João 6 - Biblia Tetun Dili

Nai Jesus foo hahaan ba ema rihun lima resin

^1-4 Liu tiha nee, ema Judeu nia loron boot ‘Paskua’ besik ona. Jesus sira baa iha tasi Galileia nia sorin. (Tasi nee nia naran seluk mak, ‘tasi Tiberias’.) Ema barak loos tuir Nia ba iha nebaa, tanba sira haree ona Nia halo milagre barak bainhira Nia kura ema moras sira. Too iha tasi nia sorin, Jesus ho Nia eskolante sira sae ba iha foho kiik ida. Depois sira tuur iha nebaa.

⁵ Bainhira Jesus haree ema barak mai, Nia husu ba Nia eskolante ida naran Filipe, “Ita bele sosa paun hodi foo ba ema sira nee, iha nebee?”

⁶ Nia hatene tiha ona Nia atu halo saida. Maibee Nia koalia nunee hodi koko Filipe.

⁷ Filipe hataan, “Maski badae ida serbisu loron atus rua mos, nia osan seidauk too hodi sosa paun foo ba ema sira nee hotu. Maski ema ida-idak simu paun rohan deit mos, sei la too.”

⁸ Entaun Jesus nia eskolante ida tan, naran Andre, Simão Pedro nia alin, foo hatene ba Jesus dehan,

⁹ “Senhor! Iha labarik ida iha nee lori paun fuan lima, ho ikan rua. Maibee nee la too liu hodi foo ba ema barak nee.”

¹⁰ Iha nebaa iha duut barak. Jesus haruka Nia eskolante sira dehan, “Haruka sira hotu tuur tiha.” I sira mos tuur. Iha tempu nee, ema barak teb-tebes. Mane deit mais-ou-menus ema rihun lima.

¹¹ Tuir mai, Jesus foti paun sira nee, Nia agradese ba Maromak. Depois Nia fahe ba Nia eskolante sira, i sira hodi baa fahe ba ema barak nee. Nia halo nunee mos ho ikan sira nee. Ema hotu haan too bosu.

¹² Bainhira sira haan hotu ona, Jesus haruka Nia eskolante sira dehan, “Halibur hahaan restu sira nee, para la bele soe estraga.”

¹³ Sira halibur hahaan restu hosi paun fuan lima nee, tau iha bote 12 nakonu.

¹⁴ Bainhira ema barak haree milagre nebee Jesus halo ona nee, sira dehan, “Ema ida nee laos halimar. Nia nee, mak profeta nebee Maromak promete ona atu haruka mai.”

¹⁵ Jesus hatene katak, ema barak nee hakarak obriga Nia para sai liurai. Entaun Nia lao sai tiha, sae ba foho kiik ida, para Nia bele mesak iha nebaa.

Nai Jesus lao iha bee leten

¹⁶ Bainhira loro matan mout, Jesus nia eskolante sira lao tuun ba tasi.

¹⁷ Jesus la baa hamutuk ho sira. I sira ba sae bero ida hodi hean ba sidade Kafarnaum, iha tasi nia sorin baa. Bainhira sira komesa hean bero nee, rai nakukun ona.

¹⁸ Derepenti anin boot mai, halo laloran sai boot.

¹⁹ Bainhira Jesus nia eskolante sira hean ona bero mais-ou-menus kilometru lima, sira haree Jesus lao iha bee leten. Nia mai besik sira nia bero, i sira tauk teb-tebes.

²⁰ Maibee Jesus foo hatene, “Keta tauk! Nee Hau.”

²¹ Nunee, sira la tauk tan ona. Sira simu Jesus ba iha bero hamutuk ho sira. I sira mos too kedas iha fatin nebee sira hakarak baa.

Ema barak buka Nai Jesus

^22-24 Iha aban fali, ema barak nee sei iha tasi sorin baa. Sira besik iha fatin nebee Jesus foo agradese ba Nai Maromak, hodi foo hahaan ba sira. I sira hatene katak, horiseik iha bero ida deit. Maibee Jesus nia eskolante sira sae tiha bero nee hodi baa tiha fatin seluk. I Jesus rasik la sae bero nee hamutuk ho Nia eskolante sira. Maibee iha bero sira seluk mai hosi sidade Tiberias nebee baa-mai iha fatin nee. I ema barak hatene katak Jesus ho Nia eskolante sira la iha tan nebaa ona, entaun sira sae bero sira seluk, hodi baa buka Jesus iha Kafarnaum, iha tasi nia sorin baa.

Nai Jesus hanesan paun nebee lori moris

²⁵ Depois sira hetan Jesus iha tasi nia sorin. Sira husu ba Nia, “Mestri! Ita Boot too iha nee hori bainhira?”

