João 5 - Biblia Tetun Dili

Nai Jesus kura ema aleizadu ida iha bee tanki naran Betesda

¹ Liu tiha ida nee, ema Judeu sira iha loron boot ida. Tan nee mak Jesus sira baa iha sidade Jerusalem.

² Iha nebaa iha bee tanki ida besik odamatan boot naran Bibi Malae. Bee tanki nee iha ai riin fatuk lima hanesan arku. Ho sira nia lian Aramaiku, bee tanki nee naran ‘Betesda’.

³ Iha ema moras lubuk ida nebee hein hela iha ai riin arku sira nee nia okos. Ema moras sira nee mak hanesan ema matan delek, ema aleizadu, no ema nebee book aan la diak. [Sira hein bainhira bee nee book aan.

⁴ Tanba, dala ruma, Maromak nia anju hosi lalehan tama iha bee nee, halo bee nee book aan. I see mak tama uluk ba iha bee tanki nee, nia mak hetan kura.]

⁵ Iha fatin nee, iha mane ida moras tinan 38 ona.

⁶ Jesus haree ema nee toba hela iha nebaa. Nia hatene ema nee moras kleur ona, entaun Nia husu, “Ita hakarak hetan kura, ka?”

⁷ Nia hataan, “Nai, hau hakarak hetan kura. Maibee, bainhira bee book aan ona, la iha ema ida mak foti hau tau ba bee laran. Hau foin book aan atu baa, ema seluk tama uluk tiha ona.”

⁸ Entaun Jesus dehan ba nia, “Hamriik ona! Lulun o nia biti, hodi fila ona.”

⁹ Jesus koalia tiha nunee, ema nee diak kedas. I nia hamriik, foti nia biti, hodi fila. Iha loron nee natoon loos loron Sabadu, loron nebee ema Judeu sira hodi harohan.

¹⁰ Entaun ema Judeu nia boot sira foo hatene ba ema nebee foin diak nee dehan, “O hatene, ka lae? Loron ida nee, loron Sabadu. Tuir ita nia lei relijiaun, ema la bele lori nia biti, tanba nee hanesan serbisu ida.”

¹¹ Nia hataan, “Senhor sira, keta hirus! Tanba Ema nebee kura hau nee mak haruka dehan, ‘Lulun o nia biti, hodi fila ona.’ ”

¹² I sira husu ba nia, “See mak haruka o lori biti nee?”

¹³ Maibee ema nebee foin diak nee, la konhese see mak Jesus. Tanba Jesus sai nonook deit hosi ema barak nia leet.

¹⁴ La kleur, Jesus mos hasoru fali ema nee iha Uma Kreda Boot nia area. I Jesus dehan ba ema nee, “Rona didiak! Agora o diak ona. Keta halo sala tan, para buat ruma aat liu la kona fali o.”

¹⁵ Depois ema nee baa buka ema Judeu nia boot sira, hodi hatete nunee, “Ida nebee kura hau nee, Nia naran, Jesus.”

¹⁶ Iha tempu nee kedas, sira komesa halo susar Jesus, tanba Nia kura ema iha loron Sabadu, loron hodi harohan.

¹⁷ Maibee Jesus foo hatene ba sira dehan, “Hau nia Aman serbisu nafatin. Nunee, Hau mos serbisu nafatin.”

Nai Jesus foo sai dehan, Nia mak Nai Maromak nia Oan

¹⁸ Ema Judeu nia boot sira hirus demais ona ho Jesus. Nunee, sira buka dalan hodi oho Nia, tanba Jesus kontra sira nia lei loron Sabadu, loron la bele serbisu. Saa tan, Nia mos dehan Nai Maromak nee, Nia Aman. Ho liafuan nee, Nia foti Nia aan hanesan ho Maromak.

¹⁹ I Jesus foo hatene ba sira dehan, “Loos! Hau foo hatene dehan, Hau la bele halo buat ida hosi Hau nia aan rasik. Tan Hau Nai Maromak nia Oan. Nee mak Hau so bele halo tuir buat nebee Hau haree Hau nia Aman halo. Hau nia Aman halo saida, ida nee mak Hau halo tuir.

²⁰ Hau nia Aman iha lalehan hadomi teb-tebes Hau, nudar Nia Oan. Nia mos hatudu mai Hau buat hotu-hotu nebee Nia halo. Depois Nia sei hatudu mai Hau buat sira nebee makaas liu tan, para imi bele haree, i admira.

²¹ Hau nia Aman halo moris fila fali ema mate. Nunee mos, Hau sei foo moris loloos ba see-see deit, tuir Hau nia hakarak.

²² Tuir loloos, nunee: Aman rasik la tesi ema ida nia lia. Maibee Nia entrega hotu mai Hau, tan Hau nee, Nia Oan. Hau mak tesi ema nia lia dehan, ema nee halo loos, ka sala.

