Judas 1 - Biblia Tetun Dili

Judas hahuu nia surat

¹ Surat nee hosi hau, Judas, nudar Jesus Kristu nia atan ho Tiago nia alin. Hau hakerek surat nee ba imi nebee Maromak bolu tiha ona para sai Nia ema. Aman Maromak hadomi imi i Jesus Kristu sempre kuidadu imi.

² Hau harohan para Nai Maromak loron ba loron hatudu Nia domin ba imi, i foo paz ho hakmatek ida ke boot teb-tebes ba imi.

Maromak sei kastigu mestri falsu sira

³ Maluk doben sira, tuir loloos hau hakarak teb-tebes hakerek ba imi kona ba salvasaun nebee ita hotu simu ona. Maibee agora hau senti katak, hau tenki hakerek fali buat seluk hodi foo hanoin ba imi para imi bele defende fiar hotu nebee Nai Maromak foo dala ida ona ba Nia povu.

⁴ Tanba iha ona ema balu tama sub-subar iha imi nia leet. Sira nee uza sala Nai Maromak Nia grasa. Sira dehan, tanba Maromak nee laran diak, entaun ita bele halo sala saida deit konformi ita nia hakarak. Sira mos nega Jesus Kristu, afinal Nia mak ita nia Liurai ho ita nia Nai. Iha Livru Sagradu hakerek tiha ona katak ema sira nee sei hetan kastigu.

Nai Maromak sei kastigu ema nebee hanorin la loos

⁵ Imi hatene ona istoria nebee mak hau atu koalia, maibee hau hakarak foo hanoin fila fali ba imi: Uluk Nai Maromak lori povu Israel sai hosi rai Ejitu. Maski Nia salva sira, maibee too ikus Nia halo rahun fali sira nebee mak la fiar ba Nia.

⁶ Nunee Maromak mos kastigu anju nebee husik tiha sira nia knaar ho sira nia hela fatin. Maromak kesi metin sira ho korenti iha fatin nakukun laran hodi hein loron nebee Maromak tesi ema hotu-hotu nia lia.

⁷ Hanesan povu sidade Sodoma ho Gomora, ho aldeia sira nebee besik. Sira gosta halo sala seksual nebee la normal no iha relasaun seksual ho ema nebee laos nia laen ka nia feen. Too ikus Maromak kastigu sira iha ahi nebee nunka mate. Nee hanesan ezemplu ida hodi foo hanoin mai ita hotu.

⁸ Nunee mos ho ema aat sira nebee tama iha imi nia leet nee. Sira halo sala hodi hafoer sira nia aan rasik, i dehan mehi mak foo sai ba sira para halo nunee. Sira lakohi rona see-see deit mak kaer ukun iha lalehan ka iha rai, too hatete aat forsa sira iha lalehan.

⁹ Maibee anju sira nia boot Miguel, bainhira Moisés foin mate, nia haksesuk malu ho diabu kona ba see mak sei hetan Moisés nia mate isin. Iha tempu nebaa Miguel la brani julga diabu no hatete aat nia. Miguel so dehan deit, “Nai Maromak sei kastigu o.”

¹⁰ Maibee ema sira nee hatete aat buat nebee mak sira la komprende. Sira so hatene sira nia hakarak deit, hanesan fali animal nebee la iha neon. I hahalok nee mak harahun sira.

¹¹ Sira sei terus! Tanba sira tuir Kaín nia dalan. Sira hakarak teb-tebes hetan osan, too monu ba sala hanesan Balaão. I sira rahun tanba sira hanesan Koré nebee lori ema barak kontra Moisés ho Arão.

¹² Bainhira imi sarani sira halibur malu hodi haan-hemu hamutuk, ema sira nee mai haan hamutuk ho imi, maibee sira kaan-teen i la hatene moe. Nunee sira hanesan bibi atan nebee foo haan deit nia aan, i ida nee hanesan buat foer ida iha imi nia klaran. Sira hanesan kalohan nebee anin huu, maibee la foo udan. Sira hanesan ai nebee la foo fuan, maski too ona nia tempu. Ikus mai, ai nee toos nain fokit sai tiha hamutuk ho nia abut too mate tiha.

¹³ Sira hatudu hahalok nebee halo moe deit ita, hanesan laloran boot nebee baku hasai nia furin iha bee leten. Sira hanesan fitun nebee lao la tuir dalan. Maromak prepara tiha ona fatin ida nakukun liu ba sira, para sira hela iha nebaa too tinan ba tinan nafatin.

¹⁴ Nunee mos Enoke foo sai hori uluk kedas kona ba ema hanesan nee. Se ita sura Adão nia jerasaun, Enoke tama ba jerasaun hitu. Nia dehan nunee: “Haree baa! Ita nia Nai mai ho anju rihun ba rihun.

¹⁵ Nia mai hodi tesi ema hotu-hotu nia lia. Nia sei kastigu ema aat sira hotu tanba sira nia hahalok no ema hotu-hotu nebee koalia aat hasoru Nai Maromak.”

¹⁶ Ema sira nee so hatene murmura deit i foo sala ba ema seluk. Sira moris tuir deit sira nia hakarak aat rasik. Sira gaba aan, i kos-kose ema seluk para halo tuir sira nia hakarak.

Lia menon hodi hametin fiar

¹⁷ Maibee maluk doben sira, la bele haluha liafuan nebee ita nia Nai Jesus Kristu nia apostolu sira foo sai tiha ona ba imi.

¹⁸ Sira foo sai katak, bainhira mundu nee besik remata ona, sei iha ema nebee halo trosa Maromak nia povu, i moris tuir deit sira nia hakarak aat.

¹⁹ Ema sira nee mak halo imi fahe malu. Sira la iha Maromak nia Espiritu, maibee sira nia hakarak aat mak domina fali sira.

²⁰ Maibee maluk doben sira, kaer metin ba imi nia fiar nebee loos liu. Halo orasaun ho Espiritu Santu nia tulun.

²¹ Imi hein hela ita nia Nai Jesus Kristu atu hatudu Nia laran diak ba imi hodi lori imi ba moris rohan-laek. Durante imi hein, keta husik Maromak nia domin.

²² Imi tenki hadomi ema sira nebee mak fiar laran rurua,

²³ i dada sai ema seluk hosi ahi laran para salva sira. Iha tan ema seluk mak imi tenki hadomi, maibee kuidadu. Maski imi hanoin sira, maibee imi mos tenki hakribit sira nia sala, too hakribit mos sira nia hena nebee foer tanba sira nia hahalok aat nee.

Judas entrega ema fiar sira ba Nai Maromak

²⁴ Nai Maromak forsa teb-tebes, Nia mak iha kbiit hodi kuidadu imi para imi la bele monu ba sala. Nia mak bele lori imi ba iha Nia futar oin. Tanba Nia mak halo imi moris loos, no la iha sala ida. Imi sei haksolok boot, iha Nia naroman nabilan.

²⁵ So Nia mesak deit mak Maromak, Nia mak ita nia Salvador, liu hosi Jesus Kristu, ita nia Nai. Nunee, onra, gloria no poder hotu-hotu foo ba Nia. Nia mak kaer ukun, molok mundu nee iha, agora, i too tinan ba tinan nafatin. Amen.