²⁶ Jesus hataan, “Hau hatete loloos nunee: imi buka Hau laos tanba imi haree ona milagre. Maibee imi buka Hau, tanba Hau foo ona hahaan ba imi haan too bosu.

²⁷ Rona didiak! La bele serbisu deit hodi hetan hahaan nebee la kleur aat tiha. Diak liu imi serbisu hodi hetan hahaan nebee la iha rohan, nebee lori moris rohan laek. Tanba Hau, Ema Oan. Hau mak bele foo moris nee ba imi. Tanba Aman iha lalehan mak foo direitu nee mai Hau.”

²⁸ I sira husu dehan, “Se nunee, ami tenki halo saida, para ami bele halao Maromak nia serbisu?”

²⁹ Jesus foo hatene dehan, “Maromak nia serbisu mak nee: imi tenki fiar ba Hau, tan Nai Maromak mak haruka Hau mai.”

³⁰ I sira husu tan, “Senhor atu hatudu milagre saida, para ami bele haree no fiar ba Ita Boot? Depois Senhor atu halo saida tan mai ami?

³¹ Hanesan ita nia bei-ala sira haan paun manaa iha rai fuik maran. Ida nee hakerek iha Maromak nia Eskritura Sagrada dehan, ‘Nia foo ba sira paun, nebee tuun mai hosi lalehan, para sira haan.’ ”

³² Jesus hatete, “Hau foo hatene loloos nunee: Uluk nee, laos Moisés mak hatuun paun sira nee hosi lalehan ba imi nia bei-ala sira. Ida nebee hatuun paun ba sira nee, Hau nia Aman iha lalehan. Agora Nia mos prepara foo paun hosi lalehan ba imi. Maibee paun nee, mak paun nebee loloos.

³³ Tan Paun hosi Maromak nee, mak Ida nebee tuun hosi lalehan no lori moris ba ema iha mundu nee.”

³⁴ I sira husu, “Senhor, foo paun nee nafatin mai ami.”

³⁵ Jesus foo hatene ba sira dehan, “Hau mak Paun nee. Tan Hau mak lori moris nebee loloos. Nunee ema nebee sai Hau nia ema, sei la hamlaha tan. I ema nebee fiar mai Hau, sei la hamrook tan.

³⁶ Maibee Hau foo hatene ona ba imi dehan, maski imi haree ona Hau, maibee imi lakohi fiar mai Hau.

³⁷ Afinal ema hotu nebee Hau nia Aman hili ona para sai Hau nia ema, sira sei mai ba Hau. I ema nebee mai iha Hau, Hau la duni nia sai.

³⁸ Tan Hau tuun mai hosi lalehan hodi halo tuir Hau nia Aman iha lalehan nia hakarak. Tanba Nia mak haruka Hau mai. Hau lakohi halo tuir Hau nia hakarak rasik.

³⁹ I Nia hakarak mak nee: Hosi ema sira nebee Nia hili ona atu sai Hau nia ema, Nia hakarak Hau halibur sira hotu. Hau la bele husik ida lakon. Maibee bainhira mundu nee remata, Hau sei halo sira moris fali.

⁴⁰ Hanesan ohin Hau dehan ona, Hau nia Aman hakarak para ema hotu konhese no fiar mai Hau, Nia Oan, para sira bele hetan moris rohan laek. I bainhira mundu nee remata, Hau sei halo sira moris fali.”

⁴¹ Ema Judeu nia boot sira komesa kritika Nia, tanba Nia dehan, “Paun ida nebee hosi Maromak nee, mak Hau, nebee tuun hosi lalehan.”

⁴² Sira koalia dehan, “Nee oinsaa? Laos Nia nee Jesus, José nia oan? Ita konhese nia inan-aman sira. Agora nusaa mak Nia dehan fali, ‘Hau tuun mai hosi lalehan’?”

⁴³ Jesus hatete ba sira, “Lalika murmura ona!

⁴⁴ Hau nia Aman iha lalehan mak haruka Hau mai iha nee. La iha ema ida mak bele mai iha Hau, se Hau nia Aman la lori nia mai. I bainhira mundu nee remata, Hau sei halo sira moris fali.

⁴⁵ Maromak nia profeta sira uluk hakerek ona dehan, ‘Nai Maromak hakarak hanorin ema hotu.’ I ema hotu nebee rona ba Aman iha lalehan, no aprende hosi Nia, sira mai iha Hau no sai Hau nia ema.

⁴⁶ Hau tuun mai hosi Nai Maromak. Nunee, Hau mesak deit mak haree Nia. La iha ema ida tan mak haree Aman iha lalehan ho sira nia matan rasik.

⁴⁷ Hau hatete loloos ba imi! Ema nebee fiar mai Hau, sei hetan moris rohan laek.

⁴⁸ Tan Hau mak Paun nebee lori moris.

