João 1 - Biblia Tetun Dili

Jesus mak Nai Maromak nia Liafuan

¹ Hahuu fofoun, Nai Maromak nia Liafuan iha tiha ona. Liafuan nee hamutuk ho Nai Maromak. I Liafuan nee mak Nai Maromak. [Liafuan nee, Ema ida.]

² Molok lalehan ho rai iha, Nia iha kedas ona ho Nai Maromak.

³ Maromak halo buat hotu-hotu liu hosi Nia. La iha buat ida iha, se Nia la halo.

⁴ Nia mak moris nia huun. Nunee, ema nebee hetan moris loloos, sira moris hosi Nia. Nia mos hanesan naroman nebee nabilan, para ema nebee moris iha naroman nee, bele haree no komprende.

⁵ Naroman nee, leno borus ba nakukun; Too nakukun la bele satan netik naroman nee. Tanba naroman nee nabilan nafatin.

⁶ Iha tan ema ida, naran João. Nai Maromak mos haruka nia mai,

⁷ hodi sai sasin ba ema kona ba Naroman nee. Para ema hotu bele fiar ba Maromak, liu hosi João nia lia menon.

⁸ João laos Naroman nee. Maibee Maromak haruka nia para hatoo ba ema kona ba Naroman nee.

⁹ Tan Ema nee mak Naroman loloos, nebee mai iha mundu nee. Naroman nee hatudu momoos buat nebee loos ba ema hotu.

¹⁰ Maski Nia halo ona buat hotu iha mundu nee, maibee ema iha mundu la konhese Nia, bainhira Nia mai iha mundu nee.

¹¹ Maski Nia mai ba Nia ema rasik, maibee sira la simu Nia.

¹² Maibee ema sira nebee simu no fiar ba Nia, Nia foo direitu ba sira para sai Nai Maromak nia oan.

¹³ Nee hanesan ho sira hetan moris foun. Maibee sira nia moris foun nee, laos hanesan ema partus oan. I laos hanesan mane ida nebee hakarak hetan jerasaun. Sira sai Maromak nia oan, tanba Maromak mak foo ba sira moris foun nee.

¹⁴ I ‘Maromak nia Liafuan’ nee, sai tiha ema. Nia moris iha ita nia leet. Ita haree Nia naroman-nabilan. Nia iha naroman-nabilan nunee, tanba Nia mak Nai Maromak nia Oan mane mesak. Nia hakarak hatudu Nia laran diak no grasa mai ita, tanba Nia hahalok nunee duni. I buat hotu nebee Nia hatoo kona ba Nai Maromak, loos duni.

¹⁵ João foo sai kona ba Ema nee. João koalia ho lian makaas dehan, “Hotu-hotu, rona mai! Nia nee mak ida nebee hau hatete tiha ona dehan, ‘La kleur Ema ida atu mai. Nia nee, boot liu hau. Tanba molok hau moris, Nia iha tiha ona!’ ”

¹⁶ João koalia nunee, tanba Ema nee hakarak teb-tebes hatudu Nia grasa bebeik mai ita hotu.

¹⁷ Hori uluk liu, Moisés mak foo Maromak nia lei ba ita nia bei-ala sira. Maibee agora Ema ida nee hatudu Maromak nia grasa no lia loos mai ita hotu, Nia mak Jesus Kristu.

¹⁸ La iha ema ida mak bele haree Nai Maromak. Maibee Nia Oan mane mesak, nebee Nia hadomi, mak hatudu Nia laran mai ita. Oan nee, iha Aman nia sorin. Tan Nia mos, Nai Maromak.

João Sarani Nain foo sasin kona ba Nai Jesus

¹⁹ Iha loron ida, ema Judeu nia boot sira iha Jerusalem haruka nai lulik balu, ho ema balu hosi suku Levi, nebee baibain serbii iha Nai Maromak nia Uma Kreda Boot, baa iha mota Jordaun nia sorin baa. Sira baa hodi husu ba João Sarani Nain dehan, “O mak Kristu, nebee Maromak promete ona atu haruka mai, ka?” ''

²⁰ João foo sai loloos ba sira dehan, “Lae! Hau laos Kristu.”

²¹ I sira husu tan dehan, “Se nunee, see mak o? Profeta Elias, ka?” Nia hataan dehan, “Nee mos lae!” I sira husu tan, “Keta halo be o nee, Maromak nia profeta ida tan?” Nia hataan dehan, “Nee mos lae.”

²² Depois sira husu tan dehan, “Se nunee, o nee see? Favor ida, foo hatene lai! Tanba ami tenki fila baa foo hatene ba lider sira nebee haruka ami mai nee.”

²³ João foo sai tuir saida mak profeta Isaias hakerek ona dehan, “Hau nee, ema ida nebee koalia makaas iha rai fuik maran dehan, ‘Ema hotu-hotu hadia dalan, hodi simu Nai atu mai! Halo dalan kabeer hodi simu Nia mai.’ ”

²⁴ Ema sira nebee mai hosi Jerusalém nee, iha mos ema balu hosi grupu relijiaun Farizeu.

²⁵ I sira husu ba João dehan, “Entaun, se o laos Kristu, laos Elias, i laos Maromak nia profeta ida tan, tanba saa o sarani ema? O hetan direitu hosi nebee?”

²⁶ João hataan, “Hau sarani ema ho bee deit. Maibee iha ona Ema ida iha imi nia leet nebee imi la konhese.

²⁷ Nia boot liu hau. Maski hau mak hanorin uluk, maibee atu kore deit nia sandalias talin mos, hau la serve.”

²⁸ Buat sira nee akontese iha Betania, iha mota Jordaun nia sorin baa. João ho nia eskolante sira sarani ema iha nebaa.

