Lucas 11 - Biblia Tetun Dili

Nai Jesus hanorin kona ba orasaun

¹ Iha loron ida, Jesus halo hela orasaun iha fatin ida. Hotu tiha, Nia eskolanti ida husu ba Nia, “Nai, hanorin ami halo orasaun, hanesan João Sarani Nain hanorin ona nia eskolanti sira.”

² Entaun Jesus hatete ba sira, “Bainhira imi halo orasaun, halo hanesan tuir mai nee: ‘Ami nia Aman, tulun ema atu foti aas Ita Boot nia naran santu. Mai ukun ema hotu-hotu baa.

³ Foo ai haan natoon mai ami loro-loron.

⁴ Foo perdaun mai ami nia sala, hanesan ami mos foo perdaun ona ba ema nebee halo sala mai ami. Keta husik ami monu ba tentasaun.’ ”

⁵ Depois Jesus halo komparasaun nunee: “Se karik iha tuku sanulu resin rua kalan, imi ida baa iha kolega nia uma hodi tuku odamatan dehan, ‘Belun, empresta lai paun fuan tolu mai.

⁶ Tanba iha kolega ida foin too mai hosi rai dook, i hau la iha buat ida atu foo ba nia haan. Loron seluk mak hau foo fali.’

⁷ Se o nia kolega hataan, ‘Keta interompe hau! Odamatan xavi tiha ona, i hau ho hau nia oan sira mos toba tiha ona. Hau la bele hadeer hodi foo buat ruma ba o.’

⁸ Hau hatete ba o, maski imi nain rua kolega, maibee nia lakohi hadeer hodi foo buat ruma ba o, maibee se o la moe tuku bebeik nia odamatan, maka iha ikus nia hadeer duni hodi foo ba o, buat nebee mak o presiza.

⁹ Nunee mos ho orasaun. Hau hatete ba imi: Husu bebeik ba Maromak, Nia sei foo. Buka bebeik, o sei hetan. Tuku bebeik odamatan, odamatan sei nakloke ba o.

¹⁰ Tanba see mak husu bebeik ba Nai Maromak, nia sei simu. See mak buka bebeik, nia sei hetan. See mak tuku bebeik odamatan, Maromak sei loke ba nia.

¹¹ Imi nudar aman, bainhira imi nia oan husu ikan, imi foo fali samea ka?

¹² Se nia husu mantolun, imi foo fali sakunar ka? Nunka!

¹³ Maski imi ema aat, maibee imi hatene foo buat diak ba imi nia oan sira. Saa tan imi nia Aman iha lalehan! Se imi husu para Nia foo Nia Espiritu Santu ba imi, Nia sei foo duni.”

Nai Jesus kura ema monok ida

¹⁴ Iha loron ida, Jesus duni sai espiritu aat hosi ema monok ida. Espiritu aat sai tiha, ema nee komesa koalia kedas, halo ema barak admira.

¹⁵ Maibee iha ema balu dehan, “Nia duni sai espiritu aat, tanba espiritu aat nia xefi Belzebu mak foo kbiit ba Nia.”

¹⁶ Iha ema seluk hakarak koko Jesus. Sira husu para Nia halo tan milagre hodi hatudu katak Nia kbiit nee mai duni hosi Maromak.

¹⁷ Maibee Jesus hatene sira hotu nia hanoin. Nunee Nia hatete ba sira, “Se iha nasaun ida, nia povu haan malu hela deit, nasaun nee sei rahun. Se iha uma kain ida, feen ho lain istori malu hela deit, uma kain nee sei rahun.

¹⁸ Nunee mos, se diabu nia reinu haan malu hela deit, diabu nia ukun sei la dura. Maski nunee, imi duun Hau dehan, hodi Belzebu nia kbiit mak Hau duni sai espiritu aat.

¹⁹ Se nunee, bainhira imi nia ema sira duni sai espiritu aat sira, sira mos uza Belzebu nia kbiit ka? Lae! Imi nia ema sira rasik mak sei hatete sai katak, buat nebee imi duun Hau nee, la loos.

