João 13 - Biblia Tetun Dili

Nai Jesus fasi Nia eskolante sira nia ain

¹ Molok loron boot Paskua hahuu, Jesus hatene ona katak, Nia tempu too ona atu Nia husik hela mundu nee, hodi fila fali ba Nia Aman iha lalehan. Maibee Nia hadomi teb-tebes Nia ema sira iha mundu nee, too Nia foo Nia moris tomak ba sira.

² Tempu nee, diabu tau lia ba Judas, Simão Eskariotes nia oan, para faan Jesus. Bainhira Jesus sira tuur haan festa Paskua, Judas desidi ona atu halo nunee.

³ Jesus hatene ona katak Nai Maromak mak haruka Nia mai iha mundu nee, i la kleur tan Nia tenki fila fali ba Maromak. Nia mos hatene ona katak Nia Aman iha lalehan foo buat hotu-hotu iha Nia liman.

⁴ Tuir mai, Nia hamriik hosi meza, hasai tiha Nia batina, depois Nia foti toalha ida, sikat iha Nia kanotak.

⁵ I Nia tau bee iha basia ida, no komesa fasi Nia eskolante sira nia ain. Fasi tiha hotu, Nia hamaran ho toalha nebee sikat iha Nia kanotak.

⁶ Nia fasi sira ida-idak nia ain. Bainhira too iha Simão Pedro, Pedro husu, “Senhor, Ita Boot mos hakarak fasi Hau nia ain, ka?”

⁷ Jesus hataan, “Agora o seidauk hatene kona ba saida mak Hau halo nee. Maibee iha ikus mai o sei komprende.”

⁸ Maibee Pedro dehan, “Senhor, la bele nunee! Hau la husik Senhor fasi hau nia ain.” Jesus hataan, “Se Hau la fasi o nia ain, o laos Hau nia ema.”

⁹ Entaun Simão Pedro hataan, “Se nunee, Ita Boot la bele fasi deit hau nia ain, maibee fasi mos hau nia liman no ulun.”

¹⁰ Jesus foo hatene ba nia dehan, “Ema nebee hariis ona, presiza fasi deit mak nia ain. Tanba nia isin lolon, moos ona. Loos duni, imi nia laran moos ona, maibee laos imi hotu moos.”

¹¹ (Jesus koalia nunee, tanba Nia hatene ona see mak atu faan Nia. Nee mak Nia foo hatene dehan, “Laos imi hotu moos.”)

¹² Bainhira Jesus fasi hotu ona sira nia ain, Nia hatais fali Nia batina, hodi baa tuur fali iha meza. Nia husu ba sira, “Oinsaa? Bainhira Hau fasi imi nia ain, imi komprende saida mak Hau halo, ka lae?

¹³ Imi gosta bolu Hau dehan, ‘Mestri’ i ‘Nai’ nebee iha direitu manda imi. Nee loos, tanba Hau mak hanesan nee duni.

¹⁴ Maibee se imi nia Mestri i Nai nee, fasi ona imi nia ain hanesan atan ida, oinsaa ho imi? Imi mos tenki serbii malu i tenki fasi ain ba malu.

¹⁵ Hau hatudu ona ezemplu ba imi, para imi mos tenki halo tuir nunee.

¹⁶ Hau nia koalia nee loos. Atan ida la boot liu nia patraun. I ema nebee haruka ema ida baa, nia boot liu ida nebee baa.

¹⁷ Tanba imi hatene ona buat sira nee, imi hetan sorti boot se imi halo tuir nunee.

¹⁸ Hau la koalia kona ba imi hotu. Hau konhese diak ema sira nebee Hau hili ona. Maibee ida nee tenki akontese, tuir hakerek ona iha Eskritura Sagrada dehan, ‘Ema nebee tuur haan hamutuk ho hau, fila kotuk no kontra hau.’

¹⁹ Hau hatete kedas ba imi, se bainhira ema lao husik hela Hau nunee, imi bele fiar katak Hau mak Kristu.

