Lucas 1 - Biblia Tetun Dili

Tanba saa mak Lucas hakerek livru nee

¹ Senhor Teófilo mak hau respeita. Iha ema barak mak hakerek ona kona ba buat nebee mak Nai Maromak halo ona iha ami nia leet.

² Sira hakerek tuir loloos istoria nebee ami rona hosi ema sira nebee lao hamutuk ho Jesus hosi hahuu kedas, i sira nee mak foo tutan mai ami.

³ Hau rasik mos estuda didiak ona istoria nee tomak hosi huun too rohan. Nee duni hau desidi atu hakerek ba senhor, saida mak akontese,

⁴ para ita mos bele hatene katak, buat nebee mak ema hanorin ona ba ita kona ba Jesus, loos duni.

Anju foo hatene kona ba João Sarani Nain atu moris

⁵ Istoria nee hahuu bainhira liurai Herodes sei ukun iha provinsia Judeia. Iha tempu nebaa iha nai lulik relijiaun Judeu ida naran Zacarias. Nia tama iha grupu nai lulik Abias nian. Zacarias nia kaben naran Isabel. Sira nain rua hosi nai lulik Arão nia jerasaun.

⁶ Sira nain rua nee ema nebee moris loos iha Maromak nai futar oin, i halo tuir Maromak nia lei no Nia ukun fuan sira.

⁷ Zacarias ho Isabel katuas ho ferik liu ona, maibee sira la iha oan, tanba hori uluk kedas Isabel la bele hetan oan.

⁸ Iha loron ida, Zacarias nia grupu mak baa halao serbisu iha Nai Maromak nia Uma Kreda Boot iha Jerusalém. Nunee Zacarias mos halao nia serbisu hanesan nai lulik iha Nai Maromak nia futar oin.

⁹ Tuir nai lulik sira nia kostumi, sira dada rifa hodi hatene see mak bele tama ba iha Uma Kreda Boot nia laran hodi sunu ai morin iha Nai Maromak nia futar oin. Iha loron nee, rifa monu ba Zacarias.

¹⁰ Entaun Zacarias tama ba laran. Bainhira nia sunu hela ai morin, ema barak halo hela orasaun iha liur.

¹¹ Derepenti deit, Nai Maromak nia anju ida mosu mai i hamriik iha altar nia sorin loos, nebee sunu ai morin nee.

¹² Haree nunee, Zacarias hakfodak i tauk teb-tebes.

¹³ Maibee anju nee hatete, “Zacarias, la bele tauk! Tanba Nai Maromak rona ona o nia orasaun. O nia feen Isabel sei tuur ahi, oan mane ida. O tenki tau nia naran João.

¹⁴ Nia moris mai nee sei halo imi nia laran haksolok teb-tebes, no ema barak mos sei haksolok hamutuk ho imi.

¹⁵ Nai Maromak sei konsidera nia nudar ema boot. Durante nia moris tomak, imi nia oan nee la bele hemu tua no tua manas. Nia sei nakonu ho Maromak nia Espiritu Santu dezde iha nia inan nia kabu-laran.

¹⁶ Nia sei lori ema Israel barak fila fali ba sira nia Nai Maromak.

¹⁷ Nia mai ho espiritu no kbiit hanesan Maromak nia profeta Elias. João sei mai uluk hodi prepara povu atu simu ita nia Nai. Depois mak foin ita nia Nai mai. João sei halo aman sira nia laran hadomi fila fali sira nia oan. I ema sira nebee fila kotuk ba Maromak, nia sei halo sira tuir fali Maromak nia hakarak.”

¹⁸ Zacarias husu ba anju nee, “Hau katuas liu ona, i hau nia kaben mos ferik liu ona. Oinsaa mak hau bele hatene katak buat nee loos?”

¹⁹ Anju hataan, “Hau Gabriel. Hau sempre serbii iha Nai Maromak nia futar oin. I Nia rasik mak haruka hau mai hatoo novidade diak nee ba o.

²⁰ Maibee o la fiar hau nia liafuan. Nee duni, komesa agora o sei monok tiha too labarik nee moris. Tanba too tempu nebee Nai Maromak desidi, buat sira nee sei sai duni.”

²¹ Ema barak nebee halo hela orasaun iha liur, hein Zacarias atu sai mai. Sira admira tanba nia kleur teb-tebes iha Uma Kreda laran.

²² Bainhira nia sai mai, nia la koalia liafuan ida ba sira. Nia halo sinal deit ho liman, tanba nia monok. Entaun sira komprende katak Maromak hatudu sinal ruma ba nia iha Uma Kreda laran.

