Jonas 2 - Biblia Tetun Dili

Jonas harohan ba Nai Maromak

¹ Bainhira Jonas sei iha ikan nia kabun laran, nia harohan ba nia NAI Maromak

² dehan, “Bainhira hau iha susar no terus nia laran, hau hakilar husu tulun ba NAI, i Nia hataan, hodi tulun hau. Bainhira hau iha ikan nia kabun laran, nee hanesan hau iha ema mate sira nia fatin. Hau husu tulun hosi nebaa, Maromak rona, hodi tulun hau.

³ Maromak soe hau ba tasi laran, hanesan mota boot lori lakon hau, laloran sira nebee Maromak haruka mai nee, baku hau baa-mai.

⁴ I hau hanoin dehan, ‘Maromak duni sai hau ona, para lalika haree tan hau. Loos duni hau sei la haree tan, Maromak nia uma kreda santu.’

⁵ La kleur tan hau mate ona, tan laloran sira baku hau baa-mai, no bee falun metin hau, duut tasi iha tasi laran bobar hau nia ulun.

⁶ Hau tuun bebeik too iha foho huun, iha tasi okos liu. Nee hanesan hau tuun ba ema mate sira nia fatin, i sira taka no xavi metin hau iha nebaa. Susar liu hau sai fali hosi nebaa! Maibee Maromak nee, hau nia NAI Maromak! Maromak foti hau hosi susar laran hosi kraik liu, no salva hau, para hau la bele mate!

⁷ Bainhira hau senti iis atu kotu ona, i hau nia moris atu lakon ona, hau hanoin ba NAI, no hau nia harohan husu tulun, too iha Aman Maromak nia uma kreda santu.

⁸ Ema hotu nebee hahii maromak falsu, hahii ba buat sira nebee la iha folin. Sira fila kotuk no husik Maromak nebee hatudu laran diak ba sira, no tulun nafatin ema nebee foo laran ba Nia.

⁹ Maibee hau hakarak lori sakrifisiu hodi adora no hananu hodi hahii Maromak! Saida mak hau promete ona nee, agora hau hakarak halo tuir. Tanba Maromak deit mak iha kbiit hodi salva hau!”

¹⁰ Tuir mai, Maromak haruka ikan boot nee lori Jonas ba iha rai maran. Entaun ikan nee baa muta sai tiha nia iha tasi ibun.