Lucas 17 - Biblia Tetun Dili

Jesus foo konselhu kona ba sala ho perdaun

¹ Jesus hatete ba Nia eskolanti sira dehan, “Sempre iha buat ruma mak halo ema monu ba sala. Maibee see mak halo ema seluk monu ba sala, nia sei simu kastigu todan liu.

² See mak halo ema nebee fiar sei fraku monu ba sala, diak liu kesi fatuk boot iha nia kakorok i lori nia ba soe iha tasi laran.

³ Nee duni, imi tenki kuidadu para la bele halo ema seluk monu ba sala! Se imi nia maluk ida halo sala, koriji nia. Se nia arepende hosi nia sala, foo perdaun ba nia.

⁴ Se nia halo sala hasoru o dala hitu iha loron ida, i dala hitu nia fila ba o i hatete "hau arepende ona", maka o tenki foo perdaun ba nia.”

Fiar ba Nai Maromak

⁵ Nai Jesus nia apostolu sira husu ba Nia, “Nai, aumenta tan ami nia fiar!”

⁶ Jesus hataan, “Se imi nia fiar kiik-oan hanesan mostarda musan ida mos, imi bele foo orden ba ai huun boot ida dehan, ‘Sai tiha hosi nee, i muda baa hamriik fali iha tasi laran.’ I ai huun nee sei tuir duni imi nia orden.”

Atan tenki tuir patraun nia hakarak

⁷ Jesus foo ezemplu ida dehan, “Hanoin took, imi mak hanesan patraun. Imi nia atan ida baa fila rai iha toos ka hein bibi malae. Bainhira atan nee fila hosi serbisu, imi konvida kedas nia mai haan ka?

⁸ Lae! Imi sei haruka dehan, ‘O baa prepara hahaan mai hau lai, depois troka tiha o nia ropa hodi serve hau iha meza. Depois mak o bele haan-hemu.’

⁹ Tuir imi nia hanoin, se atan nee halo tuir buat nebee patraun haruka, patraun sei foo obrigadu ba nia ka? Lae!

¹⁰ Imi mos hanesan. Se imi halo hotu ona serbisu nebee Maromak foo ba imi, imi tenki hatete, ‘Ami nee atan nebee la serve. Ami so halao deit ami nia serbisu.’ ”

Nai Jesus kura ema moras lepra nain sanulu

¹¹ Jesus kontinua lao ba Jerusalém. Nia lao tuir baliza entre provinsia Galileia ho Samaria.

¹² Bainhira Nia tama ba aldeia ida, mane nain sanulu moras lepra mai hasoru Nia. Sira hamriik hosi dook deit

¹³ hodi bolu ho lian makaas dehan, “Jesus, Mestri, hanoin ami baa!”

¹⁴ Bainhira Jesus haree sira, Nia hatete ba sira, “Imi baa hatudu imi nia isin ba nai lulik sira, para sira haree.” Entaun sira baa. Iha dalan, derepenti sira hotu hetan kura.

¹⁵ Ema ida hosi nain sanulu nee, bainhira nia haree katak nia diak tiha ona, nia fila kedas ba Jesus hodi hahii dadaun Maromak ho lian makaas.

¹⁶ Too iha nebaa, nia hakneak ho hakruuk too rai iha Jesus nia ain hodi agradese ba Nia. Afinal, ema nee ema Samaria, laos ema Judeu.

¹⁷ Jesus husu ba ema sira iha nebaa, “Ohin Hau kura ema nain sanulu. Sira nain sia iha nebee?

¹⁸ Nusaa mak ema estranjeiru ida nee deit mak fila mai hodi agradese ba Nai Maromak? Sira seluk iha nebee?”

¹⁹ Depois Jesus hatete ba ema nee, “O diak ona tanba o fiar. Agora bele hamriik i baa ona.”

Nai Jesus koalia kona ba Nia fila fali mai hosi lalehan

²⁰ Iha loron ida, ema Farizeu balu mai husu Jesus, “Bainhira mak Nai Maromak komesa ukun nudar Liurai?” Jesus hataan, “Maromak halao nia ukun iha mundu, laos buat ida ke ema bele haree ho matan.

²¹ Nunee ema la bele dehan, ‘Nai Maromak ukun iha nee’ ka, ‘ukun iha nebaa.’ Tanba Nai Maromak ukun ona iha imi nia leet.”

²² Depois Jesus hatete ba Nia eskolanti sira, “Iha tempu oin mai, imi sei hakarak teb-tebes atu haree Hau, Ema Oan fila fali mai, maibee imi la haree.

²³ Ema sei hatete ba imi, ‘Ema Oan iha nee’ ka, ‘Nia iha nebaa.’ Lalika baa haree e lalika fiar.

²⁴ Tanba bainhira Hau, Ema Oan fila fali mai hosi lalehan, ema sei haree momoos, hanesan rai lakan makaas foo naroman hosi rai rohan ba rohan.

²⁵ Maibee Hau tenki hetan terus oi-oin uluk lai, i ema sira nebee moris agora sei fila kotuk mai Hau.

²⁶ Bainhira loron too atu Hau fila fali mai, ema sei moris hanesan iha Noé nia tempu uluk.

²⁷ Iha tempu nebaa, sira haan-hemu, sira kaben no halo festa kazamentu hanesan baibain, too loron Noé tama ba roo boot laran. Depois, bee boot sae, halo sira mate hotu.

²⁸ Nunee mos akontese iha Lo nia tempu. Ema haan-hemu, halo kontratu, halo toos, i harii uma, hanesan baibain.

²⁹ Maibee iha loron nebee Lo sai hosi sidade Sodoma, derepenti deit ahi ho ahi klaak monu tuun hosi loro-leten, halo ema Sodoma sira mate hotu.

³⁰ Nunee mos, bainhira Hau, Ema Oan fila fali mai i ema hotu-hotu haree momoos Hau.

³¹ Iha loron nee, ema nebee iha hela liur, la bele tama ba uma laran hodi foti nia sasaan. Ema nebee iha hela toos, la bele fila baa foti buat ruma iha uma.

³² Keta haluha saida mak akontese ho Lo nia kaben.

³³ See mak hakarak salva nia aan, nia sei lakon nia moris. I see mak lakon nia moris, nia sei hetan moris rohan-laek.

³⁴ Hau hatete ba imi, aban-bainrua bainhira Hau fila mai, ema nain rua toba hela iha kama ida, Maromak sei lori tiha ida, i husik hela ida seluk.

³⁵ Iha feto nain rua fai hela hare, Maromak sei lori tiha ida, i husik hela ida seluk.

³⁶ [Iha mane nain rua serbisu hela iha toos, Maromak sei lori tiha ida, i husik hela ida seluk.]”

³⁷ Jesus nia eskolanti sira husu, “Nai, buat sira nee sei akontese iha nebee?” Jesus hataan, “Bainhira imi haree manu metan semo hamutuk ba iha fatin ida, nee sinal hodi hatudu katak iha mate isin dodok iha nebaa.”