João 16 - Biblia Tetun Dili

¹ Hau hatoo buat sira nee ba imi, para imi la sees hosi Hau.

² Ema Judeu sira sei duni sai imi hosi sira nia uma kreda. I laos nee deit, tempu sei too, bainhira ema oho imi, sira hanoin dehan sira halo diak ba Nai Maromak.

³ Sira halo nunee ba imi, tanba sira la konhese Hau, no mos la konhese Hau nia Aman.

⁴ Maibee Hau hatoo ona buat sira nee ba imi, para aban-bainrua, se buat sira nee mosu, imi hanoin ona dehan, Hau foo hatene tiha ona ba imi hori uluk. Hau seidauk foo hatene ba imi, tanba hau sei hamutuk ho imi.”

Maromak nia Espiritu nia serbisu

⁵ Jesus hanorin tan dehan, “Agora Hau fila ba Nia nebee haruka Hau mai iha mundu nee. Maibee la iha ema ida hosi imi mak husu mai Hau dehan, ‘Ita Boot atu baa nebee?’

⁶ Tanba Hau foo hatene ona buat nee ba imi, nee mak imi nia laran sai susar.

⁷ Maibee saida mak Hau hatete ba imi nee, loos. Se Hau baa, nee diak liu ba imi. Se Hau la baa, Tulun-Nain nee la mai hatudu dalan ba imi. Maibee se Hau baa, Hau sei haruka Nia mai iha imi.

⁸ Bainhira Tulun-Nain nee mai, Nia sei hatudu ba ema iha mundu nee dehan, sira nia laran ho sira nia hahalok nee, sala. Nia foo hanoin ba sira hodi tuir dalan nebee loos. Nia mos foo hanoin ba sira dehan, Maromak sei tesi sira nia lia dehan, sira nee sala, ka loos.

⁹ Tulun-Nain nee hatudu sira nia sala, tanba sira la fiar mai Hau.

¹⁰ Nia mos hatudu dalan ba moris nebee loloos. Tanba Hau fila ba Hau nia Aman, imi sei la haree tan Hau.

¹¹ Nia hatudu ona dehan, Maromak sei tesi ema nia lia ho loloos, tanba Maromak desidi ona diabu nebee ukun mundu nee para simu kastigu.

¹² Iha buat barak mak Hau atu hatoo ba imi, maibee agora imi seidauk bele komprende.

¹³ Maibee bainhira Espiritu nebee hatudu lia loos mai ona, Nia sei hanorin imi para bele komprende buat nebee loos. Nia la koalia hosi Nia aan rasik, maibee Nia foo hatene saida mak Nia rona hosi Hau nia Aman. Nia mos sei foo hatene ba imi, saida mak sei mosu iha aban-bainrua.

¹⁴ Nia sei foti aas Hau, tanba Nia sei hatudu ba imi buat hotu nebee loos kona ba Hau.

¹⁵ Buat hotu-hotu nebee Hau nia Aman ninian, Hau nian mos. Nee mak ohin Hau koalia dehan, Maromak nia Espiritu sei hatudu ba imi buat hotu nebee loos kona ba Hau.”

Agora imi tristi, tuir mai imi sei haksolok

¹⁶ Jesus foo hatene tan dehan, “La kleur tan, imi la haree ona Hau. Maibee la kleur mos, imi sei haree fila fali Hau.”

¹⁷ Depois Nia eskolante balu dehan ba malu, “Nia hakarak dehan saida kona ba ida nee, ‘La kleur tan, imi la haree ona Hau. Maibee la kleur mos, imi sei haree fila fali Hau.’ I tanba saa mak Nia koalia dehan, ‘Tanba Hau atu baa Hau nia Aman’?

¹⁸ I Nia hakarak dehan saida, ‘La kleur tan’? Ita la komprende.”

¹⁹ Jesus hatene ona sira atu husu buat ida ba Nia. Nia dehan, “Ohin Hau koalia dehan, ‘La kleur tan, imi la haree ona Hau. Maibee la kleur mos, imi sei haree fila fali Hau.’ Imi husu nunee, ka?

²⁰ Diak liu imi buka hatene. Hau hatete loloos ba imi nunee: imi sei tristi no tanis, maibee ema seluk iha mundu nee sira haksolok. Maski imi laran tristi nunee, maibee depois imi sei haksolok fali.

²¹ Nee hanesan feto isin rua ida nebee senti moras atu besik tuur ahi. Nia tristi tanba nia loron terus too ona. Maibee depois bebee moris tiha, feto nee kontenti teb-tebes, tanba ema ida foin moris iha mundu nee.

²² Nunee mos ho imi. Agora imi laran susar no tristi. Maibee la kleur Hau sei mai haree fali imi, nunee imi nia laran kontenti fali. I bainhira buat nee akontese ona, la iha ema ida mak bele impede imi nia laran haksolok nee.

²³ Se nee akontese ona, imi la husu ona buat ida mai Hau. Tebes duni, Hau hatete tan ba imi dehan, se imi husu saida deit ba Hau nia Aman, lori Hau nia naran, Nia sei foo ba imi.

²⁴ Too agora, imi seidauk husu buat ida, lori Hau nia naran. Husu deit baa, maka imi sei simu. Nunee, imi nia laran sei haksolok teb-tebes.”

Nai Jesus manaan hotu forsa mundu nian

²⁵ Jesus kontinua koalia dehan, “Hau baibain hanorin imi uza komparasaun. Maibee too iha tempu ida Hau hanorin sei la uza ona komparasaun. Tanba Hau sei koalia momoos kona ba Hau nia Aman.

²⁶ Bainhira tempu nee too ona, imi rasik halo orasaun, husu direta ba Hau nia Aman, lori Hau nia naran. Hau la presiza tan halo orasaun kona ba imi.

²⁷ Hau nia Aman hadomi imi, tanba imi hadomi Hau. I imi mos fiar dehan, Maromak mak haruka Hau mai.

²⁸ Uluk Hau husik hela Hau nia Aman, hodi mai hela iha mundu nee. Maibee agora Hau atu husik mundu nee, hodi baa hela fali ho Nia.”

²⁹ Rona nunee, Jesus nia eskolante sira foo hatene dehan, “Agora Ita Boot koalia momoos, no hanorin la uza tan komparasaun.

³⁰ Ami fiar ona Ita Boot hatene buat hotu-hotu. Ema la presiza husu saida-saida ba Ita Boot ona, tanba Ita Boot hatene uluk tiha ona saida mak sira atu husu, no nia resposta oinsaa. Nee hatudu mai ami katak, Ita Boot mai hosi Nai Maromak.”

³¹ Jesus husu ba sira, “Loos, ka? Agora imi fiar duni ba Hau, ka?

³² La kleur tan, imi hotu sei halai namkari. Imi ida-idak sei halai husik hela Hau, hodi baa subar iha ida-idak nia fatin rasik. Maski nunee, Hau la mesak, tanba Hau nia Aman hamutuk ho Hau.

³³ Hau foo hatene ona buat sira nee ba imi, para imi nia laran bele hakmatek, tanba imi metin ho Hau. Tan ema iha mundu nee sei halo susar no terus imi. Maibee imi laran metin baa, tanba Hau manaan tiha ona forsa mundu nian hotu.”