Lucas 18 - Biblia Tetun Dili

Komparasaun kona ba feto faluk ho juis nebee aat

¹ Depois Jesus halo komparasaun ida ba Nia eskolanti sira hodi hanorin para sira tenki halo orasaun nafatin i la bele lakon esperansa.

² Nia konta nunee: “Iha sidade ida iha juis ida ke la tauk Maromak, i la interese ema ida.

³ Iha mos feto faluk ida nebee baa hasoru bebeik juis hodi husu nia direitu dehan, ‘Tesi hau nia lia ho loloos.’

⁴ Fofoun juis lakohi simu feto faluk nee, maibee too ikus nia dehan ba nia aan, ‘Maski hau la tauk Maromak, i hau la respeita ema ida,

⁵ feto faluk nee mai inkomoda bebeik hau. Diak liu hau tesi nia lia ho loloos. Se lae, nia mai bebeik halo hau kolen ona.’ ”

⁶ Depois Nai Jesus hatete, “Imi hanoin took, juis laran aat nia koalia nee.

⁷ Too ikus, nia tulun duni feto faluk nee. Saa tan Nai Maromak! Ema nebee Maromak hili ona, sira loron-kalan harohan husu tulun ba Nia. Nia sei tesi sira nia lia ho loloos, i sei la demora.

⁸ Hau hatete ba imi, Maromak sei desidi kedas sira nee ema moris loos. Maibee Hau hakarak husu nunee: Aban-bainrua Hau, Ema Oan, fila fali mai iha mundu, Hau sei hetan ema nebee fiar mai Hau ka lae?”

Komparasaun kona ba ema Farizeu ho kobrador impostu

⁹ Jesus halo tan komparasaun ida ba ema nebee foti aan dehan sira mak moris loos liu, i la konsidera ema seluk. Nia konta hanesan nee:

¹⁰ “Iha loron ida, ema nain rua baa halo orasaun iha Uma Kreda Boot. Ida hosi grupu relijiaun Farizeu, ida seluk kobrador impostu.

¹¹ Ema Farizeu nee hamriik hodi halo orasaun nunee, ‘Maromak, hau agradese ba Ita Boot, tanba hau laos hanesan ema sira seluk. Hau laos naok-teen, laos ema aat, la halo sala ho ema nia kaben, no la hanesan kobrador impostu ida nebaa.

¹² Hau jejun semana ida dala rua. I buat hotu-hotu nebee hau hetan, hau sempre foo parte ida hosi sanulu ba Ita Boot.’

¹³ Maibee kobrador impostu nee hamriik hosi dook, i la brani foti matan ba leten. Nia hakruuk i baku nia hirus matan, ho laran tristi teb-tebes tanba nia halo ona sala. I nia harohan dehan, ‘Maromak, hau ema sala nain. Hadomi hau baa.’

¹⁴ Hotu tiha, ema nain rua nee fila ba uma.” Jesus hatutan tan, “Hau hatete ba imi, ema kobrador impostu nee fila ba uma nudar ema moris loos, maibee ema Farizeu lae. Tanba ema nebee foti aan, Maromak sei hatuun, i ema nebee haraik aan, Maromak sei foti aas.”

Nai Jesus foo bensaun ba labarik oan sira

¹⁵ Ema balu lori sira nia oan ba Jesus, atu Nia tau liman hodi foo bensaun ba sira. Haree nunee, Jesus nia eskolanti sira hirus ema sira nee.

¹⁶ Maibee Jesus bolu labarik sira nee ba Nia. I Jesus siak Nia eskolanti sira dehan, “Husik labarik oan sira nee mai Hau, la bele impede netik sira. Tanba ema hanesan sira nee mak sai Maromak nia reinu.

¹⁷ Hau hatete loloos ba imi, see mak la simu Maromak nia reinu hanesan labarik oan ida, nia sei la tama iha Maromak nia reinu.”

Ema riku susar tama lalehan

¹⁸ Loron ida, iha ema Judeu nia boot ida husu ba Jesus, “Mestri nebee diak, hau tenki halo saida para hau bele hetan moris rohan-laek?”

¹⁹ Jesus hataan, “Tanba saa mak ita dehan, Hau ema diak? La iha ema ida mak diak, so Maromak deit.

