Lucas 2 - Biblia Tetun Dili

Nai Jesus moris

¹ Iha tempu nebaa liurai boot Augusto hasai orden para estadu Roma tenki halo sensus hodi rejistu nia povu hotu-hotu.

² Nee foin primeira-ves mak sira halo sensus, i momentu nebaa, governador Kirinu mak ukun iha provinsia Síria.

³ Entaun ema hotu-hotu fila ba ida-idak nia aldeia hodi rejistu.

⁴ Nunee mos José sai hosi Nazaré iha Galileia hodi baa rejistu iha liurai David nia moris fatin Belém iha provinsia Judeia, tanba José hosi liurai David nia jerasaun.

⁵ Nia lori mos Maria, tanba sira nain rua troka prenda ona. Momentu nee, Maria isin rua hela.

⁶ Sira too iha Belém, Maria nia loron hodi tuur ahi too ona.

⁷ Nia tuur ahi oan mane boot. Nia falun ho neras, i hatoba iha animal nia haan fatin, tanba la iha fatin ba sira hodi hela.

Anju foo hatene Nai Jesus nia moris ba bibi atan sira

⁸ Iha kalan nee, bibi atan balu hein hela sira nia bibi malae iha animal sira nia haan fatin dook hosi sidade.

⁹ Derepenti deit Nai Maromak nia anju ida mosu ba sira, i Maromak nia naroman nabilan haleu sira, halo sira tauk teb-tebes.

¹⁰ Maibee anju hatete ba sira, “La bele tauk! Hau mai hatoo novidade diak ida ba imi. Novidade diak nee sei halo ema hotu-hotu haksolok boot.

¹¹ Ohin imi nia Salvador moris ona iha liurai David nia moris fatin Belém. Nia mak Kristu, imi nia Nai, Ema nebee Maromak promete ona hori uluk atu haruka mai.

¹² Sinal atu imi hatene Nia mak nee: Imi sei hetan Kosok Oan ida falun hela ho neras i hatoba hela iha animal nia haan fatin.”

¹³ Derpenti anju lubuk boot ida hosi lalehan mosu hamutuk ho anju nee. Sira hotu hahii Maromak dehan,

¹⁴ “Foti aas Nai Maromak nia naran. Nia tuur iha fatin aas liu. Nai Maromak foo dame ba ema iha mundu nebee halo haksolok Nia laran.”

¹⁵ Depois anju sira fila fali ba lalehan. I bibi atan sira hatete ba malu, “Mai ita baa Belém hodi haree saida mak akontese iha nebaa, tuir saida mak Nai Maromak foo hatene ona mai ita.”

¹⁶ Entaun sira baa kedas. Too iha nebaa, sira hetan Maria ho José, ho Kosok Oan nebee toba hela iha animal nia haan fatin.

¹⁷ Haree tiha Labarik nee, bibi atan sira konta ba ema hotu saida mak anju sira hatete ona ba sira kona ba Kosok Oan nee.

¹⁸ Rona tiha bibi atan sira nia liafuan, ema hotu admira.

¹⁹ Maibee Maria rai hela buat sira nee hotu iha nia laran, hodi hanoin didiak buat sira nee dehan saida.

²⁰ Hotu tiha, bibi atan sira fila fali ba hein sira nia bibi, hodi hahii foti aas Nai Maromak nia naran tanba buat nebee sira rona i haree nee tuir loloos saida mak anju foo hatene ona ba sira.

Sira tau naran ba Kosok Oan nee Jesus no sunat Nia

²¹ Bainhira Jesus halo loron walu ona, ema tenki sunat Nia. Loron serimonia sunat Kosok Oan nee, Nia inan-aman tau Nia naran Jesus. Naran nee mak anju foo hatene ba Nia inan, bainhira nia seidauk isin rua.

Sira lori Jesus ba Uma Kreda Boot

²² Iha Lei ida hosi Moisés nebee dehan, feto nebee tuur ahi liu ona loron haat nulu tenki ba halo tuir serimonia hamoos aan iha Uma Kreda Boot. Entaun José ho Maria baa sidade Jerusalém hodi halo tuir lei nee. Sira lori mos Kosok Oan Jesus ba iha Uma Kreda Boot hodi entrega ba Nai Maromak.

²³ Nunee sira halo tuir Nai Maromak nia lei ida nebee dehan, “Ema hotu-hotu tenki entrega sira nia oan mane primeiru ba Nai Maromak.”

²⁴ Tuir Nai Maromak nia lei, inan-aman mos tenki foo lakateu par ida ka manu pombu oan rua hanesan sakrifisiu. José ho Maria mos halo tuir.

Simeão dehan Jesus mak Kristu

²⁵ Tempu nee, iha katuas ida naran Simeão hela iha sidade Jerusalém. Nia ema ida ke moris loos i badinas halo tuir Nai Maromak nia hakarak. Nia hein hela Nai Maromak atu salva ema Israel. Nia nakonu ho Maromak nia Espiritu Santu,

²⁶ i Espiritu Santu foo hatene ona ba nia katak, nia sei haree tiha Kristu lai, mak foin nia mate. Kristu nee mak Nai Maromak promete hori uluk ona atu haruka mai.

