João 18 - Biblia Tetun Dili

Ema kaer Nai Jesus

¹ Bainhira Jesus halo tiha orasaun nunee, Nia mos sai hamutuk ho Nia eskolante sira ba iha mota Kidron nia sorin baa. Iha fatin nee iha toos ida nebee Jesus ho Nia eskolante sira tama ba iha nebaa.

^2-3 Tempu nebaa, nai lulik Judeu nia xefi sira, no ema hosi grupu relijiaun Farizeu sira haruka soldadu Roma balu no ema seguransa balu hosi Uma Kreda Boot ba hasoru Judas, tanba sira hatene Judas atu faan Jesus. Judas hatene toos nee, tanba Jesus dala barak halibur ho Nia eskolante sira iha nebaa. Sira hotu baa iha toos nee, lori ahi oan, lanterna no dima.

⁴ Tuir loloos, Jesus hatene tiha hotu ona saida mak sei akontese ba Nia. Nunee Nia hakbesik aan ba sira hodi husu, “Imi buka see?”

⁵ Sira hataan, “Ami buka ema ida naran Jesus, hosi aldeia Nazaré.” Jesus foo hatene dehan, “Hau mak nee!” Tempu nee, Judas mos hamutuk ho sira. Nia mak faan Jesus.

⁶ Bainhira Jesus koalia dehan, “Hau mak nee!” ema sira nee hakiduk, no monu kedas ba rai.

⁷ Jesus husu tan ba sira, “Imi buka see?” Sira hataan, “Jesus, ema Nazaré.”

⁸ Jesus dehan, “Hau foo hatene ona ohin dehan, Nia nee, mak Hau. Entaun, se imi buka Hau, keta kaer ema seluk. Husik sira baa deit.”

⁹ (Nia koalia nunee hodi halo sai tuir saida mak Nia koalia ona dehan, “Aman, ema hotu nebee Ita Boot foo mai Hau nee, la iha ida mak lakon.”)

¹⁰ Tempu nee, Simão Pedro lori taha ida. Nia losu taha nee hosi nia knuuk, i tesi kotu tiha ema ida nia tilun sorin kuana. (Ema nee, naran Malku. Nia nee, relijiaun Judeu nia ulun boot nia atan.)

¹¹ Haree nunee, Jesus hatete, “Pedro! Hatama fila fali taha ba iha nia knuuk. Tan Hau nia Aman dehan ona Hau tenki hetan terus hanesan nee. Entaun husik baa! Nee hanesan Nia foo kalis ida ho tua moruk ba Hau hemu.”

Sira lori Nai Jesus baa ulun boot relijiaun Judeu nian

¹² Tuir mai, komandante, soldadu sira, ho ema seguransa hosi Uma Kreda Boot, kaer Jesus, i futu tiha Nia.

¹³ Depois sira lori Nia baa uluk iha Anas. Anas nee, Kaifas nia banin mane. Iha tinan nebaa, Kaifas mak ulun boot relijiaun Judeu nian.

¹⁴ Kaifas mak foo hanoin ba ema Judeu nia boot sira dehan, “Diak liu ema ida mate ba ema hotu.”

Pedro nega Nai Jesus

¹⁵ Simão Pedro tuir Jesus hosi kotuk, hamutuk ho Jesus nia eskolante ida tan, mak hau, João. Ulun boot relijiaun Judeu nian hatene hau, nee mak hau bele tama ba nia area, hamutuk ho Jesus.

¹⁶ Maibee Pedro hamriik hela iha liur, besik odamatan muru nian. Hau sai ba koalia ho feto ida nebee hein iha nebaa, para hau bele lori Pedro tama ba laran.

¹⁷ Feto nee husu ba Pedro, “Hei, o mos tuir Ema nee, ka?” Pedro hataan, “Lae!”

¹⁸ Tempu nebaa rai malirin. Nee mak ema seguransa sira ho atan sira hamriik haneruk hela ahi. Pedro mos baa haneruk ahi hamutuk ho sira.

Eis-Ulun boot relijiaun nian husu litik Nai Jesus

¹⁹ Iha tempu nee, eis-ulun boot relijiaun Judeu nian husu ba Jesus kona ba Nia hanorin, no kona ba Nia eskolante sira.

²⁰ Jesus hataan, “Hau koalia momoos para ema hotu bele rona. Hau sempre hanorin iha fatin nebee ita ema Judeu sira hodi halibur, mak ita nia uma kreda sira, no iha Uma Kreda Boot. Hau nunka koalia subar buat ida.

²¹ Tanba saa ita husu mai Hau? Husu deit ba ema sira nebee rona Hau nia hanorin. Sira hatene didiak saida mak Hau foo sai ona.”

