João 10 - Biblia Tetun Dili

Komparasaun kona ba bibi atan ho nia bibi malae

¹ Jesus halo komparasaun ida dehan, “Rona mai. Saida mak Hau atu hatete ba imi nee, loos. Bibi malae iha nia luhan. Se ema nebee la tama liu hosi odamatan, maibee sae liu hosi lutu, nia nee, ema naok-teen.

² Maibee ema nebee tama liu hosi odamatan, nee mak bibi atan nebee tau matan ba bibi sira.

³ Ema nebee hein iha odamatan konhese nia, i loke odamatan ba nia. I bibi malae sira mos konhese bibi atan nia lian. Se nia bolu sira ida-idak nia naran, sira tuir nia ba liur.

⁴ Bainhira nia lori sira ba liur, nia lao uluk, bibi malae sira tuir nia hosi kotuk, tanba sira hatene nia lian.

⁵ Ema nebee bibi sira la hatene, sira la tuir nia, maibee bibi sira halai lakon, tanba sira la konhese ema nee nia lian.”

⁶ Jesus halo komparasaun nee ba sira, maibee sira la komprende Nia hakarak.

Nai Jesus hanesan bibi atan diak

⁷ Jesus kontinua foo sai ba sira dehan, “Hau koalia nee, loos. Hau hanesan odamatan ba bibi malae sira nia luhan.

⁸ Ema hotu nebee mai uluk Hau, sira hanesan ema naok-teen. Maski sira bolu bebeik, maibee bibi sira lakohi rona.

⁹ Hau hanesan odamatan. Ema nebee tama liu hosi Hau, Nai Maromak salva nia hosi nia sala sira. Nee hanesan bibi malae nebee tama-sai hodi haan-hemu.

¹⁰ Naok-teen sira so halo rungu-ranga deit, tan sira mai para naok, oho, no harahun ema nia moris. Maibee Hau lori moris loloos nebee diak liu, tan Hau mai para ema bele moris hakmatek, no nakonu too resin.

¹¹ Hau hanesan bibi atan diak. Tanba bibi atan diak prontu foo nia aan too mate, para nia bibi sira bele hetan moris.

¹² Maibee ema nebee laos bibi atan duni, bainhira nia haree asu fuik siak ida mai, nia halai lakon no husik hela bibi sira iha nebaa. Asu fuik siak tata bibi ida no bibi sira seluk halai namkari.

¹³ Ema nebee laos bibi atan halai, tanba nia serbisu hodi buka osan deit. Nia la foo aan hodi hein didiak bibi sira.

¹⁴ Hau mak bibi atan diak. Hau konhese Hau nia bibi sira, no sira mos konhese Hau.

¹⁵ Hanesan Aman iha lalehan konhese Hau, i Hau mos konhese Nia. Hau entrega Hau nia aan too mate, para Hau nia bibi sira bele hetan moris.

¹⁶ Hau iha bibi seluk nebee seidauk tama hamutuk ho Hau nia bibi sira iha nee. Hau tenki baa halibur sira mos. Bainhira sira rona Hau nia lian, sira konhese kedas. Depois sira mai hamutuk hodi sai bibi lubun boot ida ho nia bibi atan ida.

¹⁷ Tanba nee, mak Hau nia Aman iha lalehan hadomi Hau. Tanba Hau foo Hau nia aan too mate, para Hau bele moris fila fali.

¹⁸ La iha ema ida obriga Hau atu foo Hau nia moris, maibee Hau rasik mak foo Hau nia aan too mate. Hau iha direitu hodi foo Hau nia aan. Hau mos iha direitu hodi foti fila fali. Orden nee, Hau simu hosi Hau nia Aman iha lalehan.”

¹⁹ Tanba sira rona Jesus koalia nunee, ema Judeu sira haksesuk malu fali tan.

²⁰ Ema barak hosi sira dehan, “Ema ida nee bulak. Espiritu aat tama iha Nia. Nusaa mak imi hakarak rona Nia?”

²¹ Maibee ema balu dehan, “Nee laos ema bulak mak koalia. Liafuan sira hanesan nee, nunka sai hosi espiritu aat nia ibun. Espiritu aat sira bele halo ema matan delek haree, ka?”