⁴⁹ Uluk imi nia bei-ala sira haan paun manaa, bainhira lao baa-mai iha rai fuik maran. Maski sira haan paun nee, maibee depois sira mos mate.

⁵⁰ Maibee Paun nebee tuun hosi lalehan mai agora nee oin seluk. Tanba ema hotu bele haan. Nee dehan katak, ema hotu nebee fiar mai Hau, sira la haketak tan hosi Nai Maromak.

⁵¹ Hau mak Paun nebee lori moris, nebee tuun mai hosi lalehan. Bainhira Hau mate, Hau entrega Hau nia isin para ema hotu iha mundu nee bele moris. I ema nebee haan Paun nee, sira hetan moris rohan laek.”

⁵² Rona nunee, ema Judeu nia boot sira komesa haksesuk malu dehan, “Nia koalia saida mak nee? Oinsaa mak Ema ida nee bele foo Nia isin ba ita haan?”

⁵³ Entaun Jesus foo hatene ba sira, “Hau koalia loloos ba imi. Hau nee, Ema Oan. Ema nebee hakarak moris loloos tenki kesi metin ho Hau. Nunee, se imi lakohi haan Hau nia isin, no lakohi hemu Hau nia raan, la iha moris loloos iha imi.

⁵⁴ Tanba ema nebee haan Hau nia isin, no hemu Hau nia raan simu ona moris loloos nebee rohan laek. I bainhira mundu nee remata, Hau sei halo moris fali nia.

⁵⁵ Tan hahaan nebee loloos, mak Hau nia isin. I bee nebee loloos, mak Hau nia raan.

⁵⁶ Nunee ema nebee haan Hau nia isin, no hemu Hau nia raan nee, nia moris kesi metin ho Hau, i Hau mos kesi metin ho nia.

⁵⁷ Aman iha lalehan, nebee moris hela, haruka Hau mai. Hau mos hetan moris hosi Nia. Nee mak ema nebee haan Hau nia isin, nia mos sei simu moris loloos hosi Hau.

⁵⁸ Uluk imi nia bei-ala sira haan paun manaa nebee monu hosi lalehan. Maski sira haan paun nee, maibee depois sira mate. Maibee Paun nebee tuun mai hosi lalehan agora nee, oin seluk. Tanba ema nebee haan Paun nee, sei hetan moris rohan laek.”

⁵⁹ Jesus hanorin buat sira nee iha ema Judeu nia uma kreda ida iha sidade Kafarnaum.

Ema barak dada aan hosi Nai Jesus

⁶⁰ Iha ema barak mak tuir Jesus. Maibee bainhira sira rona Jesus nia hanorin nunee, sira balu koalia dehan, “Nia hanorin nee, todan! See mak bele simu hanorin hanesan nee?”

⁶¹ Bainhira Jesus hatene sira murmura hasoru Nia, Nia mos husu, “Hanorin nee halo imi susar, ka?

⁶² Saa tan bainhira imi haree Hau, Ema Oan, sae fila fali ba Hau nia fatin uluk?

⁶³ Maromak nia Espiritu mak lori moris loloos. Laos ema nia isin mak lori moris loloos. Maibee Hau nia Liafuan mai hosi Maromak nia Espiritu. Nunee Liafuan sira nee mos lori moris loloos ba ema.

⁶⁴ Maibee iha ema balu hosi imi la fiar ba Hau”. Jesus koalia nunee, tanba Nia hatene ona hosi hahuu, see mak la fiar no see mak sei faan Nia.

⁶⁵ Jesus koalia tan, “Nee mak Hau foo hatene ona ba imi dehan, la iha ema ida nebee bele mai iha Hau, se Hau nia Aman iha lalehan la loke dalan ba nia.”

⁶⁶ Hahuu hosi tempu nee, Nia eskolante barak dada aan hosi Nia, tanba sira lakohi tuir tan Nia.

⁶⁷ Depois Jesus husu ba Nia eskolante nain sanulu resin rua nee dehan, “Imi oinsaa? Imi mos hakarak dada aan hosi Hau, ka?”

⁶⁸ Maibee Simão Pedro hataan, “Senhor! Ami atu baa tan iha see? La iha ema seluk mak bele foo hatene mai ami oinsaa ami bele hetan moris rohan laek nee. So Ita Boot mesak deit!

⁶⁹ I ami fiar ba Ita Boot. Tanba ami hatene ona dehan, Ita Boot mak Ema Santu hosi Nai Maromak.”

⁷⁰ Jesus foo hatene ba sira dehan, “Hau hili ona imi nain sanulu resin rua. Maibee entre imi sira nee, iha ida mak hanesan diabu!”

⁷¹ Nia koalia nee kona ba Judas, Simão Iskariotes nia oan. Judas nee, Jesus nia eskolante ida hosi eskolante sanulu resin rua nee. Nia nee mak sei faan Jesus.