²⁰ Hau nia koalia nee loos. See mak simu ho diak ema nebee Hau haruka baa nee, nia mos simu Hau. I see mak simu diak Hau, nia mos simu Ida nebee haruka Hau mai.”

Nai Jesus foo hatene katak iha ema ida sei faan Nia

²¹ Jesus koalia tiha nunee, Nia laran susar teb-tebes. I Nia foo hatene dehan, “Ida nebee Hau hatete nee, loos. Ema ida hosi imi mak sei faan Hau.”

²² Rona nunee, Nia eskolante sira haree ba malu, sai bilan tiha. Sira la hatene Nia koalia ba see.

²³ Iha nebaa mos iha eskolante ida hosi sira nebee Jesus hadomi (mak hau, João, nebee hakerek livru nee). Hau tuur iha Jesus nia sorin.

²⁴ Simão Pedro foo sinal, para hau husu ba Jesus, Nia koalia nee ba see loos.

²⁵ I hau hakbesik aan ba Jesus, hodi husu, “Ema nebee Ita Boot dehan nee, mak see?”

²⁶ Jesus hataan, “Hanesan nee, Hau foti paun rohan ida habokon iha manko laran i foo ba ema nebee hau koalia ona nee.” Nia habokon paun nee i Nia foo ba Judas, Simão Eskariotes nia oan.

²⁷ Simu tiha paun nee, diabu tama kedas iha Judas nia laran. I Jesus hatete ba nia, “Lalais! O hakarak halo saida, halo ona baa.”

²⁸ Maibee sira hotu nebee tuur iha meza la komprende tanba saa mak Jesus koalia nunee.

²⁹ Judas nee mak sira nia tezoreiru. Entaun, balu hanoin katak Jesus nia koalia ohin nee haruka Judas, “Baa sosa hahaan ruma ba ita haan iha festa Paskua.” Iha balu mos hanoin dehan, “Baa foo osan ituan ba ema kiak sira.”

³⁰ Bainhira Judas simu tiha paun nee, nia sai kedas, i rai mos kalan ona.

Ukun-fuan foun

³¹ Bainhira Judas sai tiha ona, Jesus hatete, “Hau Ema Oan. Agora tempu too ona atu Nai Maromak foti aas Hau. I liu hosi Hau, ema sei haree mos Nai Maromak nia naronam-nabilan.

³² Tanba Hau laran ida ho Maromak i hatudu Nia naroman-nabilan, nee mak Nia foti aas Hau. I Nia halo agora kedas.

³³ Hau nia oan sira! Maski Hau hadomi teb-tebes imi, maibee la kleur tan Hau la hamutuk ona ho imi. Imi sei buka Hau, maibee la hetan. Hau foo hatene ba imi sira nee, hanesan saida mak Hau foo hatene ona ba ema Judeu nia boot sira dehan, ‘Hau baa iha fatin nebee imi la bele tuir.’

³⁴ Hau foo ukun-fuan foun ida ba imi, mak nee: imi tenki hadomi malu, hanesan Hau hadomi imi. Nunee imi mos tenki hadomi malu.

³⁵ Se imi hadomi malu nunee, ema hotu bele hatene, imi Hau nia eskolante.”

Nai Jesus foo hatene katak Pedro sei nega Nia

³⁶ Liu tiha nee, Simão Pedro husu ba Jesus, “Senhor, Ita Boot atu baa nebee?” Jesus hatete ba nia dehan, “Hau baa fatin ida nebee o seidauk bele baa agora. Maibee iha ikus mai o sei baa mos iha nebaa.”

³⁷ Pedro husu tan, “Senhor! Tanba saa hau seidauk bele baa ho Ita Boot agora? Hau prontu mate ba Ita Boot!”

³⁸ Jesus hataan dehan, “Tebes, ka? O prontu entrega o nia aan ba Hau too mate, ka? Rona mai! Molok manu kokoreek, o nega ona Hau dala tolu.”