²⁰ Hau duni sai espiritu aat hodi Nai Maromak nia kbiit. Nee hatudu katak Nai Maromak nia Reinu too ona iha imi.

²¹ Se ema forti ida kaer kroat hodi hein nia uma, maka nia rikusoin hotu sei seguru.

²² Maibee too ikus, se iha ema ida forti liu fali nia, mai ataka i manaan nia, ema nee sei hadau nia kroat hotu, i foti nia rikusoin hotu hodi fahe ba ema seluk.

²³ Ema nebee la hamutuk ho Hau, nia kontra Hau. I ema nebee la serbisu hamutuk ho Hau, nia rahun namkari.”

Espiritu aat fila ba nia hela fatin uluk

²⁴ Jesus hatutan tan dehan, “Bainhira ita duni sai espiritu aat hosi ema ida, espiritu aat nee baa lao lemo-lemo iha rai fuik maran hodi buka fatin ba hela. Tanba nia la hetan fatin hodi hela, nia dehan, ‘Diak liu hau fila fali ba hau nia hela fatin ida uluk.’

²⁵ Bainhira nia fila, nia haree fatin nee ema dasa moos tiha ona, i buat hotu-hotu tau tuir nia fatin.

²⁶ Depois espiritu aat nee baa bolu tan espiritu aat hitu nebee aat liu fali nia, i sira hotu baa hela iha ema nee. Nunee, ema nee nia moris aat liu fali uluk.”

See mak hetan bensaun loloos

²⁷ Jesus sei koalia hela, feto ida iha ema barak nee nia leet hatete ho lian makaas dehan, “O nia inan hetan bensaun boot! Tanba nia mak kous O, i foo susu ba O.”

²⁸ Jesus hataan, “Maibee ema nebee rona Nai Maromak nia liafuan i halo tuir, nia mak hetan bensaun boot liu.”

Ema husu Nai Jesus hatudu milagre

²⁹ Ema barak liu tan mai hobur Jesus. Nia dehan ba sira, “Imi nee jerasaun ida nee laran aat. Imi husu bebeik mai Hau atu halo milagre hanesan sinal ba imi hodi hatudu katak Maromak mak haruka Hau mai. Afinal uluk Nai Maromak foo tiha ona sinal ba imi liu hosi Nia profeta Jonas. Nee too ona!

³⁰ Saida mak uluk akontese ba profeta Jonas, nee hanesan sinal ba ema sira iha sidade Ninive. Nunee mos ho Hau, Ema Oan, nee hanesan sinal ba jerasaun ida nee.

³¹ Aban-bainrua Maromak sei tesi ema hotu-hotu nia lia. I liurai feto hosi rai Seba sei moris fali, i hamriik hanesan sasin. Nia sei foo sala ba imi nebee moris agora, tanba uluk nia mai hosi rai dook atu rona rasik liafuan matenek nian hosi liurai Salomão. Afinal agora iha imi nia leet iha Ema ida ke boot liu fali liurai Salomão. Maibee imi lakohi rona Nia.

³² I laos liurai feto nee deit. Ema sira iha Ninive mos sei hamriik hodi foo sala ba imi, tanba uluk, bainhira Jonas baa foo sai Maromak nia liafuan ba sira, sira husik kedas sira nia sala. Agora iha imi nia leet iha Ema ida nebee boot liu fali Jonas, maibee imi lakohi husik imi nia sala.”

Moris iha naroman

³³ Jesus hatutan tan dehan, “La iha ema ida sunu ahi-oan, depois subar tiha ahi-oan nee, ka taka ho sanan rai. Ema nebee sunu ahi-oan, sempre tau iha fatin aas, para foo naroman ba ema nebee tama ba iha nebaa.

³⁴ Ita nia matan hanesan ahi-oan nebee foo naroman ba ita nia moris tomak. Se ita nia matan haree moos, ita nia moris naroman. Maibee se ita nia matan aat, maka ita nia moris sei sai nakukun.

³⁵ Haree didiak para naroman nebee iha imi nia moris nee labele sai fali nakukun.

³⁶ Se imi moris iha naroman, i la iha nakukun ida, mak imi nia moris tomak mos sei sai naroman, hanesan ahi-oan boot leno imi nia moris.”