²³ Too nia tempu serbisu iha Uma Kreda Boot hotu ona, Zacarias fila ba uma.

²⁴ La kleur, nia kaben Isabel isin rua. Durante fulan lima, Isabel hela deit iha uma laran.

²⁵ Nia dehan, “Nai Maromak mak halo ida nee mai hau. Nia hatudu Nia laran diak mai hau, para ema ida la bele hamoe tan hau tanba hau la iha oan.”

Anju foo hatene Nai Jesus nia moris ba Maria

²⁶ Bainhira Isabel isin rua fulan neen ona, Nai Maromak haruka anju Gabriel baa iha aldeia ida naran Nazaré, iha provinsia Galileia,

²⁷ hodi hasoru feto raan ida naran Maria. Feto raan nee troka prenda ona ho mane ida naran José, hosi liurai David nia jerasaun.

²⁸ Entaun anju Gabriel baa hasoru Maria hodi kumprimenta nia dehan, “Shalom, Nai Maromak foo bensaun ba o, i Nia hamutuk ho o.”

²⁹ Rona nunee, Maria iha konfuzaun hodi hanoin liafuan nee dehan saida loos?

³⁰ Maibee anju hatutan tan dehan, “Maria, keta tauk! Tanba Nai Maromak hatudu nia grasa ba o.

³¹ La kleur tan, o sei isin rua, i sei tuur ahi, oan mane ida. O tenki tau Nia naran Jesus.

³² Nia sei sai boot teb-tebes. I Maromak Aas Liu sei bolu Nia dehan, ‘Hau nia Oan.’ Nai Maromak sei foti Nia hodi kaer ukun, hanesan Nia bei-ala liurai David.

³³ O nia oan nee mak sei ukun ema Israel tinan ba tinan nafatin. Nia ukun sei la ramata.”

³⁴ Maria husu ba anju, “Hau seidauk iha lain. Oinsaa mak hau bele isin rua?”

³⁵ Anju hataan, “Nai Maromak nia Espiritu Santu sei tuun ba iha o, i Maromak Aas Liu nia kbiit sei hamahon o. Nunee, labarik nebee atu moris mai nee ema sei bolu Nia santu i ‘Nai Maromak nia Oan’.

³⁶ Laos nee deit. O nia maluk Isabel mos hetan ona oan mane ida, maski nia ferik liu ona. Ema dehan nia la bele hetan oan, tanba nia kiuk, maibee agora nia isin rua fulan neen ona.

³⁷ Tanba ba Nai Maromak buat hotu-hotu bele.”

³⁸ Maria hataan, “Hau nee Nai Maromak nia atan deit. Hau hein buat hotu-hotu sai tuir ita nia liafuan nee.” Depois anju husik tiha nia.

Maria baa vizita Isabel

^39-40 Liu tiha loron hira nunee, Maria prepara aan hodi baa lalais iha Zacarias nia uma iha aldeia ida iha foho provinsia Judeia nian. Too iha nebaa, nia tama liu ba uma laran hodi kumprimenta Isabel.

⁴¹ Bainhira Isabel rona Maria nia liafuan, bebee iha nia kabu-laran book aan kedas. I Isabel nakonu ho Espiritu Santu.

⁴² Entaun nia koalia sai ho lian makaas dehan, “Maromak foo bensaun ba o liu feto hotu-hotu, i foo bensaun mos ba o nia oan nebee atu moris mai.

⁴³ Hau nee see, too hau nia Nai nia inan mai vizita hau?

⁴⁴ Bainhira hau rona anoi kumprimenta hau, labarik iha hau nia kabu-laran book aan kedas tanba haksolok.

⁴⁵ Nai Maromak foo bensaun ba o, tanba o fiar katak buat nebee Nia promete ona ba o, sei sai duni.”

Maria hahii Nai Maromak

⁴⁶ Maria dehan, “Ho hau nia laran tomak hau hahii Nai Maromak!

⁴⁷ Hau nia laran haksolok, tanba Maromak hau nia Salvador.

⁴⁸ Nia matan monu mai hau, Nia atan kiik ida nee. Komesa agora ba oin, ema hotu-hotu sei konsidera hau ema ida nebee simu bensaun boot hosi Maromak,

⁴⁹ tanba Maromak Forsa Teb-tebes halo ona buat furak no boot mai hau. Nia mak santu duni.

⁵⁰ Nai Maromak hadomi ema hotu nebee respeita i adora Nia, hosi jerasaun ba jerasaun.

