Lucas 14 - Biblia Tetun Dili

Nai Jesus kura ema ida iha loron Sabadu

¹ Iha loron Sabadu ida, ema boot ida hosi grupu relijiaun Farizeu konvida Jesus baa haan iha nia uma. Iha nebaa ema haree tutuir Nia saida mak Nia atu halo.

² Iha mos mane ida moras isin bubu, hamriik hela iha Jesus nia oin.

³ Jesus husu ba mestri relijiaun ho ema Farizeu sira, “Tuir ita nia lei relijiaun, bele kura ema moras iha loron Sabadu ka lae?”

⁴ Maibee sira nonook deit. Entaun Jesus tau liman ba ema moras nee hodi kura nia, i haruka nia fila.

⁵ Depois Jesus husu tan ba sira, “Se imi nia oan ka imi nia karau monu tama ba bee posu laran iha loron Sabadu, konserterza imi baa dada sai. Loos ka lae? Nee mos serbisu ida.”

⁶ La iha ema ida mak bele hataan.

La bele buka oin

⁷ Iha festa nee, Jesus haree bainaka barak baa tuur iha ema boot sira nia fatin. Entaun Nia halo komparasaun ida nunee:

⁸ “Bainhira ema konvida o baa iha festa kazamentu, la bele baa tuur iha fatin ema boot nian. Keta halo be festa nain konvida mos ema nebee boot liu o.

⁹ Se nunee, festa nain sei mai hatete ba o, ‘Foo fatin nee ba senhor nee.’ O tenki muda baa tuur iha kotuk liu nebaa, nunee o sei moe boot.

¹⁰ Maibee bainhira ema konvida o, baa tuur deit iha fatin simples. Nunee, festa nain sei mai hatete, ‘Kolega, mai tuur iha oin.’ Hanesan nee o hetan respeitu iha bainaka hotu nia oin.

¹¹ Tanba ema nebee foti aan, Maromak sei hatuun nia, i ema nebee haraik aan, Maromak sei foti aas nia.”

¹² Depois Jesus hatete ba uma nain, “Bainhira senhor halo festa, la bele konvida ita nia kolega sira, ita nia maun-alin sira, familia sira, ho vizinhu sira nebee riku. Tanba loron seluk sira sei konvida fali ita, i nunee sira selu fali buat nebee ita halo ba sira.

¹³ Maibee, bainhira senhor halo festa, konvida mak ema kiak sira, ema aleijadu sira, ema nebee lao la diak ho ema matan delek sira.

¹⁴ Se ita halo nunee, Maromak sei foo bensaun ba ita. Ema sira nee la bele selu fali buat nebee ita halo ba sira. Maibee aban-bainrua, bainhira Maromak halo moris fali ema nebee moris loos, Nia sei selu fali ita nia hahalok diak nee.”

Komparasaun kona ba festa boot

¹⁵ Rona nunee, iha ema ida nebee tuur hamutuk ho Jesus iha meza, dehan ba Nia, “Ema nebee tuur haan hamutuk iha Maromak nia reinu iha Maromak nia festa boot, hetan bensaun.”

¹⁶ Jesus hataan ho komparasaun ida nunee: “Iha ema ida halo festa boot, i konvida ema barak.

¹⁷ Bainhira oras too ona atu hahuu festa, nia haruka nia atan ida baa foo hatene ba sira nebee simu konviti, dehan, ‘Mai ona, tanba buat hotu-hotu prontu ona.’

¹⁸ Maibee sira hotu lakohi baa, i foo razaun oi-oin. Ida primeiru dehan, ‘Deskulpa! Hau foin hola rai pedasuk ida, hau tenki baa haree lai.’

¹⁹ Ida seluk dehan, ‘Deskulpa! Hau foin hola karau par lima, hau sei baa koko karau sira nee hodi koa rai.’

²⁰ Ida seluk tan dehan, ‘Hau foin kaben, tanba nee hau la baa.’

²¹ Depois atan nee fila fali hodi foo hatene ba nia patraun. Nia patraun hirus teb-tebes, i nia foo orden ba atan nee dehan, ‘Baa lalais iha dalan-dalan too mos iha dalan kloot sira iha sidade nee, lori ema kiak, ema aleijadu, ema matan delek, ho ema nebee lao la diak.’

²² Atan nee mos halo tuir. Bainhira nia fila, nia foo hatene dehan, ‘Patraun, sira mai hotu ona, maibee fatin mamuk sei iha.’

²³ Entaun patraun dehan, ‘Se nunee, o sai hosi sidade nee ba iha dalan boot sira no dalan kiik sira. O hetan see-see deit iha dalan, obriga sira mai, hodi halo nakonu hau nia fatin nee.’

²⁴ Hau hatete ba imi, hosi ema sira nebee Hau konvida uluk, ida mos la bele haan iha Hau nia festa.”

Husik buat hotu-hotu hodi tuir Jesus

²⁵ Iha loron ida, ema barak lao hamutuk ho Jesus. Nia fila oin ba sira hodi dehan,

²⁶ “Ema nebee hakarak tuir Hau, nia tenki hadomi Hau liu buat hotu-hotu. Nia tenki hadomi Hau liu fali nia inan-aman, liu nia kaben, liu nia oan, liu nia maun-alin sira, liu nia feton ho naan sira ho mos liu nia aan rasik. Se lae, nia la serve sai Hau nia eskolanti.

²⁷ Ema nebee hakarak tuir Hau, nia tenki prontu atu simu terus, hanesan ema nebee prontu lori nia krus hodi tuir Hau too mate. Se lae, nia la serve sai Hau nia eskolanti.

²⁸ Hanoin took ema nebee atu halo uma andar. Nia tenki tuur sura didiak, atu halo uma nee, tenki gasta osan hira. I nia tenki haree didiak nia osan too hodi halo remata uma nee ka lae?

²⁹ Se lae, foin hahuu halo aliserse, osan hotu tiha ona. Nunee ema bele hamoe nia,

³⁰ dehan, ‘Ema nee foin hahuu halo uma, maibee la iha kbiit hodi halo remata!’

³¹ Hau foo ezemplu ida tan. Liurai ida hakarak funu hasoru liurai seluk, nia tenki tuur hodi tetu didiak lai. Se nia iha deit soldadu rihun sanulu, nia bele manaan inimigu rihun rua-nulu ka lae?

³² Se liurai nee hanoin katak nia atu lakon, bainhira nia inimigu sei dook, nia haruka kedas nia reprezentante sira hodi ba husu para bele dame malu.

³³ Nunee mos, se o atu tuir Hau, o tenki prontu husik buat hotu-hotu nebee o iha. Se lae, o la serve atu sai Hau nia eskolanti.”

Masin nebee la meer soe tiha deit

^34-35 Jesus foo ezemplu ida tan dehan, “Masin diak duni. Maibee se karik masin nee la meer ona, ita la bele halo meer fila fali, la iha folin tan ona. Ita soe tiha deit. Imi nebee iha tilun, rona didiak baa!”