²³ Hau nia Aman hakarak ema hotu-hotu respeita Hau, hanesan sira respeita ona ba Nia. Tanba ema nebee la respeita Hau, nudar Nia Oan, ema nee mos la respeita Aman nebee haruka Hau mai.

²⁴ Tebes duni! Hau foo hatene ba imi. Ema nebee rona Hau nia liafuan no fiar ba Nai Maromak, nebee haruka Hau mai, hetan moris rohan laek. Maromak la kastigu mate tan ema nee ona, tanba ema nee husik ona mate hodi tama ba moris hamutuk ho Maromak tinan ba tinan.

²⁵ Tebes duni! Hau hatete ba imi. Nia tempu besik ona, no agora hahuu dadauk ona. Ema mate sira rona lian hosi Hau, Maromak nia Oan. Tan ema nebee rona no simu ho diak Hau nia liafuan sei hetan moris loloos.

²⁶ Moris hotu-hotu nia huun iha Hau nia Aman. Nia mos foo mai Hau moris loloos. Tanba Hau nee, Nia Oan.

²⁷ Hau nia Aman mos foo direitu no kbiit mai Hau hodi tesi ema hotu nia lia, tanba Hau, Ema Oan.

²⁸ Imi lalika admira, tanba la kleur tan ema mate hotu-hotu sei rona Hau nia lian.

²⁹ I sira sei moris fali no sai hosi rate. Ema sira nebee uluk halo buat diak, sei hetan moris rohan laek, maibee ema sira nebee uluk halo buat aat, sei hetan kastigu rohan laek.”

Iha sasin barak mak foo sai kona ba Nai Jesus

³⁰ Jesus koalia tan dehan, “Hau rasik la bele halo buat ida, se Hau seidauk rona hosi Hau nia Aman. Bainhira Hau rona tiha hotu, foin Hau tesi ema nia lia. Tanba nee, saida mak Hau desidi nee loos. Tanba Hau la halo tuir Hau nia hakarak, maibee Hau nia Aman nia hakarak deit. Tanba Nia mak haruka Hau mai.

³¹ Se Hau mak foo sasin kona ba Hau nia aan rasik, Hau nia sasin nee, la vale.

³² Maibee iha ema seluk nebee sai sasin kona ba Hau. I Hau hatene sira nia koalia kona ba Hau nee, loos.

³³ Imi haruka ona ema ba husu iha João Sarani Nain i nia foo sasin loos kona ba Hau.

³⁴ Tuir loloos, Hau la presiza ema nia sasin kona ba Hau. Maibee Hau foo hanoin buat sira nee para Maromak bele salva imi, ema sala nain.

³⁵ João nia koalia nee, hanesan ahi oan ida nebee lakan hodi foo naroman. Bainhira nia sei lakan hela, imi nia laran haksolok.

³⁶ Tuir loloos, iha Ema ida boot liu João nebee foo sasin kona ba Hau. Nia mak Hau nia Aman iha lalehan, nebee foo knaar hotu mai Hau, para Hau halao too remata. Serbisu sira nee mak hatudu katak, Aman mak haruka Hau mai.

³⁷ Nia nebee haruka Hau mai, mak foo sasin loos kona ba Hau. Imi nunka rona Nia lian, i nein haree Nia oin.

³⁸ Maromak nia Liafuan la moris iha imi nia laran, tanba imi la fiar Hau, nebee Nia haruka mai.

³⁹ Imi gosta estuda didiak Eskritura Sagrada, tanba imi hanoin hosi nebaa imi sei hetan moris rohan laek. Afinal Liafuan sira nee foo hatene kona ba Hau.

⁴⁰ Maibee imi lakohi mai iha Hau, i sai Hau nia ema, para imi bele hetan moris rohan laek.

⁴¹ Hau la presiza ema gaba Hau.

⁴² Maibee Hau hatene momoos imi nia laran. Nee mak Hau hatene katak imi nia laran la iha domin ba Nai Maromak.

⁴³ Hau mai iha mundu nee, tanba Hau nia Aman nebee kaer ukun mak haruka Hau mai. Maibee imi la simu Hau. Se karik ema seluk mai ho nia kbiit rasik, imi simu nia ho diak.

⁴⁴ Imi ho imi gosta gaba malu. Maibee imi la interese se Nai Maromak gaba imi, ka lae. Afinal Nia nee, Nai. La iha tan seluk. Nunee, se imi la interese Nia, oinsaa imi bele fiar ba Nia?

⁴⁵ Keta hanoin dehan, Hau mak foo sala ba imi iha Hau nia Aman nia oin. Lae! Ema nebee foo sala ba imi mak Moisés. Afinal imi laran metin ba nia, tanba nia mak foo Maromak nia Lei ba imi.

⁴⁶ Se imi fiar tebes ba Moisés, entaun imi mos fiar mai Hau. Tan nia hakerek kona ba Hau.

⁴⁷ Maibee tanba imi la fiar saida mak nia hakerek, imi nunka fiar buat nebee Hau koalia, ka?”