Lucas 12 - Biblia Tetun Dili

Jesus foo konselhu ba nia eskolante sira

¹ Iha tempu nebaa, ema rihun ba rihun sena malu hodi mai rona Jesus nia hanorin. Jesus hanorin uluk ba Nia eskolanti sira dehan, “Kuidadu ho ema Farizeu sira. Tanba sira nee koalia oin ida, hahalok oin seluk. Sira nia hahalok nee hanesan fermentu, ema tau ituan deit ba trigu, depois trigu sae.

² Buat hotu-hotu nebee agora taka hela, loron ida sei nakloke. I buat hotu nebee agora subar hela, aban-bainrua ema sei hatene.

³ Buat nebee mak imi koalia sub-subar agora, loron ida ema sei rona momoos. I saida mak imi koalia bis-bisi iha kuartu laran, aban-bainrua ema sei foo sai ho lian makaas iha ema barak nia oin.”

Tauk mak Maromak deit

⁴ “Hau nia belun sira, se ema atu oho imi, la bele tauk. Tanba sira so bele oho deit imi nia isin, maibee la bele halo buat ida ba imi nia klamar.

⁵ Agora Hau foo hatene ba imi, see mak imi tenki tauk. Imi tenki tauk mak Nai Maromak. Tanba Nia bele oho imi nia isin, depois Nia mos iha kbiit hodi soe imi ba infernu. Nunee imi tenki tauk mak Nia.

⁶ Hanoin took manu liin. Ema faan manu liin lima, sentavus rua deit. Maski baratu liu, maibee manu liin ida deit mos Nai Maromak la haluha.

⁷ Laos nee deit, Nai Maromak mos hatene loloos imi nia fuuk lahan hira mak iha imi nia ulun. Nee duni, lalika tauk, tanba imi folin boot liu manu liin barak.”

Keta moe foo sai katak ita tuir Nai Jesus

⁸ Jesus koalia nafatin ba Nia eskolanti sira dehan, “Rona didiak mai! See mak foo sai iha ema nia oin katak nia fiar mai Hau, aban-bainrua Hau, Ema Oan mos sei foo sai iha Maromak nia anju sira nia oin katak nia Hau nia ema.

⁹ Maibee see mak nega Hau iha ema nia oin, aban-bainrua Hau mos sei nega nia iha Maromak nia anju sira nia oin.

¹⁰ Ema nebee hatete aat Hau, Ema Oan, nia sei hetan perdaun. Maibee see mak hatete aat Maromak nia Espiritu Santu, Nai Maromak sei la foo perdaun ba nia.

¹¹ Aban-bainrua, bainhira ema lori imi baa hataan iha uma kreda ka iha ukun nain sira tanba imi fiar Hau, lalika preokupa kona ba oinsaa imi atu defende aan ka saida mak imi atu koalia.

¹² Tanba iha oras nee duni Espiritu Santu sei hanorin imi, oinsaa mak imi atu hataan sira.”

Ema riku nebee beik-teen

¹³ Ema ida hosi ema barak nee husu ba Jesus, “Mestri, hatete ba hau nia maun atu fahe ami nia aman nia rikusoin ho hau.”

¹⁴ Jesus hataan, “Belun, see mak foti Hau sai juiz hodi fahe imi nia rikusoin?”

¹⁵ Depois Jesus dehan ba ema barak nee, “Kuidadu! Matan moris neon nain, para imi la bele kaan ema nia sasaan. Tanba ema nia moris la depende ba nia rikusoin.”

¹⁶ Tuir mai, Jesus halo komparasaun ida hanesan nee: “Iha ema riku ida hetan ai haan barak hosi nia toos.

¹⁷ I nia hanoin dehan, ‘Hau nia armazen hodi tau ai haan nakonu hotu ona. Agora hau atu halo oinsaa tan?

¹⁸ Diak liu hau halo nunee deit. Hau sobu tiha armazen tuan sira nee, i harii fali halo boot liu. Nunee hau bele rai ai haan sira nee hotu ho mos hau nia sasaan selu-seluk.

