Jenesis 9 - Biblia Tetun Dili

Nai Maromak halo aliansa ho Noé

¹ Nai Maromak foo bensaun ba Noé ho ba nia oan sira, hodi hatete, “Imi tenki iha oan barak baa, hodi halo nakonu mundu.

² I animal fuik, manu ho ikan sira sei tauk ba imi. Imi mak tenki domina sira.

³ Imi bele haan animal sira nee hotu nia naan, hanesan imi haan ai haan hosi toos. Buat hirak nee hotu Hau foo ba imi.

⁴ Maibee imi la bele haan naan nebee raan sei iha, tanba animal nia moris iha nia raan.

^5-6 Hau halo ema tuir Hau nia imajen. Tanba nee, keta oho ema. Se iha ema ka animal mak halo mate ema, nia tenki mate.

⁷ Imi iha oan halo barak baa, hodi halo nakonu mundu nee.”

⁸ Nai Maromak hatutan tan Nia liafuan dehan,

⁹ “Agora Hau halo Hau nia aliansa ho imi, ho mos imi nia jerasaun sira.

¹⁰ Aliansa nee kona mos ba buat hotu nebee mak moris, hanesan animal hakiak, animal fuik, ho manu fuik sira, buat hotu nebee sai hamutuk ho imi hosi roo nee.

¹¹ Hau nia aliansa nunee: Hau sei la halo tan rai nabeen, para hamate buat hotu nebee iha moris, i harahun buat hotu iha mundu.

^12-13 Hau tau arkuiris iha loro leten hanesan sinal hodi foo hanoin mai Hau, kona ba Hau nia aliansa nebee nunka kotu ho imi ho buat hotu nebee moris iha mundu.

¹⁴ Bainhira Hau halo kalohan taka rai, i arkuiris mosu iha kalohan nee,

¹⁵ entaun Hau sei hanoin Hau nia aliansa ba imi ho ba animal hotu-hotu katak, bee boot sei la harahun tan buat hotu-hotu nebee iha vida.

^16-17 Bainhira arkuiris mosu iha kalohan, Hau sei haree, i sei hanoin Hau nia aliansa ba buat hotu-hotu nebee iha vida. Aliansa nee sei la kotu. Nee mak sinal nebee hatudu Hau nia aliansa nee.”

Noé foo malisan ba nia oan Kam

¹⁸ Noé nia oan sira nebee sai hosi roo, mak nee: Sem, Jafé no Kam. (Kam nee Kanaán nia aman.)

¹⁹ Ema hotu-hotu iha mundu nia jerasaun mai hosi Noé nia oan nain tolu nee.

²⁰ Noé nee ema toos nain. Nia mak hahuu fofoun kuda uvas.

²¹ Iha loron ida, nia hemu tua uvas too lanu todan. Nia hasai tiha nia hena hodi toba molik deit iha nia tenda laran.

²² Bainhira Kam haree nia aman isin molik, nia halai sai ba liur, konta ba nia maun Sem ho Jafé.

²³ Depois sira nain rua foti manta ida, kahe iha sira nia kabaas, i hakiduk tama ba tenda laran, hodi taka sira nia aman nia isin molik. Sira hateke ba sorin para la bele haree nia molik. Depois sira sai ba liur.

²⁴ Bainhira Noé nia oin komesa moos ona, nia hatene saida mak nia oan ikun halo ba nia.

²⁵ Entaun nia hatete, “Kanaán! Hau foo malisan ba o! O sei sai atan ba o nia maun sira.

²⁶ Hahii ba NAI, Sem nia Maromak! Kanaán nia aman sei sai Sem nia atan.

²⁷ Nai Maromak sei amenta Jafé nia rain halo luan; i nia jerasaun moris dame ho Sem nia jerasaun. Maibee Kanaán nia aman sei sai Jafé nia atan.”

²⁸ Komesa hosi bee boot nee hotu, Noé sei moris tan tinan 350.

²⁹ Nia mate ho tinan 950.