João 2 - Biblia Tetun Dili

Festa kazamentu iha aldeia Kanaa

¹ Liu tiha loron rua, iha festa kazamentu ida iha aldeia Kanaa, iha provinsia Galileia. I Jesus nia inan mos iha festa nee.

² Jesus ho Nia eskolante sira hetan konvite, no sira mos partisipa.

³ Maibee tua iha festa nee atu besik hotu. Entaun Jesus nia inan foo hatene ba Nia dehan, “Ajuda lai! Tanba sira nia tua hotu ona.”

⁴ Maibee Jesus hataan dehan, “Senhora, tanba saa mak ita husu mai Hau? Hau nia tempu seidauk too.”

⁵ Maibee Nia inan foo hatene ba sira nebee serbisu iha nebaa dehan, “Rona mai! Nia haruka saida, imi halo tuir deit.”

⁶ Iha nebaa iha sana boot neen, nebee ema halo hosi fatuk. Sana ida tau bee mais-ou-menus litru 75-115. Baibain ema Judeu sira uza sana nee hodi tau bee para hamoos sira nia aan, tuir lei relijiaun.

⁷ Entaun Jesus hatete ba ema serbisu sira dehan, “Baa tau bee iha sana sira nee.” Nunee sira tau bee nakonu too ibun.

⁸ Tuir mai, Jesus hatete ba sira dehan, “Agora hasai ituan hodi baa foo ba xefi tenda.” I sira halo tuir.

⁹ Lori too iha nebaa, xefi tenda hemu koko bee nee, i bee nee sai tiha tua. Nia hakfodak, tanba nia la hatene sira hetan tua nee hosi nebee (Maibee ema serbisu sira nee hatene). Nunee nia bolu noivu mai.

¹⁰ Nia dehan, “Tuir ita nia kostumi, festa nain foo uluk tua nebee diak liu ba bainaka sira hemu. Bainhira sira hemu barak ona, foin nia hasai tua baibain. Maibee o halo oin seluk fali. O hasai uluk tua baibain, mak foin hasai tuir tua nebee diak liu.”

¹¹ Ida nee akontese iha aldeia Kanaa, iha provinsia Galileia. Nee milagre dahuluk Jesus halo nebee ema bele haree. Jesus hatudu Nia naroman-nabilan nunee, maka Nia eskolante sira fiar ba Nia.

¹² Liu tiha nee, Jesus ho Nia inan, Nia alin sira, no Nia eskolante sira tuun ba sidade Kafarnaum. No sira hela loron hira deit iha nebaa.

Nai Jesus duni sai ema hosi Nai Maromak nia Uma Kreda Boot

¹³ Bainhira ema Judeu sira nia loron boot Paskua besik ona, Jesus sae ba sidade Jerusalem.

¹⁴ Iha Uma Kreda Boot nia area, Jesus haree ema faan karau, bibi malae, ho manu pombu nebee ema sosa hodi halo sakrifisiu. Iha mos ema nebee tuur iha meza hodi troka osan hodi foo ba Nai Maromak iha Uma Kreda Boot.

¹⁵ Nunee Jesus halo sikoti ida hosi tali hodi duni sai sira hotu hosi Uma Kreda nia area. Nia mos duni sai karau no bibi malae sira hotu. Nia baku fila meza sira too osan sira hotu fakar namkari ba rai.

¹⁶ Nia mos haruka ema nebee faan manu pombu sira nee dehan, “Hasai sasaan sira nee hosi nee! La bele halo Hau nia Aman nia Uma sai fali fatin hodi kontratu. Fatin nee laos basar!”

¹⁷ Entaun Nia eskolante sira hanoin fali Maromak nia liafuan nebee hakerek ona iha Eskritura Sagrada dehan, “Hau hadomi teb-tebes Maromak nia Uma. Nee mak hau foo Hau nia laran tomak hodi defende Uma Kreda nia naran diak.”

¹⁸ I ema Judeu nia boot sira haruka Jesus dehan, “Se O iha autoridade hodi duni sai ema sira nee, entaun hatudu took milagre ida mai ami hanesan evidensia ida.”

¹⁹ Jesus hataan, “Se imi harahun tiha fatin santu nee, Hau sei harii fila fali iha loron tolu nia laran.”

²⁰ Maibee sira hataan, “Nusaa!? Ema sira harii Uma Kreda Boot nee lori tinan haat-nulu resin neen. Oinsaa mak O dehan fali O bele harii iha loron tolu nia laran deit?!”

²¹ Maibee sira la komprende, afinal Jesus koalia kona ba Nia aan rasik, hanesan fatin santu ida.

²² Depois, bainhira Jesus mate, i moris fila fali, Nia eskolante sira foin hanoin hetan saida mak Nia hatoo ona ba sira. Nunee sira fiar ba Maromak nia liafuan iha Eskritura Sagrada nebee hakerek ona hori uluk, no saida mak Jesus hatete tiha ona ba sira.

Jesus hatene ema hotu nia laran

²³ Jesus hela lalais deit iha sidade Jerusalem, hodi selebra loron boot Paskua. Ema barak haree Nia halo milagre oi-oin i sira fiar ba Nia.

^24-25 Maibee Jesus rasik la fiar ba sira, tanba Nia hatene ema hotu nia laran. Nia la presiza ema foo hatene saida deit ba Nia, tanba Nia rasik hatene ona ema ida-idak nia hahalok.