¹⁹ Depois hau hatete ba hau nia aan rasik: Hau moris diak ona! Iha tiha ona buat hotu-hotu, nebee sei rai ba tinan naruk nia laran. Agora deskansa ona baa, haan-hemu no goza deit ona.’ ”

²⁰ Maibee Nai Maromak hatete ba nia, ‘Hei, o ema beik-teen! Kalan nee kedas Hau hakotu o nia iis. Depois, see mak sei hetan sasaan barak nebee o rai ba o nia aan nee?’

²¹ Nunee mos ho ema nebee halibur rikusoin ba nia aan rasik, maibee sai kiak iha Maromak nia futar oin.”

La bele preokupa ho ita nia moris

²² Depois Jesus hatete ba Nia eskolanti sira dehan, “Tanba nee Hau hatete ba imi, lalika preokupa ho imi nia moris, atu haan saida, ka atu hatais saida.

²³ Tanba ita nia moris folin liu hahaan, i ita nia isin lolon folin liu ropa.

²⁴ Haree took manu metan sira. Manu sira nee la kuda batar, la silu batar, la iha armazen hodi haloot ai haan, maibee Nai Maromak foo ai haan ba sira. Imi folin liu fali manu metan sira nee.

²⁵ Se imi preokupa kona ba imi nia moris, nee bele aumenta imi nia tinan ka? Atu aumenta ita nia moris ituan deit mos lae.

²⁶ Se buat kiik-oan deit, imi la bele halo, nusaa mak imi preokupa ho buat sira seluk?

²⁷ Haree took ai funan nebee moris iha ai laran. Ai funan nee la halo serbisu, la soru tais. Maibee Hau dehan ba imi, Liurai Salomão, maski riku teb-tebes, nia ropa kapaas halo nusaa mos, ai funan sira nee kapaas liu nafatin.

²⁸ Nunee, Nai Maromak halo furak duut nebee ohin matak, aban ema soe tiha ba ahi laran. Saa tan imi! Nia sei foo ropa ba imi hatais. Entaun nusaa mak imi nia fiar fraku hanesan nee?

²⁹ Nee duni, lalika hanoin barak kona ba haan-hemu.

³⁰ Ema sira nebee la fiar ba Maromak, mak preokupa buat sira nee. Maibee imi nia Aman iha lalehan hatene ona saida mak imi presiza.

³¹ Nee duni, imi tenki buka uluk atu serbii Nai Maromak imi nia Liurai. Depois Nia sei foo mos buat sira nee ba imi.”

Rai rikusoin iha lalehan

³² Jesus hatutan tan ba nia eskolanti sira dehan, “Lalika tauk! Imi hanesan bibi malae grupu kiik oan deit, maibee imi nia Aman iha lalehan mak Liurai Boot, i Nia haksolok hili imi hodi moris iha Nia ukun laran.

³³ Entaun, baa faan tiha sasaan nebee imi iha i fahe osan nee ba ema kiak sira. Nunee imi rai fali rikusoin iha lalehan, para bele dura. Iha nebaa, imi nia rikusoin sei la hotu, naok-teen la besik, i barata mos la haan.

³⁴ Tanba imi nia rikusoin tau iha nebee, imi nia fuan-laran mos iha nebaa.”

Ita tenki prontu loron-kalan atu simu Nai Jesus fila mai hosi lalehan

³⁵ Jesus hatutan tan dehan, “Imi tenki prontu loron-kalan, hanesan atan nebee hatais hela ropa serbisu nian i nia ahi-oan lakan hela deit.

³⁶ Imi tenki sai hanesan atan sira nebee hadeer hein hela sira nia patraun fila hosi festa kazamentu. Bainhira patraun fila i tuku odamatan, sira baa loke kedas.

³⁷ Bainhira patraun haree nia atan sira hein hela nia, sira sorti boot. Hau hatete loloos ba imi, patraun rasik sei haruka sira tuur iha meza, depois nia hatais fali ropa atan nian hodi serve nia atan sira nee.

³⁸ Loos duni, atan sira nee sorti boot se sira nia patraun haree sira hein hela nia, maski nia fila iha kalan boot ka dadeer-saan rai huun mutin.