Nai Jesus hanesan Nai Maromak nia Bibi Malae Oan

²⁹ Iha aban fali, João haree Jesus lao mai hasoru nia. João hatete dehan, “Haree ba Ema ida nebaa! Nia, Nai Maromak nia Bibi Malae Oan nebee sai sakrifisiu hodi hamoos ema iha mundu nee nia sala.

³⁰ Ema ida nee, mak hau hatoo ona ba imi dehan, ‘La kleur Ema ida sei mosu mai. Nia boot liu hau, tanba Nia iha uluk hau.’

³¹ Uluk hau la hatene katak Nia mak Kristu. Maski nunee, hau hatene ona hau tenki foo hatene kona ba Nia ba ema Israel. Tanba nee, hau mai sarani ema ho bee.

^32-33 Nai Maromak haruka hau sarani ema ho bee. Nia mos hatete mai hau dehan, ‘La kleur Ema ida sei baa hamutuk ho o. Hau nia Espiritu tuun baa hela iha Nia. Ema nee mak sei sarani imi ho Espiritu Santu, hodi foo kbiit ba Hau nia ema sira.’ Bainhira Ema nee mai, hau seidauk konhese loloos Nia. Maibee bainhira hau haree Maromak nia Espiritu Santu tuun hosi lalehan hanesan manu pombu ida nebee tuun mai iha Nia, foin mak hau hatene Nia hodi dehan, ‘Nia mak Ema nee!’

³⁴ Hau haree buat sira nee ho hau nia matan rasik. Nunee, hau foo hatene ba imi dehan, ‘Ema ida mai nee, Nia mak Nai Maromak nia Oan!’ ”

Nai Jesus hili primeiru Nia eskolante nain rua

³⁵ Iha loron tuir mai, João hamriik hela ho nia eskolante nain rua.

³⁶ Bainhira João haree Jesus liu hosi nebaa, nia foo hatene dehan, “Haree baa! Nia nee Nai Maromak nia Bibi Malae Oan nebee sei sai sakrifisiu!”

³⁷ João nia eskolante nain rua nee rona nia koalia nunee, i sira nain rua husik tiha nia, hodi baa tuir Jesus.

³⁸ Bainhira Jesus haree ba kotuk Nia haree sira tuir Nia. Depois Nia husu ba sira dehan, “Oinsaa? Presiza saida?” Sira husu fila fali ba Nia dehan, “Rabi hela iha nebee?” (Ho sira nia lian Aram, ‘Rabi’ nia signifikadu dehan, ‘Mestri’.)

³⁹ Jesus hataan dehan, “Mai haree rasik baa.” I sira tuir Nia baa haree Nia hela fatin. Bainhira sira too, mais-ou-menus tuku haat lokraik, sira hela ho Nia too loro matan monu.

⁴⁰ Nain rua nebee rona João nia koalia no tuir Jesus nee, ida naran Andre, Simão Pedro nia alin.

⁴¹ Fila ho fila Andre baa buka kedas nia maun Simão hodi dehan, “Maun! Ami hasoru ona Mesias!” (Ho sira nia lian, ‘Mesias’ nia signifikadu dehan, ‘Kristu, Ema nebee Maromak promete ona hori uluk atu haruka mai.’)

⁴² I nia lori nia maun ba Jesus. Bainhira Jesus haree Simão, Nia foo hatene dehan, “O mak Simão. O nia aman mak João. Komesa agora ema bolu o ‘Kefas’ ” (Nia signifikadu hanesan ho ‘Pedro’, nee dehan ‘fatuk’.)

Nai Jesus bolu Filipe ho Natanael

^43-44 Iha nebaa iha mos ema seluk ida, naran Filipe. Nia hosi aldeia Betsaida. Pedro ho Andre mos mai hosi nebaa. Iha aban fali, Jesus desidi atu baa provinsia Galileia. I Nia baa hasoru mos ho Filipe, i Nia bolu dehan, “Mai tuir Hau para sai Hau nia eskolante.”

⁴⁵ Depois Filipe baa buka Natanael, hodi hatete dehan, “Ami hasoru ona Ema nebee Maromak hatudu ba Moisés iha nia eskritura. Maromak nia profeta sira iha tempu uluk mos hakerek ona kona ba Ema nee. Nia naran Jesus, hosi aldeia Nazaré. Nia aman naran José.”

⁴⁶ Maibee Natanael hataan, “Ema hosi Nazaré? La iha buat diak ida mak mai hosi Nazaré!” Filipe dehan, “Keta dehan nunee. Mai haree rasik ba!”

⁴⁷ Bainhira Natanael lao mai, Jesus haree nia, i dehan kedas, “Nia nee ema laran moos! Iha nia laran, la iha bosok. Nia, ema Israel isin!”

⁴⁸ Natanael husu, “Oinsaa Ita Boot hatene hau?” Jesus hataan, “Hau haree tiha ona o bainhira o iha hela ai huun figeira nebaa nia okos. Tempu nebaa, Filipe seidauk baa bolu o.”

⁴⁹ Natanael rekonhese dehan, “Mestri, Ita Boot Nai Maromak nia Oan! Ita Boot mos ema Israel nia Liurai!”

⁵⁰ Jesus husu ba nia dehan, “Tanba Hau foin dehan, ‘Hau haree tiha ona o, bainhira o iha hela ai huun figeira nebaa nia okos,’ nee mak o fiar ka? Rona mai! O sei haree buat nebee boot liu tan.

⁵¹ Tebes duni! Hau foo hatene kedas. Imi sei haree lalehan nakloke, i Maromak nia anju iha lalehan tuun-sae iha Hau nia sorin. Hau nee, Ema Oan.”