João 21 - Biblia Tetun Dili

Nai Jesus hatudu Nia aan ba Nia eskolante nain hitu

¹ Liu tiha loron hira nunee, Jesus hatudu nia aan fali iha tasi Tiberias nia ibun. Nia istoria nunee:

² Tempu nee, Jesus nia eskolante nain hitu halibur hamutuk hela. Sira nee, mak: Simão Pedro, Tome, nebee sira bolu, ‘oan kaduak’, Natanael, hosi aldeia Kanaa iha provinsia Galileia, Zebedeu nia oan nain rua, ho Jesus nia eskolante nain rua seluk.

³ Simão Pedro foo hatene ba nia kolega sira dehan, “Hau atu ba hatuun redi hodi kaer ikan.” Sira hataan, “Ami mos baa hotu.” Entaun sira baa ona iha tasi ibun. Depois sira sae bero hodi baa buka ikan. Maibee kalan tomak, sira la hetan ikan ida.

⁴ Iha aban dadeer-saan, Jesus hamriik hela iha tasi ibun. Maibee Nia eskolante sira la hatene katak Nia nee Jesus.

⁵ Entaun Jesus bolu ba sira, “Alin sira! Imi hetan ikan ruma, ka?” Sira hataan, “Mamuk loos, la hetan buat ida.”

⁶ Nia foo hatene ba sira, “Koko soe took redi iha bero nia sorin loos. Nunee imi sei hetan ikan.” Sira halo tuir. Nunee sira hetan ikan barak teb-tebes, too sira dada redi la bele ba bero laran.

⁷ Hau, eskolante ida nebee Jesus hadomi, mos iha nebaa. Bainhira hau haree nunee, hau foo hatene ba Pedro dehan, “Nia mak ita nia Nai!” Rona hau nia lian, Simão Pedro hatais fali nia ropa, i haksoit ba tasi laran hodi nani ba rai maran.

⁸ Bero nee dook hosi rai maran mais-ou-menus metru 100. I nia kolega sira hean bero hodi fila ba rai maran, ho dada redi nebee nakonu ho ikan.

⁹ Bainhira sira too iha rai maran, sira haree ahi klaak lakan hela iha nebaa. Iha ahi klaak nee nia leten iha ikan ida, no mos iha paun.

¹⁰ Jesus hatete ba sira, “Lori ikan balu imi foin kaer nee mai.”

¹¹ Nunee Pedro sae fali ba bero laran, hodi dada redi ba rai maran. Redi nee nakonu ho ikan bo-boot deit. Ikan hamutuk 153. Maski ikan barak nunee, maibee redi la naklees.

¹² I Jesus bolu sira hodi dehan, “Mai haan lai!” Sira hatene ona, Nia nee, sira nia Nai. Nee mak sira la brani husu, “Ita nee, see?”

¹³ Depois Jesus foti paun no ikan hodi foo ba sira.

¹⁴ Ida nee ba dala tolu Jesus hatudu Nia aan ba Nia eskolante sira, bainhira Nia moris fila fali hosi mate.

Nai Jesus koalia ho Pedro

¹⁵ Bainhira sira haan hotu ona, Jesus husu ba Simão Pedro, “Simão, João nia oan, o hadomi Hau liu sira seluk hadomi Hau, ka?” Nia hataan, “Loos! Nai hatene ona hau hadomi Ita Boot.” Entaun Jesus hameno ba nia, “Se nunee, foo hahaan didiak ba Hau nia bibi malae oan sira.”

¹⁶ I Jesus husu tan ba dala rua, “Oinsaa, Simão, João nia oan, o hadomi Hau, ka?” Nia hataan, “Loos! Nai hatene ona hau hadomi Ita Boot.” Entaun Jesus hameno ba nia, “Se nunee, hein didiak Hau nia bibi malae sira.”

¹⁷ I Jesus husu tan ba dala tolu, “Simão, João nia oan. Oinsaa? O hadomi Hau, ka?” Maibee Pedro laran susar, tanba Jesus husu dala tolu ona dehan, “O hadomi Hau, ka?” Nia hataan, “Ita Boot hatene buat hotu-hotu. Entaun Ita Boot hatene ona katak hau Ita Boot nia belun.” Depois Jesus hameno ba nia, “Se nunee, foo hahaan didiak ba Hau nia bibi malae oan sira.

¹⁸ O komprende ona Hau nia hakarak, ka? Hau hakarak hatete nunee: uluk o foin sae, baibain o hatais ropa, no kesi sintu, i o baa nebee deit tuir o nia hakarak. Maibee, bainhira o katuas ona, o lolo o nia liman, ema ruma sei kesi o nia liman ho o nia sintu rasik, i sira lori o baa iha fatin nebee o lakohi baa.”

¹⁹ (Jesus koalia nunee hodi foo hatene ba Pedro saida mak sei akontese ba nia aan. Tanba Pedro nia mate nee hatudu Nai Maromak nia naroman-nabilan.) Depois Jesus hatete ba Pedro, “Mai tuir Hau ona, i sai Hau Nia ema!”

Eskolante nebee Jesus hadomi

²⁰ Iha tempu nee, Pedro haree ba kotuk, i nia haree hau tuir hosi sira nain rua nia kotuk. Hau eskolante ida nebee Jesus hadomi. Hau mos tuur iha Jesus nia sorin bainhira ami tuur hamutuk haan iha festa Paskua. Hau mak husu ba Nia, “Senhor, see mak sei faan Ita Boot?”

²¹ Bainhira Pedro haree hau, nia husu ba Jesus, “Nai ohin koalia ona kona ba hau. Maibee oinsaa ho nia?”

²² Jesus hatete ba Pedro, “Nee laos o nia serbisu. Se karik Hau hakarak nia hela nafatin too Hau fila fali mai, nee laos o nia problema. Importante mak o tenki hanoin saida mak Hau hameno ona ba o ohin nee, mak: mai tuir ona Hau, i sai Hau nia ema.”

²³ Tanba Jesus koalia nunee, Nia eskolante sira seluk koalia ba malu dehan, “João sei la mate.” Afinal Jesus la koalia nunee. Ida Nia koalia nee, mak: “Nee laos o nia serbisu. Se karik Hau hakarak nia hela nafatin too Hau fila fali mai, nee laos o nia problema.”

João taka nia surat

²⁴ Eskolante nebee Jesus koalia nee, mak hau, João. Hau mak konta buat sira nee hotu ba imi. Hau mak haree ho hau nia matan rasik. I hau mak hakerek buat sira nee hotu. Ita hotu hatene katak, saida mak hau foo hatene ba imi nee, loos duni.

²⁵ I iha buat barak tan mak Jesus halo. Se ema hakarak hakerek buat sira nee hotu, komesa hosi Jesus halao nia serbisu too remata, hau hanoin mundu nee tomak la too hodi rai livru sira nee hotu. Hosi hau, João