Lucas 15 - Biblia Tetun Dili

Komparasaun kona ba bibi malae nebee lakon

¹ Iha loron ida, kobrador impostu sira ho ema sira nebee moris iha sala, mai rona Jesus.

² Haree nunee, ema Farizeu ho mestri relijiaun sira murmura dehan, “Ema ida nee halo belun fali ho ema sira nebee moris iha sala, i tuur haan hamutuk fali ho sira.”

³ Depois, Jesus foo hanoin ba sira liu hosi komparasaun ida dehan,

⁴ “Se karik imi ida iha bibi malae atus ida, i bibi ida lakon tiha, bibi nain sei halo saida? Nia sei husik hela bibi sia-nulu resin sia iha rai luan, i baa buka kedas bibi ida nebee lakon nee too hetan.

⁵ Bainhira nia hetan ona bibi nee, nia kaer tau ba nia kabaas hodi fila ba uma ho kontenti.

⁶ Too iha uma, nia foo hatene nia kolega ho vizinhu sira dehan, ‘Mai ita haksolok hamutuk, tanba hau hetan fali hau nia bibi nebee lakon.’

⁷ Hau hatete ba imi, iha lalehan mos nunee. Maromak ho Nia anju sira haksolok teb-tebes bainhira sala nain ida husik nia sala. Nee halo Sira haksolok liu fali duke ema sia-nulu resin sia nebee moris loos i la presiza husik sira nia sala.

Komparasaun kona ba osan mutin nebee lakon

⁸ Jesus halo tan komparasaun ida dehan, “Senhora ida iha osan mutin sanulu, depois osan mutin ida lakon tiha. Agora nia atu halo saida? Nia sei sunu ahi-oan, i dasa uma laran tomak hodi buka didiak osan nee too hetan.

⁹ Bainhira nia hetan ona, nia foo hatene ba nia kolega ho vizinhu sira dehan, ‘Mai ita haksolok hamutuk, tanba hau hetan fali ona hau nia osan nebee lakon.’

¹⁰ Hau hatete ba imi, iha lalehan mos nunee. Maromak nia anju sira haksolok teb-tebes bainhira sala nain ida husik nia sala.”

Komparasaun kona ba oan nebee lakon

¹¹ Jesus halo komparasaun ida tan nunee: “Senhor ida iha oan mane nain rua.

¹² Loron ida, oan mane kiik dehan ba nia aman, ‘Apaa, apaa nia rikusoin sira nee, fahe ona hau nian mai.’ Entaun nia aman fahe nia rikusoin ba sira nain rua.

¹³ La kleur, oan mane kiik nee faan tiha hotu rikusoin nebee nia hetan nee hodi baa rai dook. Iha nebaa nia gasta osan arbiru hodi moris goza hela deit.

¹⁴ Too ikus nia osan hotu ona. Iha tempu nebaa, rai nee hamlaha boot, i nia moris susar.

¹⁵ Entaun nia baa buka serbisu. Ema rai nain ida simu nia i haruka nia baa hein fahi.

¹⁶ Nia hamlaha atu-mate, too nia haree fahi nia hahaan, nia kaan teb-tebes. Maibee la iha ema mak foo netik hahaan ba nia.

¹⁷ Iha ikus nia hanoin fali kona ba nia aan no dehan, ‘Ema sira nebee serbisu ba hau nia aman, simu ai haan barak too resin, i hau iha nee hamlaha atu-mate.

¹⁸ Diak liu, hau fila deit ba hau nia aman, i hau hatete ba nia katak, hau halo sala ona hasoru Maromak no hasoru apaa.

¹⁹ Hau la serve atu sai tan apaa nia oan. Hau sai deit apaa nia ema serbisu mos, la iha buat ida.’

²⁰ Entaun nia hamriik hodi fila ba nia aman. Hosi dook nia aman haree ona nia, i hanoin teb-tebes. Nia halai baa simu nia oan hodi hakuak i rei nia.

²¹ Oan nee hatete ba nia apaa, ‘Apaa, hau halo sala ona hasoru Maromak i hasoru apaa. Hau la serve atu sai tan apaa nia oan.’

²² Maibee nia aman haruka nia atan sira dehan, ‘Lalais! Baa foti ropa nebee diak liu hodi foo hatais nia. Tau kadeli ba nia liman, i tau sandalias ba nia ain.

²³ Baa dada karau vaka oan bokur ida mai oho, para ita halo festa rame-rame.

²⁴ Tanba hau nia oan nee hanesan mate tiha ona, maibee agora nia moris fila fali. Nia lakon tiha ona, maibee agora hau hetan fali.’ Nunee sira hahuu halo festa rame-rame.

²⁵ Momentu nebaa, oan mane boot iha hela toos. Bainhira nia fila, atu besik too ona uma, nia rona muzika lian no ema dansa.

²⁶ Entaun nia bolu atan ida hodi husu, ‘Imi halo saida mak rame loos nee?’

²⁷ Atan nee hataan, ‘Senhor nia alin mai fali ona. Nee mak ita nia apaa haruka oho karau oan bokur ida hodi halo festa, tanba nia fila fali ona ho diak.’

²⁸ Rona nunee, oan mane boot hirus teb-tebes, i lakohi tama ba uma laran. Depois nia aman sai baa hamaus nia atu tama ba laran.

²⁹ Maibee nia hataan ba nia aman, ‘Apaa, hanoin took! Durante tinan barak nia laran hau serbisu hanesan fali atan ba apaa, i apaa haruka hau halo saida deit, hau sempre halo tuir. Maski nunee, apaa nunka foo bibi oan ida mai hau para halo festa ho hau nia kolega sira.

³⁰ Maibee apaa nia oan nee foin mai deit i nia gasta tuun-sae apaa nia rikusoin hotu ho feto luroon sira. Agora apaa oho kedas ita nia karau bokur ida ba nia.’

³¹ Maibee nia aman hataan, ‘Hau nia oan doben, durante nee o sempre hela hamutuk ho hau. Buat hotu-hotu nebee hau nian, o nian.

³² Maibee agora ita tenki halo festa hodi haksolok, tanba o nia alin nee hanesan mate tiha ona, maibee agora nia moris fila fali. Nia hanesan lakon tiha, maibee agora hau hetan fali ona.’ ”