi sira buka dalan atu oho Nai Jesus

¹ Ema Judeu sira nia loron boot ida naran Festa Paun la Tau Fermentu besik ona. Festa nee sira mos bolu Paskua.

² Tempu nee, nai lulik nia xefi sira ho mestri relijiaun sira buka hela dalan atu oho Jesus. Maibee atu oho subar deit, tanba sira tauk povu.

Judas iha planu atu faan Nai Jesus

³ Depois Satanás tama iha Judas nia laran. Judas nee Jesus nia eskolanti ida hosi sira nain sanulu resin rua; ema mos bolu nia Iscariotes.

⁴ Entaun Judas baa buka nai lulik nia xefi sira ho xefi seguransa sira iha Uma Kreda Boot, hodi kombina para faan Jesus ba sira.

⁵ Nia planu nee halo sira kontenti teb-tebes, i sira promete atu foo osan ba nia.

⁶ Judas mos konkorda. Nunee nia komesa buka dalan hodi entrega nonook Jesus ba sira, para povu la bele hatene.

Nai Jesus nia eskolanti sira prepara ba Paskua

⁷ Loron too ona hodi halo preparasaun ba Festa Paun la Tau Fermentu. Iha loron nee, ema Judeu tenki oho bibi malae hodi selebra loron Paskua.

⁸ Entaun Jesus haruka Pedro ho João, dehan, “Imi nain rua baa uluk prepara hahaan ba Paskua, para orsida ita haan hamutuk.”

⁹ Sira husu, “Ita Boot hakarak ami baa prepara iha nebee?”

¹⁰ Jesus hataan, “Bainhira imi tama ba iha sidade Jerusalém, imi sei hasoru mane ida lori hela sanan rai ho bee iha laran. Imi tuir deit nia too nia tama ba iha uma ida.

¹¹ Too iha uma, husu ba uma nain nunee: ‘Mestri husu fatin iha nebee atu prepara ba Nia hodi haan hamutuk ho Nia eskolante sira iha loron Paskua?’

¹² Uma nain sei hatudu salaun ida iha uma andar leten, nia prepara tiha ona fatin nee. Hela deit imi nain rua baa prepara hahaan iha nebaa.”

¹³ Nunee sira nain rua baa, hetan buat hotu tuir loloos saida mak Jesus hatete ba sira. I sira prepara hahaan Paskua iha nebaa.

Loron boot Paskua

¹⁴ Bainhira oras too ona, Jesus ho Nia apostolu sira tuur haleu meza atu haan hamutuk.

¹⁵ Jesus hatete ba sira, “Hau hakarak teb-tebes haan hamutuk ho imi iha loron Paskua nee, molok Hau terus.

¹⁶ Hau hakarak halo nunee hodi hatudu ba imi katak Hau sei la haan tan hahaan Paskua nian too ema haree momoos Nai Maromak ukun nudar Liurai.”

¹⁷ Depois Jesus foti tua kopu ida hodi foo agradese ba Nai Maromak. I Nia foo tua nee ba sira hodi hatete, “Simu baa i fahe ba imi ida-idak hemu.

¹⁸ Hau hatete ba imi, Hau sei la hemu tan tua too ema haree Nai Maromak ukun nudar Liurai.”

¹⁹ Depois Nia foti paun fuan ida hodi agradese ba Nai Maromak. Nia silu paun nee foo ba Nia eskolanti sira hodi hatete, “Nee Hau nia isin nebee Hau foo ba imi. Halo hanesan nee nafatin hodi hanoin Hau.”

²⁰ Bainhira sira haan hotu ona, Jesus foti tan tua kopu ida hodi dehan, “Tua nee hatudu Maromak nia promesa foun nebee Nia halo ho imi. Promesa nee sei sai realidade tanba Hau nia raan sei fakar ba imi.

²¹ Maibee iha ema ida haan hamutuk hela ho Hau iha meza nee, nia mak sei faan Hau.

²² Loos, Hau, Ema Oan tenki mate duni tuir Nai Maromak nia planu. Maibee ema nebee faan Hau nee, sei terus teb-tebes.”

²³ Rona nunee, Jesus nia eskolanti sira komesa husu ba malu, see mak atu halo buat aat nee.

Eskolante sira haksesuk malu kona ba see mak boot liu

²⁴ Depois Jesus nia eskolanti sira komesa haksesuk malu. Sira diskuti malu kona baa, hosi sira nee, ida nebee mak boot liu.

