Jonas 1 - Biblia Tetun Dili

Nai Maromak bolu Jonas, maibee Jonas halai

¹ Uluk liu, iha ema Israel ida, naran Jonas. Nia aman naran Amitai. Iha loron ida, NAI Maromak haruka Jonas ba hatoo Nia lia menon dehan,

² “Rona mai! Agora o baa iha nasaun Asiria nia sidade boot, Ninive, iha loro sae, nebee inimigu ho Israel. Baa foo hatene ba ema sira iha nebaa dehan, ‘Nai Maromak haree ona imi nia aat. Nee mak Nia atu kastigu ona imi.’ ”

³ Maibee Jonas lakohi rona. Nia atu halai dook tiha hosi Maromak. Nee mak nia hakarak baa dook tiha iha loro monu iha sidade Tarsis, iha Espanha. Entaun nia tuun ba sidade Jope hodi buka roo baa Espanha. Bainhira nia hetan tiha roo ida, nia hola bilhete, i sae ba roo. Ho nunee, Jonas hanoin nia bele halai subar hosi Maromak.

Anin boot iha tasi, i roo besik atu mout

⁴ Maibee iha tempu nee roo lao iha tasi klaran, NAI Maromak haruka anin boot ida mai iha tasi. I tasi siak makaas too roo nee atu besik mout.

⁵ Ema sira serbisu iha roo nee mos tauk loos. Sira ida-idak hakilar husu tulun ba sira nia maromak sira no lulik sira. Depois sira foti naha sira iha roo laran soe ba tasi, para roo nee bele kamaan. Bainhira marineiru sira hakaas aan buka dalan para roo nee la bele mout, Jonas tuun tiha ba iha roo okos, i toba dukur tiha.

⁶ I bainhira kapitaun roo haree Jonas, nia siak dehan, “O nee, nusaa? Tanba saa mak o bele toba dukur nunee? Diak liu o hadeer lai, hodi hamulak ba o nia maromak sira no lulik sira. Keta halo be nia hanoin ita, nunee ita la mate!”

Sira hakarak soe Jonas hosi roo laran

⁷ Ema marineiru sira nee koalia ba malu dehan, “Ita susar ona mak nee! Se ita la hetan problema nee nia huun, ita bele mate hotu. Mai ita soe rifa hodi buka hatene, ida nee see nia sala.” Nee mak sira dada rifa, i rifa monu iha Jonas.

⁸ Entaun sira husu ba Jonas dehan, “Oinsaa mak nee! O halo sala saida mak susar ida nee kona ita nunee? O nia serbisu saida, too o mai sae roo nee? O mai hosi nebee? O ema nebee? O nia ema sira ema nebee? Hatete mai!”

⁹ Jonas hataan dehan, “Hau ema Ebreu. Hau fiar ba NAI Maromak iha lalehan, nebee halo lalehan ho rai.

¹⁰ Maibee hau hakarak halai dook tiha hosi Nia.” Rona nunee, marineiru sira nee tauk liu tan. I sira husu tan ba Jonas dehan, “Tanba saa mak o halo nunee?!”

¹¹ Laloran makaas tan deit. Entaun marineiru sira husu ba Jonas dehan, “Ami tenki halo saida ba o, atu tasi nee bele hakmatek, hodi ami bele moris?”

¹² Jonas hataan dehan, “Nunee deit. Hau hatene ona katak anin boot nee kona ita tanba hau nia sala. Imi foti hau soe tiha ba tasi laran, para nunee tasi bele hakmatek fali ba imi.”

Sira foti Jonas soe ba tasi laran

¹³ Maski Jonas foo ona ninian hanoin nunee, maibee marineiru sira hakaas aan hodi hean roo ba tasi ibun. Maibee susar teb-tebes, tanba anin boot no laloran aumenta makaas liu tan.

¹⁴ Entaun sira harohan ba Jonas nia NAI Maromak dehan, “Nai! Tulun ami lai! Keta husik ami mate tanba ami atu soe ema ida nee ba tasi laran. Se karik nia nunka halo sala, i ami oho mate nia, keta foo sala nee mai ami. Tan Maromak mak prepara buat hotu-hotu, laos ami. Nunee ami la lori sala nee.”

¹⁵ Harohan hotu tiha, marineiru sira foti Jonas soe ba tasi laran. I tasi hakmatek kedas.

¹⁶ Haree nunee, marineiru sira tauk teb-tebes ba NAI Maromak. Nee mak sira oho animal foo ba Nia no halo promesa oi-oin ba Nia.

¹⁷ Maibee bainhira sira soe Jonas ba tasi, NAI Maromak prepara ikan boot ida mai tolan tiha Jonas. I nia hela iha ikan nia kabun laran loron tolu, kalan tolu.