²⁷ Iha loron nee, Maromak nia Espiritu hatete ba Simeão para baa iha Uma Kreda Boot. Nunee, bainhira José ho Maria lori Jesus baa entrega ba Maromak hodi kumpri lei,

²⁸ Simeão mos iha nebaa. Nia simu no kous Kosok Oan nee hodi hahii Nai Maromak dehan,

²⁹ “Nai, Ita Boot kumpri ona Ita Boot nia promesa mai hau ata. Agora Ita Boot bele husik ona hau mate ho paz.

³⁰ Tanba hau nia matan haree tiha ona Ema nebee mak Ita Boot haruka mai hodi salva ami.

³¹ Ita Boot prepara ona Nia iha nasaun hotu-hotu nia prezensa.

³² Para Nia sai naroman ba nasaun sira seluk, i halo Ita Boot nia povu Israel sai naran boot.”

³³ Rona nunee, Jesus nia inan-aman admira ho buat nebee Simeão hatete kona ba Jesus.

³⁴ Depois Simeão foo bensaun ba sira, i hatete ba Jesus nia inan Maria, “Maromak desidi ona katak, ema Israel barak sei monu tanba la simu Labarik nee, maibee sira seluk Nia sei foti sae. Nia sei hatudu sai Maromak nia planu, maibee ema barak sei koalia kontra Nia.

³⁵ Ho nunee, sira sei hatudu loloos, saida mak iha sira nia laran. I Maria, o mos sei laran tristi teb-tebes, hanesan surik sona borus o nia laran.”

Ana hahii Maromak tanba Nai Jesus

^36-37 Iha Uma Kreda Boot, iha mos profeta feto ida naran Ana. Nia aman naran Fanuel, hosi suku Asér. Nia kaben i moris hamutuk ho nia lain tinan hitu, depois nia kaben mate, husik hela nia faluk. Agora nia halo ona tinan walu-nulu resin haat, i ferik liu ona. Nia nunka husik Uma Kreda Boot, no hela iha nebaa hodi adora Nai Maromak loron-kalan ho orasaun no jejun.

³⁸ Simeão sei koalia hela ho José no Maria, profeta Ana mos too mai. Nia hahii Nai Maromak, i foo sai kona ba Jesus ba ema hotu nebee hein hela Maromak atu foo liberdade ba povu Israel.

José ho Maria fila fali ba aldeia Nazaré

³⁹ Bainhira José ho Maria halo tuir tiha hotu Nai Maromak nia lei, sira fila fali ba sira nia aldeia Nazaré iha provinsia Galileia.

⁴⁰ Jesus boot ba dadauk, isin mos diak no forti. Nia matenek teb-tebes, i Nai Maromak nia grasa iha Nia.

Nai Jesus iha Uma Kreda Boot

⁴¹ Tinan-tinan Jesus nia inan-aman baa iha sidade Jerusalém hodi tuir loron boot Paskua Judeu nian.

⁴² Bainhira Jesus tinan sanulu resin rua ona, sira baa hamutuk tuir loron boot Paskua hanesan baibain.

^43-44 Loron Paskua hotu ona, Jesus nia inan-aman fila fali ba sira nia uma iha Nazaré, maibee Jesus sei hela iha Jerusalém. Nia inan-aman la hatene, sira hanoin Jesus lao hamutuk ho Nia kolega sira, tanba iha ema barak lao rame-rame. Nunee sira lao tiha loron ida tomak mak foin buka Nia iha maluk ho kolega sira nia leet.

⁴⁵ Tanba sira buka la hetan, entaun sira fila fali ba Jerusalém hodi buka Nia iha nebaa.

⁴⁶ Liu tiha loron tolu, foin Nia inan-aman hetan Nia iha uma kreda boot laran. Nia tuur hamutuk hela ho mestri relijiaun sira hodi rona sira i mos husu pergunta ba sira.

⁴⁷ Ema hotu-hotu nebee rona Nia, admira teb-tebes, tanba Nia hatene klean i hataan mestri sira nia pergunta ho matenek.

⁴⁸ Haree nunee, Nia inan-aman mos admira. Depois Nia inan dehan, “Oan, nusaa mak O halo nunee mai ami? O nia aman ho hau laran susar hodi buka O!”

⁴⁹ Maibee Jesus hataan, “Tanba saa mak imi tenki buka Hau? Imi la hatene katak, Hau tenki iha Hau nia Aman nia uma?”

⁵⁰ Maibee sira la komprende saida mak Nia hatete.

⁵¹ Depois Jesus fila ho sira ba Nazaré, i halo tuir sira nia hakarak. Nia inan rai buat sira nee hotu iha nia laran.

⁵² Jesus boot ba dadauk i Nia matenek mos aumenta ba bebeik. Nai Maromak ho ema hadomi teb-tebes Nia.