²⁵ Maibee Jesus siak sira dehan, “Iha nasaun selu-seluk, liurai sira hanehan sira nia reinu. Maski nunee sira hakarak para povu bolu sira dehan ‘Liurai laran luak’.

²⁶ Maibee imi la bele nunee. See mak boot liu, nia tenki sai hanesan ema nebee kiik liu. I ema nebee ukun, tenki sai hanesan atan hodi serbii ema seluk.

²⁷ Hanoin took. Ida nebee mak boot liu: ema nebee tuur haan iha meza ka, ida nebee serbii nia? Ida nebee tuur haan iha meza mak boot. Maibee Hau iha imi nia leet hanesan ema nebee serbii.

²⁸ Bainhira Hau iha susar nia laran, imi mak hamutuk ho Hau.

²⁹ Hau nia Aman foti ona Hau sai Liurai hodi ukun. Nunee mos, agora Hau foti imi hodi ukun,

³⁰ atu nunee bainhira Hau kaer ukun, imi bele tuur iha meza hodi haan-hemu hamutuk ho Hau. I imi mak sei ukun suku sanulu resin rua iha Israel.”

Nai Jesus dehan, Pedro sei nega Nia

³¹ Jesus hatete ba Simão Pedro, “Simão, Simão, Satanás husu lisensa ba Maromak atu koko imi. Nia hakarak haketak imi hosi Hau, hanesan ema tahek foos para hasai nia kulit.

³² Maibee, Simão, Hau halo ona orasaun ba o, para o nia fiar la bele lakon. I bainhira o fila fali mai Hau, o tenki hametin o nia kolega sira nia fiar.”

³³ Pedro hataan, “Lae, Nai! Hau prontu tama kadeia no mate hamutuk ho Ita Boot.”

³⁴ Maibee Jesus hataan fali dehan, “Simão, rona mai. Orsida molok manu kokoreek, o sei nega Hau dala tolu dehan, o la konhese Hau.”

Eskolante sira tenki prontu hasoru susar

³⁵ Depois Jesus husu ba Nia eskolanti sira, “Uluk Hau haruka imi baa foo sai Hau nia Novidade Diak, Hau hatete para imi la bele lori osan, bukae, ho sandalias rezerva. Iha tempu nebaa, imi falta buat ruma ka?” Sira hataan, “Lae, ami la falta buat ida.”

³⁶ Jesus dehan, “Maibee agora oin seluk. Se imi iha osan, lori deit. Se iha bukae, lori mos. Se la iha surik, faan tiha imi nia faru ida hodi sosa.

³⁷ Tanba ema judeu sira konsidera Hau hanesan ema nebee halo krimi ka ema aat. La kleur tan sira sei mai kaer Hau. Nee tuir saida maka profeta Isaias hakerek ona. Agora sei sai duni. Buat nebee hakerek kona ba Hau nee besik kumpri ona."

³⁸ Sira dehan, “Nai, ami iha surik rua.” Jesus hataan, “Too ona, lalika koalia tan ona.”

Nai Jesus harohan iha foho Oliveira

³⁹ Depois, Jesus sai hosi sidade baa iha foho Oliveira, hanesan baibain. Nia eskolanti sira akompanha Nia.

⁴⁰ Too iha nebaa, Nia dehan ba sira, “Imi tenki halo orasaun para imi la bele monu ba tentasaun.”

⁴¹ Depois Jesus hadook aan ituan hosi sira, i Nia hakneak hodi halo orasaun, dehan,

⁴² “Hau nia Aman, se Ita Boot hakarak, hasai tiha terus ida nee hosi Hau. Maibee la bele halo tuir Hau nia hakarak, halo tuir deit Ita Boot nia hakarak.”

⁴³ [Anju ida mai hosi lalehan hodi foo forsa ba Nia.

⁴⁴ Jesus laran terus teb-tebes, nee mak Nia halo orasaun makaas liu tan, too Nia kosar sai turu ba rai hanesan raan.]

⁴⁵ Harohan tiha hotu, Jesus hamriik hodi fila fali ba Nia eskolanti sira, maibee sira toba dukur hela, tanba sira nia laran tristi.

⁴⁶ Jesus hatete ba sira, “Nusaa mak imi toba? Hadeer ona hodi halo orasaun para imi la bele monu ba tentasaun.”

Ema kaer Nai Jesus

⁴⁷ Jesus sei koalia hela, Judas, eskolanti ida hosi sira nain sanulu resin rua nee, lori ema barak mai. Nia besik baa hodi rei Jesus.

