João 20 - Biblia Tetun Dili

Nai Jesus moris fila fali

¹ Loron Domingu, loron primeiru iha semana nee, Maria hosi rai Madala baa Jesus nia rate iha dadeer-saan nakukun. Too iha nebaa, nia haree fatuk boot nebee hodi taka rate ibun nee, muda sees tiha ona hosi nia fatin.

² Entaun nia halai fila fali ba Simão Pedro, no hau, Jesus nia eskolante nebee Nia hadomi nee. Nia hatete dehan, “Ema naok tiha ona ita nia Nai nia mate isin hosi rate! Ita la hatene sira tau Nia iha nebee.”

³ Rona nunee, hau ho Pedro halai ba rate.

⁴ Ami halai baa hamutuk, maibee hau halai lalais liu, i too uluk.

⁵ Iha nebaa, hau la tama ba laran, maibee hosi liur deit hau hateke ba laran, hau haree hena finu nebee sira uza hodi falun Jesus nia mate isin iha hela nebaa.

⁶ Bainhira Pedro too iha nebaa, nia tama liu ba laran. Nia mos haree hena finu nee iha nebaa.

⁷ Nia mos haree lensu ida, nebee sira uza hodi taka Jesus nia ulun. Maibee lensu nee dobra ketak hela hosi hena nee.

⁸ Hau nebee too uluk iha rate nee, tama mos ba laran. Bainhira hau haree tiha hotu, hau fiar ba Jesus nia koalia uluk nebee dehan, depois Nia sei moris fali hosi mate.

⁹ Iha tempu nee, ami sira nebee sai ona Nia eskolante seidauk komprende Maromak nia Eskritura Sagrada nebee hakerek ona dehan, Kristu tenki moris fali hosi mate.

¹⁰ Depois, ami nain rua fila ba uma.

Nai Jesus hatudu Nia aan ba Maria Madalena

¹¹ Maibee Maria hamriik hela iha rate liur, i tanis. Bainhira nia tanis hela, nia hateke tama ba rate laran.

¹² Nia haree Maromak nia anju rua hosi lalehan. Sira hatais ropa mutin. Sira nain rua tuur iha fatin nebee ema latan Jesus nia mate isin ba nee. Ida tuur iha ulun, ida seluk tuur iha ain.

¹³ Sira husu ba nia dehan, “Senhora, tanba saa ita tanis?” Nia hataan, “Hau tanis, tanba ema lori tiha hau nia Nai nia mate isin. Hau la hatene sira tau iha nebee.”

¹⁴ Nia koalia tiha hotu nunee, nia fila ba kotuk, nia haree ema ida hamriik hela. Maibee nia la hatene katak Ema nee mak Jesus.

¹⁵ Entaun Jesus husu ba nia, “Senhora, tanba saa ita tanis? Senhora buka see?” Maria hanoin ema nee serbisu iha toos, i nia husu, “Senhor, se ita foti tiha Nia mate isin hosi nee, foo hatene mai hau, para hau baa foti Nia ba hakoi didiak.”

¹⁶ Jesus bolu nia naran, “Maria.” Nia fila ba Jesus dehan, “Raboni!” (Ho lian Aramaiku, nia signifikadu dehan, “Hau nia Mestri!”)

¹⁷ Jesus foo hatene ba nia dehan, “Keta kaer Hau lai, tanba Hau seidauk sae ba Hau nia Aman iha lalehan. Maibee, senhora baa uluk, foo hatene ba Hau nia alin sira dehan, ‘Hau atu sae ba Hau nia Aman. Nia mos imi nia Aman. Nia mak Hau nia Maromak, no mos imi nia Maromak.’ ”

¹⁸ Nunee, Maria Madalena baa konta Jesus ba nia eskolante sira dehan, “Hau hasoru tiha ona ita nia Nai, Jesus.” I nia hatoo Jesus nia lia menon ba sira.

Nai Jesus hatudu Nia aan ba Nia eskolante sira

¹⁹ Iha loron Domingu lokraik, loron primeiru iha semana nee, Jesus nia eskolante sira halibur malu iha fatin ida. Sira taka odamatan metin, tanba sira tauk ema Judeu nia boot sira. Derepenti deit, Jesus mai hamriik iha sira nia klaran dehan, “Paz i hakmatek ba imi.”

²⁰ Bainhira Jesus hasee sira nunee, Nia mos hatudu Nia kanek nebee iha Nia liman no Nia knosen. Nia eskolante sira haksolok teb-tebes bainhira haree sira nia Nai.

²¹ Jesus foo hatene tan ba sira dehan, “Paz no hakmatek ba imi. Hau nia Aman haruka ona Hau, Hau mos haruka imi hanesan nee.”

²² Nia koalia tiha hotu, Nia besik ba sira, i Nia huu Nia iis ba sira ida-idak. Nia dehan, “Hau foo Maromak nia Espiritu Santu ba imi. Simu Nia baa.

²³ Nunee, se imi foo perdaun ba ema nia sala, sala nee lakon tiha ona, tan Maromak mos hamoos tiha sala sira nee ona. Maibee se imi lakohi foo perdaun ba ema nia sala, Maromak mos la hamoos sala nee.”

Nai Jesus ho Tome

²⁴ Jesus nia eskolante ida, hosi sira nain sanulu resin rua nee, nia naran Tome, nebee sira temi mos, ‘oan kaduak’. Bainhira Jesus baa hatudu Nia aan ba sira, Tome la hamutuk ho eskolante sira seluk.

²⁵ Nee mak bainhira nia kolega sira dehan, “ami hasoru tiha ona ita nia Nai,” nia hataan, “hau tenki haree no kaer uluk pregu fatin iha Nia liman, no hau tenki hatama hau nia liman fuan ba Nia knosen. Se hau seidauk halo nunee, hau seidauk fiar dehan, Nia moris fali ona.”

²⁶ Liu tiha semana ida, Jesus nia eskolante sira hamutuk ho Tome iha uma ida. Odamatan hotu taka metin, maibee Jesus tama ba hamriik iha sira nia klaran. Nia hasee sira dehan, “Paz i hakmatek ba imi!”

²⁷ I Nia koalia ba Tome dehan, “Tau o nia liman fuan ba iha pregu fatin no haree didiak baa. Lolo o nia liman mai hatama ba Hau nia knosen. Entaun fiar ona ba, dehan katak Hau moris fali ona. Husik tiha o nia laran rurua nee.”

²⁸ Tome hataan, “Nai! Agora hau fiar tebes ona. Ita Boot mak hau nia Nai no hau nia Maromak!”

²⁹ Jesus foo hatene tan ba nia dehan, “Tome! O fiar Hau moris fali ona, tanba o haree Hau ho o nia matan rasik. Maibee bensaun boot liu ba ema nebee la haree Hau, maibee fiar.”

Tanba saa João hakerek livru nee?

³⁰ Jesus halo milagre bar-barak tan, nebee hau la hakerek iha livru nee. Nia eskolante sira haree milagre sira nee ho sira nia matan rasik.

³¹ Maibee, buat sira nebee hau hakerek ona iha livru nee, hau hakerek para imi bele fiar dehan, Jesus mak Kristu nebee Nai Maromak promete ona atu haruka mai. Jesus mos Nai Maromak nia Oan. I bainhira imi fiar ba Nia, imi hetan moris rohan laek, tanba imi sai ona Nia ema.