⁵¹ Nia hatudu Nia forsa hodi halo ema nebee foti aan halai namkari.

⁵² Nia hatuun ukun nain sira hosi sira nia kadeira, maibee Nia foti aas ema nebee haraik aan.

⁵³ Nia foo hahaan didiak ba ema nebee hamlaha, too sira bosu, maibee Nia haruka ema riku sai ho liman mamuk.

⁵⁴ Nia tulun Nia atan ema Israel sira, i sempre hatudu Nia domin ba sira.

⁵⁵ Nunee Maromak halo tuir Nia promesa nebee nia promete ona ba ita nia bei-ala Abraão ho nia jerasaun too tinan ba tinan.”

⁵⁶ Maria hela ho Isabel mais-ou-menus fulan tolu nia laran, depois fila ba nia uma.

João Sarani Nain moris

⁵⁷ Bainhira tempu too ona para Isabel tuur ahi, nia tuur ahi oan mane ida.

⁵⁸ Nia familia ho ema iha aldeia laran rona katak dehan, Nai Maromak hatudu ona Nia domin boot ba Isabel, ema hotu-hotu haksolok hamutuk ho nia.

⁵⁹ Bainhira labarik nee halo ona loron walu, sira halibur malu para sunat nia, tuir ema Judeu nia lisan. Sira atu tau naran ba labarik nee, Zacarias, tuir nia aman nia naran.

⁶⁰ Maibee nia inan la hataan, “La bele! Nia naran mak João.”

⁶¹ Sira hataan, “Maibee iha imi nia familia tomak la iha ema ida mak naran João.”

⁶² Entaun sira foo sinal ba Zacarias para buka hatene, nia hakarak foo naran saida ba labarik nee.

⁶³ Depois Zacarias halo sinal husu fatuk kabelak oan ida hodi hakerek. I nia hakerek dehan, “Nia naran João.” Sira hotu admira.

⁶⁴ Iha momentu nee kedas, Zacarias bele koalia fali, i nia komesa hahii Nai Maromak.

⁶⁵ Ema iha aldeia nee tauk i admira. Notisia nee ema konta too rejiaun sira iha foho-foho provinsia Judeia nian.

⁶⁶ I ema hotu nebee rona kona ba labarik nee, hanoin hodi hatete, “Bainhira labarik nee boot, nia sei sai ema oinsaa loos?” Tanba sira hatene katak Maromak nia kbiit iha nia.

Zacarias hahii Nai Maromak

⁶⁷ Depois João nia aman, Zacarias, nakonu ho Espiritu Santu, hatete,

⁶⁸ “Hahii Maromak, ema Israel nia Nai! Tanba Nia mai ona para ajuda no foo liberdade ba Nia povu.

⁶⁹ Maromak foti ona Ema ida hosi Nia atan David nia jerasaun. Ema nee nia kbiit boot teb-tebes hodi salva ita.

⁷⁰ Nunee Maromak halo tuir buat nebee Nia promete tiha ona hori uluk liu hosi Nia profeta sira.

⁷¹ Ema nee sei salva ita hosi ita nia inimigu, i hosi ema hotu nebee odi ita.

⁷² Maromak halo nunee para hatudu Nia domin ba ita nia bei-ala sira hodi hanoin Nia aliansa ho sira.

⁷³ Uluk Nia jura ba ita nia bei-ala Abraão katak,

⁷⁴ Nia sei hasai ita hosi ita nia inimigu sira nia liman, atu ita la tauk tan hodi serbii Nia,

⁷⁵ i bele moris loos no laran moos iha Nia oin durante ita nia moris tomak.”

⁷⁶ Depois Zacarias hatete ba nia oan, “Hau nia oan, ema sei bolu o Maromak Aas Liu nia profeta. O sei baa uluk Nai hodi prepara dalan ba Nia.

⁷⁷ O sei foo hatene ba Maromak nia povu dehan, Maromak sei hamoos sira nia sala hodi salva sira,

⁷⁸ tanba ita nia Maromak nee laran diak teb-tebes. Nee mak loro matan sae dadauk, lori naroman hosi lalehan tuun mai ita,

⁷⁹ hodi leno ema nebee moris iha nakukun laran ho ema nebee tauk mate, hodi lori ita ba dalan dame nian.”

⁸⁰ Loron ba loron, João boot ba dadauk, i Maromak Nia Espiritu halo nia sai forti ba bebeik. Depois nia baa hela iha rai fuik maran too tempu nebee nia hahuu nia serbisu iha ema Israel sira nia leet.