²² Bainhira Jesus koalia nunee, ema seguransa ida nebee hamriik iha nebaa basa Nia, no dehan, “O la bele koalia nunee ba nain ulun boot!”

²³ Jesus foo hatene ba nia dehan, “Se Hau koalia sala ona, hatudu sala nee iha nebee. Maibee se Hau koalia nee loos, tanba saa mak o basa Hau?”

²⁴ Tuir mai, Anas haruka sira lori Nia ba Kaifas. Kaifas nee mak ulun boot relijiaun Judeu nian. Bainhira sira lori Jesus baa, sira futu nafatin Nia.

Pedro nega fali tan Jesus

²⁵ Tempu nee, Simão Pedro sei hamriik haneruk hela ahi. Ema sira seluk iha nebaa husu ba nia, “O nee, Nia eskolante ida, ka?” Pedro nega dehan, “Lae!”

²⁶ Iha nebaa mos iha ulun boot relijiaun Judeu nia atan ida. Nia sei maluk ho ema nebee Pedro tesi tiha nia tilun. Nia dehan, “Ohin hau haree o hamutuk ho Nia iha toos nebaa.”

²⁷ Maibee Pedro nega fali tan. Momentu nee, manu kokoreek kedas.

Ema lori Nai Jesus ba hatudu iha governador Pilatus

²⁸ Iha dadeer-saan nakukun sira lori Jesus hosi Kaifas nia uma ba governador nia palasiu iha tropas Roma sira nia kuartel prinsipal. Ema Judeu sira rasik la tama baa iha ema Roma sira nia kuartel, para sira la bele sai foer tuir sira nia kostumi relijiaun, tanba sira atu baa haan iha festa Paskua.

²⁹ Entaun governador Pilatus sai ba liur hasoru ho ema Judeu sira nee. Nia husu, “Imi foo sala saida ba Ema ida nee?”

³⁰ Sira hataan, “Senhor, se Nia laos ema aat ida, ami la lori nia mai iha nee. Saa tan entrega Nia ba ita nia liman.”

³¹ Governador dehan ba sira, “Nunee deit, imi mak tesi Nia lia baa, tuir ema Judeu nia lei.” Entaun ema Judeu nia boot sira foo hatene dehan, “La bele, senhor. Ami ema Judeu la iha direitu tan atu desidi kastigu mate. Nee so imi estadu Roma deit mak iha direitu nunee.”

³² (Bainhira sira koalia nunee, saida mak Jesus koalia uluk ona nee, sai nunee duni. Nia hatete tiha ona ba Nia ema sira dehan, Nia sei mate tuir estadu Roma nia maneira, sira hedi Nia iha ai krus.)

³³ Depois governador tama fila fali ba tropas sira nia fatin. I nia bolu Jesus hodi husu, “Oinsaa? O mak ema Judeu sira nia liurai, ka?”

³⁴ Jesus husu fali ba nia, “Senhor rasik mak hakarak husu nunee, ka iha ema ruma mak foo hatene ba ita kona ba Hau?”

³⁵ Governador hataan, “He! Hau laos ema Judeu! O nia ema rasik no mos nai lulik nia xefi sira mak entrega O mai hau. O halo saida? Hatete mai!”

³⁶ Jesus hataan, “Hau laos liurai ida iha mundu nee. Se Hau liurai iha mundu nee, Hau nia ema sira defende Hau para ema Judeu la kaer Hau. Loos, Hau Liurai duni. Maibee laos ema iha mundu nee mak foti Hau.”

³⁷ Governador husu fali, “Entaun, o Liurai, ka?” Jesus hataan, “Senhor rasik mak dehan Hau Liurai. Loloos nee, Hau moris para sai Liurai. Hau mai iha mundu nee para sai Liurai, hodi foo hatene kona ba buat nebee loos. Ema hotu nebee kaer metin lia loos, sira rona Hau.”

^38a Governador husu ba Nia dehan, “Lia loos nee, saida?”

Sira desidi foo kastigu mate ba Nai Jesus

^38b Bainhira governador Pilatus koalia tiha nunee, nia sai fila fali ba ema Judeu sira. Nia dehan, “Hau litik tiha Nia ona, maibee hau la hetan sala ida iha Nia.

³⁹ Maibee imi nia kostumi, tinan-tinan iha festa Paskua, hau tenki hasai ema dadur ida ba imi. Entaun tinan ida nee, imi hakarak hau hasai ema Judeu nia liurai, ka oinsaa?”

⁴⁰ Sira hotu hakilar dehan, “La bele hasai Ema nee! Hasai deit Barabas!” Tuir loloos, Barabas nee, ema ida ke aat teb-tebes.