Lucas 21 - Biblia Tetun Dili

Feto faluk kiak ida foo oferta

¹ Jesus hateke ba kaixa oferta Uma Kreda Boot nian, Nia haree ema riku balu tau osan ba kaixa laran.

² Nia mos haree feto faluk kiak ida mai tau osan oferta sentavus rua.

³ Haree nunee, Jesus dehan, “Hau hatete loloos ba imi, feto faluk kiak nee foo osan folin boot liu fali sira selu-seluk.

⁴ Sira seluk foo oferta hosi sira nia osan resin. Maibee feto faluk nee foo tiha nia osan hotu ba Nai Maromak. Atu hola hahaan mos, la iha ona.”

Nai Jesus foo hatene katak ema sei mai harahun Uma Kreda Boot

⁵ Iha tempu nee, Jesus nia eskolanti balu gaba loos Uma Kreda Boot dehan, uma nee enfeita ho fatuk mesak didiak deit ho mos sasaan kapaas oi-oin nebee ema foo ba Maromak. Maibee Jesus hatete,

⁶ “Buat nebee imi nia matan haree dadauk nee, too loron ida, sei rahun hotu. Fatuk sira nee hotu sei tetuk too rai.”

Loron susar ho terus

⁷ Jesus nia eskolanti sira husu, “Mestri, buat nebee ohin Ita Boot koalia nee, bainhira mak sei akontese? Kuandu nia tempu besik ona, sinal saida mak sei mosu?”

⁸ Jesus hataan, “Kuidadu didiak para ema la bele bosok imi. Ema barak sei mai lori Hau nia naran dehan, sira nee mak Kristu. I ema sei bosok dehan, mundu besik remata ona. Maibee la bele fiar!

⁹ Se imi rona dehan, nasaun ho nasaun funu malu i povu hamriik hasoru nai ulun sira iha fatin-fatin, keta hakfodak. Nee la signifika mundu atu remata ona. Maibee buat sira nee tenki akontese uluk mak foin mundu remata.

¹⁰ Nasaun sei funu hasoru nasaun, reinu sei funu hasoru reinu.

¹¹ Rai sei nakdoko makaas iha fatin-fatin, sei iha hamlaha boot, i moras aat oi-oin sei halo ema barak mate. Sinal boboot mos sei mosu iha loro leten, halo ema nia isin fulun hamriik.

¹² Molok buat sira nee atu akontese, ema sei kaer imi, i halo terus imi. Sira sei entrega imi ba lider uma kreda hodi tesi imi nia lia, i sei hatama imi ba kadeia. Sira mos sei foo sala ba imi iha liurai ho nai ulun sira nia oin. Buat sira nee hotu sai nunee, tanba imi tuir Hau.

¹³ Nunee imi hetan oportunidade diak para foo sai ba sira kona ba Hau.

¹⁴ Maibee imi lalika hanoin uluk dehan, imi atu defende aan oinsaa.

¹⁵ Tanba Hau sei foo liafuan matenek ba imi, halo imi nia inimigu sira la hatene atu dehan tan saida.

¹⁶ Imi nia inan-aman, maun-alin, maluk ho kolega sira sei faan imi, too imi balu mos ema oho.

¹⁷ I ema iha fatin-fatin sei odi imi, tanba imi tuir Hau.

¹⁸ Maibee imi nia fuuk lahan ida sei la lakon.

¹⁹ Se imi aguenta nafatin, imi sei hetan moris rohan-laek.”

Sidade Jerusalém sei rahun

²⁰ Jesus koalia tan dehan, “Bainhira imi haree inimigu sira haleu ona sidade Jerusalém, imi hatene ona katak, sidade besik rahun ona.

²¹ Haree nunee, ema iha provinsia Judeia tenki halai ona ba foho. Sira nebee iha sidade laran tenki halai sai ona, i sira nebee iha liur lalika tama fali ba sidade laran.

²² Tanba iha loron nee, Maromak sei haruka loron susar sira nee hotu, hodi kastigu ema sira nebee la rona ba Nia. Ida nee hodi kumpri buat nebee Nia profeta sira hakerek ona hori uluk.

²³ Iha tempu nee, feto isin rua ho inan sira nebee foo susu sira nia oan, sei terus teb-tebes. Iha nasaun nee tomak, ema sei hetan terus boot, tanba Nai Maromak fakar Nia hirus ba povu nee.

²⁴ Inimigu sei oho sira balu, i lori sai balu baa kastigu iha nasaun selu-seluk. I ema hosi rai liur nebee la fiar Nai Maromak sei mai sama i hanehan povu Jerusalém, too tempu nebee Nai Maromak desidi ba sira nee remata ona.”

Ema Oan sei fila mai

²⁵ Jesus hatutan tan, dehan, “Sei iha sinal iha loro matan, iha fulan no iha fitun. Iha mundu nee mos, tasi siak i laloran boot tarutu baa-mai, halo ema iha nasaun hotu-hotu laran susar, too sira hanoin la hetan.

²⁶ Forsa sira iha loro-leten sei nakdoko arbiru i rungu-ranga. Haree nunee, ema sei tauk too dezmaia, tanba sira hatene dezastre boot atu mosu ona iha mundu tomak.

²⁷ Entaun mak sira haree Hau, Ema Oan tuun mai iha kalohan laran, ho kbiit boot ho naroman nabilan nian.

²⁸ Bainhira sinal sira nee hahuu akontese, hamriik metin no fotin oin ho laran haksolok baa, tanba imi nia Salvador besik mai ona.”

Komparasaun hosi ai huun

²⁹ Depois Jesus halo komparasaun ida dehan, “Imi hanoin took ai figeira ka ai huun seluk.

³⁰ Bainhira ai nee dikin ona, nee sinal katak, besik bailoro ona.

³¹ Nunee mos bainhira imi haree buat sira nee akontese ona, imi hatene katak, tempu besik ona para Nai Maromak rasik ukun nudar Liurai.

³² Hau hatete loloos ba imi, hosi ema hotu nebee moris iha tempu nee, iha balu sei moris too buat sira nee akontese.

³³ Loro leten ho rai sei remata, maibee Hau nia liafuan sei la remata.”

Prepara aan hein Nai Jesus fila fali mai hosi lalehan

³⁴ Jesus hatutan tan dehan, “Matan moris neon nain! Keta halo festa hela deit, keta sai lanu-teen, no keta hanoin liu ba mundu nia hakarak. Se lae, bainhira Hau fila fali mai derepenti, imi hanesan animal fuik nebee molok hakfodak mono ba iha lasu.

³⁵ Tanba bainhira Hau fila fali mai, la iha ema ida iha mundu mak bele subar hosi Hau nia oin.

³⁶ Nee duni, matan moris neon nain nafatin. Halo orasaun bebeik atu imi bele liu hosi susar nee ho diak. Nunee too ikus imi sei la tauk hamriik metin iha Ema Oan nia oin.”

³⁷ Loro-loron Jesus baa hanorin iha Uma Kreda Boot. Maibee kalan Nia sai hosi Jerusalém baa toba iha foho Oliveira.

³⁸ Dadeer-saan rai huun mutin, ema barak lao ba iha Uma Kreda Boot para rona Nia hanorin.