Kolose 3 - Biblia Tetun Dili

¹ Nai Maromak halo imi moris fali ona hamutuk ho Kristu. Agora Kristu tuur iha lalehan, iha Nai Maromak nia sorin loos. Nee duni hanoin bebeik buat lalehan nian.

² Foo atensaun bebeik ba buat lalehan nian, la bele preokupa ho buat nebee iha mundu.

³ Tanba imi mate ona hamutuk ho Kristu. I agora imi mos moris hamutuk ho Nia iha Nai Maromak nia oin, maski ema seluk seidauk haree.

⁴ Kristu foo ona moris foun ba imi. I aban-bainrua Nia fila fali mai, imi mos mosu hamutuk ho Nia, ho naroman nabilan nian.

Troka moris tuan ba moris foun

⁵ Nee duni, imi tenki hamate tiha buat aat hotu-hotu hosi imi nia moris hanesan: relasaun seksual nebee la loos, hanoin foer kona ba seksual, kaan atu halo seksu arbiru, hakarak atu halo buat aat saida deit, ho kaan sasaan tanba nee hanesan o foti aas sasaan sira nee liu fali Maromak.

⁶ Sala sira nee halo Nai Maromak hirus teb-tebes, too Nia mos desidi kastigu ema sira nebee lakohi rona Nia.

⁷ Uluk imi rasik mos moris nunee, tanba imi nia laran belit malu ho buat aat sira nee.

⁸ Maibee agora, imi tenki husik tiha hahalok aat sira nee. La bele ona hirus, laran nakali, ka odi ema. La bele tan konta aat ema nia vida, tolok,

^9-10 ka bosok malu. Tanba imi nia moris ida uluk ho hahalok aat sira nee, imi soe tiha ona. Agora imi troka tiha ona moris tuan nee ho moris foun. Nee hanesan ema soe tiha nia ropa bosan, hodi hatais fali ropa foun. Maromak mak foo moris foun nee ba imi. I agora Nia kontinua hafoun imi nia moris hodi sai hanesan Nia, atu nunee imi bele konhese liu tan Maromak.

¹¹ Iha moris foun nee, ita la fihir ona ema. Atu ema Judeu ka laos Judeu, sunat ka la sunat, ema lao rai ka ema fuik, atan ka livre, buat sira nee la importante. Maibee importante mak Kristu. I Kristu hela iha ita ida-idak nia laran.

¹² Nai Maromak hadomi teb-tebes imi i hili ona imi sai Nia povu hodi entrega imi nia moris tomak ba Nia. Nee duni imi tenki sai ema nebee laran diak, ajuda ema iha susar nia laran, haraik aan, laran maus, no pasiensia.

¹³ Bainhira ema halo buat ruma la monu ba imi nia laran, komprende deit baa. I se ema ruma halo sala ba imi, foo perdaun ba nia, hanesan mos Maromak foo perdaun ona ba imi nia sala.

¹⁴ Laos buat sira nee deit. Maibee importante liu tan mak hadomi malu, tanba domin mak kesi metin imi hotu sai ida deit.

¹⁵ Kristu foo paz ba imi. Entaun husik Nia paz nee domina imi nia laran. Tanba imi halo parte hamutuk iha isin lolon ida, i Maromak bolu imi para moris iha dame nia laran. I sempre agradese ba Maromak.

¹⁶ Kristu nia liafuan tenki domina imi nia laran, tanba Nia liafuan nee folin teb-tebes i foo matenek mai ita. Uza Nia liafuan nee hodi hanorin malu i foo hanoin ba malu. Hananu kanta oi-oin, hanesan hosi livru Salmus, kanta espiritual, ho hananu seluk nebee hodi adora Maromak. Hananu hodi agradese ba Maromak ho laran tomak.

¹⁷ Imi halo saida deit, halo hodi Nai Jesus nia naran. I imi koalia saida deit, koalia hodi Nia naran. Sempre foo agradese ba Aman Maromak liu hosi Nai Jesus.

Moris nudar uma kain

¹⁸ Imi feen sira, hakruuk ba imi nia laen, tanba ida nee imi nia obrigasaun nudar ema nebee tuir Nai Jesus Kristu.

¹⁹ Laen sira, imi tenki hadomi imi nia feen, i la bele hanehan sira.

²⁰ Oan sira, imi tenki halo tuir buat hotu-hotu nebee imi nia inan-aman haruka, tanba ida nee mak halo haksolok ita nia Nai nia laran.

²¹ Aman sira, keta halo imi nia oan sira fuan moras, para sira la bele baruk atu rona tan.

²² Atan sira, imi tenki halo tuir buat hotu nebee imi nia patraun iha mundu nee haruka. Halo nunee laos deit bainhira sira haree tutuir imi. Maibee serbisu ho laran, tanba imi respeita Nai Maromak.

²³ Imi halo saida deit, halo ho laran tomak, hanesan imi serbisu ba Nai Jesus Kristu, laos ba ema deit.

²⁴ Tanba Kristu mak Nai, imi mak Nia atan. Keta haluha, aban-bainrua Nia sei selu imi nia kolen hodi foo bensaun nebee Nia promete tiha ona.

²⁵ Maibee se imi halo sala, imi sei hetan konsekuensia, tanba atu atan ka patraun, Maromak la fihir.