⁴⁸ Maibee Jesus hatete, “Hai, Judas, o rei Hau, Ema Oan, hodi faan Hau ka?”

⁴⁹ Bainhira Jesus nia eskolanti sira seluk hatene saida mak atu akontese, sira husu ba Jesus, “Nai, ami bele ataka sira ho surik ka?”

⁵⁰ I eskolanti ida tesi kotu tiha ema ida nia tilun sorin loos. Ema ida kanek nee nai lulik nia boot nia atan.

⁵¹ Maibee Jesus hatete, “Paara ona!” Depois Nia foti atan nee nia tilun hodi taka halo tomak fali.

⁵² Ema sira nebee mai atu kaer Jesus nee mak nai lulik Judeu nia xefi sira, xefi seguransa sira iha Uma Kreda Boot, ho lideransa sira. Jesus husu ba sira, “Nusaa mak imi mai kaer Hau lori surik ho ai dona? Imi hanoin Hau ema aat ka?

⁵³ Afinal loro-loron Hau hamutuk hela ho imi iha area Uma Kreda Boot nian, i imi la kaer Hau. Maibee agora imi nia tempu, no mos agora forsa nakukun nia tempu.”

Pedro nega Nai Jesus

⁵⁴ Depois sira kaer Jesus, i lori Nia ba iha nai lulik boot nia uma. Pedro lao tutuir hosi dook deit.

⁵⁵ Iha uma oin ema haneruk hela ahi, i Pedro mos baa tuur hamutuk ho sira.

⁵⁶ Iha atan feto ida haree Pedro tuur hela besik ahi. Feto nee baa fihir didiak Pedro nia oin, i hatete, “Ema ida nee hamutuk ho Jesus!”

⁵⁷ Maibee Pedro nega dehan, “Lae! Hau la konhese Nia.”

⁵⁸ La kleur, ema ida tan haree Pedro, i dehan, “O nee Nia ema duni!” Maibee Pedro hataan, “Lae, maun! Laos hau.”

⁵⁹ Liu tiha oras ida hanesan nee, iha tan ema ida hatete ho lian makaas dehan, “Ema nee hamutuk ho Jesus duni. La iha duvida, tanba nia mos ema Galileia.”

⁶⁰ Maibee Pedro nega dehan, “Lae! Hau la hatene saida mak ita koalia nee.” Pedro sei koalia hela manu mos kokoreek.

⁶¹ Nai Jesus fila ba kotuk hodi hateke loos ba Pedro. I Pedro hanoin fali Nai Jesus nia liafuan nebee Nia dehan, “Molok manu kokoreek, o sei nega Hau dala tolu.”

⁶² Nunee Pedro sai hosi nebaa i tanis halerik.

Ema baku Nai Jesus i tarata Nia

⁶³ Ema sira nebee hein Jesus nee komesa hamoe Nia i baku Nia fila-fila.

⁶⁴ Sira kesi tiha Nia matan ho hena hodi goza Nia dehan, “He, siik took, see mak baku o nee?”

⁶⁵ I sira mos hatete liafuan aat oi-oin hodi tarata Nia.

Nai Jesus iha justisa nain relijiaun Judeu nia oin

⁶⁶ Iha dadeer-saan, loro matan foin sae, ema Judeu nia ulun boot sira halibur malu. Sira nee mak: lideransa sira, nai lulik nia xefi sira ho mestri relijiaun sira. Depois ema nebee hein Jesus lori Nia baa aprezenta ba sira para tesi Nia lia.

⁶⁷ Juis sira husu ba Nia, “Hatete mai ami, O mak Kristu ka?” Jesus hataan, “Maski Hau hatete ba imi, imi sei la fiar.

⁶⁸ I se Hau husu buat ruma ba imi, imi sei la hataan.

⁶⁹ Maibee komesa agora, Hau, Ema Oan tuur ona iha Nai Maromak Forsa Teb-tebes nia sorin loos.”

⁷⁰ Rona nunee, sira hotu husu fali, “Entaun, O Nai Maromak nia Oan ka?” Jesus hataan, “Imi rasik mak hatete katak Hau Nai Maromak nia Oan.”

⁷¹ Depois sira dehan ba malu, “Ita la presiza tan sasin ona. Ita rona ona hosi Nia ibun rasik, Nia liafuan rasik mak hamonu Nia.”