³⁹ Hanoin didiak! Se iha uma nain hatene loloos tuku hira mak naok-teen atu mai, nia sei hadeer hodi hein atu naok-teen la tama.

⁴⁰ Nunee mos, imi tenki prontu nafatin. Tanba Hau, Ema Oan sei fila fali mai derepenti deit iha oras nebee imi la hatene.”

Atan nebee foo laran ho ida nebee la foo laran ba nia patraun

⁴¹ Pedro husu ba Jesus, “Nai, komparasaun ohin nee kona ba ami deit ka ba ema hotu?”

⁴² Jesus hataan, “Komparasaun nee kona ba ema see-see deit mak hanesan atan diak ida, nia hatene toma konta nia patraun nia sasaan, i foo laran ba nia patraun. Patraun sei foo fiar ba ema nee para fahe hahaan ba nia atan sira seluk tuir oras.

⁴³ Bainhira patraun fila ba uma, haree atan nee badinas halao nia serbisu, atan nee sorti boot.

⁴⁴ Hau hatete loloos ba imi, patraun sei foti nia hodi toma konta nia rikusoin hotu.

⁴⁵ Maibee karik atan nee hanoin dehan, ‘Patraun sei kleur mak fila’, depois nia komesa baku atan feto ho atan mane sira, i haan-hemu too lanu.

⁴⁶ Maka iha loron nebee nia la hein, i oras nebee nia la hatene, derepenti deit nia patraun fila mai. I patraun sei oho tiha atan nee i soe hamutuk ho ema sira nebee la halo tuir patraun nia hakarak.

⁴⁷ Tanba atan nebee deit mak hatene patraun nia hakarak, maibee la prepara aan i la halo tuir, nia sei hetan kastigu todan.

⁴⁸ Maibee atan nebee mak halo serbisu la loos tanba la hatene patraun nia hakarak, nia sei simu kastigu kamaan. Tanba ema nebee simu barak ona, Maromak sei husu barak ba nia. I ema nebee simu knaar boot, Maromak sei husu responsabilidade boot ba nia.”

Ema sei kontra malu tanba Nai Jesus

⁴⁹ Jesus koalia nafatin dehan, “Hau mai atu soe ahi ba mundu nee i Hau hakarak atu ahi nee lakan ona.

⁵⁰ Maibee Hau tenki simu terus todan lai, i Hau nia laran susar teb-tebes too terus nee hotu.

⁵¹ Imi hanoin Hau mai iha mundu nee para halo ema moris iha dame nia laran ka? Lae! Hau hatete ba imi, laos dame, maibee ema sei kontra malu tanba tuir Hau.

⁵² Komesa agora, se iha uma kain ida iha ema nain lima, entaun nain tolu kontra rua, i nain rua kontra tolu.

⁵³ Sira nia liafuan sei la haan malu: aman kontra oan mane; oan mane kontra aman. Inan kontra oan feto; oan feto kontra inan. Banin feto kontra feto foun; feto foun kontra banin feto.”

Sinal loron susar nian

⁵⁴ Depois Jesus hatete ba ema barak nee dehan, “Bainhira imi haree kalohan metan mosu iha loro monu, imi dehan, ‘Nee sinal hatudu katak, udan atu mai ona.’ I udan mai duni.

⁵⁵ I bainhira anin boot mai hosi rai fuik maran, imi dehan, ‘Orsida loro manas makaas.’ I sai nunee duni.

⁵⁶ Hei, imi nee laran makerek! Imi hatene siik sinal nebee mosu iha loro leten ho rai. Nusaa mak imi la komprende buat nebee akontese dadauk iha tempu agora nee?”

Se iha problema, tenki dame malu

⁵⁷ Jesus koalia nafatin dehan, “Nusaa mak imi la desidi rasik buat nebee mak loos?

⁵⁸ Tanba, se ema lori imi ba tribunal, hakaas aan para rezolve tiha imi nia problema molok imi too iha nebaa. Se lae nia bele obriga imi baa iha juis nia oin, juis entrega ba polisia, i polisia soe imi ba iha kadeia.

⁵⁹ Hau hatete ba imi, imi tenki selu tiha multa mak foin bele sai fali hosi kadeia.”