²⁰ O hatene ona Maromak nia ukun fuan sira nee: La bele halo relasaun seksual ho ema nebee laos o nia kaben, la bele oho ema, la bele naok, la bele foo sasin falsu, respeita o nia inan-aman.”

²¹ Ema nee hataan, “Ukun fuan sira nee, hau halo tuir hotu, komesa hau sei kiik.”

²² Rona nunee, Jesus hataan, “Maibee o sei falta buat ida nebee o tenki halo. Agora baa faan tiha o nia rikusoin hotu, i osan nee fahe ba ema kiak. Nunee mak o sei hetan fali rikusoin iha lalehan. Depois mai tuir Hau.”

²³ Rona tiha Jesus nia resposta, ema nee laran tristi teb-tebes, tanba nia ema riku boot.

²⁴ Jesus hateke ba nia hodi dehan, “Ema riku susar teb-tebes atu tama ba Maromak nia reinu.

²⁵ Kuda kamelu tama liu hosi daun kuak susar teb-tebes. Maibee susar liu tan, ema riku ida atu tama ba Maromak nia reinu.”

²⁶ Ema sira nebee rona Jesus koalia nee, sira husu, “Se nunee, see loos mak bele hetan salvasaun?”

²⁷ Jesus hataan, “Ba ema, la bele duni. Maibee ba Nai Maromak, bele.”

²⁸ Pedro hatete, “Ami husik tiha ona buat hotu-hotu hodi tuir Ita Boot.”

²⁹ Jesus dehan ba sira, “Hau hatete loloos ba imi, ema nebee husik ona nia uma, nia kaben, nia maun-alin, nia inan-aman, ka nia oan sira, tanba nia serbii Maromak nudar nia Liurai,

³⁰ nia sei simu barak liu fali buat nebee mak nia husik iha moris nee. I bainhira nia husik mundu nee, nia sei hetan moris rohan-laek.”

Nai Jesus koalia ba dala tolu kona ba Nia mate

³¹ Jesus bolu Nia eskolanti nain sanulu resin rua halibur hamutuk iha fatin ida. Nia hatete ba sira, “Ita besik ona Jerusalém. Too iha nebaa, buat hotu nebee Maromak nia profeta sira uluk hakerek ona kona ba Ema Oan sei kumpri duni.

³² Ema sei entrega Hau ba ema nebee laos Judeu. I ema sira nee sei hamoe Hau, tarata Hau, tafui kabeen mai Hau,

³³ baku Hau ho sikoti, i oho Hau. Maibee iha loron tolu Hau sei moris fali.”

³⁴ Nia eskolanti sira la komprende liu buat ida. Signifikadu hosi liafuan nee taka hela ba sira, i sira la hatene Jesus koalia kona ba saida.

Nai Jesus kura ema matan delek ida

³⁵ Bainhira Jesus besik atu tama ona iha sidade Jerikó, iha ema matan delek ida tuur hela iha dalan ninin hodi husu ezmola.

³⁶ Ema matan delek nee rona ema barak lao liu hosi nebaa, nia husu, saida mak akontese.

³⁷ Ema dehan ba nia, “Jesus hosi Nazaré mak liu.”

³⁸ Entaun nia bolu ho lian makaas dehan, “Jesus, liurai David nia jerasaun! Hadomi hau baa.”

³⁹ Ema sira nebee lao iha Jesus nia oin, siak ema matan delek nee i haruka nia nonook. Maibee ema nee bolu ho lian makaas liu tan, dehan, “Liurai David nia Jerasaun! Hadomi hau baa.”

⁴⁰ Rona nunee, Jesus mos paara, i Nia haruka ema lori ema nee mai. Bainhira ema nee too, Jesus husu ba nia,

⁴¹ “O hakarak Hau halo saida ba o?” Nia hataan, “Nai, hau hakarak haree.”

⁴² Jesus hatete ba nia, “O haree ona baa. Tanba o nia fiar mak o hetan kura.”

⁴³ I ema nee nia matan haree kedas. Depois nia lao tuir Jesus, hahii dadaun Nai Maromak. Ema hotu-hotu nebee haree buat nee, sira mos hahii Maromak.