Kolose 1 - Biblia Tetun Dili

Paulo hahuu nia surat

¹ Hau Paulo, Kristu Jesus nia apostolu; Maromak rasik mak hili hau. Hau ho ita nia irmaun Timóteo

² haruka surat nee ba maluk sarani sira iha sidade Kolose. Imi Maromak nia povu santu, i tuir Kristu ho laran tomak. Ami harohan ba ita nia Aman Maromak para hatudu Nia grasa ba imi, i foo paz ho hakmatek ba imi.

Paulo halo orasaun ba sarani sira iha Kolose

³ Bainhira ami halo orasaun ba imi, ami sempre agradese ba Nai Maromak. Nia mak ita nia Nai Jesus Kristu nia Aman.

⁴ Ami agradese ba Nia tanba ami rona dehan, imi fiar ba Kristu Jesus i hadomi Maromak nia povu santu hotu.

⁵ Imi nia fiar ho imi nia domin nee buras tanba imi hein ho laran metin atu simu bensaun nebee Maromak prepara tiha ona ba imi iha lalehan. Imi fofoun rona kona ba bensaun nee bainhira imi rona Maromak nia Novidade Diak. Liafuan nee loos

⁶ i buras ba bebeik hodi muda ema nia moris iha fatin bara-barak. Nunee mos muda imi nia moris, komesa hosi loron primeiru imi rona Novidade Diak nee hodi komprende loloos Nai Maromak nia grasa.

⁷ Imi aprende buat sira nee hosi ita nia maluk doben Epafras. Nia Kristu nia atan hanesan mos ami, i nia badinas halao Kristu nia serbisu iha imi nia leet.

⁸ Nia mak konta mai ami katak, imi hadomi malu tuir domin nebee Espiritu Santu foo ba imi.

⁹ Tanba nee, hahuu hosi loron primeiru nebee ami rona kona ba imi, ami halo orasaun bebeik ba imi. Ami husu ba Nai Maromak atu foo ba imi matenek espiritual no konhesimentu kompletu nebee loos tuir Maromak nia hakarak.

¹⁰ Ho nunee, imi nia moris foti aas Nai Jesus nia naran, i sempre halo haksolok Nia laran. Imi mos sei foo fuan iha imi nia serbisu nebee diak, i sei buras hodi konhese Maromak diak liu tan.

¹¹ Ami mos husu ba Nai Maromak atu foo Nia kbiit nebee boot teb-tebes ba imi, para imi bele iha forsa hodi aguenta no pasiensia iha terus laran.

^12-13 Ami harohan para imi foo agradese bebeik ba Aman Maromak ho laran haksolok. Nia mak loke dalan para imi bele simu bensaun nebee Nia prepara tiha ona ba Nia povu santu iha lalehan. Nia hasai tiha ita hosi forsa nakukun nia ukun, hodi hatama ita ba iha Nia Oan doben Jesus Kristu nia reinu naroman.

¹⁴ Jesus Kristu selu kotu ona ita nia tusan hodi foo liberdade mai ita. Nunee ita nia sala hamoos tiha ona.

Kristu boot liu buat hotu-hotu

¹⁵ Kristu hanesan loloos Nai Maromak. La iha ema ida mak bele haree Nai Maromak, maibee Kristu hatudu mai ita Maromak nia Aan. Kristu iha molok Maromak halo buat hotu-hotu. I Nia mak ukun buat hotu-hotu nebee Maromak halo.

¹⁶ Tanba liu hosi Kristu, Nai Maromak halo lalehan ho rai ho buat hotu-hotu iha laran, buat nebee ita ema bele haree, ho mos buat nebee ita la bele haree. Nia halo ukun nain sira, liurai sira, autoridade ho espiritu boboot sira nebee kaer ukun iha fatin nebee ita la haree. Nai Maromak halo buat hotu-hotu liu hosi Kristu, hodi foo ba Kristu.

¹⁷ Kristu iha nanis tiha ona, molok buat hotu-hotu iha, i buat hotu-hotu lao nafatin tuir nia dalan tanba Nia mak tau matan.

¹⁸ Kristu mak sarani sira nia Ulun, i sarani sira hanesan Nia isin lolon. Kristu mak moris nia huun. Nia mak ema primeiru nebee moris fali hosi mate, nunee Nia mak boot liu buat hotu-hotu.

¹⁹ Buat hotu-hotu nebee iha Nai Maromak nia Aan, iha mos iha Kristu, tanba Maromak hakarak hanesan nee.

²⁰ Liu hosi Kristu nia mate, Nai Maromak halo buat hotu-hotu dame fali ho Nia. Kristu nia raan fakar too mate iha krus, para halo buat hotu-hotu iha lalehan ho iha rai bele diak malu fali ho Maromak.

²¹ Uluk imi moris dook hosi Nai Maromak. Imi hanoin deit buat aat iha imi nia ulun, i imi nia hahalok mos aat, halo imi sai Nia inimigu.

²² Maibee, tanba Kristu sai ema hodi foo aan ba mate, agora Maromak halo imi dame malu ona ho Nia. Kristu mate para bele lori imi baa hamriik iha Nai Maromak nia futar oin, ho laran moos, la iha noda ida, i la iha ema ida bele hatudu liman ba imi.

²³ Naran katak imi hamriik metin hodi fiar nafatin. Keta nakdoko, maibee laran metin nafatin katak Maromak halo tuir duni buat nebee Nia promete ona iha Nia Novidade Diak. Novidade Diak nee, ema foo sai ona iha fatin-fatin deit iha mundu nee. I hau, Paulo, mos simu knaar para foo sai Novidade nee.

Paulo serbisu makaas ba Maromak nia povu

²⁴ Agora dadauk hau terus hela ba imi. Maibee terus nee halo hau nia laran haksolok. Hanesan Kristu terus, nunee mos hau simu terus nebee hau tenki hasoru, atu bele ajuda Kristu nia povu, tanba Nia povu hanesan Nia isin lolon.

²⁵ Nai Maromak foti ona hau para serbii imi hodi foo sai Nia planu tomak ba imi.

²⁶ Hori uluk liu, Maromak nia planu nee sei taka hela ba ita ema. Maibee agora, Maromak loke ona Nia planu ba Nia povu.

²⁷ Nia desidi atu hatudu ba sira katak, Nia planu ba imi nebee laos Judeu mos kapaas i boot teb-tebes. Nia planu mak nee: Kristu hela iha imi nia laran. Tanba nee mak imi laran metin katak, aban-bainrua imi sei haksolok ho Maromak nia naroman nabilan iha lalehan.

²⁸ Ami sempre foo hatene ba ema iha fatin-fatin kona ba Kristu. Ho matenek hotu nebee Maromak foo, ami hanorin sira i foo hanoin ba sira. Ami halo nunee, para ema hotu-hotu nebee fiar ba Kristu bele sai forti liu tan i moris loos, atu aban-bainrua sira bele hamriik iha Maromak nia futar oin.

²⁹ Ho objetivu nee mak hau serbisu mate aan ho forsa tomak nebee Kristu foo mai hau. I Nia forsa nee makaas teb-tebes.