João 4 - Biblia Tetun Dili

Nai Jesus koalia ho feto ida iha Samaria

^1-2 Se kompara João ho Jesus, Jesus nia eskolante sira sarani ema barak liu ema nebee tuir Nia. Jesus rasik la sarani ema, so Nia eskolante sira mak sarani. I bainhira Jesus hatene dehan, ema hosi grupu relijiaun Farizeu rona ona dehan sira sarani ema barak liu,

³ entaun Nia ho Nia eskolante sira husik tiha rejiaun Judeia, hodi fila fali ba provinsia Galileia.

⁴ Maibee sira tenki lao liu provinsia Samaria hodi too iha Galileia.

⁵ Sira lao too sidade ida iha Samaria, naran Sikar, besik rai ida nebee Jaco foo ba nia oan José.

^6-8 Iha nebaa iha bee posu ida, naran ‘posu Jaco’. Iha meiudia, Jesus sira too iha nebaa. Nia senti kolen durante sira nia viajen, i Nia tuur deskansa iha bee posu nee. Nia eskolante sira husik hela Nia mesak iha nebaa, hodi baa sosa hahaan iha sidade. Depois feto ida hosi sidade Samaria nee baa kuru bee iha bee posu nee. Jesus husu ba nia dehan, “Mana, ita bele foo bee ituan mai hau hemu, ka?”

⁹ Maibee feto nee hakfodak, tanba ema Judeu baibain la iha relasaun diak ho ema Samaria sira. I nia husu fali ba Jesus, dehan, “Senhor, ita ema Judeu, hau ema Samaria. Senhor husu bee ba hau, nee la sala, ka?”

¹⁰ Jesus hatete, “Se mana hatene saida mak Nai Maromak hakarak foo ba ema hotu, no mos hatene see mak Hau nebee husu bee nee, maka mana sei husu fila fali bee mai Hau. Nunee Hau sei foo bee nebee lori moris ba ema.”

¹¹ Feto nee dehan, “Senhor, ita la iha kanaba hodi dada bee. I bee posu nee mos klean. Hosi nebee Senhor hetan bee nebee lori moris nee?

¹² Oinsaa? Senhor boot liu fali ami nia bei-ala Jaco? Nia mak husik hela posu nee mai ami. I nia rasik mos hemu bee hosi posu nee. Nia oan sira ho nia animal sira mos hanesan.”

¹³ Jesus hataan, “Keta haluha! Ema nebee hemu bee iha bee posu nee, sei hamrook fali.

¹⁴ Maibee ema nebee hemu bee nebee Hau foo nee, sei la hamrook tan ona. Tanba bee nebee Hau foo nee, hanesan bee matan ida iha nia laran, nebee fakar sai mai. Bee nee, lori moris loloos nebee rohan laek.”

¹⁵ Feto nee dehan, “Se nunee, Senhor, foo ona bee nee mai hau, para hau keta hamrook tan ona. Nunee, hau lalika mai bebeik kuru bee iha nee.”

¹⁶ Jesus dehan, “Ita baa bolu ita nia laen mai iha nee.”

^17-18 Feto nee hataan, “Maibee hau la iha laen.” Jesus dehan, “O koalia loos duni, dehan o la iha laen. Afinal o iha laen nain lima ona. I mane ida nebee moris hamutuk ho o agora nee, mos laos o nia laen.”

¹⁹ Feto nee hataan, “Agora hau hatene ona, Senhor nee Maromak nia profeta ida.

²⁰ Hau atu husu. Ami ema Samaria nia bei-ala sira adora Nai Maromak iha foho Gerizim. Maibee imi ema Judeu dehan, se hakarak adora Nai Maromak, ema hotu tenki baa Jerusalem. Tuir Ita Boot, ida nebee mak loos?”

²¹ Jesus hataan, “Ita fiar ba Hau Nia koalia, tanba Hau koalia loos. Sei too nia tempu, imi adora Maromak iha foho nee, ka iha Jerusalem, fatin rua nee la iha folin tan ona.

²² Imi ema Samaria la hatene adora ba see. Maibee ami ema Judeu hatene Nai Maromak nebee ami adora. Tanba Nia hakarak uza ami hodi loke dalan, para salva ema sala nain.

²³ Bainhira nia tempu too, agora too tiha ona, ema nebee adora loloos ba Aman Maromak iha lalehan, sira adora Nia tuir Nia Espiritu, i tuir buat nebee loos. Tanba Aman iha lalehan hakarak ema nebee adora Nia hanesan nee.

²⁴ Tanba Maromak nee, Espiritu. No ema nebee adora Nia tenki adora tuir Nia Espiritu, i tuir buat nebee loos.”

²⁵ Feto nee dehan tan, “Hau hatene ona Mesias atu mai, nebee ema bolu Nia dehan ‘Kristu’. Nia nee mak Nai Maromak promete ona atu haruka mai. Bainhira Nia mai, Nia sei foo sai buat hotu-hotu ba ita.”

²⁶ Jesus hataan, “Mak Hau duni, ida nebee koalia hela ho o.”

²⁷ Sira sei koalia namanas hela, Nia eskolante sira mos too mai hosi sidade. Sira hakfodak loos, tanba sira haree Jesus koalia hela ho feto Samaria ida. Maibee la iha ema ida husu ba feto Samaria nee, “O hakarak saida?” I la iha ema ida husu ba Jesus, “Tanba saa mak Senhor koalia ho feto nee?”