Nai Jesus kritika ema Farizeu ho mestri relijiaun Judeu sira

³⁷ Jesus hanorin tiha hotu, ema ida hosi grupu relijiaun Farizeu konvida Nia baa haan iha nia uma. Entaun Jesus baa iha nia uma, i tama baa tuur iha meza.

³⁸ Ema Farizeu nee hakfodak, tanba nia haree Jesus haan, la fasi liman uluk tuir ema Farizeu nia lisan.

³⁹ Nai Jesus hatete ba nia, “Imi ema Farizeu sira, imi badinas hamoos kopu ho bikan nia liur. Maibee imi nia laran nakonu ho buat aat i kaan ema nia sasaan.

⁴⁰ Imi beik-teen! Keta haluha, Nai Maromak halo ita nia isin lolon, Nia mos halo ita nia laran.

⁴¹ Dukee imi hamoos deit bikan nia liur, diak liu foo buat nebee imi iha ba ema kiak sira. Se imi halo nunee mak imi sai moos iha Nai Maromak nia futar oin.

⁴² Imi ema Farizeu sira, imi sei susar. Bainhira imi kuu modo tahan iha toos, imi badinas foo parte ida hosi sanulu ba Maromak. Too modo tahan kiikoan-kiikoan hanesan ortelaun ho ruku mos imi foo. Maibee kona ba justisa ho hadomi Nai Maromak, imi la interese. Tuir loloos justisa ho domin nee mak importante. Maibee, keta haluha foo mos parte ida hosi sanulu ba Maromak.

⁴³ Imi ema Farizeu sira, imi sei susar. Tanba imi gosta loos tuur iha fatin ema boot nian iha uma kreda laran, i gosta atu ema kumprimenta imi no respeita imi iha merkadu.

⁴⁴ Imi ema Farizeu sira, imi sei susar. Tanba imi hanesan rate nebee la iha sinal. Ema sama tan, la hatene katak iha rai okos iha mate isin.”

⁴⁵ Iha mestri relijiaun Judeu ida dehan ba Jesus, “Mestri, Ita Boot nia liafuan ohin nee, hatuun mos ami mestri sira.”

⁴⁶ Maibee Jesus hataan, “Imi mestri relijiaun sira, imi mos sei susar. Tanba imi foo regra todan liu ba povu, maibee imi la ajuda netik sira atu bele halo tuir.

⁴⁷ Imi sei susar. Tanba imi hada rate kapaas ba Maromak nia profeta sira. Afinal, imi nia bei-ala sira mak oho.

⁴⁸ Sira oho profeta sira, i imi mak hada sira nia rate. Nee hatudu katak, imi mos konkorda ho imi nia bei-ala sira nia hahalok nee.

⁴⁹ Tanba nee, Nai Maromak koalia sai Nia matenek kona ba imi dehan, ‘Hau sei haruka Hau nia profeta sira ho apostolu sira ba imi maibee imi sei halo terus balu, i oho balu.’

⁵⁰ Nunee, profeta sira hotu-hotu nebee imi nia bei-ala sira oho, komesa hosi Nai Maromak halo mundu too ohin loron, imi nebee moris agora nee mak tenki lori todan.

⁵¹ Nee sura hosi Abel nia mate too iha Zacarias; ema oho Zacarias nee iha meza sakrifisiu ho uma kreda boot nia klaran. Hau hatete loloos ba imi katak sira nia mate hotu, imi nebee moris agora mak tenki lori todan.

⁵² Imi mestri relijiaun sira, imi sei susar. Tanba imi mak kaer xavi hodi loke odamatan ba ema para sira bele hatene Nai Maromak nia hakarak. Maibee imi rasik lakohi tama ba iha nebaa. Aat liu tan, imi taka dalan ba ema seluk nebee atu tama.”

⁵³ Hotu tiha, Jesus sai hosi fatin nee. Komesa hosi tempu nee, mestri relijiaun ho ema Farizeu sira kontra makaas Nia. Sira sempre husu pergunta oi-oin ba Nia

⁵⁴ hodi koko para nia bele koalia liafuan ruma, nunee sira bele Nia.