Ema Judeu nia boot sira la simu Jesus

²² Iha tempu nee, ema Judeu selebra sira nia relijiaun nia loron boot. Loron boot nee monu iha tempu rai malirin. Festa nee hodi hanoin fila fali bainhira ema Judeu sira hamoos Maromak nia Uma Kreda Boot iha sidade Jerusalem hodi inagura fali, tanba ema seluk halo foer ona.

²³ Jesus lao baa-mai iha Uma Kreda Boot nia area, iha fatin nebee sira temi dehan, ‘Varanda Salomão nian’.

²⁴ Entaun ema Judeu nia boot sira mai hamriik hadulas Nia hodi husu, “Ami tenki hein too bainhira, foin ami bele hatene loloos? Se Ita Boot nee mak Kristu, koalia loloos deit.”

²⁵ Jesus hataan, “Hau foo hatene tiha ona, maibee imi la fiar. Afinal serbisu sira nebee Hau halo, hotu-hotu tuir Hau nia Aman nia orden. Serbisu sira nebee Hau halo nee mak hatudu, see mak Hau.

²⁶ Maibee imi la fiar Hau, tanba imi laos Hau nia bibi.

²⁷ Hau nia bibi loloos, rona no konhese Hau nia lian. Sira mos tuir Hau, i Hau mos konhese sira.

²⁸ Hau foo moris rohan laek ba sira, no Maromak la soe lakon sira. La iha ema ida bele hadau sira hosi Hau nia liman.

²⁹ Hau nia Aman iha lalehan mak foo sira ba Hau. Nia kbiit makaas liu hotu-hotu. Nee mak la iha ema ida bele hadau sira hosi Nia liman.

³⁰ Hau ho Hau nia Aman, Ami ida deit.”

³¹ Rona nunee, ema Judeu nia boot sira foti fatuk dala ida tan atu tuda mate Jesus.

³² Jesus dehan ba sira, “Hau hatudu ona buat diak barak hosi Hau nia Aman. I hosi buat diak sira nee, ida nebee mak halo imi hakarak tuda Hau ho fatuk?”

³³ Sira hataan, “Ami atu tuda O ho fatuk, laos tanba O halo buat diak sira nee, maibee tanba O hatete aat Maromak. O ema baibain deit, maibee O foti O nia aan hanesan ho Nai Maromak. Nee demais liu ona!”

³⁴ Jesus hataan, “Oinsaa? Iha imi nia Lei Relijiaun hakerek dehan, ‘Hau foo hatene kedas dehan, imi ema boot sira nee, mak maromak’.

³⁵ Ami hatene ona dehan, buat hotu nebee hakerek iha Maromak nia Eskritura Sagrada nee, loos, la bele hasai ba soe. Maromak rasik temi ema sira nee, dehan, sira nee, ‘mak maromak’.

³⁶ Entaun oinsaa mak imi dehan fali Hau hatete aat Maromak, tanba deit Hau dehan Hau nee, Maromak nia Oan? Nee la tama iha kakutak. Tan Aman iha lalehan mak hili Hau, no haruka Hau mai iha mundu nee.

³⁷ Se Hau la halao Hau nia Aman iha lalehan nia serbisu, imi lalika fiar Hau.

³⁸ Maibee Hau halao Nia serbisu nafatin. Entaun maski imi la fiar Hau, maibee pelu-menus, imi fiar ba milagre sira nebee Hau halo. Nunee, imi bele komprende katak, Hau nia Aman hamutuk ho Hau, i Hau hamutuk ho Nia.”

³⁹ Sira koko fali atu kaer Nia, maibee la iha ema ida mak liman kona Nia.

⁴⁰ Jesus fila fali baa iha mota Jordaun nia sorin baa, iha fatin nebee uluk João sarani ema. I Nia hela lalais iha nebaa.

⁴¹ Ema barak mai buka Nia. Sira koalia ba malu dehan, “João nunka halo milagre ida. Maibee buat hotu nebee nia koalia kona ba Jesus nee, loos.”

⁴² Ema barak fiar ba Jesus iha fatin nebaa.