²⁸ Tuir mai, feto nee husik hela nia sana rai iha nebaa, fila ba sidade hodi konta ba ema hotu iha nebaa dehan,

²⁹ “Mai ita baa haree took Ema ida iha nebaa. Tanba Nia foo sai momoos hau nia hahalok hotu nebee hau halo ona. Keta halo be Ema nee Kristu, nebee Maromak promete ona atu haruka mai.”

³⁰ Ema barak sai hosi sidade nee, hodi baa haree Jesus.

³¹ Bainhira feto nee fila fali ba sidade, Jesus nia eskolante sira bolu Nia, “Mestri! Mai haan lai!”

³² Maibee Nia hataan, “Hau iha ona hahaan nebee imi la hatene.”

³³ Nia eskolante sira husu ba malu, “Oinsaa mak nee? See mak mai foo hahaan ba Nia?”

³⁴ Maibee Jesus hatete, “Nai Maromak haruka Hau mai hodi halo tuir Nia hakarak, no halao Nia serbisu too remata. Ida nee mak hanesan hahaan ba Hau.

³⁵ Baibain imi haree ba toos, i dehan, ‘Sei hela fulan haat tan, foin bele silu batar.’ Maibee Hau hatete ba imi. Se imi haree didiak, toos sira prontu ona baa halibur. Toos sira nee mak hanesan ema barak nebee mai hasoru ita iha nebaa. Tanba sira nee prontu ona fiar mai Hau.

³⁶ Laos nee deit, ema sira nebee halibur batar hatama ba armazen, sira komesa simu ona sira nia kolen. Sira nee hanesan ema nebee hatudu dalan para ema fiar ba Nai Maromak, i hetan moris loloos nebee rohan laek. Nunee ema nebee kuda fini, no ema nebee halibur ai haan, bele haksolok hamutuk.

³⁷ Ema dehan, ‘Ema ida kuda fini; ema seluk mak halibur nia rezultadu.’ Nee loos duni.

³⁸ Hau haruka ona imi baa halibur rezultadu hosi ema seluk nia serbisu. Laos imi mak serbisu, maibee imi mak aproveita hosi sira nia kosar been.”

³⁹ Tempu nebaa, ema Samaria barak iha sidade nee mak fiar ba Jesus, tanba feto nee koalia dehan, “Nia foo sai momoos hau nia hahalok hotu.”

⁴⁰ Bainhira sira baa hasoru Jesus, sira husu ba Nia, “Senhor, hela ho ami iha nee deit!” I Nia hela loron rua iha nebaa.

⁴¹ I ema barak mos fiar ba Nia, tanba Nia liafuan.

⁴² I sira foo hatene ba feto nee dehan, “Horiseik, ami rona o koalia deit. Maibee agora ami fiar ba Nia, tanba ami rasik rona hosi Nia. Ami hatene duni dehan, Ema nee mak salva ita ema sala nain hotu iha mundu nee.”

Jesus kura funsionariu ida nia oan

⁴³ Jesus sira hela loron rua iha nebaa, depois sira kontinua lao baa provinsia Galileia.

⁴⁴ (Jesus koalia ona dehan, “Ema la respeita Nai Maromak nia profeta sira iha sira nia rai rasik.”)

⁴⁵ Uluk, molok festa Paskua, ema Galileia barak baa iha sidade Jerusalem hodi selebra loron boot iha nebaa. I sira haree saida mak Jesus halo iha festa nee. Tan nee mak bainhira Nia fila ba Galileia, ema simu Nia ho diak.

⁴⁶ I Jesus sira lao nafatin fila fali ba aldeia Kanaa iha provinsia Galileia, nebee Nia halo bee sai tua. Iha tempu nee, iha funsionariu ida iha sidade Kafarnaum. Nia oan mane moras.

⁴⁷ Bainhira funsionariu nee rona dehan, Jesus fila fali mai iha Galileia hosi provinsia Judeia, nia mos lao sae ba Kanaa buka Jesus. Hasoru tiha, nia husu ho haraik aan ba Jesus para tuun ba kura nia oan. Tanba labarik nee besik atu mate.

⁴⁸ Jesus foo hatene ba funsionariu nee dehan, “Se imi la haree Hau halo milagre oi-oin, imi lakohi fiar Hau.”

⁴⁹ Funsionariu nee hataan, “Senhor, favor ida mai lai. Tanba, se Ita la mai, hau nia oan nee sei mate.”

⁵⁰ I Jesus foo hatene ba nia dehan, “Fila ona ba uma, tanba o nia oan sei moris.” Nia fila kedas, tanba nia fiar ba Jesus nia liafuan nee.

⁵¹ Bainhira nia fila, ema sira nebee serbisu iha nia uma baa hasoru nia iha dalan, dehan, “Senhor, lalika laran susar tan, tanba ita nia oan sei moris.”

⁵² Nia husu ba sira, “Nia diak tuku hira?” Sira hataan, “Nia isin manas tuun kedas hahuu horiseik meiudia, tuku ida.”

⁵³ Funsionariu nee hanoin kedas dehan, nia oan diak ona, iha momentu Jesus foo hatene dehan, “Senhor nia oan sei moris.” Entaun nia ho ema hotu iha nia uma laran fiar ba Jesus.

⁵⁴ Ida nee milagre ba dala rua nebee Jesus halo bainhira Nia sai hosi Judeia, hodi baa Galileia.